KĨU NĨ KĨĨRANĨRO KĨEGA MŨNO! Mũũmbi witũ atwĩrĩire atĩ nĩ agaatũhee muoyo wa tene na tene gũkũ thĩ. O na kũrĩ ũguo, andũ aingĩ mationaga ũndũ ũcio ta ũngĩhoteka. Moigaga atĩ, ‘No mũhaka andũ othe magaakua. Ũguo nĩguo ũtũũro ũhaana atĩ mũndũ aciarũo no mũhaka agaakua.’ Angĩ nao monaga atĩ andũ nĩ magatũũra tene na tene, no ti gũkũ thĩ. Moigaga atĩ mũndũ aheagwo muoyo wa tene na tene arĩkia gũkua na gũthiĩ igũrũ. Wee wonaga atĩa?

Ũtanacokia kĩũria kĩu, reke twambe twĩcirie ũrĩa Bibilia ĩcokagia ciũria ici ithatũ: Ũrĩa mũndũ ombĩtwo wonanagia oombĩtwo atũũre ihinda rĩigana atĩa? Muoroto wa Ngai harĩ thĩ na harĩ andũ warĩ ũrĩkũ kuuma o kĩambĩrĩria? Gĩkuũ kĩoimire kũ?

Harĩ indo ciothe iria Ngai ombire, mũndũ ombĩtwo na njĩra ya mwanya. Na njĩra ĩrĩkũ? Bibilia yonanagia no andũ tu moombirũo na “mũhianĩre” wa Ngai. (Kĩambĩrĩria 1:26, 27) Ũguo nĩ kuuga atĩa? Nĩ kuuga atĩ andũ moombirũo marĩ na maũndũ mahaana ma Ngai, ta wendo na kĩhooto.

Ningĩ andũ nĩ moombirũo marĩ na ũhoti wa gwĩciria, ũhoti wa kũmenya wega na ũũru, o hamwe na wendi wa gũkorũo na ũrata na Ngai. Kĩu nĩkĩo gĩtũmaga tũkenere ũthaka wa thĩ na igũrũ na indo iria irĩ kuo, o hamwe na mbica, nyĩmbo, na marebeta. No ũndũ ũrĩa wa bata makĩria nĩ atĩ mũndũ ombĩtwo arĩ na ũhoti wa gũthathaiya Ngai. Maũndũ macio matũmaga andũ makorũo marĩ ngũrani biũ na indo iria ingĩ ciothe irĩ thĩinĩ wa thĩ.

Nĩ ũndũ ũcio wĩyũrie atĩrĩ: Hihi Ngai nĩ angĩombire andũ na njĩra ĩyo ya mwanya na marĩ na ũhoti mũingĩ ũguo korũo eendaga matũũrage o mĩaka mĩnini? Ũma nĩ atĩ Ngai ombire andũ na njĩra ya mwanya na marĩ na ũhoti wa gwĩka maũndũ matiganĩte nĩguo makenere ũtũũro tene na tene gũkũ thĩ.

O na kũrĩ ũguo, andũ amwe moigaga muoroto wa Ngai ndwarĩ andũ matũũre tene na tene thĩinĩ wa thĩ. Moigaga atĩ thĩ yombĩtwo nĩguo andũ magaikara kuo ihinda inini, nĩgetha magerio moneke nĩa magĩrĩire gũthiĩ gũtũũra tene na tene hamwe na Ngai. No korũo ũguo nĩguo kũrĩ-rĩ, githĩ ti ta gũkiuga Ngai nĩwe ũtũmĩte thĩ ĩkorũo ĩiyũirũo nĩ  maũndũ moru? Ũndũ ũcio ũngĩkorũo ũrĩ ngũrani biũ na ũrĩa Ngai atariĩ. Bibilia ĩkĩaria ũhoro wake yugaga ũũ: “Nĩ gũkorũo mĩthiĩre yake yothe nĩ ya kĩhooto; Nake nĩwe Mũrungu ũrĩa mwĩhokeku, ũtarĩ ũũru, Na ningĩ nĩ wa ma, o na wa kĩhooto.”—Gũcokerithia Maathani 32:4.

Bibilia nĩ yonanagia wega muoroto wa Ngai harĩ thĩ kuuma o kĩambĩrĩria kũgerera ciugo ici: “Igũrũ-rĩ, rĩo rĩene nĩ rĩa Jehova, nayo thĩ nĩ kũhe aheete ciana cia kĩrĩndĩ.” (Thaburi 115:16) Ngai ombire thĩ ĩrĩ mũciĩ mũthaka wa gũtũũrũo nĩ andũ na akĩmĩkĩra indo ciothe iria tũbataraga nĩguo tũkenere ũtũũro mwega tene na tene.—Kĩambĩrĩria 2:8, 9.

“Igũrũ-rĩ, rĩo rĩene nĩ rĩa Jehova, nayo thĩ nĩ kũhe aheete ciana cia kĩrĩndĩ.”—Thaburi 115:16

Ningĩ Bibilia nĩ yonanagia wega muoroto wa Ngai harĩ andũ. Eerire mũthuri na mũtumia wa mbere ũũ: “[Mũiyũrie] thĩ, na mũmĩtorie; ningĩ mwathage . . . nyamũ o yothe ĩrĩa ĩthiangaga thĩ.” (Kĩambĩrĩria 1:28) Maarĩ na mweke wa kũmenyerera na kwaramia mũgũnda ũcio wao mũthaka thĩ yothe! Kwoguo Adamu na Hawa, o hamwe na njiaro ciao mangĩatũũrire gũkũ thĩ tene na tene, no ti kũrĩa igũrũ.

Andũ magĩkuaga nĩkĩ? Bibilia yonanagia atĩ mũraika ũmwe, na nĩwe wĩtagwo Shaitani kana Mũcukani, nĩ aageririe gũthũkia mũbango wa Ngai mũgũnda-inĩ wa Edeni. Na njĩra ĩrĩkũ?

Shaitani aatũmire aciari aitũ a mbere Adamu na Hawa manyitanĩre nake harĩ kũremera Ngai. Oigire atĩ Ngai nĩ aamaimaga ũndũ mwega, na nĩguo wĩyathi wa gwĩtuĩra nĩ ũndũ ũrĩkũ mwega na nĩ ũrĩkũ mũũru. Maathuurire gũthikĩrĩria Shaitani na kwoguo makĩremera Ngai. Moimĩrĩro maarĩ marĩkũ? Thutha wa ihinda nĩ maakuire o ta ũrĩa Ngai aamerĩte. Nĩ maateire mweke wa gũtũũra tene na tene thĩinĩ wa Paradiso gũkũ thĩ.—Kĩambĩrĩria 2:17; 3:1-6; 5:5.

Moimĩrĩro ma ũremi wa Adamu na Hawa mahutĩtie andũ nginya matukũ-inĩ maya. Kiugo kĩa Ngai kiugaga ũũ: “Kũgerera harĩ mũndũ ũmwe [Adamu] mehia maatonyire thĩinĩ wa thĩ na gĩkuũ gĩgĩtonya nĩ ũndũ wa mehia.” (Aroma 5:12) Tũkuaga tondũ nĩ twagaire mehia na gĩkuũ kuuma kũrĩ aciari aitũ a mbere, no ti tondũ harĩ ũndũ ũtangĩtaũkĩka ũkoragwo ũbangĩtwo nĩ Ngai.

Ũremi ũcio wekĩkire Edeni ndwathũkirie muoroto ũrĩa Ngai aarĩ naguo harĩ thĩ na harĩ andũ kuuma o kĩambĩrĩria. Tondũ Ngai arĩ wendo mũingĩ na nĩ wa kĩhooto, nĩ aathondekire njĩra ya gũtũkũũra kuuma kũrĩ mehia na gĩkuũ iria twagaire. Mũtũmwo Paulo aatarĩirie ũndũ ũcio ũũ: “Mũcara wa mehia nĩ gĩkuũ, no kĩheo kĩrĩa Ngai aheanaga nĩ muoyo wa tene na tene kũgerera Kristo Jesu Mwathani witũ.” (Aroma 6:23) Nĩ ũndũ wa wendo, Ngai “[nĩ aarutire] Mũrũ wake wa mũmwe [Jesu Kristo], nĩguo mũndũ o wothe ũrĩonanagia wĩtĩkio harĩ we ndakananiinwo no akaagĩa na muoyo wa tene na tene.” (Johana 3:16) Rĩrĩa Jesu eerutĩire gũkua eyendeire nĩ getha atuĩke igongona rĩa gũkũũra andũ, nĩ aakũũrire kĩrĩa gĩothe gĩatetwo nĩ Adamu. *

Ica ikuhĩ, kĩĩranĩro kĩa Ngai gĩa gũtua thĩ paradiso nĩ gĩkũhinga. Nĩ ũkona kĩĩranĩro kĩu gĩkĩhinga angĩkorũo nĩ ũgwathĩkĩra ũtaaro ũyũ wa Jesu: “Tonyerai mũromo ũrĩa mũceke tondũ mũromo nĩ mwariĩ na njĩra ĩrĩa ĩkinyagia andũ harĩ kũniinwo nĩ njaramu, na andũ arĩa aingĩ nĩyo mageraga; no mũromo nĩ mũceke na njĩra ĩrĩa ĩkinyagia andũ harĩ muoyo nĩ ngunderu, na andũ arĩa mamĩonaga nĩ anini.” (Mathayo 7:13, 14) Ũrĩa ũtũũro waku wa mahinda mokĩte ũgaakorũo ũhaana, wĩhocetie harĩ matua maku. Ũgũtua matua mahaana atĩa?