Nĩ ũthomete na kinyi icunjĩ cia mwaka ũyũ cia Mũrangĩri? Ta rora kana no ũhote gũcokia ciũria ici:

Twagĩrĩirũo gwĩkĩra arĩa aitĩrĩrie maguta maũndũ na njĩra ĩrĩkũ?

Nĩ twagĩrĩirũo kwĩgerekania na wĩtĩkio wao, no tũtiagĩrĩirũo kũmahe gĩtĩo gĩkĩrĩtie njano. Ti wega kũmoria ciũria itatwĩgiĩ ciĩgiĩ kĩĩrĩgĩrĩro kĩao.​—w20.01, kar. 28-29.

Nĩ ũndũ ũrĩkũ ũngĩtũma wĩtĩkie atĩ Jehova nĩ akũũĩ?

Bibilia yonanagia atĩ Jehova nĩ aakũũĩ o na ũtanaciarũo. Ningĩ nĩ athikagĩrĩria mahoya maku. Nĩ oĩ kĩrĩa kĩrĩ ngoro-inĩ yaku, na nĩ oĩ maũndũ marĩa wĩciragia, na ciĩko ciaku no itũme akene kana arakare. (1 Maũ. 28:9; Thim. 27:11) Nĩwe wakũgucĩrĩirie harĩ we.​—w20.02, kar. 12.

Nĩ hĩndĩ ta ĩrĩkũ twagĩrĩirũo kwaria na nĩ hĩndĩ ta ĩrĩkũ twagĩrĩirũo gũkira?

Nĩ twagĩrĩirũo kwaria ũhoro wĩgiĩ Jehova tũkenete. Nĩ twagĩrĩirũo kwaria tũngĩona mũndũ agĩka ũndũ ũngĩmũingĩria ũgwati-inĩ. Athuri a kĩũngano nĩ magĩrĩirũo kũheana ũtaaro rĩrĩa kwabatarania. Tũtiagĩrĩirũo kũria kana kũheana ũhoro wĩgiĩ ũrĩa wĩra witũ ũrarutwo mabũrũri-inĩ marĩa mahũũrĩtwo marubuku. Tũtiagĩrĩirũo kũheana maũndũ ma hitho.​—w20.03, kar. 20-21.

Ngigĩ iria igwetetwo thĩinĩ wa Joeli mũrango wa 2 nĩ ngũrani atĩa na iria igwetetwo thĩinĩ wa Kũguũrĩrio mũrango wa 9?

Joeli 2:20-29 yugaga atĩ Ngai nĩ angĩkaaingata ngigĩ icio na akĩĩranĩra atĩ nĩ akaarĩha kĩrĩa cianangire. Thutha ũcio nĩ angĩgaitĩrĩria andũ roho wake. Maũndũ macio nĩ maahingire rĩrĩa Ababuloni maatharĩkĩire Aisiraeli na nginya thutha ũcio. Kũguũrĩrio 9:1-11 ĩtaarĩirie ngigĩ iria irũgamĩrĩire aitĩrĩrie maguta mahinda-inĩ maya, arĩa mahunjagia matuĩro ma Jehova thĩinĩ wa thĩ ĩno njũru, na ũndũ ũcio nĩ ũtũmaga arĩa manyitaga mbaru maũndũ ma thĩ ĩno maigue ũũru mũno.​—w20.04, kar. 3-6.

Nũũ mũthamaki wa mwena wa rũgongo mahinda-inĩ maya?

Russia na mabũrũri marĩa mamĩnyitaga mbaru. Nĩ makoretwo makĩnyarira andũ a Ngai, makahũũra wĩra wa kũhunjia marubuku na makonania rũthũũro kwerekera Aira a Jehova. Mũthamaki wa mwena wa rũgongo nĩ akoretwo akĩgucanĩria ũnene na mũthamaki wa mwena wa mũhuro.​—w20.05, kar. 13.

Hihi ngumo iria kenda cionanĩtio thĩinĩ wa Agalatia 5:22, 23, nocio tu ngumo iria ciumanaga na “maciaro ma roho”?

Aca. Roho mũtheru nĩ ũtũteithagia gũkũria ngumo ingĩ njega, ta ngumo ya ũthingu. (Ef. 5:8, 9)​—w20.06, kar. 17.

Ũgwati ũmwe wa gwĩkĩra maũndũ makwĩgiĩ thĩinĩ wa social media nĩ ũrĩkũ?

Maũndũ marĩa mũndũ arekĩra thĩinĩ wa social media no matũme andũ mone ta arĩ mũndũ mwĩtĩi na ũtarĩ na wĩnyihia.​—w20.07, kar. 6-7.

Nĩ maũndũ marĩkũ Akristiano mangĩĩruta kuuma kũrĩ ategi a thamaki marĩ na ũmenyeru?

Ategi a thamaki mathiaga gũtega kũrĩa thamaki ironeka na ihinda rĩrĩa ingĩoneka. Nĩ makoragwo moĩ kũhũthĩra indo iria ciagĩrĩire cia kũruta wĩra. Nĩ makoragwo na ũmĩrĩru wa kũruta wĩra ũcio nginya rĩrĩa macemania na maũndũ maritũ. O na ithuĩ no twĩgerekanie nao tũrĩ ũtungata-inĩ.​—w20.09, kar. 5.

Nĩ maũndũ marĩkũ tũngĩka tũteithie arutwo a Bibilia mende Jehova makĩria?

No tũmekĩre ngoro mathomage Bibilia o mũthenya na magecũrania maũndũ marĩa mathoma. Ningĩ no tũmarute kũhoya.​—w20.11, kar. 4.

1 Akorintho 15:22 ĩkiuga atĩ “othe [nĩ] magaacokio muoyo nĩ ũndũ wa Kristo” yendaga kuuga atĩa?

Mũtũmwo Paulo ndeendaga kuuga atĩ andũ othe nĩ makaariũkio. Aaragia ũhoro wĩgiĩ Akristiano aitĩrĩrie maguta arĩa makoragwo ‘matheretio marĩ na ũiguano na Kristo Jesu.’ (1 Kor. 1:2; 15:18)​—w20.12, kar. 5-6.

Aitĩrĩrie maguta magathiĩ kũruta wĩra ũrĩkũ thutha wao ‘kũgarũrũo o rĩmwe ta kũbucia kwa riitho, hĩndĩ ya karumbeta ka mũico’?​—1 Kor. 15:51-53.

Nĩ makaanyitanĩra na Kristo kũrĩithia andũ na rũthanju rwa kĩgera. (Kũg. 2:26, 27)​—w20.12, kar. 12-13.