1, 2. (a) Wendo na wĩtĩkio ikonainie atĩa? (b) Nĩ ciũria irĩkũ tũkwarĩrĩria?

NĨ TWENDETE Jehova “tondũ we nĩ aambire gũtwenda.” (1 Joh. 4:19) Jehova oete mweke wa mbere wa kũrathima ndungata ciake njĩhokeku ĩrĩ ta njĩra ĩmwe ya iria onanagia wendo nacio. O ũrĩa tũthiaga na mbere kwenda Jehova, noguo wĩtĩkio witũ ũgĩaga na hinya, tũgetĩkia arĩ kuo, na atĩ nĩ arathimaga arĩa othe endete.—Thoma Ahibirania 11:6.

² Gũkorũo atĩ Jehova nĩ arathimaga ndungata ciake kuonanagia ũrĩa we atariĩ na maũndũ marĩa ekaga. Wĩtĩkio witũ ndũngĩkorũo ũrĩ mũkinyanĩru tũngĩaga gũkorũo na ma biũ atĩ Ngai nĩ arathimaga arĩa mamũcaragia na kĩyo, tondũ “wĩtĩkio nĩ gũkorũo na kĩĩrĩgĩrĩro kĩa ma kĩa maũndũ marĩa matanyĩtwo.” (Ahib. 11:1) Wĩtĩkio nĩ gũkorũo na ma biũ atĩ ciĩranĩro cia Jehova nĩ ikahinga. Gũkorũo na kĩĩrĩgĩrĩro kĩa irathimo gũtũgunaga atĩa? Jehova aarathimire ndungata ciake cia tene atĩa, na arathimaga atĩa ndungata ciake cia mahinda maya? Rekei tuone.

3. Nĩ kĩĩranĩro kĩrĩkũ gĩkoragwo thĩinĩ wa Malaki 3:10?

³ Jehova nĩ erutĩire kũrathimaga ndungata ciake njĩhokeku, kwoguo nĩ endaga tũcarie irathimo ciake. Bibilia yugaga ũũ: “Jehova  Mũnene wa Ita ekuuga atĩrĩ, . . . ‘mũndorie . . . muone kana ndingĩmũhingũrĩra ndirica cia igũrũ, ndĩmũikũrũkĩrie kĩrathimo kĩingĩ, o nginya mwage handũ kĩngĩiganĩra nĩ ũndũ wa ũrĩa kĩingĩhĩte.’” (Mal. 3:10) Tuonanagia ngatho citũ cia kuuma ngoro rĩrĩa twetĩkĩra gwĩka ũguo Jehova atwĩrĩte.

4. Nĩ kĩĩ kĩngĩtũma twĩtĩkie ũrĩa Jesu oigire thĩinĩ wa Mathayo 6:33?

⁴ Jesu aaheire arutwo ake ũũma wa atĩ mangĩiga maũndũ ma Ũthamaki mbere, Ngai nĩ arĩmateithagia. (Thoma Mathayo 6:33.) Jesu aarĩ na ma biũ akĩheana kĩĩranĩro kĩu tondũ nĩ aamenyaga ũrĩa Jehova arĩ mwĩhokeku harĩ kũhingia ciĩranĩro ciake. Nĩ aamenyaga atĩ ciĩranĩro cia Jehova itiagaga kũhinga. (Isa. 55:11) O na ithuĩ no tũkorũo na ma atĩ tũngĩonania wĩtĩkio mũrũmu biũ harĩ Jehova, nĩ arĩhingagia kĩĩranĩro gĩkĩ gĩake: “Ndirĩ hĩndĩ ngaagũtiga, na ndirĩ hĩndĩ ngaagũtirika.” (Ahib. 13:5) Kĩĩranĩro kĩu nĩ kĩhutanĩtie na ũrĩa Jesu oigire wĩgiĩ gũcaragia Ũthamaki wa Ngai mbere hamwe na ũthingu wake.

5. Ciugo iria Jesu erire Petero nĩ cia gũtwĩkĩra ngoro nĩkĩ?

⁵ Hĩndĩ ĩmwe mũtũmwo Petero nĩ oririe Jesu ũũ: “Ithuĩ nĩ tũtigĩte indo ciothe na tũgakũrũmĩrĩra; tũkaaheo kĩĩ?” (Mat. 19:27) Handũ ha Jesu kũrakarĩra Petero nĩ ũndũ wa kũũria ũguo, eerire arutwo ake atĩ nĩ mangĩarathimirũo nĩ ũndũ wa kwĩrutĩra kwao. Atũmwo acio ehokeku hamwe na andũ angĩ nĩ magaathana na Jesu kũrĩa igũrũ. No o na rĩu nĩ kũrĩ na irathimo. Jesu oigire ũũ: “Mũndũ o wothe ũtigĩte nyũmba kana ariũ a nyina kana aarĩ a nyina kana ithe kana nyina kana ciana kana mĩgũnda nĩ ũndũ wa rĩĩtwa rĩakwa, nĩ  ekwamũkĩra indo icio irĩ maita igana na nĩ akaagaya muoyo wa tene na tene.” (Mat. 19:29) Arutwo ake mangĩagĩire na irathimo nyingĩ mũno o na gũkĩra maũndũ marĩa mangĩeimire. Na githĩ gũkorũo na aciari a kĩĩroho, na aarĩ na ariũ a Ithe witũ, gũtikĩrĩte ũndũ o wothe tũngĩima nĩ ũndũ wa Ũthamaki?

6. Gũkorũo Jehova nĩ erĩire athathaiya ake irathimo kũmateithagia atĩa?

⁶ Gũkorũo Jehova nĩ erĩire athathaiya ake atĩ nĩ arĩmarathimaga, gũtũmaga mahote gũkirĩrĩria rĩrĩa wĩkindĩru wao ũragerio. O na gũtuĩka ndungata njĩhokeku cia Jehova nĩ ikenagĩra irathimo cia kĩĩroho mahinda-inĩ maya, nĩ itanyaga gũkona irathimo nyingĩ o na makĩria ihinda rĩũkĩte. (1 Tim. 4:8) Twakorũo na ma biũ atĩ Jehova nĩ “arathimaga arĩa mamũcaragia na kĩyo,” nĩ tũrĩhotaga kwĩhanda wega thĩinĩ wa wĩtĩkio.—Ahib. 11:6.

7. Kĩĩrĩgĩrĩro nĩ nanga na njĩra ĩrĩkũ?

⁷ Jesu oigire ũũ hĩndĩ ya Mahunjio ma Kĩrĩma-inĩ: “Kenai na mũcanjamũke mũno, nĩ gũkorũo kĩheo kĩanyu nĩ kĩnene kũrĩa igũrũ, tondũ ũguo noguo maanyamaragia anabii arĩa maarĩ mbere yanyu.” (Mat. 5:12) Thengia ya kĩĩrĩgĩrĩro gĩa gũthiĩ igũrũ, kĩĩrĩgĩrĩro gĩa gũgatũũra paradiso thĩinĩ wa thĩ nĩ gĩtũmi gĩa ‘gũkena na gũcanjamũka mũno.’ (Thab. 37:11; Luk. 18:30) Tũkorũo tũrĩ na kĩĩrĩgĩrĩro gĩa gũthiĩ igũrũ kana gĩa gũgatũũra gũkũ thĩ, kĩĩrĩgĩrĩro kĩu no gĩtuĩke ‘nanga ya muoyo, gĩkorũo kĩrĩ kĩa ma, na kĩrũmu.’ (Ahib. 6:17-20) O ta ũrĩa nanga ĩnyitagĩrĩra meri nĩguo ĩĩhande wega hĩndĩ ya kĩhuhũkanio, no taguo kĩĩrĩgĩrĩro kĩa ma kĩa irathimo gĩtũteithagia kwaga kwagaga kĩĩroho na kĩĩmeciria. Kĩĩrĩgĩrĩro nĩ gĩtũteithagia kũgĩa na hinya wa gũkirĩrĩria rĩrĩa twagĩa na moritũ.

8. Kĩĩrĩgĩrĩro gĩtũteithagia atĩa kũnyihanyihia mĩtangĩko?

⁸ Kĩĩrĩgĩrĩro kĩrĩa Bibilia ĩtũheaga nĩ gĩtũteithagia kũnyihanyihia mĩtangĩko. Ciĩranĩro cia Ngai nĩ ihooreragia ngoro citũ rĩrĩa tũratangĩka. Na githĩ ‘kũrekereria Jehova mũrigo witũ’ tũrĩ na ma atĩ nĩ ‘arĩtũtiiragĩrĩra,’ ti ũndũ wa gũtwĩkĩra ngoro! (Thab. 55:22) No tũkorũo na ma biũ atĩ Ngai nĩ arĩkaga na “agakĩrĩrĩria mũno mũno marĩa mothe tũhoyaga o na marĩa twĩciragia.” (Ef. 3:20, The Bible in Gikũyũ) Ta wĩcirie ũndũ ũcio, to gũkĩrĩrĩria, na to gũkĩrĩrĩria mũno, no nĩ ‘gũkĩrĩrĩria mũno mũno.’

9. Tũrabatara gwĩka atĩa nĩguo tuone irathimo cia Jehova?

⁹ Nĩguo tuone irathimo icio, tũrabatara gũkorũo na wĩtĩkio biũ harĩ Jehova na twathĩkagĩre ũtongoria ũrĩa atũheaga. Musa eerire rũrĩrĩ rwa Isiraeli ũũ: “Jehova ndarĩ hingo atagakũrathima wĩ bũrũri ũrĩa Jehova Ngai waku akũheaga ũwĩgwatĩre ũtuĩke waku . . . , ũngĩkorũo nĩũkarũmia uuge wa Jehova Ngai waku na kĩyo, o na ũmenyagĩrĩre gwĩka maũndũ mothe marĩa ngũgwatha ũmũthĩ. Nĩ gũkorũo Jehova Ngai waku nĩagakũrathima, o ta ũrĩa aakwĩrire.” (Gũcok. 15:4-6) Hihi ũrĩ na ma biũ atĩ Jehova nĩ egũkũrathima ũngĩthiĩ na mbere kũmũtungatĩra ũrĩ mwĩhokeku? Ũrĩ na gĩtũmi kĩega gĩa gũkorũo na ũũma ũcio.

10, 11. Jehova aarathimire Jusufu atĩa?

¹⁰ Bibilia yandĩkirũo nĩguo ĩtũteithagie. Ĩkoragwo na ngerekano nyingĩ cia ũrĩa Jehova aarathimire ndungata ciake njĩhokeku. (Rom. 15:4) Ngerekano ĩmwe nĩ ya Jusufu. Nĩ ũndũ wa ariũ a ithe kũmwendia Misiri na thutha-inĩ kũigĩrĩrũo kĩgenyo nĩ mũtumia wa mwathi wake, Jusufu nĩ aikirio njera bũrũri-inĩ ũcio wa Misiri. Hihi Ngai nĩ aamũtiganĩirie? Aca. “Jehova aarĩ hamwe na Jusufu, agĩkĩmwĩka maũndũ mega ma ũtugi.  . . . Jehova aarĩ hamwe nake; naguo ũndũ ũrĩa wothe eekaga, Jehova agĩtũma ũgaacĩre.” (Kĩam. 39:21-23) Rĩrĩa ageragĩra maũndũ macio maritũ, Jusufu eetereire Ngai wake.

¹¹ Mĩaka ĩigana ũna thutha ũcio Firauni nĩ ohorire Jusufu, ũrĩa warĩ ngombo na warĩ mwĩnyihia, na akĩmũtua wa kerĩ ũthamaki-inĩ wa Misiri. (Kĩam. 41:1, 37-43) Rĩrĩa mũtumia wa Jusufu agĩire ciana igĩrĩ, ‘ka irigithathi Jusufu agatuire Manase, akiuga atĩrĩ, “Nĩ tondũ Ngai nĩatũmĩte ndiganĩruo nĩ mathĩna makwa mothe, o na nyũmba ya baba yothe.” Nako ga kerĩ agĩgatua Efiraimu, agĩkiuga atĩrĩ, “Nĩ tondũ Ngai nĩatũmĩte ngĩe na rũciaro ndĩ bũrũri ũrĩa ‘nyarirĩkĩire.”’ (Kĩam. 41:51, 52) Tondũ Jusufu aatũũrire arĩ mwĩhokeku harĩ Ngai, aagĩire na irathimo nyingĩ mũno iria ciateithĩrĩirie harĩ kũhonokia mĩoyo ya Aisiraeli o hamwe na ya Amisiri. Ũndũ wa bata nĩ atĩ, Jusufu nĩ aamenyaga atĩ Jehova nĩwe wamũrathimĩte.—Kĩam. 45:5-9.

12. Nĩ kĩĩ gĩateithirie Jesu gũtũũra arĩ mwĩhokeku rĩrĩa aacemanagia na magerio?

¹² Jesu Kristo o nake, aatũũrire arĩ mwathĩki harĩ Ngai nginya rĩrĩa wĩtĩkio wake wageragio, na nĩ ũndũ ũcio nĩ aarathimirũo. Nĩ kĩĩ kĩamũteithirie kũhiũrania na magerio? Bibilia yugaga ũũ: “Nĩ ũndũ wa gĩkeno kĩrĩa kĩaigĩtwo mbere yake, aakirĩrĩirie mũtĩ wa kũnyarirĩrũo na ndaamakirio nĩ gũconorithio.” (Ahib. 12:2) Hatarĩ nganja, Jesu nĩ aakenaga mũno nĩ ũndũ wa kũhota gũtheria rĩĩtwa rĩa Ngai. Makĩria ma ũguo, nĩ aarathimirũo na njĩra ya gwĩtĩkĩrũo nĩ Ithe, na akĩhokerũo mawĩra mangĩ maingĩ. Bibilia yugaga atĩ, “aikarĩte thĩ guoko-inĩ kwa ũrĩo gwa gĩtĩ kĩa ũnene kĩa Ngai.” Na rĩo rĩandĩko rĩngĩ riugaga ũũ: “Ngai akĩmũtũũgĩria akĩmũnenehia makĩria, na nĩ ũndũ wa ũtugi akĩmũhe rĩĩtwa rĩkĩrĩte marĩĩtwa marĩa mangĩ mothe.”—Afil. 2:9.

13, 14. Jehova aiguaga atĩa nĩ ũndũ wa maũndũ marĩa tũmwĩkagĩra?

¹³ No tũkorũo na ma atĩ Jehova nĩ akenaga mũno nĩ kĩyo o gĩothe twĩkagĩra nĩguo tũmũtungatĩre. Nĩ ataũkagĩrũo nginya rĩrĩa tũremena kana rĩrĩa tũreĩkĩrĩra nganja. Jehova nĩ atuonagia tha rĩrĩa twaritũhĩrũo nĩ mathĩna ma kĩĩmbeca, kana rĩrĩa gũtangĩka kana kwaga ũgima mwega wa mwĩrĩ gwatũma tũremwo nĩ kũhingia maũndũ maingĩ ũtungata-inĩ. Na tũrĩ na ma biũ atĩ Jehova nĩ akenaga mũno nĩ ũndũ wa ũrĩa ndungata ciake ciĩrutanagĩria nĩguo itũũre irĩ njĩhokeku.—Thoma Ahibirania 6:10, 11.

¹⁴ Ningĩ ririkana atĩ no tũkuhĩrĩrie ‘Mũigua wa mahoya’ tũrĩ na ma atĩ nĩ egũtũthikĩrĩria. (Thab. 65:2) “Ithe witũ mwene tha na Ngai ũrĩa ũmagĩrĩria andũ maũndũ-inĩ mothe,” nĩ egũtũhe hinya ũrĩa wothe tũrabatara wa kĩĩmeciria na wa kĩĩroho, na no ahũthĩre aarĩ na ariũ a Ithe witũ gwĩka ũguo. (2 Kor. 1:3) Jehova nĩ akenaga mũno rĩrĩa tuonia andũ angĩ tha. “Mũiguĩri arĩa athĩni tha nĩ ngwatio aragwatia Jehova, na wega ũcio wake, we no akamũrĩha.” (Thim. 19:17; Mat. 6:3, 4) Kwoguo rĩrĩa twerutĩra gũteithia arĩa marĩ na thĩna, Jehova onaga ciĩko citũ njega ta arĩ thiirĩ twamũkombera. Na nĩ eranĩire atĩ nĩ akaarĩha ciĩko icio cia tha.

15. Nĩ irathimo irĩkũ ũtanyaga gũkona? (Rora mbica kĩambĩrĩria-inĩ gĩa gĩcunjĩ gĩkĩ.)

¹⁵ Akristiano aitĩrĩrie maguta nĩ momagĩrĩrio nĩ kĩĩrĩgĩrĩro gĩa gũkaaheo “thũmbĩ ya ũthingu, . . . mũthenya ũcio ĩrĩ kĩheo nĩ Mwathani, o we mũtuanĩri cira mũthingu.” (2 Tim. 4:7, 8) No angĩkorũo Jehova akũheete kĩĩrĩgĩrĩro kĩngĩ, ti kuuga atĩ ndakuonaga ũrĩ wa bata. Andũ milioni nyingĩ a “ng’ondu ingĩ” cia Jesu, nĩ matanyaga  mũno gũkona kĩrathimo kĩa ihinda rĩũkĩte kĩa muoyo wa tene na tene thĩinĩ wa paradiso gũkũ thĩ. Nĩ magatũũra “mekenagĩra tondũ wa kũingĩhĩrũo nĩ thayũ.”—Joh. 10:16; Thab. 37:11.

16. Rĩandĩko rĩa 1 Johana 3:19, 20 rĩtũũmagĩrĩria atĩa?

¹⁶ Rĩmwe na rĩmwe no tũigue ta tũtarahingia ũndũ mũnene, kana tũkarigwo kana Jehova nĩ akenagio nĩ kĩyo gitũ. O na no tuone ta tũtagĩrĩire kũheo kĩrathimo o gĩothe. O na kũrĩ ũguo, tũtikanariganĩrũo atĩ “Ngai nĩ mũnene gũkĩra ngoro citũ na nĩ oĩ maũndũ mothe.” (Thoma 1 Johana 3:19, 20.) Nĩ arathimaga ũtungata o wothe tũrutaga kuuma ngoro tũrĩ na wĩtĩkio na wendo, o na akorũo ithuĩ tũreigua ta gũtarĩ ũndũ tũreka.—Mar. 12:41-44.

17. Nĩ irathimo irĩkũ tũrakenera mahinda-inĩ maya?

¹⁷ Jehova no arathimaga andũ ake nginya matukũ-inĩ maya ma kũrigĩrĩria ma mũtabarĩre ũyũ mũũru wa Shaitani. Nĩ atigagĩrĩra atĩ athathaiya a ma nĩ marakenera na makagacĩra thĩinĩ wa paradiso ya kĩĩroho na makaamũkĩra irio cia kĩĩroho na gĩkĩro kĩnene. (Isa. 54:13) O ta ũrĩa Jesu eranĩire, Jehova nĩ atũrathimaga mahinda-inĩ maya na njĩra ya gũtwĩtĩkĩria tũkorũo thĩinĩ wa famĩlĩ ya aarĩ na ariũ a Ithe witũ a thĩ yothe. (Mar. 10:29, 30) Makĩria ma ũguo, arĩa macaragia Ngai na kĩyo nĩ maheagwo irathimo ingĩ, na nĩ cio thayũ wa meciria, kũiganĩra, na gĩkeno.—Afil. 4:4-7.

18, 19. Ndungata cia Jehova ciguaga atĩa nĩ ũndũ wa irathimo iria cionaga?

¹⁸ Ndungata cia Jehova thĩinĩ wa thĩ yothe no irute ũira wa irathimo nyingĩ iria cionete. Kwa ngerekano, Bianca kuuma bũrũri-inĩ wa Njĩrĩmani oigire ũũ: “Ngoragwo na ngatho nyingĩ mũno kũrĩ Jehova nĩ ũrĩa andeithagia kũhiũrania na mĩtangĩko na ũrĩa akoragwo hamwe na niĩ o mũthenya. Maũndũ marĩa marĩ thĩinĩ wa thĩ nĩ moru mũno. No ngĩrutithania wĩra na Jehova, njiguaga ndĩ na ũgitĩri. Rĩrĩa rĩothe ndĩreima nĩ getha ndĩmũtungatĩre, Jehova andĩhaga na irathimo maita igana.”

¹⁹ Ningĩ ta wĩcirie ngerekano ya Paula kuuma Canada ũrĩa ũrĩ na mĩaka 70, na ũtahotaga gwĩka maũndũ maingĩ nĩ ũndũ wa mũrimũ wa mũnyiginyigi wa spina bifida. Mwarĩ wa Ithe witũ ũcio oigaga ũũ: “Gũkorũo atĩ ndihotaga gũthiĩ mũno ti kuuga atĩ ndingĩhingia maũndũ maingĩ ũtungata-inĩ. Hũthagĩra njĩra ingĩ cia kũhunjia, ta kwaria na andũ rĩrĩa itarĩ ũtungata-inĩ na kũhunjia kũgerera thimũ. Ngoragwo na kabuku nyandĩkaga maandĩko na maũndũ mangĩ ma kũnyũmĩrĩria kuuma mabuku-inĩ maitũ, karĩa thomaga kaingĩ. Ndĩgetaga ‘Kabuku ga Kũndeithia Ũtũũro-inĩ.’ Tũngĩiga meciria maitũ harĩ ciĩranĩro cia Jehova, gũkua ngoro gũkoragwo kũrĩ o gwa kahinda kanini. Hĩndĩ ciothe Jehova akoragwo hamwe na ithuĩ nĩguo atũteithie, o na tũngĩkorũo tũragerera maũndũ mahaana atĩa.” No gũkorũo mathĩna maku ti ta ma Bianca kana ta ma Paula. O na kũrĩ ũguo, no wĩcirie njĩra itiganĩte iria Jehova akũrathimĩte nacio na akarathima nginya andũ angĩ. Na githĩ ti ũndũ mwega gwĩcũrania ũrĩa Jehova arakũrathima mahinda-inĩ maya, na ũrĩa agakũrathima mahinda mokĩte!

20. Tũngĩrĩgĩrĩra kĩĩ twathiĩ na mbere gũtungatĩra Jehova na ngoro yothe?

²⁰ Ndũkanariganĩrũo atĩ mahoya maku ma kuuma ngoro ‘nĩ magaatũma ũheo kĩheo kĩnene.’ No ũkorũo na ma atĩ ‘thutha wa gũkorũo wĩkĩte wendi wa Ngai, nĩ ũkaamũkĩra ũndũ ũrĩa eranĩire.’ (Ahib. 10:35, 36) Kwoguo rekei tũthiĩ na mbere gwĩkĩra wĩtĩkio witũ hinya na kũruta wĩra na ngoro yothe ta arĩ Jehova tũrarutĩra. Na twĩke ũguo tũrĩ na ma atĩ Jehova nĩwe ũgaatũrathima.—Thoma Akolosai 3:23, 24.