Rũmena Rũingĩhĩte Ũguo Nĩkĩ?
Nĩ kĩĩ gĩtũmĩte rũmena rũthereme mũno thĩinĩ wa thĩ? Nĩguo tũmenye gĩtũmi, twagĩrĩirũo gũtaũkĩrũo rũmena nĩ kĩĩ, na ũrĩa rũtheremaga.
Rũmena nĩ Kĩĩ?
Mũndũ ũrĩ na rũmena akoragwo na rũthũũro rũnene mũno kwerekera mũndũ mũna kana gĩkundi kĩna kĩa andũ. Nĩ makĩria ma kũrakarĩra mũndũ o gwa kahinda kanini.
KĨRĨA GĨTŨMAGA ANDŨ MAKŨRIE RŨMENA
Andũ makũragia rũmena nĩ ũndũ wa itũmi nyingĩ. Kaingĩ andũ mamenagwo, ti tondũ wa ũndũ mũũru mangĩkorũo mekĩte, no nĩ tondũ o nĩ andũ a mũthemba mũna. Andũ no mamamene tondũ wa gwĩciria atĩ andũ a mũthemba ũcio othe nĩ oru na matingĩcenjia. No mamone marĩ a kĩrathi gĩa thĩ, marĩ ũgwati, kana ta arĩ o kĩhumo gĩa thĩna mũna. Kaingĩ andũ arĩa monanagia rũmena, makoragwo mekĩtwo maũndũ moru, matarĩ ma kĩhooto, kana ũndũ ũngĩ mũũru, na kwoguo magakũria rũmena.
ŨRĨA RŨMENA RŨTHEREMAGA
Andũ no mathũũre andũ arĩa angĩ o na matamoĩ. Kwa ngerekano, kaingĩ andũ no mone andũ a mũthemba mũna kũringana na ũrĩa andũ a famĩlĩ na arata mamonaga. Na njĩra ĩyo, rũmena no rũthereme na ihenya kũrĩ andũ a famĩlĩ kana a itũũra na othe makorũo na mawoni mahaanaine kwerekera andũ acio.
Kũmenya ũrĩa rũmena rũtheremaga na njĩra hũthũ no gũtũme tũtaũkĩrũo nĩ kĩrĩa gĩtũmaga andũ aingĩ makorũo na rũmena. O na kũrĩ ũguo, nĩguo tũhote gũtooria rũmena rũrĩa rũtheremete na njĩra nene thĩinĩ wa thĩ, nĩ tũrabatara kwamba kwĩruta ũrĩa rũmena rwaambĩrĩirie. Ũndũ ũcio nĩ wonanĩtio thĩinĩ wa Bibilia.
BIBILIA NĨ ĨGUŨRAGIA ŨRĨA RŨMENA RWAAMBĨRĨIRIE
RŨMENA RŨTIAUMANIRE NA ANDŨ. Rwambĩrĩirie rĩrĩa mũraika ũmwe kũrĩa igũrũ, ũrĩa wacokire gwĩtwo Shaitani ũrĩa Mũcukani, aaremeire Ngai. Mũcukani “aarĩ mũũragani kuuma o kĩambĩrĩria” rĩrĩa aaremire. Tondũ “nĩ wa maheeni na nĩwe ithe wa maheeni,” no athiaga na mbere gũcogera andũ kuonania rũmena. (Johana 8:44; 1 Johana 3:11, 12) Bibilia yonanagia atĩ akoragwo na rũmena na marakara manene.—Ayubu 2:7; Kũguũrĩrio 12:9, 12, 17.
NĨ ŨNDŨ MŨHŨTHŨ ANDŨ MATARĨ AKINYANĨRU KUONANIA RŨMENA. Adamu, ũrĩa warĩ mũndũ wa mbere kũũmbwo, nĩ aaremeire Jehova o ta Shaitani. Nĩ ũndũ ũcio, andũ othe makĩgaya mehia na kwaga gũkinyanĩra. (Aroma 5:12) Rũmena nĩ rwatũmire Kaini, ũrĩa warĩ irigithathi rĩa Adamu, orage Habili mũrũ wa nyina. (1 Johana 3:12) Ma nĩ atĩ, kũrĩ na andũ aingĩ monanagia wendo na ũcayanĩri. No nĩ ũndũ wa mehia marĩa twagaire, andũ aingĩ nĩ eyendi, marĩ ũiru, na mwĩtĩo, na gũkorũo mahaana ũguo nĩ gũtũmaga mamene andũ arĩa angĩ.—2 Timotheo 3:1-5.
KWAGA GŨKIRANĨRĨRIA NĨ KŨREHAGA RŨMENA. Thĩinĩ wa thĩ ĩno tũratũũra, andũ nĩ matheremagia rũmena kũgerera ciĩko itarĩ cia tha. Kwaga gũkiranĩrĩria, mũthutũkanio, irumi, na ũthũkangia wa indo, itheremaga tondũ “thĩ yothe ĩkoragwo rungu rwa hinya wa ũrĩa mũũru,” Shaitani ũrĩa Mũcukani.—1 Johana 5:19.
O na kũrĩ ũguo, Bibilia nĩ yonanagia ũndũ ũngĩ makĩria ma gũkorũo yugĩte kĩhumo kĩa rũmena. Nĩ yonanagia ũrĩa rũmena rũgaathira.
Icunjĩ Ingĩ Hihi Ũngĩenda Gũthoma
MACOKIO MA CIŨRIA CIA BIBILIA
Hihi Ngai Nĩwe Wombire Mũcukani?
Shaitani oimire kũ? Thoma ũmenye nĩ kĩĩ gĩatũmire Jesu oige atĩ Mũcukani “ndeehandire wega ũhoro-inĩ ũrĩa wa ma.”
MACOKIO MA CIŨRIA CIA BIBILIA
Mehia ma Kĩambĩrĩria Maarĩ Marĩkũ?
Adamu na Hawa nĩ maaremeire Ngai na makĩgaĩra njiarũa ciao mehia, o ta ũrĩa ciana ingĩgaya mawathe matiganĩte kuuma harĩ aciari ao.
