“Ũndũ ũrĩa wothe mũrĩhoyaga Awa, nĩ arĩmũhingagĩria na rĩĩtwa rĩakwa.”​—Johana 16:23.

Ciugo icio ironania wega atĩ Jehova endaga tũmũhoe kũgerera harĩ rĩĩtwa rĩa Jesu Kristo no ti kũgerera harĩ atheru, araika, andũ aitũ arĩa makuĩte, kana kĩndũ kĩngĩ. Hĩndĩ ĩrĩa twahoya Ngai kũgerera harĩ rĩĩtwa rĩa Jesu, nĩ tuonanagia atĩ nĩ tũrataũkĩrũo nĩ ũndũ wa bata ũrĩa Jesu atwĩkĩire. Jesu ooigire: “Gũtirĩ mũndũ ũũkaga kũrĩ Awa atagereire harĩ niĩ.”​—Johana 14:6.

“Mũitũrũragĩrei ngoro cianyu.”​—Thaburi 62:8.

Rĩrĩa tũrahoya Jehova, twagĩrĩirũo kwaria nake o ta ũrĩa tũngĩaria na mũciari ũtwendete. Handũ ha gũthoma ibuku kana gũcokacokera maũndũ o marĩa marĩa tũkĩmũhoya, twagĩrĩirũo kwaria nake na njĩra ya gĩtĩo na kuuma ngoro.

“Tũngĩhoya ũndũ o na ũrĩkũ kũringana na wendi wake, nĩ atũiguaga.”​—1 Johana 5:14.

Thĩinĩ wa Bibilia, Jehova Ngai nĩ atwĩrĩte maũndũ marĩa agaatwĩkĩra, na marĩa endaga twĩke. Nĩguo mahoya maitũ metĩkĩrĩke nĩ Ngai, twagĩrĩirũo kũhoya “kũringana na wendi wake.” Nĩgetha tũhote gwĩka ũguo, nĩ tũrabatara kwĩruta Bibilia nĩguo tũmũmenye wega. Tũngĩka ũguo, nĩ arĩkenaga gũthikĩrĩria mahoya maitũ.

Mũhoe Akũhe Mabataro Maku. No tũhoe Ngai atũhe mabataro maitũ ma o mũthenya, nĩmo irio, nguo, na handũ ha gũikara. Ningĩ no tũmũhoe atũhe ũũgĩ nĩguo tũtue matua mega na atũhe hinya nĩguo tũhote gũkirĩrĩria magerio. No tũmũhoe atũhe wĩtĩkio, atuohere mehia maitũ, na atũteithie.​—Luka 11:3, 4, 13; Jakubu 1:5, 17.

Hoyagĩra Andũ Arĩa Angĩ. Aciari arĩa mendete ciana ciao, nĩ makenaga rĩrĩa mona atĩ ciana ciao nĩ ciendanĩte. O na Jehova nĩ endaga ciana ciake cia gũkũ thĩ ikorũo ikĩrũmbũyania. Kwoguo nĩ ũndũ mwagĩrĩru kũhoera mũndũ ũrĩa mũhikanĩtie nake, andũ anyu a famĩlĩ, ciana ciaku, na arata aku. Mũtũmwo Jakubu aandĩkire ũũ: “Mũhoyanagĩre.”​—Jakubu 5:16.

Cokagia Ngatho. Bibilia ĩkĩaria ũhoro wĩgiĩ Mũũmbi witũ yugaga: “Nĩ eekaga maũndũ mega, akamũhe mbura kuuma igũrũ na imera irĩ na maciaro, akamũhũnia na irio na akaiyũria ngoro cianyu gĩkeno.” (Atũmwo 14:17) Rĩrĩa tweciria ũhoro wa maũndũ mothe marĩa Ngai atwĩkĩire, nĩ tũiguaga tũkĩenda kũmũcokeria ngatho. Ningĩ, nĩ twagĩrĩirũo kuonia Ngai ngatho citũ na njĩra ya kũmwathĩkĩra.​—Akolosai 3:15.

Rĩmwe na rĩmwe no tũigue tũkuĩte ngoro twaga kuona macokio ma na ihenya ma mahoya maitũ ma kuuma ngoro. Hihi ũguo nĩ kuonania atĩ Ngai ndaratũrũmbũiya? Aca. Reke tuone cionereria ironania atĩ rĩmwe no tũbatare gũthiĩ na mbere kũhoya.

Steve, ũrĩa ũgwetetwo gĩcunjĩ-inĩ kĩa mbere ooigire ũũ: “Nĩ ingĩakuire ngoro tene tiga ndaathiire na mbere kũhoya.” Nĩ kĩĩ kĩamũteithirie? Nĩ aambĩrĩirie kwĩruta Bibilia na akĩĩruta bata wa kũhoya na gũthiĩ na mbere gwĩka ũguo ategũkua ngoro. Ooigire ũũ: “Nĩ hoyaga Ngai ngamũcokeria ngatho nĩ ũndũ wa ũteithio ũrĩa wothe heagwo nĩ arata akwa. Rĩu ngoragwo na gĩkeno itarĩ ndakorũo nakĩo mbere ĩyo.”

Ĩ ũhoro wĩgiĩ Jenny, ũrĩa weiguaga atarĩ kĩene na akona Ngai ta atangĩmũthikĩrĩria? Ooigire ũũ: “Hĩndĩ ĩyo ndaiguaga nguĩte ngoro mũno nĩ ndathaithire Ngai andeithie gũtaũkĩrũo nĩ kĩĩ gĩatũmaga ndĩigue itarĩ kĩene.” Ũndũ ũcio wamũteithirie atĩa? Ooigire, “Kwaria na Ngai nĩ kũndeithĩtie kuona maũndũ na njĩra ĩrĩa yagĩrĩire ngamenya atĩ o na ngoro yakwa ĩngĩikara ĩkĩnjirithagia, Ngai nĩ aanjoheire. Ningĩ nĩ kũndeithĩtie kwaga gũkua ngoro. Mahoya nĩ mandeithĩtie kuona Jehova arĩ Ithe witũ ũrĩ wendo na mũrata wĩhaarĩirie hingo ciothe gũkoragwo hamwe na niĩ na kũndeithia angĩkorũo nĩ ngũthiĩ na mbere kwĩrutanĩria gwĩka ũrĩa endaga.”

Ningĩ ta wĩcirie ũhoro wa Isabel. Rĩrĩa aagĩire na nda, mandagĩtarĩ nĩ maamwĩrire atĩ angĩagĩire mwana ũrĩ na wathe mũnene wa mwĩrĩ. Ũndũ ũcio nĩ wamũragire ngoro mũno. Andũ amwe o na maamwĩraga arute nda ĩyo. Ooigire ũũ: “Mĩtangĩko ĩyo yothe yatũmaga njigue ta ngũkua.” Hihi eekire atĩa? Ooigire ũũ: “Ndaahoire Ngai maita maingĩ mũno ngĩmwĩra andeithie.” Thutha wa ihinda nĩ aagĩire kaana ga kahĩĩ getagwo Gerard na kaarĩ na wathe wa mwĩrĩ. Hihi Isabel nĩ onaga ta Ngai aacokirie mahoya make? Ĩĩ nĩ onaga ũguo. Na njĩra ĩrĩkũ? Isabel ooigire ũũ: “Mũrũ wakwa rĩu arĩ na mĩaka 14, na rĩrĩa ndona agĩkenera ũtũũro o na gũtuĩka arĩ o na wathe, nĩ nyonaga atĩ Jehova nĩ acoketie mahoya makwa na kĩu nĩkĩo kĩrathimo kĩrĩa kĩnene Ngai aheete.”

Ciugo ta icio cia kuuma ngoro no itũme twĩcirie ũhoro wĩgiĩ ciugo ici cia mwandĩki wa thaburi: “Wee Jehova nĩ ũrĩiguaga ihoya rĩa andũ arĩa ahooreri. Ũrĩtũmaga ngoro ciao ikorũo irĩ nũmu na ũkamathikĩrĩria biũ.” (Thaburi 10:17) Na githĩ icio ti itũmi njega mũno cia gũtũma tũthiĩ na mbere kũhoya tũtegũkua ngoro!

Bibilia nĩ ĩkoragwo na mahoya maingĩ marĩa Jesu aahoire. Ihoya rĩrĩa rĩũĩkaine mũno nĩ rĩrĩa aarutire arutwo ake. Nĩ maũndũ marĩkũ tũngĩĩruta kuumana na ihoya rĩu?