GĨCUNJĨ KĨA WĨRUTI KĨA 41
Ikara ũrĩ Mwĩhokeku Hĩndĩ ya “Thĩna Mũnene”
“Endai Jehova, inyuothe arĩa ehokeku harĩ we! Jehova nĩ agitagĩra arĩa ehokeku.”—THAB. 31:23.
RWĨMBO NA. 129 Tũthiĩi na Mbere Gũkirĩrĩria
GĨCUNJĨ-INĨ GĨKĨ *
1-2. (a) Nĩ ũndũ ũrĩkũ atongoria a thĩ mekwanĩrĩra ica ikuhĩ? (b) Tũkwarĩrĩria ciũria irĩkũ?
TA HŨŨRA mbica atĩ atongoria a thĩ nĩ marĩkĩtie kwanĩrĩra ũndũ ũrĩa warathĩtwo makoiga kũrĩ na “thayũ na ũgitĩri.” Marehũũra gĩthũri makoiga thĩ ndĩrĩ yakorũo na thayũ ta ũrĩa ĩrĩ naguo. Marenda andũ mecirie atĩ nĩ mahotete kũniina mathĩna mothe marĩa marĩ thĩinĩ wa thĩ. No matigaakorũo na ũhoti o na mũnini wa kũgirĩrĩria maũndũ marĩa makaarũmĩrĩra! Nĩkĩ? Tondũ o ta ũrĩa Bibilia yarathĩte, “mwanangĩko wa na ihenya nĩ ũkaamakora o rĩmwe, . . . na matikaahonoka o na atĩa.”—1 Thes. 5:3.
2 Nĩ tũrabatara kũmenya macokio ma ciũria ici cia bata: Nĩ maũndũ marĩkũ mageekĩka hĩndĩ ya “thĩna mũnene”? Jehova agaakorũo akĩĩrĩgĩrĩra twĩke atĩa ihinda-inĩ rĩu? Na tũngĩĩhaarĩria atĩa ihinda-inĩ rĩrĩ nĩguo tũkaahota gũikara tũrĩ ehokeku hĩndĩ ya thĩna ũrĩa mũnene?—Mat. 24:21.
NĨ MAŨNDŨ MARĨKŨ MAGEEKĨKA HĨNDĨ YA “THĨNA MŨNENE”?
3. Ngai akaaniina “Babuloni Ũrĩa Mũnene” atĩa kũringana na Kũguũrĩrio 17:5, 15-18?
3 Thoma Kũguũrĩrio 17:5, 15-18. “Babuloni Ũrĩa Mũnene” nĩ akaaniinwo! O ta ũrĩa hekũgwetetwo, atongoria a thĩ matikaahota kũgirĩrĩria maũndũ marĩa makaahaanĩka ihinda-inĩ rĩu. Makaaremwo nĩkĩ? Tondũ “Ngai nĩ [ageekĩra] ũndũ ũcio ngoro-inĩ ciao nĩguo mahingie rĩciria rĩake.” Rĩciria rĩrĩkũ? Rĩa kũniina ndini ciothe cia maheeni gũkũ thĩ, nginya iria ciĩĩtaga cia Gĩkristiano. * Ngai ageekĩra rĩciria rĩake ngoro-inĩ cia “hĩa ikũmi” cia “nyamũ ya gĩthaka ya rangi mũtune.” Hĩa icio ikũmi nĩ thirikari ciothe iria inyitaga mbaru “nyamũ ya gĩthaka,” ĩrĩa ĩrũgamĩrĩire Ũrũmwe wa Mabũrũri. (Kũg. 17:3, 11-13; 18:8) Rĩrĩa thirikari icio igaatharĩkĩra ndini cia maheeni, nĩrĩo thĩna ũrĩa mũnene ũkaambĩrĩria. Hatarĩ nganja, ũndũ ũcio ũgaakorũo ũrĩ wa kũmakania thĩinĩ wa thĩ yothe.
4. (a) Nĩ itũmi irĩkũ hihi igaatũma atongoria a thĩ mone arĩ wega gũtharĩkĩra ndini cia maheeni? (b) No kũhoteke andũ arĩa maarĩ ndini-inĩ icio mageeka atĩa?
4 Tũtiũĩ nĩ itũmi irĩkũ igaatũma atongoria a thĩ mone arĩ ũndũ mwega kũniina Babuloni Ũrĩa Mũnene. No gũkorũo hihi makoiga atĩ ndini nĩ igiragia gũkorũo na thayũ thĩinĩ wa thĩ na nĩ cingagĩrĩra maũndũ ma thirikari. Kana akorũo makoiga atĩ ndini icio nĩ igĩĩte na ũtonga na indo nyingĩ mũno. (Kũg. 18:3, 7) Hĩndĩ ĩrĩa thirikari igaatharĩkĩra ndini cia maheeni, no kũhoteke itikaaniina andũ othe a ndini icio. Handũ ha ũguo, no kũhoteke kĩrĩa gĩkaaniinwo nĩ mathondeka ma ndini icio. Rĩrĩa mathondeka macio makeeherio, andũ arĩa maarĩ ndini-inĩ icio nĩ makaamenya atĩ atongoria ao a ndini matiahingirie maũndũ marĩa maameerĩire na kwoguo no kũhoteke nĩ makaambĩrĩria gũkaana ndini icio.
5. Nĩ ũndũ ũrĩkũ Jehova eranĩire ageeka hĩndĩ ya thĩna mũnene, na nĩkĩ?
5 Bibilia ndĩonanĩtie ũrĩa ihinda rĩrĩa rĩkaahũthĩrũo kũniina Babuloni Ũrĩa Mũnene rĩgaakorũo rĩigana, no nĩ tũĩ ihinda rĩu rĩtigaakorũo rĩrĩ inene. (Kũg. 18:10, 21) Jehova eranĩire atĩ nĩ “akaanyihia matukũ macio” ma thĩna ũrĩa mũnene nĩgetha ahonokie “arĩa athuurĩte” o hamwe na ndini ya ma. (Mar. 13:19, 20) No Jehova agaakorũo akĩĩrĩgĩrĩra twĩke atĩa kuuma thĩna ũrĩa mũnene wambĩrĩria nginya hĩndĩ ya mbaara ya Hari–Magedoni?
THIĨ NA MBERE KŨNYITA MBARU ŨTHATHAIYA MŨTHERU WA JEHOVA
6. Nĩkĩ kuuma thĩinĩ wa ndini cia maheeni gwiki ti kũiganu?
6 O ta ũrĩa gĩcunjĩ kĩrĩa kĩhĩtũku kĩoonanagia, Jehova erĩgagĩrĩra ndungata ciake ciĩyeheranie na Babuloni Ũrĩa Mũnene. No kuuma thĩinĩ wa ndini cia maheeni gwiki ti kũiganu. No mũhaka tũtue itua rĩa kũrũmĩrĩra ũthathaiya mũtheru wa Jehova. Ta wĩcirie njĩra igĩrĩ tũngĩka ũguo nacio.
Rekei tũtikanatige gũcemania hamwe o na rĩrĩa maũndũ marĩ maritũ (Rora kĩbungo kĩa 7) *
7. (a) Tũngĩikara tũrũmĩtie ithimi cia Jehova cia ũthingu ciĩgiĩ mĩtugo na njĩra ĩrĩkũ? (b) Ahibirania 10:24, 25 ĩtĩtĩrithagia atĩa bata wa gũcemania hamwe makĩria ihinda-inĩ rĩrĩ?
7 Wa mbere, no mũhaka tũikarage tũrũmĩtie ithimi cia Jehova cia ũthingu ciĩgiĩ mĩtugo. Tũtiagĩrĩirũo gwĩtĩkĩra ithimi cia thĩ ciĩgiĩ mĩtugo. Kwa ngerekano, tũtiĩtĩkagĩra mũthemba o wothe wa ngomanio itagĩrĩire, o hamwe na ngomanio na ihiko cia arũme kwa arũme na atumia gwa atumia. (Mat. 19:4, 5; Rom. 1:26, 27) Wa kerĩ, no mũhaka tũthiĩ na mbere gũthathaiya hamwe na Akristiano arĩa angĩ. Tũthathayagĩria kũrĩa guothe tũngĩhota ta Nyũmba-inĩ cia Ũthamaki, na rĩmwe nginya mĩciĩ-inĩ ya aarĩ na ariũ a Ithe witũ kana kũndũ kũngĩ twĩhithĩte. O na kũngĩthiĩ atĩa, tũtirĩ hĩndĩ tũgaatiga gũcemania hamwe nĩ ũndũ wa ũthathaiya. Ũhoro wa ma nĩ atĩ, twagĩrĩirũo gũcemanagia hamwe na “tũgakĩrĩrĩria gwĩka ũguo o ũrĩa [tũrona] mũthenya ũcio ũgĩkuhĩrĩria.”—Thoma Ahibirania 10:24, 25.
8. No kũhoteke ndũmĩrĩri ĩrĩa tũhunjagia ĩgaacenjia atĩa ihinda rĩũkĩte?
8 Hĩndĩ ya thĩna mũnene, no kũhoteke ndũmĩrĩri ĩrĩa tũhunjagia nĩ ĩgaacenjia. Mahinda-inĩ maya, tũhunjagia ũhoro ũrĩa mwega wa Ũthamaki na tũkerutanĩria gũtua andũ arutwo. No ihinda-inĩ rĩu, no kũhoteke tũkaahunjagia ndũmĩrĩri nditũ ĩrĩa ĩringithanagio na ihũũra rĩa mbura ya mbembe. (Kũg. 16:21) No kũhoteke tũkaahunjagia atĩ thĩ ya Shaitani ĩrĩ hakuhĩ kũniinwo biũ. O ũrĩa ihinda rĩrathiĩ, nĩ tũkũmenya wega ndũmĩrĩri ĩrĩa tũkaahunjia ihinda-inĩ rĩu na ũrĩa tũkaamĩhunjia. Hihi tũkaahũthĩra njĩra iria tũkoretwo tũkĩhũthĩra makĩria ma mĩaka igana rĩmwe kũhunjia na kũrutana? Kana hihi tũkaahũthĩra njĩra ingĩ ngũrani? Tũkũbatara gweterera nĩguo tũkoona. No gũtekũmakania tũkaahũthĩra njĩra irĩkũ, nĩ tũgaakorũo na mweke wa kũhunjia ndũmĩrĩri ya ituĩro ya Jehova tũtarĩ na guoya!—Ezek. 2:3-5.
9. No kũhoteke ndũmĩrĩri ĩrĩa tũgaakorũo tũkĩhunjia ĩgaatũma mabũrũri meke atĩa? No nĩ ũndũ ũrĩkũ tũrĩ na ma naguo?
9 No kũhoteke ndũmĩrĩri ĩrĩa tũgaakorũo tũkĩhunjia nĩ ĩgaatũma mabũrũri mende gũtũkiria. O ta ũrĩa twĩhokaga Jehova ihinda-inĩ rĩrĩ atũteithie ũtungata-inĩ, noguo tũkeehoka atũteithie nginya ihinda-inĩ rĩu. Tũrĩ na ma atĩ Ngai witũ nĩ agaatũhee hinya nĩguo tũhingie wendi wake.—Mik. 3:8.
WĨHAARĨRIE NĨ ŨNDŨ WA THARĨKĨRO YA ANDŨ A NGAI
10. O ta ũrĩa Luka 21:25-28 yarathĩte-rĩ, maũndũ marĩa mageekĩka hĩndĩ ya thĩna ũrĩa mũnene magaatũma andũ aingĩ maigue atĩa?
10 Thoma Luka 21:25-28. Hĩndĩ ya thĩna ũrĩa mũnene, andũ nĩ makaamaka rĩrĩa makoona maũndũ marĩa meehokete makĩharagana. Nĩ makaiyũrũo nĩ “kĩeha,” magĩtigĩra matikae kũũrũo nĩ mĩoyo yao ihinda-inĩ rĩu iritũ. (Zef. 1:14, 15) Ihinda-inĩ rĩu, no kũhoteke ũtũũro ũgaakorũo ũrĩ mũritũ nginya harĩ andũ a Jehova. Tondũ tũtikoragwo tũrĩ gĩcunjĩ gĩa thĩ ĩno, no kũhoteke nĩ tũgaacemania na maũndũ maritũ. No gũkorũo nĩ tũkaagaga nginya indo imwe cia o mũhaka ũtũũro-inĩ.
11. (a) Nĩ kĩĩ gĩgaatũma andũ na atongoria a thĩ merekerie meciria mao harĩ Aira a Jehova? (b) Nĩkĩ tũtirabatara gwĩtigĩra thĩna ũrĩa mũnene?
11 No kũhoteke ihinda-inĩ rĩu, andũ arĩa maarĩ thĩinĩ wa ndini iria igaakorũo iniinĩtwo, nĩ makaarakarĩra Aira a Jehova tondũ no magaakorũo magĩthiĩ na mbere na ũthathayia wao. Ta hũũra mbica ũrĩa ũndũ ũcio ũkaarehe thĩna hihi nginya thĩinĩ wa social media. Thirikari cia thĩ na mũtongoria wacio Shaitani, nĩ magaatũmena tondũ ũthathayia witũ noguo ũtagaakorũo ũniinĩtwo. Makaarakara tondũ makoona nĩ maremetwo kũhingia muoroto wao wa kũniina ndini ciothe thĩinĩ wa thĩ. Kwoguo makeerekeria meciria mao mothe harĩ ithuĩ. Hĩndĩ ĩyo nĩrĩo mabũrũri makaahingia itemi rĩa Gogu wa Magogu. * Nĩ magaacokanĩrĩra nĩguo matharĩkĩre andũ a Jehova na hinya wao wothe. (Ezek. 38:2, 14-16) Ũhoro wa ma nĩ atĩ, gwĩciria ũhoro wĩgiĩ maũndũ macio no gũtũme mũndũ aigue guoya, makĩria tondũ tũtiũĩ maũndũ mothe marĩa mageekĩka. No ũndũ ũrĩa tũĩ nĩ atĩ: Tũtiagĩrĩirũo gwĩtigĩra thĩna ũrĩa mũnene. Jehova nĩ agaatũhee motaaro ma gũtũhonokia. (Thab. 34:19) Nĩ tũkaahota ‘kũrũgama twĩhandĩte na tũtiire mĩtwe itũ,’ tondũ tũgaakorũo tũkĩmenya atĩ ‘ũhonokio witũ nĩ ũrakuhĩrĩria.’ *
12. “Ngombo ĩrĩa njĩhokeku na njũgĩ” ĩkoretwo ĩgĩtũhaarĩria atĩa nĩ ũndũ wa maũndũ marĩa megwĩkĩka ihinda rĩroka?
12 “Ngombo ĩrĩa njĩhokeku na njũgĩ” nĩ ĩkoretwo ĩgĩtũhaarĩria ũrĩa tũngĩikara tũrĩ ehokeku hĩndĩ ya thĩna ũrĩa mũnene. (Mat. 24:45) Nĩ ĩtũhaarĩirie na njĩra nyingĩ, na ũndũ ũmwe ĩkĩte ũguo naguo nĩ kũgerera igomano cia thikũ ithatũ cia kuuma 2016-2018. Igomano icio nĩ itwĩkĩrĩte ngoro gwĩkĩra hinya ngumo iria tũrabatara o ũrĩa mũthenya wa Jehova ũrakuhĩrĩria. Rekei twarĩrĩrie ngumo icio na njĩra nguhĩ.
THIĨ NA MBERE GWĨKĨRA HINYA WĨHOKEKU, ŨKIRĨRĨRIA, NA ŨMĨRĨRU WAKU
Wĩhaarĩrie rĩu nĩguo ũkaahonoka “thĩna mũnene” (Rora kĩbungo kĩa 13-16) *
13. Tũngĩkĩra hinya atĩa wĩhokeku witũ harĩ Jehova? Twagĩrĩirũo gwĩka ũguo ihinda-inĩ rĩrĩ nĩkĩ?
13 Wĩhokeku: Kĩgomano kĩa 2016 kĩarĩ na kĩongo “Tũũra Ũrĩ Mwĩhokeku Harĩ Jehova!” Kĩgomano kĩu gĩatũrutire atĩ no tũhote gũkorũo tũrĩ ehokeku harĩ Jehova tũngĩkorũo na ũrata wa hakuhĩ biũ hamwe nake. Nĩ twaririkanirio atĩ no tũhote gũkuhĩrĩria Jehova kũgerera mahoya ma kuuma ngoro na kwĩruta Kiugo gĩake na kĩyo. Gwĩka ũguo, nĩ gũtũheaga hinya wa gũtooria nginya maũndũ marĩa mangĩkorũo marĩ maritũ mũno. O ũrĩa mũtabarĩre ũyũ wa Shaitani ũrakuhĩrĩria mũico, noguo twagĩrĩirũo kwĩrĩgĩrĩra atĩ wĩhokeku witũ harĩ Ngai na harĩ Ũthamaki wake nĩ ũkũgerio ona makĩria. No kũhoteke andũ nĩ megũthiĩ na mbere gũtũnyũrũria. (2 Pet. 3:3, 4) No gũthiĩ ũguo tondũ ithuĩ tũtinyitaga mbaru mwena o wothe wa thĩ ĩno ya Shaitani. No mũhaka twĩkĩre wĩhokeku witũ hinya ihinda-inĩ rĩrĩ nĩgetha tũkaahota gũikara tũrĩ ehokeku hĩndĩ ya thĩna ũrĩa mũnene.
14. (a) Nĩ ũgarũrũku ũrĩkũ ũgeekĩka ũhoro-inĩ wĩgiĩ ariũ a Ithe witũ arĩa matongoragia maũndũ thĩinĩ wa thĩ? (b) Tũkaabatara kuonania wĩhokeku ihinda-inĩ rĩu nĩkĩ?
14 Hĩndĩ ya thĩna ũrĩa mũnene, nĩ gũgaakorũo na ũgarũrũku ũhoro-inĩ wĩgiĩ ariũ a Ithe witũ arĩa magaakorũo magĩtongoria maũndũ thĩinĩ wa thĩ. Ihinda-inĩ rĩna hĩndĩ ya thĩna ũrĩa mũnene, aitĩrĩrie maguta othe arĩa magaakorũo matigarĩte thĩinĩ wa thĩ, nĩ magaathiĩ igũrũ nĩguo makanyite itemi rĩao mbaara-inĩ ya Hari–Magedoni. (Mat. 24:31; Kũg. 2:26, 27) Ũguo nĩ kuuga atĩ gũtigaakorũo na Kĩama Kĩrĩa Gĩtongoragia gũkũ thĩ. O na kũrĩ ũguo, kĩrĩndĩ kĩrĩa kĩnene no gĩgaakorũo kĩbangĩtwo wega. Ariũ a Ithe witũ arĩa magĩrĩire a ng’ondu ingĩ nĩo magaatongoragia maũndũ. Nĩ tũkaabatara kuonania wĩhokeku witũ harĩ Jehova na njĩra ya kũnyita ariũ a Ithe witũ acio mbaru na kũrũmĩrĩra ũtongoria ũrĩa magaatũheaga uumĩte kũrĩ Ngai. Kũhonoka gwitũ gũgaakorũo kwĩhocetie harĩ kũrũmĩrĩra ũtongoria ũcio!
15. Tũngĩkĩra hinya atĩa ũkirĩrĩria witũ? Nĩkĩ nĩ ũndũ wa bata gwĩka ũguo ihinda-inĩ rĩrĩ?
15 Ũkirĩrĩria: Kĩgomano kĩa 2017 kĩarĩ na kĩongo “Ndũgakue Ngoro!” Kĩgomano kĩu nĩ gĩatũteithirie gwĩkĩra hinya ũhoti witũ wa gũkirĩrĩria magerio. Nĩ twerutire atĩ ũkirĩrĩria witũ ndũkoragwo wĩhocetie harĩ ũrĩa maũndũ maitũ matariĩ. Ũkirĩrĩria witũ ũgĩaga hinya nĩ ũndũ wa kwĩhoka Jehova. (Rom. 12:12) Rekei tũtikanariganĩrũo nĩ ũndũ ũyũ Jesu eeranĩire: “Ũrĩa ũgaakirĩrĩria o nginya mũico nĩwe ũkaahonokio.” (Mat. 24:13, kohoro ka magũrũ-inĩ) Kĩĩranĩro kĩu kĩronania atĩ no mũhaka tũthiĩ na mbere gũkorũo tũrĩ ehokeku gũtekũmakania tũracemania na maũndũ mahaana atĩa. O ũrĩa tũrakirĩrĩria magerio ihinda-inĩ rĩrĩ, noguo tũkũgĩa hinya makĩria mbere ya thĩna ũrĩa mũnene wambĩrĩirie.
16. Ũmĩrĩru witũ ũkoragwo wĩhocetie harĩ kĩĩ? Tũngĩkĩra hinya atĩa ũmĩrĩru witũ mahinda-inĩ maya?
16 Ũmĩrĩru: Kĩgomano kĩa 2018 kĩarĩ na kĩongo “Gĩa na Ũmĩrĩru!” Kĩgomano kĩu gĩatũririkanirie atĩ ũmĩrĩru witũ ndũkoragwo wĩhocetie harĩ ũhoti witũ. O ta ũrĩa tũbataraga kwĩhoka Jehova nĩguo tũgĩe na ũkirĩrĩria, noguo tũbataraga kũmwĩhoka nĩguo tũgĩe na ũmĩrĩru. Tũngĩka atĩa nĩguo twĩhoke Jehova makĩria? Na njĩra ya gũthomaga Kiugo gĩake o mũthenya na gwĩcũrania ũrĩa Jehova anahonokia andũ ake mahinda mahĩtũku. (Thab. 68:20; 2 Pet. 2:9) Rĩrĩa tũgaatharĩkĩrũo hĩndĩ ya thĩna ũrĩa mũnene, nĩ tũkaabatara gũkorũo na ũmĩrĩru na kwĩhoka Jehova gũkĩra hĩndĩ ĩngĩ o yothe. (Thab. 112:7, 8; Ahib. 13:6) Tũngĩhoka Jehova mahinda-inĩ maya, nĩ tũgaakorũo na ũmĩrĩru ũrĩa ũkaabatarania rĩrĩa tũgaatharĩkĩrũo nĩ Gogu. *
IKARAGA WĨRĨGĨRĨIRE KŨHONOKIO
Jesu na mbũtũ yake ya igũrũ mahaicĩte mbarathi cia rangi mwerũ magĩthiĩ kũrũa mbaara ya Hari–Magedoni nĩguo maniine thũ cia Ngai! (Rora kĩbungo kĩa 17)
17. Nĩkĩ tũtiagĩrĩirũo gwĩtigĩra Hari–Magedoni? (Rora mbica ngothi-inĩ.)
17 O ta ũrĩa gĩcunjĩ kĩrĩa kĩhĩtũku kĩoonanirie, aingĩ aitũ tũtũũrĩte matukũ-inĩ ma kũrigĩrĩria ũtũũro-inĩ witũ wothe. Ningĩ no tũrerĩgĩrĩra gũkaahonoka thĩna ũrĩa mũnene. Mbaara ya Hari–Magedoni nĩyo ĩgaatiriha biũ mũico wa mũtabarĩre ũyũ. O na kũrĩ ũguo, tũtibatiĩ gwĩtigĩra. Nĩkĩ? Tondũ mbaara ĩyo ĩgaakorũo ĩrĩ ya Ngai. (Thim. 1:33; Ezek. 38:18-20; Zek. 14:3) Rĩrĩa Jehova akoiga nĩ hĩndĩ, Jesu Kristo nĩ agaatongoria mbũtũ ya Ngai mbaara-inĩ ĩyo. Jesu agaakorũo hamwe na arĩa aitĩrĩrie maguta arĩa magaakorũo mariũkĩtio, na araika makiri maingĩ. Marĩ hamwe, nĩ makaarũa na Shaitani, ndaimono ciake, na mbũtũ ciao cia gũkũ thĩ.—Dan. 12:1; Kũg. 6:2; 17:14.
18. (a) Jehova eranĩire ũndũ ũrĩkũ? (b) Kũguũrĩrio 7:9, 13-17 ĩgũteithagia atĩa kũgĩa na ma atĩ nĩ tũkaahonoka?
18 Jehova eranĩire ũũ: “Gũtirĩ itharaita rĩa mbaara rĩthondeketwo nĩ ũndũ waku rĩkaagaacĩra.” (Isa. 54:17) “Kĩrĩndĩ kĩnene” kĩa athathaiya ehokeku a Jehova nĩ gĩkaahonoka ‘thĩna ũrĩa mũnene’! Kuuma hĩndĩ ĩyo, nĩ magaathiĩ na mbere kũhe Jehova ũtungata mũtheru. (Thoma Kũguũrĩrio 7:9, 13-17.) Bibilia nĩ ĩtũheaga itũmi nyingĩ cia gũtũma tũkorũo na ma atĩ nĩ tũkaahonoka! Nĩ tũĩ atĩ “Jehova nĩ agitagĩra arĩa ehokeku.” (Thab. 31:23) Arĩa othe mendete Jehova na arĩa mamũgoocaga nĩ magaakena kuona agĩtheria rĩĩtwa rĩake itheru.—Ezek. 38:23.
19. Nĩ kĩĩrĩgĩrĩro kĩrĩkũ gĩkũhinga ica ikuhĩ?
19 Ta wĩcirie 2 Timotheo 3:2-5 ĩngĩkorũo na ciugo irĩkũ korũo ĩtaaragĩria andũ arĩa magaakorũo thĩinĩ wa thĩ njerũ gũtarĩ na Shaitani. (Rora gathandũkũ “ Ũrĩa Andũ Magaakorũo Matariĩ Hĩndĩ Ĩyo.”) Mũrũ wa Ithe Witũ George Gangas, ũrĩa watungataga thĩinĩ wa Kĩama Kĩrĩa Gĩtongoragia aataarĩirie ũndũ ũcio na njĩra ĩno: “Ũgwĩciria thĩ ĩngĩkorũo ĩhaana atĩa korũo andũ othe nĩ aarĩ kana ariũ a Ithe witũ! Ica ikuhĩ nĩ ũgũkorũo na mweke wa gũtũũra thĩinĩ wa mũtabarĩre mwerũ wa maũndũ. Tondũ Jehova atũũraga tene na tene, o na ithuĩ tũgaatũũra tene na tene.” Na githĩ kĩu ti kĩĩrĩgĩrĩro kĩega mũno!
RWĨMBO NA. 122 Ikaragai Mwĩrũmĩtie, Mũtegũthengeka!
^ kĩb. 5 Nĩ tũĩ atĩ ica ikuhĩ nĩ gũkũgĩa “thĩna mũnene” ũrĩa ũrĩũka igũrũ rĩa andũ othe. Ũndũ ũcio ũgaatũhutia atĩa? Jehova akeerĩgĩrĩra twĩke atĩa hĩndĩ ĩyo? Nĩ ngumo irĩkũ tũrabatara gwĩkĩra hinya ihinda-inĩ rĩrĩ nĩguo tũtũũre tũrĩ ehokeku? Gĩcunjĩ gĩkĩ nĩ kĩarĩrĩirie maũndũ macio.
^ kĩb. 3 GŨTAARĨRIA CIUGO: Ndini iria ciĩĩtaga cia Gĩkristiano nĩ iria ciugaga atĩ irũmagĩrĩra Kristo, no itithathayagia Jehova kũringana na ũrĩa endaga.
^ kĩb. 11 GŨTAARĨRIA CIUGO: Gogu wa Magogu (na Gogu, kiugo kĩmwe kĩrĩa kĩrũgamagĩrĩra ciugo icio) nĩ ngwatanĩro ya mabũrũri ma gũkũ thĩ ĩrĩa ĩgaatharĩkĩra athathaiya a ma hĩndĩ ya thĩna ũrĩa mũnene.
^ kĩb. 11 Nĩguo wone ũhoro mũrikĩru wĩgiĩ maũndũ mothe marĩa mageekĩka mbere ya Hari–Magedoni, rora gĩcunjĩ kĩa 21 kĩa ibuku Ũthamaki wa Ngai nĩ Ũrathana! Nĩguo wone ũhoro makĩria wĩgiĩ tharĩkĩro ya Gogu wa Magogu na ũrĩa Jehova akaagitĩra andũ ake hĩndĩ ya Hari–Magedoni, rora gĩcunjĩ gĩa 17 na 18 kĩa ibuku Ũthathaiya Mũtheru wa Jehova nĩ Ũcoketio!
^ kĩb. 16 Kĩgomano kĩa 2019 kĩrĩ na kĩongo “Wendo Ndũrĩ Hĩndĩ Ũthiraga!” nĩ gĩtũteithĩtie kũgĩa na ma atĩ no tũkorũo na ũgitĩri tũrĩ rungu rwa ũgitĩri wa wendo wa Jehova.—1 Kor. 13:8.
