Mũthenya ũmwe wa kiumia, Kenneth na Filomena, arĩa maikaraga Curaçao, nĩ maathire gũceerera mũthuri ũmwe na mũtumia wake arĩa meerutaga nao Bibilia.

Kenneth oigaga, “Rĩrĩa twakinyire, twakorire nyũmba ĩrĩ hinge na ngaari yao ndĩarĩ ho. No ngĩigua ngĩenda kũhũrĩra mũtumia thimũ.”

Mũtumia ũcio nĩ oire thimũ na akiuga atĩ mũthuri wake aarĩ wĩra. O na kũrĩ ũguo, rĩrĩa aamenyire atĩ Kenneth na Filomena maarĩ hake mũrango-inĩ, nĩ aamahingũrĩire na akĩmeera maingĩre.

Mamuona o ũguo nĩ monire atĩ nĩ aarĩraga. Kenneth akĩambĩrĩria wĩruti wao wa Bibilia na mahoya, mũtumia ũcio nĩ ambĩrĩirie kũrĩra rĩngĩ. Kwoguo, Kenneth na Filomena marĩ na tha makĩmũũria nĩ kĩĩ kĩahĩtanĩte.

Mũtumia ũcio nĩ aataarĩirie atĩ aabangaga kwĩyũraga na nĩ marũa aandĩkagĩra mũthuri wake rĩrĩa Kenneth aamũhũrĩire thimũ. Akĩmeera atĩ aarĩ na mũrimũ wa gũthuthĩka ngoro, na kwoguo makĩmũũmĩrĩria makĩhũthĩra Bibilia. Kũmũmĩrĩria kũu nĩ kwahonokirie muoyo wake.

Kenneth athiaga na mbere kuuga ũũ: “Nĩ twacokeirie Jehova ngatho nĩ ũndũ wa gũtwĩtĩkĩria tũteithie mũtumia ũcio warĩ na mĩtangĩko, na makĩria nĩ ũndũ wa gũtũtindĩka, hihi kũgerera araika kana roho Wake mũtheru, tũhũũre thimũ ĩyo.”  *

Hihi Kenneth na Filomena nĩ magĩrĩirũo gwĩtĩkia atĩ Ngai nĩwe waingĩrĩire maũndũ, hihi kũgerera araika kana roho Wake mũtheru? Kana hihi no Kenneth wahũrire thimũ ihinda rĩrĩa rĩagĩrĩire?

Tũtingiuga tũrĩ na ma. No ũndũ ũrĩa tũĩ nĩ atĩ Ngai nĩ ahũthagĩra araika ake gũteithia andũ kĩĩroho. Kwa ngerekano, Bibilia yugaga atĩ Ngai nĩ aahũthĩrire mũraika gũtongoria Mũkristiano wetagwo Filipu, ũrĩa warĩ mũhunjia, agateithĩrĩrie Mũethiopia ũrĩa wethaga ũtongoria wa kĩĩroho.​—Atũmwo 8:​26-31.

Ndini nyingĩ ngũrani nĩ irutanaga ũhoro wa ciũmbe cia roho. Ikonania atĩ imwe cia cio ikoragwo na wendi mwega na nĩ ihingagia wendi wa Ngai kana atĩ harĩ ciũmbe icio, o mũndũ nĩ arĩ kĩũmbe kĩmũgitagĩra. Andũ aingĩ nĩ metĩkĩtie atĩ araika marĩ kuo na atĩ nĩ mahutagia ũtũũro wao na njĩra njega. O na kũrĩ ũguo, andũ angĩ aingĩ matiĩtĩkĩtie ũhoro wa araika o na hanini.

Hihi araika marĩ kuo? Na angĩkorũo marĩ kuo-rĩ, moimire kũ? Ũhoro wa ma wĩgiĩ araika nĩ ũrĩkũ? Hihi nĩ mahutagia ũtũũro waku? Reke tũthuthurie ũira ũrĩa ũrĩ ho.