Ũngĩruta Kũ Ũtaaro wa Kwĩhokeka Wĩgiĩ Mahinda Mokĩte?
O ta ũrĩa icunjĩ iria hĩtũku cionania, andũ nĩ mageragia gwetha ũtũũro mwega wa mahinda marĩa maroka na njĩra ya kũiga mwĩhoko wao harĩ maũndũ ta hinya ũkĩrĩte wa ndũire, gĩthomo, ũtonga, na gũtuĩka mũndũ mwega. No kwĩhoka maũndũ macio, nĩ ta gũthiĩ handũ ũkĩhũthĩra mapu ĩrĩ na mahĩtia. Hihi ũguo nĩ kuuga atĩ gũtirĩ kĩndũ kĩngĩĩhokeka kĩngĩtũteithia gũkorũo na ũtũũro mwega mahinda marĩa maroka? Aca!
ŨTAARO KUUMA HARĨ KĨHUMO GĨA KWĨHOKEKA
Rĩrĩa tũrenda gũtua matua, kaingĩ nĩ tũhoyaga ũtaaro kuuma kũrĩ mũndũ mũkũrũ na mũũgĩ gũtũkĩra. Na njĩra o ta ĩyo, nĩ kũrĩ mũndũ mũkũrũ na ũrĩ na ũũgĩ gũtũkĩra ũngĩtũhe ũtaaro wa kwĩhokeka ũrĩa ũngĩtũteithia gũkorũo na ũtũũro mwega mahinda marĩa maroka. No tũthome ũtaaro wake thĩinĩ wa ibuku rĩaambĩrĩirie kwandĩkwo mĩaka ta 3,500 mĩhĩtũku. Ibuku rĩu nĩ Bibilia.
Nĩ kĩĩ kĩngĩtũma wĩhoke Bibilia? Nĩ tondũ Mũtungi wayo nĩwe mũũgĩ mũno na wanatũũra ihinda iraihu mũno. Bibilia yugaga atĩ nĩwe “Ũrĩa Ũtũũraga Kuuma o Tene.” (Danieli 7:9; Thaburi 90:2) Nĩwe “Mũũmbi wa igũrũ, Ngai ũrĩa wa ma, Ũrĩa wombire thĩ.” (Isaia 45:18) Nĩ atwĩrĩte atĩ etagwo Jehova.—Thaburi 83:18.
Tondũ Bibilia yumanĩte na Ngai ũrĩa wombire andũ othe, ndiugaga atĩ ũndũire mũna kana rũrĩrĩ rũna nĩruo rwega gũkĩra rũrĩa rũngĩ. Ũtaaro wayo ndũhĩtũkagwo nĩ mahinda na nĩ ũteithĩtie andũ kuuma mabũrũri-inĩ mothe. Nĩ yonekaga na thiomi nyingĩ na nĩ ĩheanĩtwo kũrĩ andũ aingĩ gũkĩra ibuku rĩngĩ o rĩothe. * Ũguo nĩ kuuga atĩ andũ kũndũ guothe no mataũkĩrũo nĩyo na ĩmateithie. Maũndũ macio nĩ maratwarana na ũrĩa Bibilia yo nyene yugaga.
“Ngai ndarĩ mũthutũkanio, no thĩinĩ wa ndũrĩrĩ ciothe, mũndũ ũrĩa ũmwĩtigĩrĩte na wĩkaga ũrĩa kwagĩrĩire nĩ etĩkĩrĩkaga nĩ we.”—ATŨMWO 10:34, 35.
O ta ũrĩa mũciari ũrĩ wendo aheaga ciana ciake ũtaaro, Jehova Ngai nĩ Ithe witũ ũtwendete na nĩ atũheaga ũtaaro kũgerera Kiugo gĩake Bibilia. (2 Timotheo 3:16) No twĩhoke Kiugo gĩake tondũ nĩwe watũmbire na nĩ oĩ kĩrĩa kĩngĩtũma tũkorũo na gĩkeno.
Ũrabatara gwĩka atĩa nĩguo ũgaakenera ũtũũro mwega ũguo mahinda marĩa maroka? Gĩcunjĩ kĩrĩa kĩrũmĩrĩire nĩ kĩarĩrĩirie ũhoro ũcio.
^ kĩb. 6 Nĩguo wone ũhoro makĩria igũrũ rĩgiĩ ũrĩa Bibilia ĩtaũrĩtwo na ĩgakinyĩra andũ, hingũra www.pr418.com/ki na ũrore rungu rwa MORUTANI MA BIBILIA > HISTORĨ & BIBILIA.
^ kĩb. 16 Nĩguo wone ũhoro makĩria, rora gĩcunjĩ gĩa 9 kĩa ibuku Biblia—Neno la Mungu au la Mwanadamu? rĩrĩa rĩcabĩtwo nĩ Aira a Jehova. No rĩoneke Intaneti-inĩ thĩinĩ wa www.pr418.com/sw. Rora rungu rwa MAKTABA > VITABU NA BROSHUA.
Icunjĩ Ingĩ Hihi Ũngĩenda Gũthoma
MŨRANGĨRI
Ũhoro wa Ma Wĩgiĩ Ihinda Rĩrĩa Rĩroka
Ĩkĩra hinya kĩĩrĩgĩrĩro gĩaku harĩ ũrĩa Ngai oigĩte igũrũ rĩgiĩ ihinda rĩrĩa rĩroka thĩinĩ wa thĩ na igũrũ rĩgiĩ andũ arĩa magaatũũra thĩinĩ wayo.
MŨRANGĨRI
Bibilia nĩ Yagĩrĩire Gũtũtongoria Matukũ-inĩ Maya?
O na kũrĩ na ũhoro mũingĩ ũguo-rĩ, twagĩrĩirũo nĩ gũthoma ibuku rĩũ rĩrĩ na mĩaka ta 2,000 nĩkĩ?
MŨRANGĨRI
Ũrĩa Bibilia Ĩhũtĩtie Ũtũũro Waku wa Thutha-inĩ
Bibilia no ĩtũteithie kũhiũrania na mathĩna marĩa marĩ mbere itũ ta ma o mũthenya marĩa tũcemanagia namo thĩinĩ wa thĩ ĩno ĩtamenyagĩrũo. O na kũrĩ ũguo Bibilia no ĩtũteithie. Nĩ ĩtũheaga mwĩhoko wa mahinda mokĩte.
