1. Nĩkĩ Jehova nĩ agĩrĩire wĩrutĩri wa ngoro yothe kuuma kũrĩ ithuĩ?

JEHOVA nĩ agĩrĩire wĩrutĩri wa ngoro yothe kuuma kũrĩ ithuĩ tondũ nĩwe Mũũmbi witũ na nĩwe ũtũheete muoyo. (Kũg. 4:11) O na kũrĩ ũguo, nĩ harĩ ũritũ tũcemanagia naguo. O na gũtuĩka nĩ twendete Jehova na nĩ tũmũheete gĩtĩo, nĩ harĩ maũndũ mangĩtũgucĩrĩria twage kũmũhe wĩrutĩri wa ngoro yothe ũrĩa ũmwagĩrĩire. Nĩ tũrabatara gũtaũkĩrũo nĩ ũrĩa ũndũ ũcio ũngĩkĩka. No rekei twambe twarĩrĩrie maũndũ mamwe marĩa megũtũteithia gũtaũkĩrũo wĩrutĩri wa ngoro yothe nĩ kuuga atĩa.

2. Kũringana na ũrĩa Thama 34:14 yonanĩtie-rĩ, nĩ atĩa tũrĩkaga angĩkorũo nĩ tũrahe Jehova wĩrutĩri wa ngoro yothe?

² Kũringana na Bibilia, mũndũ gũkorũo na wĩrutĩri harĩ Ngai kuonanagia atĩ nĩ endete Ngai mũno. Angĩkorũo nĩ tũrahe Jehova wĩrutĩri wa ngoro yothe tũrĩmũthathayagia o we wiki. Tũtirĩtĩkagĩria mũndũ o na ũrĩkũ kana kĩndũ o na kĩrĩkũ gĩũke ithenya rĩake ngoro-inĩ citũ.—Thoma Thama 34:14.

3. Nĩkĩ tũrĩ na itũmi njega cia kwĩrutĩra harĩ Jehova?

³ Tũrĩ na itũmi njega cia kwĩrutĩra harĩ Jehova. Nĩkĩ? Tondũ wĩrutĩri witũ harĩ we ũkoragwo wĩhocetie harĩ maũndũ marĩa twĩrutĩte mamwĩgiĩ. Nĩ tũkenagio nĩ ngumo ciake njega. Nĩ tũĩ maũndũ marĩa endete na marĩa athũire, na o na ithuĩ nĩ  tũthũire marĩa athũire na tũkenda marĩa endete. Nĩ tũtaũkagĩrũo nĩ muoroto wake harĩ ithuĩ na nĩ tũũnyitaga mbaru. Tuonaga arĩ gĩtĩo kũheo nĩwe mweke wa gũkorũo tũrĩ arata ake. (Thab. 25:14) Maũndũ mothe marĩa twĩrutaga megiĩ Mũũmbi witũ nĩ matũmaga tũmũkuhĩrĩrie.—Jak. 4:8.

4. (a) Mũcukani ahũthagĩra kĩĩ gũtũma tũremwo kwĩrutĩra harĩ Jehova? (b) Tũkwarĩrĩria maũndũ marĩkũ gĩcunjĩ-inĩ gĩkĩ?

⁴ Mũcukani nĩwe ũtongoragia mũtabarĩre ũyũ wa maũndũ, na aũhũthagĩra gũtũma tuone maũndũ marĩa andũ mendete ũtũũro-inĩ marĩ ma bata, na gũtũma tũremwo nĩ kwĩgirĩrĩria merirĩria moru. (Ef. 2:1-3; 1 Joh. 5:19) Muoroto wake nĩ gũtũma tũgayanie wendo witũ harĩ Jehova na tũremwo kũmũhe wĩrutĩri wa ngoro yothe. Rekei twarĩrĩrie njĩra igĩrĩ Mũcukani angĩka ũguo nacio. Ya mbere, atũgeragia na njĩra ya gũtũma tũthingate ũtonga, na ya kerĩ, ageragia gũtũma tũthuure njĩra cia gwĩkenia iria itagĩrĩire.

5. Nĩkĩ no mũhaka twĩmenyerere tũtigakũrie wendo harĩ mbeca?

⁵ Ithuothe nĩ twendaga gũkorũo na irio cia kũigana, nguo iria ciagĩrĩire cia kwĩhumba, na handũ hega ha gũikara. O na kũrĩ ũguo, no mũhaka twĩmenyerere tũtigakũrie wendo harĩ mbeca. Andũ aingĩ ũmũthĩ thĩinĩ wa thĩ ya Shaitani nĩ “endi mbeca” na nĩ mendete indo iria ingĩgũrũo na mbeca. (2 Tim. 3:2) Jesu nĩ aamenyaga atĩ arũmĩrĩri ake nĩ mangĩkahatĩkwo makũrie wendo ũcio. Jesu ooigire ũũ: “Gũtirĩ mũndũ ũngĩhota gũtungatĩra athani erĩ; nĩ gũkorũo egũthũũra ũmwe na ende ũcio ũngĩ, kana egwatanie na ũmwe na anyarare ũcio ũngĩ. Mũtingĩtungatĩra Ngai na mũtungatĩre Ũtonga.” (Mat. 6:24) Mũndũ ũrĩa ũtungatagĩra Jehova o akĩhũthagĩra mahinda maingĩ mũno na hinya kũgeria gũkinyĩra ũtonga wa thĩ ĩno, nĩ ta akoragwo agĩtungatĩra athani erĩ. Ndangĩkorũo akĩhe Jehova wĩrutĩri wa ngoro yothe.

6. Tũngĩĩruta ũndũ ũrĩkũ na ciugo cia Jesu kũrĩ kĩũngano kĩa Laodikia?

 ⁶ Hakuhĩ mũthia-inĩ wa karine ya mbere, andũ a kĩũngano kĩrĩa kĩarĩ itũũra-inĩ rĩa Laodikia meeganaga makoiga ũũ: “Niĩ ndĩ mũtongu na nĩ ngĩĩte na ũtonga na ndirabatara kĩndũ o na kĩ.” No Jehova na Jesu maamonaga ‘marĩ na kĩeha na marĩ a kũiguĩrũo tha na athĩni na atumumu na marĩ njaga.’ Jesu nĩ aamaheire ũtaaro, ti tondũ wa gũkorũo marĩ atongu, no nĩ tondũ wendo wao kwerekera ũtonga nĩ wathũkagia ũrata wao hamwe na Jehova. (Kũg. 3:14-17) Tũngĩona ta tũrakũria merirĩria ma gũthingata ũtonga ngoro-inĩ, nĩ twagĩrĩirũo gwĩka na ihenya kũrũnga mwĩcirĩrie witũ. (1 Tim. 6:7, 8) Tũngĩaga gwĩka ũguo, ngoro itũ ĩrĩkoragwo ĩgayũkanĩte, na Jehova ndarĩtĩkagĩra ũthathaiya witũ. Endaga “wĩrutĩri wa ngoro yothe.” (Gũcok. 4:24) Nĩ na njĩra ĩrĩkũ mbeca ingĩkorũo irĩ cia bata mũno ũtũũro-inĩ witũ?

7-9. Ũreruta atĩa na kĩonereria kĩa mũthuri wa kĩũngano wĩtagwo David?

⁷ Ta wĩcirie ũhoro wa David, mũthuri wa kĩũngano ũrĩ kĩyo ũikaraga Amerika (US). Oigaga atĩ aarĩ mũruti wĩra warĩ kĩyo mũno. Nĩ aahaicirio ngathĩ kambuni-inĩ ĩrĩa aarutaga wĩra, na nginya akĩrũo atĩ aarĩ ũmwe wa aruti wĩra arĩa ega biũ bũrũri-inĩ. David ooigire ũũ: “Hĩndĩ ĩyo, ndeciragia atĩ kũgaacĩra kũu kuoonanagia irathimo cia Jehova.” No hihi nĩguo kwarĩ?

⁸ David nĩ aambĩrĩirie kuona ndariri itarĩ njega atĩ wĩra wake nĩ wathũkagia ũrata wake na Jehova. Ooigire ũũ: “Ndekoraga ngĩciria ũhoro wa mathĩna ma wĩra-inĩ ndĩ mĩcemanio-inĩ ya kĩũngano na nginya ndĩ ũtungata-inĩ. Nĩ ndonaga mbeca nyingĩ mũno, no nĩ ndaarĩ na mĩtangĩko mĩingĩ na kĩhiko gitũ nĩ kĩarĩ na mathĩna.”

⁹ David nĩ oonire bata wa gũtua nĩ kĩĩ kĩa  bata mũno harĩ we. Ooigire ũũ: “Nĩ ndatuire itua irũmu rĩa kũrũnga maũndũ.” David eendaga gũcenjia mũtaratara wake wa wĩra na nĩ ũndũ ũcio akĩmenyithia mũmwandĩki mũbango ũcio. Moimĩrĩro maarĩ marĩkũ? David nĩ aabutirũo wĩra! Eekire atĩa? Ooigire ũũ: “Mũthenya ũrĩa warũmĩrĩire, nĩ ndaiyũririe fomu ya gũtungata ndĩ painia wa gũteithĩrĩria wa gũthiĩ na mbere.” Nĩguo David na mũtumia wake mahote kuona mabataro mao, maambĩrĩirie kũrutaga mawĩra ma gũtheria. Thutha wa ihinda, David nĩ aatuĩkire painia wa hĩndĩ ciothe, na thutha ũcio mũtumia wake o nake agĩka guo. Maathuurire kũrutaga wĩra ũtendetwo nĩ andũ aingĩ, no wĩra ũrĩa marutaga tiguo ũndũ ũrĩa wa bata mũno harĩ o. O na gũtuĩka mũcara wao wanyihire nginya gĩcunjĩ gĩa ikũmi kĩa ũrĩa maarĩ naguo hau kabere, o mweri nĩ mahotaga kuona mũigana ũrĩa mabataraga wa mbeca wa kũhingia mabataro mao. Mendaga kũiga Jehova mbere, na nĩ meyoneire atĩ nĩ arũmbũyagia arĩa maigaga maũndũ ma Ũthamaki mbere.—Mat. 6:31-33.

10. Tũngĩgitĩra ngoro itũ atĩa?

¹⁰ O na angĩkorũo tũrĩ na indo nyingĩ cia kĩĩmwĩrĩ kana nini, nĩ tũrabatara kũgitĩra ngoro itũ. Tũngĩka ũguo atĩa? Ndũgakũrie wendo harĩ kũgĩa na ũtonga. Na ndũkareke wĩra waku wa kĩĩmwĩrĩ ũkorũo ũrĩ wa bata gũkĩra ũtungata waku harĩ Jehova. Ũngĩmenya atĩa atĩ wĩra waku wa kĩĩmwĩrĩ nĩ ũtuĩkĩte wa bata makĩria harĩ we? Ciũria imwe iria ũngĩĩyũria nĩ: ‘Hihi nĩ ndĩkoraga kaingĩ ngĩciria ũhoro wĩgiĩ wĩra wakwa wa kĩĩmwĩrĩ rĩrĩa ndĩ mĩcemanio-inĩ kana ũtungata-inĩ? Hihi nĩ thumbũkaga hingo ciothe ngĩciria kana ihinda rĩrĩa rĩroka nĩ ngakorũo na mbeca cia kũigana? Hihi mbeca na indo cia kĩĩmwĩrĩ nĩ itũmaga tũhĩtanie na ũrĩa tũhikanĩtie nake? Hihi no ngorũo ndĩhaarĩirie kũruta wĩra wonagwo ũrĩ wa gĩkĩro gĩa thĩ no ũranjĩtĩkĩria kũhũthĩra mahinda maingĩ ũtungata-inĩ wa Jehova?’ (1 Tim. 6:9-12) Tũgĩciria ũhoro wa ciũria icio, nĩ wega kũririkana atĩ Jehova nĩ atwendete na eranĩire kĩĩranĩro gĩkĩ harĩ arĩa merutĩire harĩ we: “Ndirĩ hĩndĩ ngaagũtiga, na ndirĩ hĩndĩ ngaagũtirika.” Nĩkĩo mũtũmwo Paulo aandĩkire ũũ: “Mũtũũrĩre-inĩ wanyu-rĩ, tigagai kwenda mbeca.”—Ahib. 13:5, 6.

11. Maũndũ ma gwĩkenia mangĩkorũo na moimĩrĩro marĩkũ harĩ mũndũ?

¹¹ Jehova nĩ endaga tũkenere ũtũũro, na maũndũ ma gwĩkenia no matũteithie ũndũ-inĩ ũcio. O na Kiugo kĩa Ngai kiugaga atĩ “gũtirĩ ũndũ mwega harĩ mũndũ, ũkĩrĩte kũrĩa na kũnyua na gũkenera wĩra wake mũritũ.”  (Koh. 2:24) No maũndũ maingĩ ma gwĩkenia marĩa marĩ thĩinĩ wa thĩ no matũthũkie. Matũmaga andũ mahũthie ithimi cia mĩtugo makamekĩra ngoro gwĩtĩkĩra o na kana kwenda maũndũ marĩa magirĩtio nĩ Kiugo kĩa Ngai.

12. Kũringana na 1 Akorintho 10:21, 22, nĩkĩ nĩ twagĩrĩirũo gũthuura wega maũndũ ma gwĩkenia?

¹² Tondũ twendaga kũhe Jehova wĩrutĩri wa ngoro yothe, tũtingĩrĩĩra “metha-inĩ ya Jehova” na “metha-inĩ ya ndaimono.” (Thoma 1 Akorintho 10:21, 22.) Kũrĩanĩra na mũndũ kuonanagia atĩ mũrĩ arata. Rĩrĩa tũrathuura maũndũ ma gwĩkenia marĩa matũgagĩria ngũĩ, maũndũ ma ũgo, mĩtugo ĩtarĩ mĩtheru, kana merirĩria na mĩerekera ĩngĩ ya mwĩrĩ, nĩ ta tũkoragwo tũkĩrĩanĩra na thũ cia Ngai. Moimĩrĩro ma ũndũ ũcio nĩ atĩ twĩthũkagia ithuĩ ene na tũgathũkia ũrata witũ hamwe na Jehova.

13-14. Kũringana na ũrĩa Jakubu 1:14, 15 yugaga-rĩ, nĩkĩ nĩ twagĩrĩirũo kwĩmenyerera ũhoro-inĩ wĩgiĩ maũndũ marĩa tũrathuura ma gwĩkenia? Heana ngerekano.

¹³ Nĩ na njĩra ĩrĩkũ maũndũ ma gwĩkenia mangĩringithanio na irio? Rĩrĩa tũrarĩa no tũhote gũthuura kĩrĩa tũgũikia kanua. No rĩrĩa twameria irio icio, tũtikoragwo na ũhoti wa gũthuura ũrĩa cigwĩka mĩĩrĩ-inĩ itũ. Irio njega no iteithie mĩĩrĩ itũ, no irio njũru no itũthũkie. Moimĩrĩro ma ũndũ ũcio no mage kuoneka hau hau, no thutha wa ihinda nĩ macokaga kuoneka.

¹⁴ O ũndũ ũmwe na ũcio, rĩrĩa tũrathuura maũndũ ma gwĩkenia no tũhote gũthuura kĩrĩa gĩkũingĩra meciria-inĩ maitũ. Thutha ũcio, rĩrĩa ũndũ wa gwĩkenia waingĩra meciria-inĩ na ngoro-inĩ citũ tũtingĩhota gũthuura ũrĩa tũkũhutio nĩ ũndũ ũcio. Ũndũ mwega wa gwĩkenia no ũtũcanjamũre, no ũndũ ũtagĩrĩire no ũtũthũkie. (Thoma Jakubu 1:14, 15.) Moimĩrĩro ma ũndũ mũũru wa gwĩkenia no mage kuoneka hau hau, no thutha wa ihinda nĩ macokaga kuoneka. Nĩkĩo Bibilia ĩtũheaga mũkaana ũyũ: “Mũtikahĩtithio: Ngai ti wa kũnyũrũrio. Nĩ gũkorũo kĩrĩa gĩothe mũndũ arahanda, kĩu nokĩo akaagetha; tondũ mũndũ ũrĩa ũrahanda atongoretio nĩ mwĩrĩ akaagetha kũbutha kuumana na mwĩrĩ wake.” (Gal. 6:7, 8) Nĩ ũndũ wa bata mũno tũreganage na maũndũ mothe ma gwĩkenia marĩa magathagĩrĩria maũndũ marĩa Jehova athũire.—Thab. 97:10.

15. Nĩ kĩheo kĩrĩkũ Jehova atũheete tũkenere?

¹⁵ Andũ aingĩ a Jehova nĩ makenagĩra kwĩrorera TV itũ ya JW Broadcasting^® ĩrĩa ĩkoragwo Intaneti-inĩ. Mwarĩ wa Ithe witũ ũmwe wĩtagwo Marilyn, ooigire ũũ: “JW Broadcasting nĩ ĩndeithĩtie gũkorũo ndĩna mwerekera mwega makĩria, na no ndĩĩrorere maũndũ mothe thĩinĩ wayo tondũ makoragwo marĩ mega. Rĩrĩa ndaigua ndĩna ihooru kana nguĩte ngoro, ndĩĩroragĩra mĩario ya kũnjĩkĩra ngoro kana gĩcunjĩ kĩa Ũthathaiya wa Rũcinĩ. Ũndũ ũcio nĩ ũtũmaga njigue nguhĩrĩirie Jehova o hamwe na ithondeka rĩake. JW Broadcasting nĩ ĩcenjetie ũtũũro wakwa biũ.” Hihi wee nĩ ũgunĩkaga nĩ kĩheo kuuma kũrĩ Jehova? JW Broadcasting ĩrehaga programu njerũ o mweri, indo irekondetwo, na video o hamwe na nyĩmbo cia gwĩkĩra ngoro iria cionekaga hĩndĩ o yothe.

16-17. Nĩkĩ nĩ twagĩrĩirũo kũrora mũno mahinda marĩa tũrahũthĩra gwĩkenia, na tũngĩka ũguo atĩa?

¹⁶ Nĩ twagĩrĩirũo kũrora mũno maũndũ ma gwĩkenia marĩa tũrathuura na ningĩ mũigana wa mahinda marĩa tũrahũthĩra maũndũ-inĩ macio. Tũngĩaga gwĩka ũguo, no twĩkore tũkĩhũthĩra mahinda maingĩ gwĩkenia gũkĩra marĩa tũrahũthĩra gũtungatĩra Jehova. Andũ aingĩ nĩ monaga arĩ ũndũ mũritũ gũthima  mahinda marĩa marahũthĩra gwĩkenia. Mwarĩ wa Ithe witũ wĩtagwo Abigail ũrĩ na mĩaka 18 ooigire ũũ: “Kwĩrorera TV nĩ kũndeithagia kũhurũka thutha wa gũkorũo na mũthenya ũrĩ na mĩhang’o mĩingĩ. No ingĩaga kwĩmenyerera no ndĩkore ngĩrorera TV mathaa maingĩ.” Mũrũ wa Ithe witũ mwĩthĩ wĩtagwo Samuel ooigire ũũ: “Rĩmwe na rĩmwe nĩ ndĩkoraga ndĩroreire tũvideo tũingĩ tũkuhĩ thĩinĩ wa Intaneti. Nyambagĩrĩria na kwĩrorera kamwe, no itekũmenya ngakora hũthĩrĩte mathaa matatũ kana mana.”

¹⁷ Ũngĩhota atĩa kũhũthĩra wega mahinda maku ũhoro-inĩ wĩgiĩ maũndũ ma gwĩkenia? Ikinya rĩa mbere nĩ kwamba kũmenya mahinda marĩa ũrahũthĩra maũndũ-inĩ ma gwĩkenia. Ũkuona atĩa ũngĩiga rekondi ya kiumia kĩmwe? No wandĩke karenda-inĩ mathaa marĩa ũhũthagĩra kwĩrorera TV, kũrora maũndũ Intaneti-inĩ, na gũthaaka mĩthaako ya thimũ. Ũngĩona nĩ ũrahũthĩra mahinda maingĩ mũno, no ũgerie kũbanga mũtaratara wa maũndũ ũrĩa ũrĩrũmagĩrĩra. No wambe ũbangĩre maũndũ marĩa ma bata makĩria, thutha ũcio maũndũ ma gwĩkenia. Ũcoke ũhoe Jehova agũteithie ũrũmĩrĩre mũtaratara ũcio. Ũngĩka ũguo nĩ ũrĩkoragwo na mahinda na hinya ũrĩa ũrabatara kwĩruta Bibilia, gwĩka ũthathayia wa famĩlĩ, gũthiĩ mĩcemanio-inĩ ya kĩũngano, na gũtungatĩra Jehova wĩra-inĩ wa kũhunjia na kũrutana. Ningĩ ndũrĩiguaga ũũru nĩ ũndũ wa mahinda marĩa wahũthĩra gwĩkenia.

18-19. Tũngĩonania atĩa atĩ nĩ tũrahe Jehova wĩrutĩri wa ngoro yothe?

¹⁸ Thutha wa mũtũmwo Petero kwandĩka ũhoro wĩgiĩ mũico wa thĩ ya Shaitani na ũhoro wĩgiĩ thĩ njerũ ĩrĩa ĩroka, ooigire ũũ: “Endwa akwa tondũ nĩ mwetereire maũndũ macio-rĩ, ĩkai ũrĩa wothe mũngĩhota nĩguo mũthia-inĩ akaamũkora mũtarĩ na kameni kana karooro na mũrĩ na thayũ.” (2 Pet. 3:14) Rĩrĩa twathĩkĩra ũtaaro ũcio na tweka ũrĩa wothe tũngĩhota gũikara tũrĩ atheru kĩĩroho na kĩĩmĩtugo, tuonanagia atĩ nĩ tũrahe Jehova wĩrutĩri wa ngoro yothe.

¹⁹ Shaitani na mũtabarĩre wake no megũthiĩ na mbere gũtũgeria tũigage maũndũ mangĩ mbere handũ ha gũthingata ũtungata wa Jehova. (Luk. 4:13) No o na tũngĩkorũo tũkĩgerera moritũ marĩkũ, tũtiagĩrĩirũo gwĩtĩkĩria mũndũ kana kĩndũ o na kĩrĩkũ kuoya ithenya rĩa Jehova ngoro-inĩ citũ. Muoroto witũ nĩ kũhe Jehova wĩrutĩri wa ngoro yothe, ũndũ ũrĩa nowe tu wagĩrĩire kũheo!