Ngai ombĩte mĩĩrĩ itũ ĩrĩ na ũhoti wa mwanya wa kwĩhonia. Mwĩrĩ ũngĩtemwo, ũtihio, kana ũthecwo, “wambagĩrĩria gwĩthondeka guo mwene nĩguo ũhonie kĩronda kĩrĩ kĩnene kana kĩnini.” (Johns Hopkins Medicine) O rĩo mwĩrĩ wambagĩrĩria kũruta wĩra wa gũtigithia thakame kuura, kũhonia hau hagĩa kĩronda, na kũhekĩra hinya.

TA WĨCIRIE: Angĩkorũo Mũũmbi witũ oombire mĩĩrĩ itũ ĩrĩ na ũhoti wa kwĩhonia ironda-rĩ, na githĩ tũtikĩagĩrĩirũo gwĩtĩkia ũrĩa atwĩrĩire atĩ nĩ arĩtũhonagia ironda citũ cia ngoro? Mwandĩki wa thaburi ooigire ũũ: “Andũ arĩa athuthĩku ngoro, nĩ kũhonia amahonagia, akamoha nguraro ciao.” (Thaburi 147:3) No angĩkorũo nĩ ũthuthĩkĩte kana ũkahehenjeka ngoro-rĩ, ũngĩkorũo na ma atĩa atĩ Jehova nĩ arĩohaga nguraro ciaku, ihinda-inĩ rĩrĩ na rĩrĩa rĩroka?

Ngai atwĩrĩire ũũ: “Tiga gwĩtigĩra, nĩ gũkorũo ndĩ hamwe nawe; menya ũmake nĩ ũndũ niĩ nĩ niĩ Ngai waku; nĩngũkuongerera hinya waku, ĩĩ, ti-itherũ nĩndĩĩgũteithagia.” (Isaia 41:10) Mũndũ ũrĩa ũĩ atĩ Jehova nĩ amũrũmbũyagia nĩ akoragwo na thayũ wa meciria na hinya wa kũhiũrania na moritũ matiganĩte. Mũtũmwo Paulo eetire ũhooreru ũcio “thayũ wa Ngai ũrĩa ũkĩrĩte ũtaũku wothe.” Paulo aacokire akiuga ũũ: “Nĩ gũkorũo maũndũ-inĩ mothe nĩ ngoragwo na hinya kũgerera ũrĩa ũheaga hinya.”—Afilipi 4:4-7, 9, 13.

Maandĩko nĩ matũteithagia kũgĩa na wĩtĩkio harĩ ciĩranĩro iria Jehova erĩire andũ cia mahinda mokĩte. Kwa ngerekano, rĩandĩko rĩa Kũguũrĩrio 21:4, 5 (rĩgwetetwo karatathi-inĩ karĩa karũmĩrĩire) nĩ rĩtwĩraga ũrĩa ageeka na nĩkĩ no tũmwĩhoke eke ũguo:

• ‘Nĩ akaagiria maithori mothe’ kuuma maitho-inĩ ma andũ. Jehova nĩ akaanina mĩnyamaro itũ yothe na mĩtangĩko, o na moritũ marĩa mangĩoneka nĩ arĩa angĩ ta matarĩ na kũrĩa marĩ.

• ‘Ũrĩa ũikarĩire gĩtĩ kĩrĩa kĩa ũnene’ riri-inĩ wa igũrũ, o we Mũthamaki Mwene-Hinya-Wothe wa ciũmbe ciothe nĩ akoonania hinya na ũnene wake wa kũgirĩrĩria mĩnyamaro na gũtũhe ũteithio ũrĩa tũbataraga.

• Jehova nĩ atũheete ũũma wa atĩ ciĩranĩro ciake nĩ cia “kwĩhokeka na nĩ cia ma.” Ũguo nĩ kuuga atĩ, amenyekaga atĩ nĩ Ngai ũrĩa wa ma kũringana na ũrĩa ahingagia ciĩranĩro ciake.

“‘Nĩ ekũmagiria maithori mothe mathire maitho-inĩ mao, na gĩkuũ gĩtigacoka gũkorũo kuo rĩngĩ, o na kĩeha kana kĩrĩro kana ruo. Maũndũ marĩa ma tene nĩ mathiru biũ.” Nake Ũrĩa waikarĩire gĩtĩ kĩrĩa kĩa ũnene akiuga: “Atĩrĩrĩ, maũndũ mothe nĩ kũmerũhia ndĩramerũhia.” Ningĩ akiuga: “Andĩka, nĩ gũkorũo ciugo icio nĩ cia kwĩhokeka na nĩ cia ma.’”—Kũguũrĩrio 21:4, 5.

Ũũmbi o hamwe na Bibilia nĩ cionanagia ũrĩa Ithe witũ wa igũrũ atariĩ. O na gũtuĩka ũũmbi nĩ ũtwĩraga tũmenye Ngai na tũmũtue Mũrata wa hakuhĩ o na akorũo ti na njĩra ya ĩmwe kwa ĩmwe, Bibilia ĩtwĩraga ũũ ĩmwe kwa ĩmwe: “Kuhĩrĩriai Ngai, nake nĩ ekũmũkuhĩrĩria.” (Jakubu 4:8) Nayo Atũmwo 17:27 yugaga: “Ndarĩ haraya na mũndũ o na ũmwe witũ.”

O ũrĩa ũkũhũthĩra mahinda kũmenya Ngai, noguo ũkũgĩa na ũũma makĩria atĩ ‘nĩ akũrũmbũyagia.’ (1 Petero 5:7) Nĩ irathimo irĩkũ ciumanaga na kwĩhoka Jehova ũguo?

Ta wĩcirie ũhoro wa Toru, kuuma Japan ũrĩa warerirũo nĩ nyina Mũkristiano, no akĩĩingĩria gĩkundi-inĩ kĩa eki-naĩ gĩtagwo yakuza, kũu Japan. Ooigire ũũ: “Ndetĩkĩtie atĩ Ngai nĩ athũire, na rĩrĩa ndakuĩrũo nĩ andũ a hakuhĩ, makĩria arĩa ndeendete mũno, ndonaga atĩ nĩ kũherithio ndĩraherithio.” Toru ataaragĩria atĩ nĩ ũndũ wa meciria macio moru aakoragwo namo, nĩ aatuĩkire “mũndũ ũtamakagio nĩ ũndũ o na ũrĩkũ na ũtarĩ tha.” Akĩririkana muoroto ũrĩa aarĩ naguo ooigire, “Ndeendaga gũkua ndĩ  mwĩthĩ na ndige ndoraga mũndũ ũrĩ igweta kũngĩra na njĩra ĩyo ndĩthondekere rĩĩtwa.”

No rĩrĩ, rĩrĩa Toru na Hannah mũtumia wake meerutire Bibilia, Toru nĩ eekire mogarũrũku ma na ihenya ũtũũro-inĩ wake o hamwe na muonere wake. Hannah oigaga ũũ: “Nĩ ndeyoneire mũthuri wakwa agĩka mogarũrũku.” Rĩu Toru oigaga ũũ arĩ na ũũma: “Nĩ kũrĩ Ngai na nĩ atũrũmbũyagia biũ. Ndendaga mũndũ o na ũmwe akue, na nĩ akoragwo ehaarĩirie kuohera arĩa merira mehia mao biũ. Nĩ athikagĩrĩria maũndũ marĩa tũtangĩhota kwĩra mũndũ ũngĩ tiga we na marĩa gũtarĩ mũndũ ũngĩ ũngĩtaũkĩrũo. Ica ikuhĩ, Jehova nĩ ekweheria mathĩna, mĩnyamaro, na ruo ruothe. O na rĩu, nĩ atũteithagia na njĩra tũtangĩrĩgĩrĩra. Nĩ atũrũmbũyagia na agatũteithia rĩrĩa tũũrĩtwo nĩ hinya.”—Thaburi 136:23.

O ta ũrĩa kĩonereria gĩa Toru kĩonanĩtie, kũmenya atĩ Ngai no ahote na nĩ ekweheria mĩnyamaro yothe ica ikuhĩ na atũgirie maithori mothe, nĩ gũtũheaga mwĩhoko wa mahinda marĩa maroka na gũgatũteithia kũgĩa na ũtũũro mwega mahinda maya. Hatarĩ nganja, o na thĩinĩ wa thĩ ĩiyũirũo nĩ mĩnyamaro, no ũgunĩke kuumana na ũrĩa Ngai atũrũmbũyagia na wendo.