GĨCUNJĨ KĨA WĨRUTI GĨA 5
“Mũtwe wa Mũndũrũme o Wothe nĩ Kristo”
“Mũtwe wa mũndũrũme o wothe nĩ Kristo.”—1 KOR. 11:3.
RWĨMBO NA. 12 Jehova nĩ Ngai Mwega
GĨCUNJĨ-INĨ GĨKĨ *
1. Athuri amwe marũmbũyanagia na atumia na ciana ciao atĩa?
HIHI wee ũtaũkagĩrũo mũndũ gũkorũo arĩ “mũtwe wa famĩlĩ” nĩ kuuga atĩa? Athuri amwe marũmagĩrĩra ũndũire kana mũrerere wao rĩrĩa mararũmbũyania na atumia na ciana ciao. Ta rora ũrĩa mwarĩ wa Ithe witũ Yanita ũrĩa ũikaraga Rũraya ooigire: “Kũrĩa njikaraga, andũ makoragwo metĩkĩtie atĩ athuri nĩ a bata gũkĩra atumia, na atumia magĩrĩirũo kuonwo marĩ ngombo.” Nake mũrũ wa Ithe witũ wĩtagwo Luke ũrĩa ũikaraga Amerika (US) ooigire atĩ, “Athuri amwe marutaga ariũ ao atĩ gũtirĩ ũndũ wa bata atumia mangiuga, na kwoguo matiagĩrĩirũo kũmathikĩrĩria.” No mĩerekera ta ĩyo nĩ ngũrani na ũrĩa Jehova endaga athuri matongorie famĩlĩ ciao. (Ringithania Mariko 7:13.) Gũkĩrĩ ũguo-rĩ, mũthuri angĩĩruta atĩa gũkorũo arĩ mũtwe mwega wa famĩlĩ?
2. Mũtwe wa famĩlĩ agĩrĩirũo gũtaũkĩrũo nĩ maũndũ marĩkũ, na nĩkĩ?
2 Nĩguo mũthuri atuĩke mũtwe mwega wa famĩlĩ, no mũhaka ambe ataũkĩrũo nĩ maũndũ marĩa Jehova erĩgagĩrĩra ahingie. Ningĩ nĩ agĩrĩirũo gũtaũkĩrũo kĩrĩa gĩatũmire Jehova ambĩrĩrie mũbango wa ũtongoria thĩinĩ wa famĩlĩ, na ũrĩa angĩĩgerekania na Jehova na Jesu. Nĩkĩ nĩ ũndũ wa bata harĩ mũthuri gũtaũkĩrũo nĩ maũndũ macio? Nĩ tondũ Jehova nĩ aheete athuri ũnene na gĩkĩro kĩna na nĩ erĩgagĩrĩra mahũthĩre ũnene ũcio wega.—Luk. 12:48b.
GŨKORŨO MŨNDŨ ARĨ MŨTWE WA FAMĨLĨ NĨ KUUGA ATĨA?
3. Tũreruta atĩa igũrũ rĩgiĩ ũnene kuumana na 1 Akorintho 11:3?
3 Thoma 1 Akorintho 11:3. Mũhari ũcio ũrataarĩria ũrĩa Jehova akoragwo abangĩte famĩlĩ yake kũrĩa igũrũ na gũkũ thĩ. Tondũ nĩwe mũtwe wa famĩlĩ yake, akoragwo na ũnene wothe. Kũgerera mũbango ũcio aigĩte wa ũnene, nĩ akoragwo aheete andũ amwe ũnene na gĩkĩro kĩna, no erĩgagĩrĩra mahũthĩre ũnene ũcio na njĩra ĩrĩa yagĩrĩire. (Rom. 14:10; Ef. 3:14, 15) Jehova nĩ aheete Jesu ũnene wa gũtongoria kĩũngano, no Jesu agĩrĩirũo gũtũrũmbũiya kũringana na ũrĩa Jehova arenda. (1 Kor. 15:27) Ningĩ Jehova nĩ aheete mũthuri ũnene igũrũ rĩgiĩ mũtumia na ciana ciake, no mũthuri agĩrĩirũo kũmatongoria kũringana na ũrĩa Jehova na Jesu marenda.—1 Pet. 3:7.
4. Jehova na Jesu marĩ na kĩhooto gĩa gwĩka atĩa?
4 Jehova arĩ we mũtwe wa famĩlĩ yake kũrĩa igũrũ na gũkũ thĩ, arĩ na ũnene wa kũigĩra ciana ciake mawatho marĩa ciagĩrĩirũo kũrũmĩrĩra na atigĩrĩre atĩ nĩ ciamarũmĩrĩra. (Isa. 33:22) Nake Jesu arĩ we mũtwe wa kĩũngano gĩa Gĩkristiano arĩ na kĩhooto gĩa kũiga mawatho na gũtigĩrĩra atĩ nĩ marũmĩrĩrũo.—Gal. 6:2; Kol. 1:18-20.
5. Nĩ maũndũ marĩkũ mũtwe wa famĩlĩ arĩ na kĩhooto gĩa gwĩka na nĩ marĩkũ atarĩ na kĩhooto gĩa gwĩka?
5 O ta Jehova na Jesu, mũthuri Mũkristiano arĩ na kĩhooto gĩa gũtua matua megiĩ famĩlĩ yake. (Rom. 7:2; Ef. 6:4) O na kũrĩ ũguo, ũnene wake nĩ ũkoragwo na mĩhaka. Kwa ngerekano, mawatho marĩa arahe famĩlĩ yake magĩrĩirũo gũkorũo mehocetie harĩ motaaro marĩa marĩ Kiugo-inĩ kĩa Ngai. (Thim. 3:5, 6) Na mũtwe wa famĩlĩ ndarĩ na rũtha rwa kũigĩra andũ matarĩ a famĩlĩ yake mawatho. (Rom. 14:4) Ningĩ, rĩrĩa anake na airĩtu ake makũra na moima mũciĩ, no mathiaga na mbere kũmũhe gĩtĩo, no ndathiaga na mbere gũkorũo arĩ mũtwe wao.—Mat. 19:5.
KĨRĨA GĨATŨMIRE JEHOVA AIGE MŨBANGO ŨCIO
6. Jehova aaigire mũbango wa ũtongoria nĩkĩ?
6 Jehova aigĩte mũbango mwega wa ũtongoria tondũ nĩ endete andũ ake. Mũbango ũcio nĩ kĩheo kuuma kũrĩ we. Nĩ ũtũmaga andũ ake mahote kũrutithania wĩra marĩ na thayũ na mũbango mwega. (1 Kor. 14:33, 40) Korũo gũtikoragwo na mũbango ta ũcio mwega wa ũtongoria, andũ a Jehova mangĩkoragwo matarĩ na mĩbango na matarĩ na gĩkeno. Kwa ngerekano, andũ a Jehova matingĩmenyaga nũũ wagĩrĩirũo gũtua matua na nũũ wagĩrĩirũo kuonereria arĩa angĩ ũrĩa mangĩrũmĩrĩra matua macio.
7. Kũringana na Aefeso 5:25, 28, hihi Jehova aabangĩte athuri mahinyagĩrĩrie atumia ao?
7 Angĩkorũo mũbango ũcio wa Ngai wa mũthuri akorũo arĩ we mũtwe wa famĩlĩ nĩ mwega-rĩ, nĩ kĩĩ gĩtũmaga atumia aingĩ maigue mahinyĩrĩirio nĩ athuri ao? Nĩ tondũ athuri aingĩ matirũmagĩrĩra ũtongoria wa Jehova wĩgiĩ famĩlĩ, no handũ ha ũguo marũmagĩrĩra ũndũire wa kwao. Ningĩ amwe nĩ mekaga atumia ao maũndũ moru nĩ ũndũ wa mwĩyendo. Kwa ngerekano, mũthuri no ahinyĩrĩrie mũtumia wake nĩguo eyonanie atĩ nĩ mũndũ wa bata kana onie andũ arĩa angĩ atĩ we nĩ mũndũrũme. No eĩre atĩ ndangĩhota gũtũma mũtumia wake amwende kĩa hinya no no eke ũndũ ũngĩtũma amwĩtigĩre. Mũtumia agĩa guoya na njĩra ĩyo, mũthuri ũcio no ahũthĩre ũndũ ũcio kũgariũra mũtumia wake ũrĩa arenda. * Mwĩcirĩrie ta ũcio nĩ ũtũmaga atumia mage kũheo gĩtĩo kĩrĩa kĩmagĩrĩire, na ũndũ ũcio nĩ mũgarũ mũno na ũrĩa Jehova endaga.—Thoma Aefeso 5:25, 28.
MŨTHURI ANGĨĨRUTA ATĨA GŨKORŨO ARĨ MŨTWE MWEGA WA FAMĨLĨ?
8. Mũthuri angĩĩruta atĩa gũkorũo arĩ mũtwe mwega wa famĩlĩ?
8 Mũthuri no erute gũkorũo arĩ mũtwe mwega wa famĩlĩ angĩĩgerekania na ũrĩa Jehova na Jesu mahũthagĩra ũnene wao. Rekei tuone ngumo igĩrĩ Jehova na Jesu monanagia, na tuone ũrĩa mũtwe wa famĩlĩ angĩonania ngumo icio rĩrĩa ararũmbũyania na mũtumia na ciana ciake.
9. Jehova onanagia wĩnyihia na njĩra ĩrĩkũ?
9 Wĩnyihia. Jehova nĩwe mũũgĩ mũno igũrũ na thĩ, no nĩ athikagĩrĩria mawoni ma ndungata ciake. (Kĩam. 18:23, 24, 32) Nĩ aheaga arĩa marĩ rungu rwake mweke wa kũruta mawoni. (1 Ath. 22:19-22) Ningĩ o na gũtuĩka nĩ mũkinyanĩru, ihinda-inĩ rĩrĩ nderĩgagĩrĩra twĩke maũndũ makĩrĩte ũhoti witũ. Handũ ha ũguo, nĩ ateithagia andũ matarĩ akinyanĩru nĩguo mahote kũmũtungatĩra. (Thab. 113:6, 7) Bibilia yugaga atĩ Jehova nĩ “mũteithia.” (Thab. 27:9; Ahib. 13:6) Mũthamaki Daudi ooigire atĩ aahotire kũhingia maũndũ maingĩ marĩa aahingirie tondũ Jehova nĩ eenyihirie akĩmũteithia.—2 Sam. 22:36.
10. Jesu oonanirie wĩnyihia na njĩra ĩrĩkũ?
10 Ta wĩcirie ũhoro wa kĩonereria kĩa Jesu. O na gũtuĩka aarĩ Mwathani harĩ arutwo ake, nĩ aamathambirie magũrũ. Hihi nĩ kĩĩ gĩatũmire Jehova andĩkithie ũhoro ũcio thĩinĩ wa Bibilia? Nĩgetha mũndũ o wothe, o hamwe na ciongo cia famĩlĩ marũmagĩrĩre kĩonereria kĩu. Jesu we mwene ooigire ũũ: “Nĩ kĩonereria ndamũigĩra, atĩ o ta ũguo ndeka harĩ inyuĩ, o na inyuĩ mwĩkage ũguo.” (Joh. 13:12-17) O na gũtuĩka nĩ eehokeirũo maũndũ manene, Jesu ndeerĩgagĩrĩra gũtungatĩrũo nĩ andũ arĩa angĩ. Handũ ha ũguo, nĩwe wamatungatagĩra.—Mat. 20:28.
Mũthuri no onanie wĩnyihia na wendo na njĩra ya kũruta mawĩra ma nyũmba, na kũhingĩria famĩlĩ yake mabataro ma kĩĩroho (Rora kĩbungo gĩa 11, 13)
11. Nĩ ũndũ ũrĩkũ mũtwe wa famĩlĩ angĩĩruta wĩgiĩ wĩnyihia kuumana na kĩonereria kĩa Jehova na Jesu?
11 Tũreruta atĩa? Mũtwe wa famĩlĩ no onanie wĩnyihia na njĩra nyingĩ. Kwa ngerekano, ndangĩrĩgĩrĩra atĩ mũtumia na ciana ciake nĩ marĩkaga maũndũ hingo ciothe matekũhĩtia. Nĩ athikagĩrĩria mawoni ma mũtumia wake na ciana o na rĩrĩa marĩ ngũrani na mawoni make. Marley ũrĩa ũikaraga Amerika (US) ooigire ũũ: “Rĩmwe na rĩmwe tũrĩ na mũthuri wakwa nĩ tũkoragwo na mawoni ngũrani. No nĩ menyaga atĩ nĩ onaga ndĩ wa bata na nĩ aheete gĩtĩo tondũ nĩ anjũragia mawoni makwa, na akameciria na njĩra ndikĩru atanatua itua.” Makĩria ma ũguo, mũthuri mwĩnyihia nĩ ateithagĩrĩria mawĩra ma nyũmba, o na angĩkorũo kũrĩa aikaraga mawĩra macio monagwo ta arĩ ma atumia. Ũndũ ũcio no ũkorũo ũtarĩ mũhũthũ. Nĩkĩ hihi? Mwarĩ wa Ithe witũ wĩtagwo Rachel ooigire ũũ: “Kũrĩa nyumĩte, mũthuri angĩteithĩrĩria mũtumia wake gũthambia indo kana gũthambia nyũmba andũ a famĩlĩ na andũ a itũũra marigagwo kaĩ arĩ mũndũrũme wa mũthemba ũrĩkũ. Moigaga atĩ nĩ aikarĩirũo nĩ mũtumia wake.” Angĩkorũo kwanyu andũ makoragwo na mawoni ta macio, ririkanaga atĩ Jesu nĩ aathambirie arutwo ake magũrũ o na gũtuĩka wĩra ũcio woonagwo wagĩrĩire kũrutwo nĩ ngombo. Mũthuri mwega ndeciragia ũrĩa ekuoneka nĩ andũ arĩa angĩ, no ũndũ ũrĩa wa bata harĩ we nĩ gũtũma mũtumia wake na ciana makorũo na gĩkeno. Tiga wĩnyihia-rĩ, nĩ ngumo ĩrĩkũ ĩngĩ ya bata mũtwe wa famĩlĩ agĩrĩirũo gũkorũo nayo?
12. Wendo ũtũmaga Jehova na Jesu meke maũndũ marĩkũ?
12 Wendo. Jehova ekaga maũndũ mothe agĩtongorio nĩ wendo. (1 Joh. 4:7, 8) Nĩ arũmbũyagia mabataro maitũ ma kĩĩroho akĩhũthĩra Kiugo gĩake Bibilia, na ithondeka rĩake. Ningĩ nĩ arũmbũyagia mabataro maitũ ma ngoro na njĩra ya gũtũteithia gũkorũo na ma atĩ nĩ atwendete. Ĩ namo mabataro maitũ ma kĩĩmwĩrĩ? Jehova atũheaga na “ũtaana indo ciothe iria tũkenagĩra.” (1 Tim. 6:17) Rĩrĩa twahĩtia nĩ atũrũngaga na ndatigaga gũtwenda. Nĩ ũndũ wa Jehova gũtwenda, nĩ aabangire mũbango wa gũtũkũũra. O na Jesu nĩ atwendete mũno, ũũ atĩ nĩ aarutire muoyo wake nĩ ũndũ witũ. (Joh. 3:16; 15:13) Gũtirĩ ũndũ ũngĩtũma Jehova na Jesu matige kwenda andũ arĩa makoragwo marĩ ehokeku harĩ o.—Joh. 13:1; Rom. 8:35, 38, 39.
13. Nĩkĩ nĩ ũndũ wa bata harĩ mũtwe wa famĩlĩ kuonia famĩlĩ yake wendo? (Ningĩ rora gathandũkũ, “ Mũthuri Angĩka Atĩa Ahikania Nĩguo Mũtumia Wake Amũhe Gĩtĩo?”)
13 Tũreruta atĩa? Ũndũ o wothe mũtwe wa famĩlĩ areka abatiĩ gũtindĩkwo nĩ wendo. Ũndũ ũcio nĩ wa bata mũno nĩkĩ? Mũtũmwo Johana ooigire ũũ: “Mũndũ ũrĩa ũtendete mũrũ wa Ithe [kana famĩlĩ], ũcio onete, ndangĩhota kwenda Ngai, ũcio atarĩ ona.” (1 Joh. 4:11, 20) Kwoguo, mũthuri wendete famĩlĩ yake na ũrenda kwĩgerekania na Jehova na Jesu nĩ ahingagĩria famĩlĩ yake mabataro ma kĩĩroho, mabataro ma ngoro, na ma kĩĩmwĩrĩ. (1 Tim. 5:8) Nĩ arutaga ciana ciake na agacirũnga. Ningĩ hingo ciothe nĩ erutanagĩria gũtua matua maratĩithia Jehova na mekũguna famĩlĩ yake. Rekei twarĩrĩrie maũndũ macio na tuone ũrĩa mũtwe wa famĩlĩ angĩĩgerekania na Jehova na Jesu.
MAŨNDŨ MARĨA MŨTWE WA FAMĨLĨ AGĨRĨIRŨO GWĨKA
14. Mũtwe wa famĩlĩ ahingagĩria famĩlĩ yake mabataro ma kĩĩroho atĩa?
14 Kũhingĩria famĩlĩ yake mabataro ma kĩĩroho. Jesu nĩ eegerekanirie na Ithe na njĩra ya kũhingĩria andũ arĩa maarĩ rungu rwake mabataro ma kĩĩroho. (Mat. 5:3, 6; Mar. 6:34) Na njĩra o ta ĩyo, ũndũ wa mbere ũrĩa mũtwe wa famĩlĩ abatiĩ gwĩka nĩ kũhingĩria famĩlĩ yake mabataro ma kĩĩroho. (Gũcok. 6:6-9) Ekaga ũguo na njĩra ya gũtigĩrĩra atĩ we, o hamwe na famĩlĩ yake nĩ marathoma na makeruta Kiugo kĩa Ngai, magathiĩ mĩcemanio, makahunjia ũhoro ũrĩa mwega, na magakorũo na ũrata mwega hamwe na Jehova.
15. Nĩ njĩra ĩrĩkũ ĩmwe mũtwe wa famĩlĩ angĩonania nayo atĩ nĩ ararũmbũiya mabataro ma ngoro ma famĩlĩ yake?
15 Kũhingĩria famĩlĩ yake mabataro ma ngoro. Jehova eerire Jesu atĩ nĩ amwendete andũ makĩiguagĩra. (Mat. 3:17) Jesu nĩ oonanirie atĩ nĩ eendete arũmĩrĩri ake kũgerera maũndũ marĩa eekaga na marĩa ooigaga. Ũndũ ũcio nĩ watũmaga o nao mamwende. (Joh. 15:9, 12, 13; 21:16) Mũtwe wa famĩlĩ no onanie atĩ nĩ endete mũtumia wake na ciana, kũgerera maũndũ marĩa areka ta kwĩruta nao Bibilia. Ningĩ nĩ agĩrĩirũo kũmeera atĩ nĩ amendete na nĩ onaga marĩ a bata, na rĩrĩa kwagĩrĩire, akamagaathĩrĩria o na mbere ya andũ arĩa angĩ.—Thim. 31:28, 29.
Nĩguo mũthuri akenie Jehova, nĩ agĩrĩirũo kũhingĩria famĩlĩ yake mabataro ma kĩĩmwĩrĩ (Rora kĩbungo gĩa 16)
16. Nĩ atĩa ũngĩ mũtwe wa famĩlĩ agĩrĩirũo gwĩka, na agĩrĩirũo kwĩmenyerera ũndũ ũrĩkũ?
16 Kũhingĩria famĩlĩ yake mabataro ma kĩĩmwĩrĩ. Jehova nĩ aahingĩirie Aisiraeli mabataro ma o mũhaka, o na rĩrĩa maaherithagio nĩ ũndũ wa kwaga gwathĩka. (Gũcok. 2:7; 29:5) Ningĩ nĩ atũhingagĩria mabataro maitũ ma o mũhaka mahinda-inĩ maya. (Mat. 6:31-33; 7:11) O ta Jehova, Jesu nĩ aaheire andũ arĩa maamũrũmagĩrĩra kĩndũ gĩa kũrĩa. (Mat. 14:17-20) Ningĩ nĩ aarũmbũyagia ũgima wao wa mwĩrĩ. (Mat. 4:24) Nĩguo mũtwe wa famĩlĩ akenie Jehova, nĩ agĩrĩirũo kũhingĩria famĩlĩ yake mabataro ma kĩĩmwĩrĩ. O na kũrĩ ũguo, nĩ agĩrĩire gũkorũo na ũigananĩru. Nĩ agĩrĩire kwĩmenyerera ndagatahwo nĩ wĩra mũno nginya aremwo nĩ kũhingĩria famĩlĩ yake mabataro ma kĩĩroho na ma ngoro.
17. Nĩ kĩonereria kĩrĩkũ Jehova na Jesu maigĩte ũhoro-inĩ wĩgiĩ gũtũmenyeria na gũtũrũnga?
17 Kũmenyeria andũ a famĩlĩ yake. Jehova atũmenyeragia na agatũrũnga tondũ nĩ endaga tũgunĩke. (Ahib. 12:7-9) O ta Jehova, Jesu amenyeragia arĩa marĩ rungu rwake na njĩra ya wendo. (Joh. 15:14, 15) Ndagaga gũtũrũnga, no ekaga ũguo na njĩra ya wendo. (Mat. 20:24-28) Nĩ ataũkagĩrũo atĩ tũtirĩ akinyanĩru, na kwoguo no tũhĩtie.—Mat. 26:41.
18. Nĩ ũndũ ũrĩkũ mũthuri mwega aririkanaga?
18 Mũtwe wa famĩlĩ ũrĩa wĩgerekanagia na Jehova na Jesu nĩ aririkanaga atĩ mũtumia wake na ciana ti akinyanĩru. Nĩ ũndũ ũcio, ‘ndamarakaragĩra arĩ na marũrũ.’ (Kol. 3:19) Handũ ha ũguo, ahũthagĩra ũtaaro ũrĩa ũrĩ thĩinĩ wa Agalatia 6:1 akageria ‘kũmarũnga arĩ na roho wa ũhooreri,’ o akĩririkanaga atĩ o nake ti mũkinyanĩru. O ta Jesu, nĩ aririkanaga atĩ njĩra ĩrĩa njega biũ ya kũruta andũ arĩa angĩ nĩ kũgerera kĩonereria gĩake.—1 Pet. 2:21.
19-20. Mũthuri angĩĩgerekania atĩa na Jehova na Jesu rĩrĩa aratua matua?
19 Gũtua matua atarĩ na mwĩyendo. Matua marĩa Jehova atuaga makoragwo marĩ ma kũguna andũ arĩa angĩ. Kwa ngerekano, aatũmbire tondũ nĩ eendaga o na ithuĩ tũkenere ũtũũro no ti nĩgetha egune. Gũtirĩ mũndũ wamũtindĩkĩrĩirie arute Mũrũ wake nĩ ũndũ wa mehia maitũ. Eekire ũguo eyendeire nĩgetha tũgunĩke. O na Jesu aatuaga matua marĩa mekũguna andũ arĩa angĩ. (Rom. 15:3) Kwa ngerekano, hĩndĩ ĩmwe nĩ eeimire akĩaga kũhurũka, nĩguo arute kĩrĩndĩ ũhoro mwega.—Mar. 6:31-34.
20 Mũthuri mwega nĩ amenyaga atĩ ũndũ ũmwe mũritũ ehokeirũo nĩ gũtua matua mega megiĩ famĩlĩ yake, na nĩ oyaga na ũritũ ũndũ ũcio ehokeirũo. Nĩ erutanagĩria kwaga gũtua matua matarĩ na mũthingi mwega, kana kũringana na ũrĩa araigua. Handũ ha ũguo, arekaga Jehova amũteithie gũtua matua mega. * (Thim. 2:6, 7) Na njĩra ĩyo, nĩ onanagia atĩ areka maũndũ ma kũguna andũ arĩa angĩ, no ti ma kwĩguna we mwene.—Afil. 2:4.
21. Gĩcunjĩ kĩrĩa kĩrũmĩrĩire kĩarĩrĩirie maũndũ marĩkũ?
21 Jehova nĩ ehokeire ciongo cia famĩlĩ wĩra mũritũ, na nĩ aroraga mũno ũrĩa maraũhingia. No mũthuri angĩĩrutanĩria kũrũmĩrĩra kĩonereria kĩrĩa kĩigĩtwo nĩ Jehova na Jesu, arĩkoragwo arĩ mũtwe mwega wa famĩlĩ. Nake mũtumia angĩhingia itemi rĩake, kĩhiko kĩao nĩ kĩrĩkoragwo na gĩkeno. Mũtumia agĩrĩire gũkorũo na mawoni marĩkũ megiĩ mũtwe wa famĩlĩ, na nĩ moritũ marĩkũ angĩcemania namo? Gĩcunjĩ kĩrĩa kĩrũmĩrĩire nĩ gĩcoketie ciũria icio.
RWĨMBO NA. 16 Goocai Jehova nĩ Ũndũ wa Mũrũwe
^ kĩb. 5 Rĩrĩa mũthuri ahikania, atuĩkaga mũtwe wa famĩlĩ njerũ. Thĩinĩ wa gĩcunjĩ gĩkĩ, nĩ tũkwarĩrĩria gũkorũo mũndũ arĩ mũtwe wa famĩlĩ nĩ kuuga atĩa, kĩrĩa gĩatũmire Jehova aige mũbango ũcio, na maũndũ marĩa athuri mangĩĩruta kuumana na kĩonereria kĩa Jehova na Jesu. Thĩinĩ wa gĩcunjĩ kĩrĩa kĩrũmĩrĩire, nĩ tũkaarĩrĩria maũndũ marĩa mũthuri na mũtumia mangĩĩruta kuuma kũrĩ Jesu na andũ angĩ magwetetwo Bibilia-inĩ. Na thĩinĩ wa gĩcunjĩ kĩrĩa gĩkaarũmĩrĩra kĩu nĩ tũkaarĩrĩria ũrĩa ariũ a Ithe witũ magĩrĩirũo gũtongoria kĩũngano.
^ kĩb. 7 Mwĩcirĩrie wa atĩ nĩ ũndũ mwagĩrĩru harĩ mũthuri kũhinyĩrĩria mũtumia wake o na nginya kũmũhũũra, rĩmwe na rĩmwe nĩ ũgaathagĩrĩrio thĩinĩ wa thenema, mĩthaako-inĩ, na mabuku-inĩ. Ũndũ ũcio nĩ ũtũmaga andũ mecirie atĩ ti ũũru mũthuri kũhinyĩrĩria mũtumia wake.
^ kĩb. 20 Nĩguo wone ũhoro makĩria wĩgiĩ ũrĩa ũngĩtua matua mega, rora gĩcunjĩ kĩrĩ na kĩongo, “Tua Matua ma Gũtĩithia Ngai,” thĩinĩ wa Mũrangĩri wa Ĩpuro 1, 2011, kar. 17-21.
