Ũhoro ũrĩa mwega wĩgiĩ Ũthamaki wa Ngai nĩ ũrahunjio thĩinĩ wa thĩ yothe, ta ũrĩa Jesu aarathĩte. (Mathayo 24:14) Ibuku rĩa Danieli rĩtwĩraga atĩ Ũthamaki ũcio nĩ thirikari ya Ngai. Mũrango wa 2 wa ibuku rĩu ũkoragwo na ũrathi wonanagia ũrĩa thirikari imwe irĩ na hinya cia andũ ciũkĩte irũmanĩrĩire, kuuma o hĩndĩ ya Babuloni nginya mahinda-inĩ maya. Mũhari wa 44 ũkĩgweta ũndũ ũkaahanĩka ihinda rĩũkĩte ugaga ũũ:

“Ngai-wa-Igũrũ [nĩ] akahanda ũthamaki ũrĩa ũtagacoka gũthario o rĩ, o rĩ, o na kana wathani waguo ũneanwo moko-inĩ ma andũ angĩ, no nĩ kũmemenda ũkamemenda mothamaki macio mangĩ, ũmanine biũ, naguo ũtũũre wĩhandĩte tene na tene.”

Ũrathi ũyũ na morathi mangĩ marĩ thĩinĩ wa Bibilia monanagia atĩ Ũthamaki wa Ngai nĩ ũgaacoka ithenya rĩa wathani wa andũ, na ũrehere andũ maũndũ mega na thayũ gũkũ thĩ. Ũtũũro ũgakorũo ũhaana atĩa rungu rwa Ũthamaki wa Ngai? Ici nĩ ciĩranĩro imwe cia magegania iria ikaahinga.

• MBAARA NĨ ĨGAATHIRA

  Thaburi 46:9: “[Ngai] nĩ mũnini mbaara nginya o gĩturi gĩa thĩ: ũta akauunanga, na itimũ agatinania, namo makari ma ita akamacina na mwaki.”

  Ta wĩcirie thĩ ĩngĩkoragwo ĩhaana atĩa korũo ũũgĩ na mbeca iria ciothe ihũthagĩrũo gũthondeka matharaita no ihũthĩrũo na maũndũ mekũguna andũ handũ ha kũmoraga! Kĩĩranĩro kĩa atĩ mbaara nĩ ĩgathira nĩ gĩkaahinga rungu rwa Ũthamaki wa Ngai.

• MĨRIMŨ NĨ ĨGAATHIRA

  Isaia 33:24: “Nake mũndũ ũrĩa ũtũũraga bũrũri ũcio ndarĩ hingo agacoka kuuga ũũ: Ndĩ mũrũaru.”

  Ta wĩcirie ũhoro wa thĩ andũ matakarũaraga mũrimũ wa ngoro, kansa, malaria, kana mũrimũ ũngĩ o wothe. Gũtikabatarania thibitarĩ na ndawa. Andũ othe arĩa magaikaraga thĩinĩ wa thĩ magakoragwo na ũgima mwega wa mwĩrĩ hĩndĩ ciothe.

• IRIO IGAAKORAGWO IRĨ NYINGĨ

  Thaburi 72:16: “Bũrũri ũrogĩaga na bũthi wa ngano nginya o irĩma igũrũ.”

  Thĩ ĩkaarutaga irio cia kũigana andũ othe, na gũtirĩ mũndũ ũkagaga gĩa kũrĩa. Ng’aragu nĩ ĩgathira na andũ makaarĩaga irio iria ciagĩrĩire cia kũguna mwĩrĩ.

• GŨTIGACOKA GŨKORŨO NA RUO, KĨEHA, NA GĨKUŨ

  Kũguũrĩrio 21:4: “[Ngai] nĩ ekũmagiria maithori mothe mathire maitho-inĩ mao, na gĩkuũ gĩtigacoka gũkorũo kuo rĩngĩ, o na kĩeha kana kĩrĩro kana ruo. Maũndũ marĩa ma tene nĩ mathiru biũ.”

   Ũguo nĩ kuuga thĩ yarĩkia gũtuĩka paradiso, andũ magatũũra tene na tene marĩ akinyanĩru! Ũguo nĩguo Jehova, Mũũmbi witũ ũtwendete atwĩrĩire.

Hihi maũndũ macio nĩ maroneka ta arĩ iroto? O na gũtuĩka andũ aingĩ no mende ũtũũro ũcio wĩranĩirũo na ũgataarĩrio nĩ Bibilia, aingĩ ao matitaũkagĩrũo nĩ ũrĩa kũngĩhoteka mũndũ atũũre tene na tene. Na nĩ ma mũndũ no age gũtaũkĩrũo tondũ gũtirĩ mũndũ wa gũkũ thĩ ũtũũrĩte tene na tene atĩ nĩguo atũtaarĩrie ũhoro waguo.

Andũ makoretwo marĩ ngombo cia mehia na gĩkuũ na matũũrĩte mahiũranĩtie na ruo, mĩnyamaro, na mathĩna kwa ihinda iraihu ũũ atĩ andũ aingĩ monaga ũguo nĩguo ũtũũro wagĩrĩirũo gũkorũo ũtariĩ. No ũndũ ũcio nĩ ngũrani biũ na ũrĩa Jehova Mũũmbi witũ eendaga ũtũũro wa andũ ũkorũo ũhaana.

Nĩ getha Ngai atũteithie kuona atĩ maũndũ mothe marĩa eranĩire no mũhaka makaahinga, oigire ũũ: “Ũhoro ũcio ndũkanjokerera o ro ũguo tũhũ, no nĩ kũhingia ũkahingia ũndũ ũrĩa nyendete wĩkwo, na ũrute wĩra ũrĩa ndaũrekeirie, wagĩre wega.”—Isaia 55:11.

Bibilia yugaga Jehova nĩ Ngai “ũtangĩheenania.” (Tito 1:2) Na tondũ nĩ eranĩire maũndũ maya mothe mega ũguo-rĩ, nĩ wega twĩyũrie ũũ: No kũhoteke andũ matũũre tene na tene thĩinĩ wa thĩ ĩtuĩtwo Paradiso? Na no mũhaka twĩke atĩa nĩguo tũkaagunĩka kuumana na ciĩranĩro cia Ngai? Icunjĩ iria irũmĩrĩire nĩ ĩgũgũteithia kuona macokio ma ciũria icio.