RŨGANO rũrĩa rũkoragwo thĩinĩ wa Kĩambĩrĩria 22:6 ruonanagia atĩ Iburahimu akĩĩhaarĩria gũthiĩ kũruta igongona handũ haraihu, oire “ngũ icio cia gũcina ihaki rĩu, agĩciigĩrĩra mũriũ Isaaka; nake agĩthiĩ agwete (akuuĩte) mwaki o na kahiũ, nao erĩ magĩgĩthiĩ hamwe.”

Maandĩko matigwetete njĩra ĩrĩa yahũthagĩrũo gwakia mwaki matukũ-inĩ macio ma tene. Mũndũ ũmwe akĩaria ũhoro wa rũgano rũu oigire atĩ rũrĩrĩmbĩ rwa mwaki “rũtingĩathire rwakanĩte rũgendo-inĩ rũu ruothe rũraihu,” rũrĩa Iburahimu na Isaaka maathire. Kwoguo, no kũhoteke atĩ kĩrĩa kĩarĩrĩirio hau nĩ kĩrĩa maahũthagĩra gwakia mwaki.

O na kũrĩ ũguo, andũ angĩ moigaga atĩ ndwarĩ ũndũ mũhũthũ gwakia mwaki matukũ-inĩ ma tene. Rĩrĩa kwahoteka, andũ moonaga arĩ ũndũ mũhũthũ kũhoya ikara rĩa mwaki kuuma kũrĩ arĩa mariganĩtie, handũ ha kũgeria gwakia mwaki wao. Nĩkĩo athomi amwe metĩkĩtie atĩ kĩrĩa Iburahimu aakuuĩte, kwahoteka nĩ kanyũngũ gacunjurĩtio na nyororo, karĩa kaarĩ na makara mahiũ marĩa maarutĩtwo mwaki-inĩ ũrĩa watigarĩte ũtukũ ũcio. (Isa. 30:14) Makara ta macio mahiũ makuĩtwo na njĩra ĩyo nĩ mangĩahũthĩrirũo gwakia mwaki na njĩra hũthũ mũndũ akĩhũthĩra tũkũ tũceke harĩa hothe angĩakorirũo arĩ rũgendo-inĩ.