Andũ milioni nyingĩ thĩinĩ wa thĩ metĩkĩtie Krismasi nĩ mũthenya wa gũkũngũĩra gũciarũo kwa Jesu Kristo. O na kũrĩ ũguo-rĩ, hihi nĩ ũrĩ weciria kana andũ arĩa maarĩ a hakuhĩ mũno na Jesu ta arutwo ake na arũmĩrĩri ake nĩ maakũngũyagĩra Krismasi? Hihi nĩ ũĩ ũrĩa Bibilia yugaga igũrũ rĩgiĩ mĩthenya ya gũciarũo? Gwetha macokio ma ciũria ici no gũtũteithie kũmenya kana Akristiano nĩ magĩrĩirũo gũkũngũĩra Krismasi.

Ũndũ wa mbere nĩ atĩ, Bibilia ndĩgwetete atĩ Jesu kana ndungata ingĩ njĩhokeku cia Ngai nĩ maakũngũĩire mĩthenya yao ya gũciarũo. Maandĩko magwetete o andũ erĩ tu arĩa maakũngũĩire mĩthenya yao ya gũciarũo. Andũ acio erĩ matiarĩ athathaiya a Jehova, Ngai ũrĩa ũgwetetwo Bibilia-inĩ, na maũndũ moru nĩ meekĩkire ikũngũĩro-inĩ icio ciao. (Kĩambĩrĩria 40:20; Mariko 6:21) Kũringana na ibuku rĩmwe rĩĩtagwo Encyclopædia Britannica, Akristiano a tene nĩ maareganaga na “mũtugo wa ndini cia maheeni wa gũkũngũĩra mĩthenya ya gũciarũo.”

Bibilia ndĩgwetaga Jesu aaciarirũo mũthenya ũrĩkũ. Ibuku rĩmwe rĩĩtagwo McClintock and Strong’s Cyclopedia riugaga: “Mũthenya ũrĩa Kristo aaciarirũo ndũngĩmenyeka kũringana na Maandĩko ma Gĩkristiano ma Kĩngiriki o na kana kuuma ibuku-inĩ rĩngĩ o rĩothe.” Ũhoro wa ma nĩ atĩ, korũo Jesu nĩ eendaga arũmĩrĩri ake makũngũyagĩre mũthenya wake wa gũciarũo, nĩ aangĩatigĩrĩire atĩ nĩ maamenya aciarirũo mũthenya ũrĩkũ.

Ũndũ wa kerĩ nĩ atĩ, Bibilia ndĩgwetete atĩ Jesu kana mũrutwo wake o wothe nĩ aakũngũĩire Krismasi. Kũringana na ibuku rĩa New Catholic Encyclopedia, ikũngũĩro cia Krismasi ciagwetirũo rĩa mbere “ibuku-inĩ rĩa mwandĩki ũmwe Mũroma woĩkaine wetagwo Philocalus rĩa mwaka wa 336 thutha wa Kristo.” Ũhoro wa ma nĩ atĩ, ũndũ ũcio wekĩkire thutha wa Bibilia kũrĩka na nĩ thutha wa ihinda iraya kũhĩtũka kuuma rĩrĩa Jesu aarĩ gũkũ thĩ. Kwoguo, kũringana na ibuku rĩa McClintock and Strong, “ikũngũĩro cia Krismasi itiumanĩte na Ngai o na kana Maandĩko ma Gĩkristiano ma Kĩngiriki.” *

Jesu arĩ Mũrutani ũrĩa Mũnene, nĩ aaheanire mĩtaratara ya ũrĩa arutwo ake maabatiĩ gwĩka na maũndũ macio nĩ mandĩkĩtwo Bibilia-inĩ. O na kũrĩ ũguo, ndaagwetire ũhoro wĩgiĩ gũkũngũĩra Krismasi. O ta ũrĩa mwarimũ atangĩenda arutwo ake maagarare maũndũ marĩa amerĩte, no taguo Jesu atendaga arũmĩrĩri ake ‘maagarare maũndũ marĩa maandĩke’ thĩinĩ wa Maandĩko Matheru.—1 Akorintho 4:6.

O na kũrĩ ũguo, nĩ kũrĩ ũndũ ũmwe wa bata Akristiano a tene maamenyaga na nĩguo kũririkana gĩkuũ kĩa Jesu. Jesu we mwene nĩwe werire arutwo ake rĩrĩa maagĩrĩirũo kũririkana gĩkuũ gĩake na akĩmonia ũrĩa marĩkaga ũguo. Maũndũ macio maabatiĩ gwĩka o hamwe na mũthenya ũrĩa maagĩrĩirũo kũririkana gĩkuũ gĩake, nĩ mandĩkĩtwo thĩinĩ wa Bibilia.—Luka 22:7, 19; 1 Akorintho 11:25.

O ta ũrĩa tuona, Krismasi nĩ gũkũngũĩra mũthenya wa gũciarũo na Akristiano a tene matiarũmagĩrĩra mũtugo ũcio wa ndini cia maheeni. Makĩria ma ũguo, Bibilia ndĩgwetete Jesu kana mũndũ ũngĩ o wothe agĩkũngũĩra Krismasi. Thutha wa kũmenya maũndũ macio, Akristiano aingĩ thĩinĩ wa thĩ nĩ monete atĩ matiagĩrĩirũo gũkũngũĩra Krismasi.