Ũhoro ũrĩa ũrĩ thĩinĩ wa Gũcokerithia Maathani 22:25-27 ndũrarĩrĩria kana mũndũrũme ũcio nĩ ahĩtĩtie kana ndahĩtĩtie, tondũ kũringana na mĩhari ĩyo aarĩ na mahĩtia. Ũndũ ũrĩa wĩkĩrĩirũo nĩ mĩhari ĩyo nĩ kana mũirĩtu ũcio arĩ na mahĩtia kana ndarĩ. Ta wĩcirie ũhoro ũrĩa ũthiũrũrũkĩirie mĩhari ĩyo.

Mĩhari ĩrĩa ĩrĩ mbere ya mĩhari ĩno, ĩraria ũhoro wa mũndũrũme ũngĩakomire na mũirĩtu ũrĩ na mũndũ marĩkanĩire atĩ nĩ mekũhikania, na ũndũ ũcio ũgekĩkĩra “thĩinĩ wa itũũra.” Ũndũ ũcio watũmaga mũndũrũme ũcio akorũo na mehia ma ũtharia, tondũ mũirĩtu ũcio oonagwo ta arĩkĩtie kũhikania na ũcio marĩkanĩire nake. Ĩ ũhoro wĩgiĩ mũirĩtu ũcio? ‘Ndoigire mbu arĩ itũũra-inĩ.’ Korũo nĩ ooigĩte mbu, andũ angĩ nĩ mangĩaiguire na mamũteithĩrĩrie. Nowe ndoigire mbu. Kwoguo nĩ aanyitanĩire mehia-inĩ macio ma ũtharia, na nĩ ũndũ ũcio, erĩ maagĩrĩirũo gũtuĩrũo atĩ marĩ na mahĩtia.​—Gũcok. 22:23, 24.

Mĩhari ĩrĩa ĩrũmĩrĩire ĩtaarĩirie ũndũ ngũrani na ũcio, ĩkoiga ũũ: “O na kũrĩ ũguo, angĩkorũo mũndũrũme ũcio acemanĩtie na mũirĩtu ũcio ũrahika werũ-inĩ na mũndũrũme ũcio amũkĩrie hinya na akome nake, mũndũrũme ũcio ũkomete na mũirĩtu ũcio nowe wagĩrĩire kũũragwo, na ndwagĩrĩirũo gwĩka mũirĩtu ũcio ũndũ o na ũrĩkũ. Mũirĩtu ũcio ndekĩte mehia magĩrĩire ituĩro rĩa kũũragwo. Ũhoro ũcio ũtariĩ o ta wa hĩndĩ ĩrĩa mũndũ angĩtharĩkĩra mũndũ ũngĩ na amũũrage. Nĩ gũkorũo nĩ gũcemania macemania na mũndũrũme ũcio werũ-inĩ, na mũirĩtu ũcio ũrahika oiga mbu, no haga mũndũ wa kũmũteithũra.”​—Gũcok. 22:25-27.

Hĩndĩ ta ĩyo, acirithania nĩ meetĩkagia mũirĩtu ũcio. Na njĩra ĩrĩkũ? Kwerĩgagĩrĩrũo atĩ mũirĩtu ũcio nĩ ‘ooigĩte mbu, no hakaga mũndũ wa kũmũteithũra.’ Kwoguo ti ũtharia eekaga. No mũndũrũme ũcio nĩ aatuagĩrũo atĩ arĩ na mehia ma kũnyitana kĩa hinya na ũtharia, tondũ aakoragwo ‘akĩrĩtie hinya na agakoma’ na mũirĩtu ũcio ũrĩkanĩire kũhikania na mũndũ ũngĩ.

Kwoguo, o na gũtuĩka watho ũcio woonanagia atĩ mũirĩtu ũcio ndarĩ na mahĩtia, nĩ woonanagia wega atĩ mũndũrũme ũcio nĩ aagĩrĩire gũtuĩrũo mehia ma kũnyitana kĩa hinya na ũtharia. No tũkorũo na ma atĩ acirithania nĩ ‘maathuthuragia ũhoro ũcio na kinyi,’ na magatua itua kũringana na ithimi iria Ngai aaigĩte na agacokerithia maita maingĩ.​—Gũcok. 13:14; 17:4; Tham. 20:14.