Hihi no ũhote gũcokia ciũria ici ciĩhocetie harĩ ngathĩti cia Mũrangĩri cia 2019?

Kĩĩranĩro gĩkĩ kĩa Ngai kiugĩte atĩa: “Gũtirĩ itharaita rĩa mbaara rĩthondeketwo nĩ ũndũ waku rĩkaagaacĩra”? (Isa. 54:17)

No twĩhoke atĩ Ngai nĩ arĩtũgitagĩra kuumana na mahinya marĩa mangĩtũthũkia, ta “mũrurumo wa ahinyanĩrĩria.” (Isa. 25:4, 5) Gũtirĩ hĩndĩ thũ citũ ikaahota gũtwĩka ũndũ mũũru wa gũtũũra.​—w19.01, kar. 6-7.

Ũrĩa Ngai aahiũranirie na Akanaani na Aisiraeli aremi wonanagia atĩa kĩhooto gĩake?

Ngai nĩ aarehire ituĩro harĩ arĩa meeingĩragia maũndũ-inĩ moru ma ngomanio, kana makahinyĩrĩria atumia na ciana. Nĩ aarathimaga andũ arĩa maamwathĩkagĩra na magekĩra andũ arĩa angĩ maũndũ ma kĩhooto.​—w19.02, kar. 22-23.

Twagĩrĩirũo gwĩka atĩa tũngĩkorũo handũ harahoithio nĩ mũndũ ũtarĩ mwĩtĩkia?

No tũkire na tuonanie gĩtĩo, no tũtiagĩrĩirũo kuuga “ameni” kana kũnyitana na arĩa angĩ moko gũkĩhoywo. No tũhoe ihoya ritũ ithuene na ngoro.​—w19.03, kar. 31.

Gwĩka ciana maũndũ moru ma ngomanio nĩ ũndũ mũritũ na gĩkĩro kĩrĩkũ?

Gwĩka mwana maũndũ moru ma ngomanio nĩ rĩhia kũmwerekera, kwerekera kĩũngano, thirikari, na Ngai. Athuri nĩ mathĩkagĩra watho wa thirikari wĩgiĩ gũthitanga mũndũ kũratuĩka atĩ nĩ ekĩte mwana maũndũ moru.​—w19.05, kar. 9-10.

Ũngĩhota atĩa gũcenjia kana kũgarũrĩra mwerekera ũrĩa ũtongoragia meciria maku?

Maũndũ marĩa ma bata mangĩgũteithia nĩ: Kwaria na Jehova kũgerera mahoya. Gwĩcũrania ũrĩ na muoroto wa gũthuthuria ũrĩa ũtariĩ. Gũthuura arata aku na ũũgĩ.​—w19.06, kar. 11.

Nĩ atĩa tũngĩka rĩu kwĩhaarĩria nĩ ũndũ wa mĩnyamaro?

Nĩ tũrabatara gwĩkĩra hinya ũrata witũ hamwe na Jehova. Koragwo na ma atĩ nĩ atwendete na ndarĩ hĩndĩ agaatũtiganĩria. Thomaga Bibilia o mũthenya na ũkahoyaga kaingĩ. Koragwo na ma atĩ irathimo cia Ũthamaki nĩ ikaahinga. Igaga meciria-inĩ maandĩko na nyĩmbo iria wendete.​—w19.07, kar. 2-4.

Nĩ atĩa tũngĩka gũteithia andũ aitũ a famĩlĩ makaahonoka?

Nĩ harĩ bata kũmonagia ũcayanĩri, kũreka mĩthiĩre itũ mĩega ĩrute ũira, na gũkorũo na wetereri na ũtaũku.​—w19.08, kar. 15-17.

Tũcanjamũragwo na njĩra ĩrĩkũ ta ũrĩa Jesu eeranĩire thĩinĩ wa Mathayo 11:28?

Tũkoragwo na arori arĩa ega biũ, arata arĩa ega biũ, na wĩra ũrĩa mwega biũ.​—w19.09, kar. 23.

Ngai angĩtũhe wendi na ũhoti wa gwĩka maũndũ atĩa? (Afil. 2:13)

Rĩrĩa tũrathoma Kiugo kĩa Ngai na gwĩcũrania igũrũ rĩakĩo, Ngai no atwĩkĩre hinya, atũhe wendi wa kũhingia ũrĩa endaga, na atũhe ũhoti wa gwĩka maũndũ. Roho wake mũtheru no ũtũteithie kwagagĩria ũhoti ũrĩa tũrĩ naguo.​—w19.10, kar. 21.

Nĩ makinya marĩkũ ma ũũgĩ twagĩrĩirũo kuoya tũtanatua itua iritũ?

Makinya macio matano nĩ: Gwĩka ũthuthuria na kĩyo. Kũhoya ũheo ũũgĩ. Gwĩcũrania kĩrĩa kĩratũma ũtue itua rĩna. Kũbanga maũndũ marĩa ũrenda gwĩka. Gũkorũo na ũigananĩru.​—w19.11, kar. 27-29.

Hihi ũrutani wa atĩ andũ nĩ marĩ muoyo ũtangĩkua waambĩrĩirie na ũrĩa Shaitani eerire Hawa?

Aca. Shaitani eerire Hawa atĩ ndangĩakuire, no ndaamwĩrire atĩ nĩ harĩ gĩcunjĩ kĩa mwĩrĩ wake gĩtangĩakuire. Gũtirĩ ũrutani o wothe wa maheeni ũngĩkorũo watigarire thutha wa Mũiyũro. No kũhoteke wĩtĩkio wa atĩ andũ nĩ marĩ muoyo ũtangĩkua waambĩrĩirie mbere ya Ngai kũhurunja andũ arĩa maakaga nyũmba ya Babeli.​—w19.12, kar. 15.