Bibilia ndĩrutanaga atĩ o mũndũ nĩ akoragwo na mũraika wa kũmũgitĩra. Nĩ ma, hĩndĩ ĩmwe Jesu nĩ oigire ũũ: “Mũtikananyarare [arutwo a Kristo] arĩa matariĩ ta twana, nĩ ũndũ ngũmwĩra atĩ araika ao nĩ monaga ũthiũ wa Awa ũrĩa ũrĩ igũrũ hĩndĩ ciothe.” (Mathayo 18:10) O na kũrĩ ũguo, handũ ha kuonania atĩ o mũndũ akoragwo na mũraika wa kũmũgitĩra, Jesu oigaga atĩ araika nĩ makenagĩra gũteithĩrĩria o ũmwe wa arutwo ake. Nĩ ũndũ ũcio, athathaiya a ma matiĩingĩragia ũgwati-inĩ na njĩra ĩtarĩ ya ũũgĩ makĩĩrĩgĩrĩra atĩ araika a Ngai nĩ mekũmagitĩra.

Hihi ũguo nĩ kuuga atĩ araika matiteithagia andũ? Aca. (Thaburi 91:11) Andũ amwe nĩ maiguaga marĩ na ma biũ atĩ Ngai nĩ aahũthĩrire araika kũmatongoria na kũmagitĩra. Kenneth, ũrĩa ũgwetetwo gĩcunjĩ-inĩ kĩa mbere, aiguaga ũguo. O na gũtuĩka tũtingĩkorũo na ma biũ, no gũkorũo ũguo nĩguo kũrĩ. Kaingĩ, Aira a Jehova nĩ monaga ũira wa ũteithio wa araika rĩrĩa marĩ wĩra-inĩ wa kũhunjia. O na kũrĩ ũguo, tondũ tũtingĩona araika, tũtingĩhota kuuga nĩ na gĩkĩro kĩrĩkũ Ngai amahũthagĩra gũteithia andũ maũndũ-inĩ matiganĩte. No tũtingĩkorũo tũhĩtĩtie tũngĩcokeria Ngai Mwene Hinya Wothe ngatho nĩ ũndũ wa ũteithio o wothe angĩkorũo atũhete.​—Akolosai 3:15; Jakubu 1:17, 18.