GĨCUNJĨ KĨA WĨRUTI GĨA 9
Wĩgerekanie na Jesu Harĩ Kwĩima nĩ Ũndũ wa Andũ Arĩa Angĩ
“Kũheana nĩ kũrĩ gĩkeno kĩnene gũkĩra kwamũkĩra.”—ATŨM. 20:35.
RWĨMBO NA. 17 “Nĩ Ngwenda”
GĨCUNJĨ-INĨ GĨKĨ a
1. Nĩ mwerekera ũrĩkũ mwega andũ a Jehova makoragwo naguo?
BIBILIA nĩ yarathĩte atĩ andũ a Ngai nĩ ‘mangĩkeerutagĩra meyendeire’ ũtungata-inĩ wa Jehova magĩtongorio nĩ Jesu. (Thab. 110:3) Hatarĩ nganja ũrathi ũcio nĩ ũrahinga ũmũthĩ. O mwaka, andũ a Jehova nĩ mahũthagĩra mathaa milioni nyingĩ wĩra-inĩ wa kũhunjia. Mekaga ũguo na kwĩyendera na matekũrĩhwo. Ningĩ nĩ mahũthagĩra mahinda mao gũteithia aarĩ na ariũ a Ithe witũ arĩa angĩ kuona mabataro mao, makamekĩra ngoro, na makamateithia gwĩkĩra hinya wĩtĩkio wao harĩ Jehova. Athuri a kĩũngano na ndungata cia kĩũngano nĩ mahũthagĩra mathaa maingĩ makĩhaarĩria icunjĩ cia mĩcemanio, na gũceerera aarĩ na ariũ a Ithe witũ nĩguo mamekĩre ngoro. Nĩ kĩĩ kĩmatindĩkaga gwĩka maũndũ macio mothe? Nĩ wendo wao harĩ Jehova na harĩ andũ arĩa angĩ.—Mat. 22:37-39.
2. Jesu aatũigĩire kĩonereria kĩrĩkũ kũringana na Aroma 15:1-3?
2 Jesu nĩ aatũigĩire kĩonereria kĩega gĩa kũiga mabataro ma andũ arĩa angĩ mbere ya make. Nĩ twĩrutanagĩria o ũrĩa wothe tũngĩhota kũrũmĩrĩra makinya make. (Thoma Aroma 15:1-3.) Andũ arĩa megerekanagia nake nĩ magunĩkaga. Jesu aaugire ũũ: “Kũheana nĩ kũrĩ gĩkeno kĩnene gũkĩra kwamũkĩra.”—Atũm. 20:35.
3. Tũkwarĩrĩria maũndũ marĩkũ gĩcunjĩ-inĩ gĩkĩ?
3 Gĩcunjĩ-inĩ gĩkĩ nĩ tũkwarĩrĩria maũndũ mamwe Jesu eeimire nĩguo atungatĩre andũ arĩa angĩ, na tuone ũrĩa tũngĩĩgerekania na kĩonereria gĩake. Ningĩ nĩ tũkwarĩrĩria ũrĩa tũngĩka nĩguo tũkoragwo twĩhaarĩirie makĩria gũtungatĩra andũ arĩa angĩ.
WĨGEREKANIE NA KĨONERERIA KĨA JESU
O na gũtuĩka Jesu aarĩ mũnogu-rĩ, eekire atĩa rĩrĩa andũ mookire kũrĩ we? (Rora kĩbungo gĩa 4)
4. Jesu aaigire mabataro ma andũ arĩa angĩ mbere ya make na njĩra ĩrĩkũ?
4 Jesu nĩ aateithagia andũ arĩa angĩ o na arĩ mũnogu. Ta wĩcirie ũrĩa Jesu eekire rĩrĩa andũ kĩrĩndĩ kĩnene maathiire kũrĩ we arĩ kĩrĩma-inĩ hihi hakuhĩ na Kaperinaumu. Jesu aararĩte ũtukũ mũgima akĩhoya. No mũhaka akorũo aarĩ mũnogu mũno, no rĩrĩa oonire andũ acio, nĩ aaiguire tha nĩ ũndũ wa arĩa maarĩ athĩni na arwaru gatagatĩ-inĩ kao. Nĩ aamahonirie, na makĩria ma ũguo akĩmarutĩra mĩario ĩrĩa ya gwĩkĩra ngoro mũno yanarutwo, yũĩkaine ta Mahunjio ma Kĩrĩma-inĩ.—Luk. 6:12-20.
Tũngĩĩgerekania na mwerekera wa Jesu wa kwĩima na njĩra irĩkũ ũtũũro-inĩ witũ? (Rora kĩbungo gĩa 5)
5. Ciongo cia famĩlĩ megerekanagia atĩa na mwerekera wa Jesu wa kwĩima rĩrĩa marĩ anogu?
5 Ũrĩa ciongo cia famĩlĩ megerekanagia na Jesu. Ta wĩcirie ngerekano ĩno: Thutha wa kĩongo kĩa famĩlĩ gũtinda akĩruta wĩra mũthenya mũgima, agakinya mũciĩ gwake anogete mũno. O na gũtuĩka araigua ta angĩtĩrĩria Ũthathaiya wa Famĩlĩ mũthenya ũcio, akahoya Jehova amũhe hinya nĩguo matigatĩrĩrie. Jehova agacokia mahoya make na mageka Ũthathaiya wa Famĩlĩ. Ũndũ ũcio ũgatũma ciana ciake ciĩrute ũndũ wa bata atĩ maũndũ marĩa aciari a cio maigĩte mbere ũtũũro-inĩ, nĩ maũndũ ma kĩĩroho.
6. Heana ngerekano ya ũrĩa Jesu eeimire mahinda make ma kũhurũka nĩguo ateithie andũ arĩa angĩ.
6 Jesu nĩ aahũthagĩra mahinda na andũ arĩa angĩ o na hĩndĩ ĩrĩa aangĩendire gũkorũo arĩ wiki. Ta geria kũhũũra mbica ũrĩa Jesu aaiguire rĩrĩa aamenyire atĩ mũrata wake Johana Mũbatithania nĩ oragĩtwo. Ũndũ ũcio no mũhaka akorũo nĩ wamwĩkĩrire kĩeha kĩingĩ mũno. Bibilia yugaga ũũ: “Rĩrĩa Jesu aaiguire [ũhoro wa gĩkuũ kĩa Johana], akiuma kũu na gatarũ, agĩthiĩ kũndũ gũtaarĩ andũ nĩguo akorũo arĩ wiki.” (Mat. 14:10-13) No tũtaũkĩrũo kĩrĩa gĩatũmaga ende gũkorũo arĩ wiki. Andũ amwe mendaga gũkorũo marĩ oiki rĩrĩa maracakaya. No ũguo tiguo gwathiire harĩ Jesu. Aakinya kũrĩa aathiaga nĩguo akorũo arĩ wiki, aakorire andũ kĩrĩndĩ kĩnene makinyĩte mbere yake. Hihi Jesu eekire atĩa? Nĩ eeciririe ũhoro wa mabataro ma andũ acio na “akĩringwo nĩ tha.” Nĩ oonire atĩ nĩ maabataraga kũigua maũndũ ma kĩĩroho, na o na ihenya akĩmateithia. Bibilia yugaga ũũ: “Akĩambĩrĩria kũmaruta maũndũ maingĩ.”—Mar. 6:31-34; Luk. 9:10, 11.
7-8. Heana ngerekano ĩronania ũrĩa athuri a kĩũngano megerekanagia na Jesu rĩrĩa mũndũ abatara ũteithio kĩũngano-inĩ.
7 Ũrĩa athuri a kĩũngano megerekanagia na Jesu. Nĩ tũcokagia ngatho mũno nĩ ũndũ wa ũrĩa athuri a kĩũngano meimaga na makaruta wĩra mũnene nĩ ũndũ witũ. Aarĩ na ariũ a Ithe witũ aingĩ kĩũngano-inĩ matimenyaga wĩra wothe ũrĩa athuri marutaga. Kwa ngerekano, rĩrĩa kwoimĩra ũndũ wa hinahi wĩgiĩ ũrigitani, athuri arĩa matungataga Kamĩtĩ-inĩ ya Ũiguano na Thibitarĩ nĩ mathiaga o na ihenya gũteithĩrĩria aarĩ na ariũ a Ithe witũ. Kaingĩ maũndũ ta macio moimĩraga ũtukũ. No nĩ ũndũ wa gũcaĩra mũrũ kana mwarĩ wa Ithe witũ ũrĩ na thĩna, athuri acio o hamwe na famĩlĩ ciao nĩ maigaga mabataro ma Akristiano arĩa angĩ mbere ya mao.
8 Athuri a kĩũngano ningĩ nĩ mateithagĩrĩria mĩako-inĩ ya Nyũmba cia Ũthamaki na mĩako ĩngĩ o hamwe na wĩra wa kũheana ũteithio. Na tũtingĩriganĩrũo nĩ mathaa maingĩ marĩa athuri mahũthagĩra ciũngano-inĩ citũ magĩtũruta na magĩtwĩkĩra ngoro. Nĩ tũracokeria ariũ a Ithe witũ acio na famĩlĩ ciao ngatho mũno. Jehova aromarathima! No o ta andũ arĩa angĩ, athuri a kĩũngano o nao nĩ mabataraga gũkorũo na ũigananĩru. Matiagĩrĩirũo kũhũthĩra mahinda maingĩ mũno magĩteithĩrĩria kĩũngano, nginya makaga mahinda ma kũrũmbũiya famĩlĩ ciao.
ŨRĨA TŨNGĨKŨRIA ROHO WA KWĨIMA
9. O ta ũrĩa Afilipi 2:4, 5 yonanĩtie-rĩ, nĩ mwerekera ũrĩkũ Akristiano othe magĩrĩirũo gũkũria?
9 Thoma Afilipi 2:4, 5. Ithuothe nĩ twagĩrĩirũo kwĩgerekania na Jesu harĩ kuonania roho wa kwĩima, to athuri a kĩũngano tu. Bibilia yugaga atĩ ‘ehaananirie na ngombo.’ (Afil. 2:7) Ũndũ ũcio ũratũruta atĩa? Ngombo kana ndungata yeendetwo nĩ mwathi wayo, nĩ yacaragia mĩeke ya kũmũkenia. Tondũ tũrĩ ngombo cia Jehova na nĩ tũtungatagĩra aarĩ na ariũ a Ithe witũ, nĩ twĩriragĩria o na makĩria kũhũthĩrũo nĩ Jehova na gũteithĩrĩria Akristiano arĩa angĩ. Kũhũthĩra motaaro maya marũmĩrĩire no gũtũteithie gwĩka ũguo.
10. Nĩ ciũria ta irĩkũ tũngĩĩyũria?
10 Thuthuria mwerekera waku. Wĩyũrie ciũria ta ici: ‘Hihi nĩ ngoragwo ndĩhaarĩirie kwĩima nĩguo ndeithie andũ arĩa angĩ? Kwa ngerekano-rĩ, ingĩka atĩa ingĩrũo njerere mũrũ wa Ithe witũ mũkũrũ kana ndeithie mwarĩ wa Ithe witũ mũkũrũ gũthiĩ mĩcemanio? Hihi kũngĩbatara andũ a kwĩrutĩra gũtheria kũrĩa gũgwĩkĩrũo kĩgomano kana kũmenyerera Nyũmba ya Ũthamaki-rĩ, nĩ ndĩrutagĩra o na ihenya gũteithĩrĩria?’ Tondũ nĩ tweyamũrĩire Jehova na tũkĩmwĩrĩra kũmũtungatĩra na kĩrĩa gĩothe tũrĩ nakĩo, nĩ akenaga rĩrĩa tweima na njĩra ya kũhũthĩra mahinda maitũ na indo citũ gũteithia andũ arĩa angĩ. Tũngĩka atĩa tũngĩona atĩ nĩ harĩ handũ tũrabatara kũrutĩra wĩra?
11. Mahoya mangĩtũteithia atĩa gũkũria roho wa kwĩima?
11 Hoya Jehova kuuma ngoro. Ũngĩka atĩa ũngĩmenya atĩ harĩ maũndũ ũrabatara kũrutĩra wĩra, no ndũrĩ na wendi wa gwĩka mogarũrũku marĩa marabatarania? Ũngĩmenya ũguo, hoya Jehova kuuma ngoro. Mwĩre maũndũ mothe. Ĩra Jehova ũrĩa ũraigua, na ũmwĩre akũhe “wendi o na ũhoti wa gwĩka maũndũ.”—Afil. 2:13.
12. Nĩ ũteithio ũrĩkũ ariũ a Ithe witũ ethĩ arĩa abatithie mangĩheana kĩũngano-inĩ?
12 Angĩkorũo ũrĩ mũrũ wa Ithe witũ mwĩthĩ na ũrĩ mũbatithie, hoya Jehova agũteithie gũkũria wendi wa gũteithia aarĩ na ariũ a Ithe witũ na njĩra nene makĩria kĩũngano-inĩ. Mabũrũri-inĩ mamwe, gũkoragwo na athuri aingĩ a kĩũngano gũkĩra ndungata cia kĩũngano, na aingĩ arĩa matungataga marĩ ndungata cia kĩũngano ti andũ ethĩ. O ũrĩa ithondeka rĩa Jehova rĩrathiĩ rĩkũrĩte, noguo tũrabatara ariũ a Ithe witũ aingĩ ethĩ a gũteithia kũrũmbũiya andũ a Jehova. Ũngĩkoragwo wĩhaarĩirie gũtungata handũ o hothe harĩa harabatarania, nĩ ũrĩkoragwo na gĩkeno. Nĩkĩ? Tondũ nĩ ũrĩkenagia Jehova, ũgethondekera rĩĩtwa rĩega kĩũngano-inĩ, na nĩ ũrĩiguaga ũiganĩire nĩ ũndũ wa gũteithia andũ arĩa angĩ.
Akristiano arĩa maaikaraga Judea nĩ moorĩire itũũra rĩa Pela rĩrĩa rĩarĩ mũkĩra wa Rũũĩ rwa Jorodani. Arĩa maakinyire itũũra-inĩ rĩu mbere maragaĩra Akristiano arĩa makinya thutha irio (Rora kĩbungo gĩa 13)
13-14. Nĩ makinya marĩkũ ũngĩoya ma gũteithĩrĩria aarĩ na ariũ a Ithe witũ? (Rora mbica ngothi-inĩ.)
13 Ikaraga ũrĩ maitho, nĩguo ũkona nũũ ũrabatara ũteithio. Mũtũmwo Paulo eerire Ahibirania ũũ: “Mũtikanariganĩrũo gwĩkaga wega na kũgayagĩra arĩa angĩ kĩrĩa mũrĩ nakĩo, nĩ ũndũ Ngai nĩ akenagio mũno nĩ magongona ta macio.” (Ahib. 13:16) Ũcio warĩ ũtaaro wa bata! Ihinda inini thutha wa kwamũkĩra marũa macio, Akristiano arĩa maaikaraga Judea nĩ maabatarire gũtiga mĩciĩ yao, biacara ciao, na andũ ao a famĩlĩ arĩa mataarĩ etĩkia na ‘makĩambĩrĩria kũũrĩra irĩma-inĩ.’ (Mat. 24:16) Ihinda-inĩ rĩu, nĩ maabataraga mũno gũteithania. Angĩkorũo nĩ maarũmagĩrĩra ũtaaro wa Paulo mbere ĩyo wa kũgayagĩra arĩa angĩ kĩrĩa marĩ nakĩo, nĩ ũngĩarĩ ũndũ mũhũthũ harĩ o kũmenyera ũtũũro mwerũ.
14 Ti hingo ciothe aarĩ na ariũ a Ithe witũ mangĩtwĩra maũndũ marĩa marabatara. Kwa ngerekano, mũrũ wa Ithe witũ no akorũo akuĩrĩirũo nĩ mũtumia wake. Hihi mũrũ wa Ithe witũ ũcio no akorũo akĩbatara ũteithio wa irio, gũtwarũo handũ, kana mawĩra ma mũciĩ? No age gũtwĩra, tondũ ndarenda gũtũthumbũra. Ĩndĩ no akene mũno tũngĩmũhe ũteithio ũrĩa arabatara o na atatwĩrĩte. Tũtiagĩrĩire gũtua atĩ mũndũ ũngĩ nĩ ekũmũteithia, kana atĩ hingo ciothe nĩ arĩtwĩraga ũteithio ũrĩa arabatara. Wĩyũrie, ‘Korũo nĩ niĩ-rĩ, ingĩenda gũteithio atĩa?’
15. Twagĩrĩirũo gwĩka atĩa angĩkorũo nĩ tũrenda gũteithagia andũ arĩa angĩ?
15 Tuĩka mũndũ ũngĩkinyĩrĩka. No gũkorũo nĩ ũũĩ aarĩ na ariũ a Ithe witũ kĩũngano-inĩ kĩanyu, arĩa makoragwo hingo ciothe mehaarĩirie gũteithia andũ arĩa angĩ. Rĩrĩa twamahoya ũteithio, matitũmaga tũigue ta tũramathumbũra. Nĩ tũmenyaga atĩ rĩrĩa twabatara ũteithio no matũteithie, na nĩ twendaga kwĩgerekania nao. Mũthuri ũmwe wa kĩũngano ũrĩ na mĩaka 45 wĩtagwo Alan, nĩ endaga gũkorũo arĩ mũndũ ũngĩkinyĩrĩka. Akĩaria ũhoro wĩgiĩ kĩonereria kĩa Jesu, Alan aaugire ũũ: “Jesu nĩ aakoragwo na maũndũ maingĩ ma gwĩka, no andũ arĩa akũrũ na arĩa ethĩ matiaiguaga hinya kũmũkuhĩrĩria o na kũmũhoya ũteithio. Nĩ maamenyaga atĩ nĩ aamarũmbũyagia. Nĩ nyendaga mũno kwĩgerekania na mwerekera wa Jesu, na ngorũo njũĩkaine ta mũndũ ũngĩkinyĩrĩka, ũrĩ wendo, na ũrũmbũyagia andũ arĩa angĩ.”
16. Kũhũthĩra ũtaaro wa Thaburi 119:59, 60 kũngĩtũteithia atĩa kwĩgerekania na kĩonereria kĩa Jesu?
16 Tũtiagĩrĩirũo gũkua ngoro tũngĩremwo nĩ kwĩgerekania na Jesu na njĩra nginyanĩru. (Jak. 3:2) Mũrutwo ndangĩhota kwĩgerekania na mwarimũ wake na njĩra nginyanĩru. No angĩĩruta kuumana na mahĩtia make we mwene na erutanĩrie biũ kwĩgerekania na mwarimũ wake o ũrĩa angĩhota, nĩ athiaga akĩongagĩrĩra ũmenyo. Ũndũ ũmwe na ũcio, tũngĩhũthagĩra maũndũ marĩa tũreruta wĩruti-inĩ witũ wa Bibilia, na tũkerutanĩria ũrĩa tũngĩhota gwĩka mogarũrũku marĩa marabatarania, o na ithuĩ no tũhote kũrũmĩrĩra kĩonereria kĩa Jesu.—Thoma Thaburi 119:59, 60.
ŨGUNI WA KWĨIMA NĨ ŨNDŨ WA ANDŨ ARĨA ANGĨ
Rĩrĩa athuri a kĩũngano megerekania na mwerekera wa Jesu wa kwĩima, nĩ maigagĩra andũ ethĩ kĩonereria kĩega (Rora kĩbungo gĩa 17) b
17-18. Tũrĩgunĩkaga atĩa twegerekania na mwerekera wa Jesu wa kwĩima?
17 Mwerekera witũ wa kwĩima no ũtũme andũ arĩa angĩ o nao mende kwĩgerekania na ithuĩ. Mũthuri ũmwe wa kĩũngano wĩtagwo Tim aaugire ũũ: “Nĩ tũrĩ na andũ ethĩ mathiĩte na mbere nginya magakinyĩrĩra gũtuĩka ndungata cia kĩũngano, na ũndũ ũmwe ũmateithĩtie nĩ kuona mwerekera wa kwĩima wa andũ arĩa angĩ, na makenda kwĩgerekania nao. Ariũ a Ithe witũ acio ethĩ nĩ mateithagia kĩũngano gitũ na magateithĩrĩria nginya athuri a kĩũngano.”
18 Tũratũũra thĩinĩ wa thĩ ĩiyũire andũ meyendete. No andũ a Jehova makoragwo marĩ ngũrani. Nĩ twakena mũno kuona ũrĩa Jesu oonanirie mwerekera wa kwĩima, na nĩ twĩhotorete kwĩgerekania na kĩonereria gĩake. Tũkwenda ‘kwĩrutanagĩria biũ kũrũmĩrĩra makinya make,’ o na akorũo tũtingĩhota kũmarũmĩrĩra na njĩra nginyanĩru. (1 Pet. 2:21) Tweka ũrĩa wothe tũngĩhota kwĩgerekania na mwerekera wa Jesu wa kwĩima, o na ithuĩ nĩ tũrĩkenaga nĩ kũmenya atĩ nĩ tũrakenia Jehova.
RWĨMBO NA. 13 Kristo nĩ Kĩonereria Gitũ
a Hingo ciothe Jesu aarũmbũyagia mabataro ma andũ arĩa angĩ mbere ya make. Gĩcunjĩ-inĩ gĩkĩ, nĩ tũkuona nĩ na njĩra irĩkũ tũngĩĩgerekania na kĩonereria gĩake. Ningĩ nĩ tũkwarĩrĩria ũrĩa kwĩgerekania na mwerekera wa Jesu wa kwĩima kũngĩtũrehera irathimo cia gũtũũra.
b GŨTAARĨRIA MBICA: Mũrũ wa Ithe witũ mwĩthĩ wĩtagwo Dan eroreire athuri erĩ a kĩũngano maceereire baba wao thibitarĩ. Dan akahutio nĩ kĩonereria kĩu kĩa athuri a kĩũngano, na o nake akerutanĩria gwetha mĩeke ya gũteithia andũ arĩa angĩ kĩũngano-inĩ. Mũrũ wa Ithe witũ ũngĩ mwĩthĩ wĩtagwo Ben, akona ũrĩa Dan ararũmbũiya andũ arĩa angĩ. Kĩonereria kĩa Dan gĩgekĩra Ben ngoro gũteithĩrĩria gũtheria Nyũmba ya Ũthamaki.
