Ndaaciarĩirũo Mulhouse, mwena wa rũgongo wa France, gĩcagi-inĩ kĩoĩkaine mũno nĩ ũhinya ũrĩa wakoragwo kuo. Maũndũ marĩa ndirikanaga meekĩkire ndĩ mũnini nĩ ma ũhinya marĩa meekagwo gatagatĩ-inĩ ka famĩlĩ gĩcigo-inĩ kĩu. Famĩlĩ-inĩ itũ, atumia mationagwo marĩ a bata na nĩ ũndũ warĩ hinya kũũrio mawoni mao nĩ athuri. Ndaarutirũo atĩ wĩra wa mũtumia nĩ wa riko, ahang’ĩre mũthuri na ciana.

Ũnyinyi wakwa ndwarĩ mũhũthũ. Ndĩ na mĩaka ikũmi, baba nĩ aakuire nĩ ũndũ wa ũhũthĩri mũru wa njohi. Thutha wa mĩaka ĩtano, mũrũ wa maitũ ũmwe nĩ eeyũragire. Mwaka o ũcio, nĩ ndeyoneire mũndũ akĩũragwo nĩ ũndũ wa thogothogo cia famĩlĩ, na ũndũ ũcio nĩ wamakirie mũno. Andũ a famĩlĩ nĩ maandutire ũrĩa ingĩhũthĩra tũhiũ na mĩcinga na kũrũa rĩrĩa kwaumĩra mbaara. Ngĩambĩrĩria gũcorũo mwĩrĩ (tattoo) na kũnyua njohi.

Ngĩkinyia mĩaka 16, nĩ ndanyuaga cuba 10 nginya 15 cia njohi o mũthenya, na thutha wa kahinda ngĩambĩrĩria kũhũthĩra ndawa cia kũrebia. Nĩguo hote kũgũra indo icio, ngĩambĩrĩria kwendia cuma iria ngũrũ, ũndũ ũrĩa watũmire nyambĩrĩrie kũiya. Ngĩkinyia mĩaka 17, nĩ ndaarĩkĩtie kĩoho kĩa njera. Ũtũũro-inĩ wakwa, njohetwo njera maita 18 nĩ ũndũ wa ũici na ũhinya.

Ndĩ na mĩaka mĩrongo ĩĩrĩ na kĩndũ, maũndũ makwa magĩthũka makĩria. Ndaagucagia mĩthogoto 20 ya bangi o mũthenya na ngahũthĩra ndawa ingĩ cia kũrebia ta heroin. Maita maigana ũna, ndatigagia hanini gũkua nĩ ũndũ wa kũhũthĩra indo icio gũkĩria gĩthimi. Nĩ ndambĩrĩirie kwendia ndawa cia kũrebia, kwoguo ndakoragwo nguuĩte tũhiũ na mĩcinga. Kũrĩ hĩndĩ ndendaga kũratha mũthuri ũmwe, no rithathi yaringire gĩcũhĩ kĩa mũcibi wake ĩgĩthiĩ mwena. Ndĩ na mĩaka 24, mami nĩ aakuire na marakara makwa makĩongerereka. Andũ maanyona, maakĩraga mwena ũrĩa ũngĩ wa bara nĩ ũndũ wa kũnjĩtigĩra. Kaingĩ, wikendi ndakoragwo borithi kana thibitarĩ ngĩtumwo ironda nĩ ũndũ wa kũrũa.

Ndĩ na mĩaka 28, nĩ ndaahikanirie. O ta ũrĩa ũngĩtanya, ndiatĩaga mũtumia wakwa. Ndaamwaragĩria ũũru na ngamũhũũra. Tũtiekaga maũndũ hamwe. Ndeeciragia atĩ kũmũhe mathaga maingĩ ma goro ma kwĩgemia marĩa ndaiyaga kwarĩ kũiganu. No gũgĩcoka gũgĩkĩka ũndũ iteerĩgĩrĩire. Mũtumia wakwa akĩambĩrĩria kwĩruta Bibilia na Aira a Jehova. Thutha wa gũthoma nao riita rĩa mbere, agĩtiga kũnyua thigara, agĩtiga gwĩtĩkagĩra rĩngĩ mbeca cia kũiya, na  akĩnjokeria mathaga make. Ndaarakarire mũno, ngĩũkĩrĩra wĩruti wake wa Bibilia na nĩ ndaamũhuhagĩrĩria ndogo ya thigara ũthiũ-inĩ wake. Ningĩ nĩ ndaamwaragĩria ũũru mbere ya andũ.

Ũtukũ ũmwe ndĩ mũrĩu, nĩ ndagwatirie nyũmba itũ mwaki. Mũtumia wakwa nĩ aahonokirie hamwe na kairĩtu gaitũ ka mĩaka ĩtano kuumana na mwaki ũcio. Ndaarĩũkwo, nĩ nderirire mũno. Ngoro-inĩ ndaiguaga ta Ngai atangĩnjohera. Ngĩririkana nĩ ndaiguĩte mũhunjia akiuga atĩ arĩa oru mathiaga mwaki-inĩ. O na ndagĩtarĩ ũrĩa wathondekaga aanjĩrire ũũ: “We ndũngĩthondekeka! Nĩ ũkinyĩte mũico.”

Thutha wa nyũmba kũhĩa, tũgĩthiĩ gũikaraga na aciari a mũtumia wakwa. Rĩrĩa Aira a Jehova mokire gũceerera mũtumia wakwa, nĩ ndaamoririe, “Hihi Ngai no anjohere mehia makwa mothe?” Makĩnyonia rĩandĩko rĩa 1 Akorintho 6:9-11 thĩinĩ wa Bibilia. Rĩandĩko rĩu rĩgwetete mĩtugo ĩrĩa Ngai athũire, no rĩkongerera ũũ: “Ũguo nĩguo amwe anyu mwatariĩ.” Ciugo icio nĩ cianyũmĩrĩirie atĩ no hote kũgarũrũka. Aira a Jehova magĩcoka makĩnyonia rĩandĩko rĩa 1 Johana 4:8, kũnyonia atĩ Ngai nĩ anyendete. Nĩ ũndũ wa kũũmĩrĩrio, ngĩmoria kana no mandutage Bibilia maita merĩ o kiumia, na ngĩambĩrĩria gũthiaga mĩcemanio yao ya Gĩkristiano. Ndaahoyaga Jehova itegũtigithĩria.

Ihinda rĩa mweri ũmwe, ngĩtua itua rĩa gũtigana na ndawa cia kũrebia na njohi. Ũndũ ũcio warĩ mbaara nene harĩ mwĩrĩ wakwa. Ndaakoragwo na iroto njũru, ngarĩo nĩ mũtwe, ngatuurũo nĩ mwĩrĩ, na maũndũ mangĩ. Ĩndĩ no ndaiguaga atĩ Jehova nĩ aanyitĩte guoko na akaahe hinya. Ndaiguaga o ta ũrĩa mũtũmwo Paulo aaiguaga. Paulo akĩaria ũhoro wĩgiĩ ũteithio ũrĩa Ngai aamũheire, aandĩkire ũũ: “Nĩ gũkorũo maũndũ-inĩ mothe nĩ ngoragwo na hinya kũgerera ũrĩa ũheaga hinya.” (Afilipi 4:13) Thutha wa ihinda, nĩ ndahotire nginya gũtiga thigara.—2 Akorintho 7:1.

Makĩria ma Bibilia kũndeithia gũthondeka mũtũũrĩre wakwa, nĩ yateithirie kwagĩria famĩlĩ itũ. Ngĩgarũrĩra muonere wakwa kwerekera mũtumia wakwa. Ngĩambĩrĩria kũmũhe gĩtĩo makĩria na kũhũthagĩra ciugo cia kũmũthaitha na kũmũcokagĩria ngatho. Ningĩ ngĩtuĩka baba mwega harĩ kairĩtu gaitũ. Thutha wa kwĩruta Bibilia mwaka ũmwe, ngĩrũmĩrĩra kĩonereria kĩa mũtumia wakwa, ngĩyamũrĩra Jehova na ngĩbatithio.

Ndĩ na ma atĩ motaaro ma Bibilia nĩ maahonokirie muoyo wakwa. O na andũ aitũ a famĩlĩ arĩa matarĩ Aira a Jehova nĩ monaga atĩ no kũhoteke nĩ ingĩoragirũo nĩ ndawa cia kũrebia kana ngĩrũa na mũndũ.

Mũtũũrĩre wa famĩlĩ yakwa nĩ wagarũrirũo biũ nĩ morutani ma Bibilia marĩa mataaragĩria wĩra ũrĩa ndĩĩhokeirũo ndĩ mũthuri na mũciari. (Aefeso 5:25; 6:4) Nĩ twambĩrĩirie gwĩkaga maũndũ hamwe tũrĩ famĩlĩ. Rĩu, handũ ha kuona ta wĩra wa mũtumia wakwa arĩ o wa riko, nĩ ngenaga kũmũnyita mbaru maũndũ-inĩ make arĩ mũhunjia wa hĩndĩ ciothe. Nake nĩ akenagĩra kũũnyita mbaru itemi-inĩ rĩakwa ndĩ mũthuri wa kĩũngano.

Wendo wa Jehova Ngai na tha ciake nĩ ihutĩtie ũtũũro wakwa na njĩra nene. Nĩ ngoragwo na wendi mũnene wa kwaria ũhoro wĩgiĩ ngumo ciake kũrĩ arĩa monagwo ta matarĩ na mwĩhoko, tondũ aingĩ nĩguo maanyonaga. Ndĩ na ma atĩ Bibilia nĩ ĩrĩ hinya wa gũteithia mũndũ o wothe agĩe na ũtũũro mwega na ũrĩ na muoroto. Makĩria ma Bibilia kũnduta kwendaga na gũtĩaga arĩa angĩ, athuri na atumia, nĩ ĩndeithĩtie kwĩheaga gĩtĩo.