AIRĨTU erĩ maatwaranĩte hamwe gĩcigo-inĩ gĩa biacara, taũni-inĩ ya Baguio, bũrũri-inĩ wa Philippines. Nĩ moonire Aira a Jehova makĩhunjia na gakaari ka mabuku, no matiathiire harĩ o. Mwarĩ wa Ithe witũ Helen ũrĩa warũgamĩte hakuhĩ na gakaari kau, nĩ aamarorire arĩ na ũthiũ mũcanjamũku. O na gũtuĩka airĩtu acio matiathiire gakaari-inĩ kau ka mabuku, nĩ maakenirio mũno nĩ ũrĩa Helen aamarorire acanjamũkĩte.

Thutha-inĩ rĩrĩa maainũkaga makuĩtwo nĩ mbathi, nĩ moonire kĩbaũ kĩnene kĩrĩ na rũũri rwa jw.org gĩkĩrĩtwo Nyũmba-inĩ ya Ũthamaki. Nĩ maaririkanire atĩ ndemwa icio nocio mekuonete gakaari-inĩ karĩa ka mabuku. Nĩ maacukire kuuma mbathi-inĩ ĩyo na magĩthiĩ kĩbaũ-inĩ kĩu kũrora mathaa matiganĩte ma mĩcemanio ĩrĩa yekagĩrũo Nyũmba-inĩ ĩyo ya Ũthamaki.

Airĩtu acio nĩ maathiire mũcemanio-inĩ ũmwe ũrĩa warũmĩrĩire. Na nĩ ũĩ gwathiire atĩa makinya Nyũmba-inĩ ya Ũthamaki? Maacemanirie na Helen. Nĩ maamũmenyire o na ihenya tondũ nĩ maaririkanire atĩ nĩwe mũndũ ũrĩa wamarorire acanjamũkĩte. Helen ooigire ũũ: “Rĩrĩa ndonire magĩũka harĩ niĩ, ndaiguire ndamaka. Ndambirie kwĩyũria kana nĩ harĩ ũndũ mũũru njĩkĩte.” No airĩtu acio nĩ maamũtaarĩirie ũrĩa gwathiĩte.

Airĩtu acio nĩ maakeneire mũcemanio na kũnyitanĩra na andũ arĩa angĩ, na meeiguaga marĩ mũciĩ. Rĩrĩa moonire andũ arĩa angĩ magĩtheria Nyũmba ya Ũthamaki thutha wa mũcemanio, nĩ mooririe kana no mateithie. Mũirĩtu ũmwe nĩ aacokire agĩthamĩra bũrũri-inĩ ũngĩ, no ũcio ũngĩ nĩ aambĩrĩirie gũthiaga mĩcemanio na akĩambĩrĩria kwĩruta Bibilia. Hatarĩ nganja, ũcanjamũku nĩ wa bata!