1. Nĩ ũndũ ũrĩkũ twĩriragĩria kuona andũ aitũ a famĩlĩ magĩka?

MWARĨ WA ITHE WITŨ ũmwe wĩtagwo Pauline ooigire ũũ: “Kuuma rĩrĩa nderutire ũhoro wa ma ngoretwo ngĩenda o mũndũ famĩlĩ-inĩ yakwa agaakorũo Paradiso hamwe na niĩ. * Mũno makĩria ndendaga mũthuri wakwa Wayne, hamwe na kamwana gaitũ manyitanĩre na niĩ gũtungatĩra Jehova.” Hihi nĩ ũrĩ na andũ a famĩlĩ matarĩ ndungata cia Jehova? O ta Pauline, no kũhoteke nĩ wĩriragĩria kuona magĩtuĩka ndungata cia Jehova.

2. Tũkwarĩrĩria ciũria irĩkũ gĩcunjĩ-inĩ gĩkĩ?

² Tũtingĩtindĩkĩrĩria andũ aitũ a famĩlĩ metĩkĩre ũhoro mwega, ĩndĩ no tũmekĩre ngoro mecũranie ũhoro wĩgiĩ ndũmĩrĩri ya Bibilia na mamĩtĩkĩre. (2 Tim. 3:14, 15) Nĩkĩ nĩ twagĩrĩirũo kũhunjĩria andũ aitũ a famĩlĩ? Twagĩrĩirũo kũmonia ũcayanĩri nĩkĩ? Nĩ maũndũ marĩkũ tũngĩka gũteithia andũ aitũ a famĩlĩ mende Jehova ta ũrĩa ithuĩ tũmwendete? Aarĩ na ariũ a Ithe witũ othe kĩũngano-inĩ mangĩtũteithia atĩa?

3. Twagĩrĩirũo kũhunjĩria andũ aitũ a famĩlĩ nĩkĩ kũringana na 2 Petero 3:9?

³ Ica ikuhĩ, Jehova nĩ ekũniina mũtabarĩre ũyũ. Arĩa marĩ na “mwerekera ũrĩa wagĩrĩire wa kũheo muoyo wa tene na tene” no o tu makaahonoka. (Atũm. 13:48) Nĩ tũhũthagĩra mahinda na hinya mũingĩ kũhunjĩria andũ arĩa tũtoĩ gĩcigo-inĩ  gitũ, na o na andũ aitũ a famĩlĩ no twende kũmahunjĩria nĩguo matungatĩre Jehova hamwe na ithuĩ. Jehova Ithe witũ ũrĩ wendo, “ndendaga mũndũ o na ũmwe akaaniinwo no endaga othe merire.”—Thoma 2 Petero 3:9.

4. Nĩ ihĩtia rĩrĩkũ tũngĩĩkora tũgĩka tũkĩhunjĩria andũ aitũ a famĩlĩ?

⁴ Nĩ twagĩrĩirũo kũririkana atĩ njĩra ĩrĩa tũrahunjia ndũmĩrĩri ya ũhonokio nayo no ĩkorũo ĩrĩ njega kana ĩtarĩ njega. Kwa ngerekano, no twĩkore tũkĩarĩria mũndũ tũtoĩ na njĩra ya gĩtĩo, ĩndĩ tũkĩaria na andũ aitũ a famĩlĩ tũkaga kũmacaĩra.

5. Nĩ ũndũ ũrĩkũ twagĩrĩirũo kũririkana rĩrĩa tũrahunjĩria andũ aitũ a famĩlĩ?

⁵ Aingĩ aitũ tũngĩciria njĩra ĩrĩa twahũthĩrire kũhunjĩria andũ aitũ a famĩlĩ riita rĩa mbere, nĩ tũiguaga ũũru na tũkerira na arĩ korũo nĩ twahũthĩrire njĩra njegega. Mũtũmwo Paulo aataarire Akristiano ũũ: “Rekei ciugo cianyu ikoragwo irĩ cia ũtugi hingo ciothe, ta ciĩkĩrĩtwo cumbĩ, nĩgetha mũmenyage ũrĩa mwagĩrĩirũo gũcokeria o mũndũ.” (Kol. 4:5, 6) Nĩ wega kũririkanaga ũtaaro ũcio rĩrĩa tũraaria na andũ aitũ a famĩlĩ. Kwaga ũguo, no tũtũme matũraihĩrĩrie handũ ha kũmateithia matũthikĩrĩrie.

6-7. Heana ngerekano ĩronania bata wa Mũkristiano kuonania ũcayanĩri harĩ mũthuri kana mũtumia wake ũtarĩ Mũira wa Jehova.

⁶ Onanagia ũcayanĩri. Pauline, ũrĩa ũkũgwetetwo ooigire ũũ: “Kĩambĩrĩria-inĩ, ndeendaga kwaria na mũthuri wakwa o maũndũ ma kĩĩroho tu. Tũtirĩ hĩndĩ twaragia maũndũ megiĩ ũtũũro wa o mũthenya.” No Wayne mũthuri wa Pauline, ndooĩ maũndũ maingĩ megiĩ Bibilia na ndaataũkagĩrũo nĩ maũndũ marĩa Pauline aamwĩraga. Oonaga ta Pauline  eeciragia o maũndũ ma ndini. Nĩ aamakaga ndagakorũo nĩ eingĩranĩtie na gĩkundi gĩtarĩ kĩega na akorũo nĩ araheenio.

⁷ Pauline ooigire atĩ kwa ihinda rĩigana ũna nĩ aahũthagĩra mahinda maingĩ hwaĩ-inĩ na mũthia-inĩ wa kiumia hamwe na aarĩ na ariũ a Ithe witũ mĩcemanio-inĩ, ũtungata-inĩ, na magĩceeranĩra. Ooigire ũũ: “Nĩ kũrĩ hĩndĩ Wayne aainũkaga mũciĩ agakora gũtarĩ mũndũ, ũndũ ũcio ũgatũma aigue ihooru.” Ũrĩa kũrĩ nĩ atĩ Wayne nĩ eeriragĩria mũno gũkorũo na mũtumia wake na kamwana kao. Wayne ndaamenyaga andũ arĩa maakoragwo hamwe na famĩlĩ yake, na oonaga ta arata acio erũ a mũtumia wake maatuĩkĩte a bata mũno harĩ we kũmũkĩra. Wayne eerire Pauline atĩ ũndũ ũrĩa mwega no matiganire. Hihi no wĩcirie njĩra iria Pauline angĩahũthĩrire kuonania ũcayanĩri makĩria?

8. Kũringana na 1 Petero 3:1, 2, nĩ kĩĩ kĩngĩgucĩrĩria andũ aitũ a famĩlĩ makĩria?

⁸ Iga kĩonereria kĩega. Kaingĩ ciĩko citũ nĩ cionekaga nĩ andũ a famĩlĩ gũkĩra ciugo. (Thoma 1 Petero 3:1, 2.) Mũthia-inĩ Pauline nĩ aataũkĩirũo nĩ ũndũ ũcio. Ooigire ũũ: “Nĩ ndaamenyaga atĩ Wayne nĩ aatwendete na ndeendaga tũtigane. No rĩrĩa aambĩrĩirie kwaria ũhoro wĩgiĩ ndigano, nĩ ndoonire atĩ nĩ ndaabataraga kwambĩrĩria gwĩka maũndũ kũringana na ũtaaro wa Jehova. Handũ ha kwaria mũno, ndaabataraga kũiga kĩonereria kĩega kũgerera ciĩko ciakwa.” Pauline nĩ aatigire gũtindĩkĩrĩria Wayne kwaria ũhoro wĩgiĩ Bibilia, na akĩambĩrĩria kwaragia nake maũndũ megiĩ ũtũũro wa o mũthenya. Wayne nĩ oonire atĩ Pauline nĩ aagagĩrĩte agatuĩka mũndũ wa thayũ nako kamwana kao gakagĩa na mĩtugo mĩega. (Thim. 31:18, 27, 28) Rĩrĩa  Wayne oonire ũrĩa ndũmĩrĩri ya Bibilia yarĩ na moimĩrĩro mega harĩ famĩlĩ yake, akĩambĩrĩria gwĩcũrania na gũkenio nĩ ndũmĩrĩri ya Bibilia.—1 Kor. 7:12-14, 16.

9. Twagĩrĩirũo kwĩrutanĩria gũteithia andũ aitũ a famĩlĩ nĩkĩ?

⁹ Thiĩ na mbere kwĩrutanĩria gũteithia andũ anyu a famĩlĩ. Jehova nĩ atũigĩire kĩonereria. Nĩ aheaga andũ mweke o “rĩngĩ na rĩngĩ” wa gwĩtĩkĩra ũhoro mwega nĩguo makoona muoyo. (Jer. 44:4) Mũtũmwo Paulo eerire Timotheo atũũre ateithagia arĩa angĩ. Nĩkĩ? Tondũ na njĩra ya gwĩka ũguo, nĩ angĩehonokirie we mwene na ahonokie arĩa mangĩamũthikĩrĩirie. (1 Tim. 4:16) Nĩ twendete andũ aitũ a famĩlĩ, na nĩ ũndũ ũcio twendaga mamenye ma iria irĩ Kiugo-inĩ kĩa Ngai. Thutha wa ihinda, ciugo na ciĩko cia Pauline nĩ ciagĩire na moimĩrĩro mega famĩlĩ-inĩ yake. Rĩu nĩ akoragwo na gĩkeno gũtungatĩra Jehova hamwe na mũthuri wake. Erĩ nĩ mapainia, na Wayne atungataga arĩ mũthuri wa kĩũngano.

10. Tũrabatara gũkorũo na wetereri nĩkĩ?

¹⁰ Koragwo na wetereri. Rĩrĩa ũtũũro witũ wagarũrũka twambĩrĩria gũtũũra kũringana na ithimi cia Ngai, andũ aitũ a famĩlĩ no mone arĩ ũritũ gwĩtĩkĩra ũgarũrũku ũcio. Kaingĩ, ũndũ wa mbere ũrĩa monaga nĩ atĩ tũtiranyitanĩra nao ikũngũĩro-inĩ cia kĩndini na tũtireingĩria ũteti-inĩ ta ũrĩa twekaga hau kabere. Kĩambĩrĩria-inĩ andũ amwe a famĩlĩ no matũrakarĩre. (Mat. 10:35, 36) No tũtiagĩrĩirũo kuona ta matangĩgarũrũka. Tũngĩtiga kũgeria kũmateithia mataũkĩrũo nĩ ũrĩa twĩtĩkĩtie, tũngĩkorũo tũkĩmatuĩra ciira atĩ matiagĩrĩire kũheo muoyo wa tene na tene. Jehova ndatũheete wĩra wa gũtuanĩra ciira, ehokeire Jesu wĩra ũcio. (Joh. 5:22) Tũngĩkorũo na wetereri, andũ aitũ a famĩlĩ mũthia-inĩ no mathikĩrĩrie ndũmĩrĩri itũ.—Rora gathandũkũ “ Hũthagĩra Website Itũ Kũrutana.”

11-13. Ũreruta ũndũ ũrĩkũ kuumana na ũrĩa Alice aahiũranirie na aciari ake?

¹¹ Koragwo na ũtaũku ĩndĩ ndũkaregerie mũrũgamo waku. (Thim. 15:2) Wĩcirie ngerekano ya Alice. Eerutire ũhoro wĩgiĩ Jehova arĩ kũraihu na aciari ake arĩa mateetĩkĩtie ũhoro wĩgiĩ Ngai, na nĩ meingĩranĩtie na maũndũ ma ũteti. Nĩ oonire atĩ nĩ aabataraga kũmeera o na ihenya ũhoro wĩgiĩ maũndũ mega marĩa eerutaga. Alice ooigire ũũ: “Ũngĩeterera ihinda rĩhĩtũke ũtarĩ ũrera famĩlĩ yanyu ũhoro wĩgiĩ mogarũrũku megiĩ wĩtĩkio na mĩthiĩre yaku, ũndũ ũcio no ũmamakie mũno.” Aandĩkagĩra aciari ake marũa, akamoria mawoni mao megiĩ morutani ma Bibilia marĩa oonaga ta mangĩmakenia ta ũhoro wĩgiĩ wendo. (1 Kor. 13:1-13) Nĩ aacokagĩria aciari ake ngatho nĩ ũndũ wa kũmũrera na kũmũrũmbũiya, na akamatũmĩra iheo. Rĩrĩa aceerera aciari ake, nĩ eerutanagĩria gũteithia mami wao mawĩra ma mũciĩ. Kĩambĩrĩria-inĩ, aciari ake matiakenire rĩrĩa Alice aameerire ũhoro wĩgiĩ wĩtĩkio wake mwerũ.

¹² Alice arĩ mũciĩ na aciari ake no aathiaga na mbere kũrũmĩrĩra mũbango wake wa gũthoma Bibilia o mũthenya. Ooigire ũũ: “Ũndũ ũcio nĩ wateithagia mami gũtaũkĩrũo atĩ Bibilia yarĩ ya bata harĩ niĩ.” Thutha wa ihinda, baba wa Alice nĩ aatuire itua rĩa kwĩruta tũmaũndũ tũnini kuuma Bibilia-inĩ, nĩgetha ataũkĩrũo kĩrĩa gĩatũmĩte mwarĩ eke ũgarũrũku. Ningĩ nĩ eendaga kũruta Bibilia mahĩtia. Alice ooigire ũũ: “Ndamũheire Bibilia na ngĩmwandĩkĩra marũa ngĩmaikia hau thĩinĩ.” Moimĩrĩro maarĩ marĩkũ? Handũ ha kuona mahĩtia, baba wa Alice nĩ aahutirio mũno nĩ maũndũ marĩa aathomire Kiugo-inĩ kĩa Ngai.

 ¹³ Tũbatiĩ gũkorũo na ũtaũku na tũtikaregerie mũrũgamo witũ o na angĩkorũo gwĩka ũguo no gũtũme tũcemanie na moritũ. (1 Kor. 4:12b) Kwa ngerekano, Alice nĩ aabatarire gũkirĩrĩria ũkararia kuuma kũrĩ mami wao. Ooigire ũũ: “Ndabatithio, mami ooigire ndĩ ‘mũirĩtu mũũru.’” Alice eekire atĩa? Ooigire ũũ: “Handũ ha gwĩthema kwarĩrĩria wĩtĩkio wakwa mwerũ, ndamũtaarĩirie na gĩtĩo atĩ nĩ ndatuĩte itua rĩa gũtuĩka Mũira wa Jehova na ndingĩacenjirie itua rĩu. Nĩ ndageririe gũtaarĩria mami atĩ nĩ ndĩmwendete mũno. Nĩ twarĩranĩire na ngĩmũrugĩra irio njega. Kuuma hĩndĩ ĩyo, mami nĩ aambĩrĩirie gwĩtĩkĩra atĩ Bibilia nĩ yatũmaga nduĩke mũndũ mwega makĩria.”

14. Nĩkĩ tũtiagĩrĩirũo kũreka andũ a famĩlĩ maregerie mũrũgamo witũ?

¹⁴ Ihinda no rĩhĩtũke andũ aitũ a famĩlĩ magĩgataũkĩrũo biũ ũrĩa gũtungatĩra Jehova kũrĩ kwa bata harĩ ithuĩ. Kwa ngerekano, mami wa Alice nĩ aarĩrire rĩngĩ rĩrĩa Alice aatuire itua rĩa kwambĩrĩria ũpainia handũ ha gũthingata wĩra ũrĩa aciari ake maamũthurĩire. O na kũrĩ ũguo, Alice ndaaregeririe mũrũgamo wake. Ooigire ũũ: “Ũngĩtĩkĩria andũ a famĩlĩ macenjie mũrũgamo waku ũndũ-inĩ ũmwe, kũrĩ na ũhotekeku nĩ mekũgeria gũcenjia mũrũgamo waku o na maũndũ-inĩ mangĩ. No ũngĩaga kũregeria mũrũgamo waku na ũkorũo na ũtaũku ũkĩhiũrania na andũ a famĩlĩ, amwe ao mahota gũgũthikĩrĩria.” Ũguo nĩguo gwathiire harĩ Alice. Aciari ake erĩ rĩu nĩ mapainia na ithe nĩ mũthuri wa kĩũngano.

15. Kũringana na Mathayo 5:14-16 na 1 Petero 2:12, ‘ciĩko njega’ ingĩteithia andũ aitũ a famĩlĩ atĩa?

¹⁵ Jehova agucagĩrĩria andũ harĩ we akĩhũthĩra ‘ciĩko njega’ cia kĩũngano gĩa Gĩkristiano.  (Thoma Mathayo 5:14-16; 1 Petero 2:12.) Angĩkorũo ũrĩa mũhikanĩtie nake ti Mũira wa Jehova-rĩ, hihi nĩ oĩ andũ a kĩũngano kĩanyu? Pauline ũrĩa ũkũgwetetwo hau kabere, nĩ aanyitire ũgeni aarĩ na ariũ a Ithe witũ gwake mũciĩ nĩgetha mũthuri wake Wayne amamenye. Wayne agĩtaarĩria ũrĩa mũrũ wa Ithe witũ ũmwe aamũteithirie gũtaũkĩrũo wega nĩ Aira a Jehova ooigire ũũ: “Aahoire rũtha wĩra-inĩ nĩgetha twĩrorere mũbira nake. Ũndũ ũcio watũmire ndĩĩre, ‘Nĩ mũndũ o ta arĩa angĩ!’”

16. Nĩkĩ nĩ twagĩrĩirũo kũnyita ũgeni andũ aitũ a famĩlĩ moke mĩcemanio?

¹⁶ Njĩra ĩmwe njega mũno ya gũteithia andũ aitũ a famĩlĩ nĩ kũmanyita ũgeni mĩcemanio-inĩ itũ. (1 Kor. 14:24, 25) Mũcemanio wa mbere ũrĩa Wayne aathiire nĩ Kĩririkano, tondũ nĩ mũcemanio mũkuhĩ na wekagwo thutha wa mathaa ma wĩra. Ooigire ũũ: “Ndiataũkĩirũo mĩario yaragia ũhoro wa kĩĩ, no nĩ ndaakenirio mũno nĩ andũ. Andũ mookaga harĩ niĩ makangeithia macanjamũkĩte. Nĩ ndonaga mareka ũguo kuuma ngoro.” Mũrũ wa Ithe witũ ũmwe na mũtumia wake nĩ maakoretwo makĩonia Pauline ũtugi, na njĩra ya kũmũteithia kũrũmbũiya kamwana kao marĩ mĩcemanio-inĩ na ũtungata-inĩ. Nĩ ũndũ ũcio, rĩrĩa Wayne aatuire atĩ nĩ ekwenda gũtaũkĩrũo makĩria nĩ wĩtĩkio ũcio mwerũ wa Pauline, nĩ eerire mũrũ wa Ithe witũ ũcio amũrutage Bibilia.

17. Nĩ ũndũ ũrĩkũ ũtabatiĩ gũtũma twĩmene? Nĩkĩ tũtiagĩrĩirũo gwĩciria atĩ andũ aitũ a famĩlĩ matingĩcenjia?

¹⁷ No twende andũ aitũ othe a famĩlĩ manyitanĩre na ithuĩ matuĩke ndungata cia Jehova. Ĩndĩ o na tũkĩĩrutanagĩria mũno gũteithia andũ aitũ a famĩlĩ matuĩke ndungata cia Ngai, no mage gwĩtĩkĩra ũhoro wa ma. Kũngĩthiĩ ũguo, tũtiagĩrĩirũo kwĩmena nĩ ũndũ wa itua rĩrĩa mangĩtua. Ũhoro wa ma nĩ atĩ, tũtingĩringĩrĩria mũndũ o na ũrĩkũ etĩkĩre ũhoro wa ma. O na kũrĩ ũguo, andũ anyu a famĩlĩ mahota kũgucĩrĩrio na njĩra nene mangĩona ũrĩa ũkoragwo na gĩkeno ũgĩtungatĩra Jehova. Mahoyagĩre. Hũthagĩra ũtaũku rĩrĩa ũraria nao. Ndũgakue ngoro ũkĩmateithia. (Atũm. 20:20) Koragwo na ma atĩ Jehova nĩ arĩrathimaga kĩyo gĩaku. Andũ anyu a famĩlĩ mangĩthuura gũgũthikĩrĩria, nĩ makaahonokio!