1. Mũrũ wa Ithe witũ ũmwe mwĩthĩ aahutirio atĩa nĩ mĩario yarutirũo kĩgomano-inĩ kĩmwe mwaka-inĩ wa 1935?

MWAKA-INĨ wa 1926 kwarĩ na famĩlĩ ĩmwe ya Arutwo a Bibilia, ta ũrĩa Aira a Jehova meetagwo hĩndĩ ĩyo. Famĩlĩ ĩyo yarĩ ya mũrũ wa Ithe witũ ũmwe na mũtumia wake, ariũ ao atatũ, na airĩtu erĩ. Na aciari acio nĩ maarutĩte ciana ciao gũtungatĩra Jehova na kwĩgerekania na Jesu Kristo. Mũriũ ũmwe wao aarĩ na mĩaka 18 rĩrĩa aabatithirio mwaka ũcio. O ta ũrĩa Arutwo a Bibilia acio angĩ othe meekaga hĩndĩ ĩyo, mũrũ wa Ithe witũ ũcio mwĩthĩ nĩ aarĩaga mũgate na akanyua ndibei o mwaka hĩndĩ ya Irio cia Hwaĩ-inĩ cia Mwathani. O na kũrĩ ũguo, kĩĩrĩgĩrĩro gĩake kĩa mahinda marĩa maroka nĩ gĩacenjirie rĩrĩa aaiguire mĩario ya bata yarĩ na kĩongo, “Kĩrĩndĩ Kĩingĩ.” Mĩario ĩyo yarutirũo mwaka-inĩ wa 1935 nĩ J. F. Rutherford kĩgomano-inĩ kĩrĩa gĩekĩirũo Washington, D.C., Amerika (US). Nĩ ũndũ ũrĩkũ Arutwo a Bibilia meerutire kĩgomano-inĩ kĩu?

2. Nĩ ũtheri ũrĩkũ wa kĩĩroho waguũririo mĩario-inĩ ya Mũrũ wa Ithe Witũ Rutherford?

² Thĩinĩ wa mĩario ĩyo aarutire, Mũrũ wa Ithe Witũ Rutherford nĩ aataarĩirie nĩa mangĩgaakorũo marĩ a “kĩrĩndĩ kĩingĩ” (The Bible in Gikũyũ), kana “kĩrĩndĩ kĩnene” kĩrĩa kĩgwetetwo thĩinĩ wa Kũguũrĩrio 7:9. Gũkinyĩria hĩndĩ ĩyo, andũ a kĩrĩndĩ kĩingĩ moonagwo ta arĩ Akristiano arĩa magaathiĩ igũrũ, no matioonagwo marĩ ehokeku ta Akristiano arĩa aitĩrĩrie maguta. Mũrũ wa Ithe Witũ Rutherford nĩ aahũthĩrire Maandĩko gũtaarĩria  atĩ andũ a kĩrĩndĩ kĩnene matigaathiĩ igũrũ, no o nĩ ng’ondu ingĩ * cia Kristo arĩa makaahonoka “thĩna ũrĩa mũnene,” na matũũre tene na tene thĩinĩ wa thĩ. (Kũg. 7:14) Jesu eeranĩire ũũ: “Ndĩ na ng’ondu ingĩ, itarĩ cia kiugũ gĩkĩ; icio nacio no mũhaka ndĩcirehe, na nĩ igaathikagĩrĩria mũgambo wakwa, nacio nĩ igaatuĩka rũũru rũmwe, na ikorũo na mũrĩithi ũmwe.” (Joh. 10:16) Ng’ondu icio ingĩ, nĩ ndungata njĩhokeku cia Jehova iria irĩ na kĩĩrĩgĩrĩro gĩa gũgaatũũra thĩinĩ wa thĩ tene na tene ĩrĩ Paradiso. (Mat. 25:31-33, 46) Rekei tuone ũrĩa ũtheri ũcio mwerũ wa kĩĩroho wacenjirie ũtũũro wa ndungata nyingĩ cia Jehova nginya wa mũrũ wa Ithe witũ ũcio wa mĩaka 18.—Thab. 97:11; Thim. 4:18.

3-4. Kĩgomano-inĩ kĩa 1935, nĩ ũndũ ũrĩkũ andũ aingĩ maataũkĩirũo wĩgiĩ kĩĩrĩgĩrĩro kĩao?

³ Andũ nĩ maacanjamũkire mũno kĩgomano-inĩ kĩu rĩrĩa mwaria ooigire ũũ: “Arĩa othe marĩ na kĩĩrĩgĩrĩro gĩa gũgaatũũra gũkũ thĩ nĩ marũgame.” Mũrũ wa Ithe witũ ũmwe warĩ kĩgomano-inĩ kĩu ooigire atĩ kwarĩ na andũ ta 20,000, na makĩria ma nuthu ya andũ acio nĩ maarũgamire. Mũrũ wa Ithe Witũ Rutherford aacokire akiuga ũũ: “Ta rorai! Kĩrĩndĩ kĩingĩ!” Aarĩkia kuuga ũguo, andũ othe arĩa maarĩ kĩhaaro-inĩ kĩu makiugĩrĩria nĩ ũndũ wa gũkena. Andũ arĩa maarũgamire nĩ maataũkĩirũo atĩ matiathuurĩtwo nĩguo mathiĩ magatũũre kũrĩa igũrũ. Nĩ maamenyire atĩ matiarĩ aitĩrĩrie maguta kũgerera roho wa Ngai. Mũthenya ũrĩa warũmĩrĩire wa kĩgomano kĩu, andũ 840 nĩ maabatithirio, na aingĩ ao maarĩ a ng’ondu ingĩ.

⁴ Thutha wa mĩario ĩyo, mũrũ wa Ithe witũ mwĩthĩ ũrĩa ũkũgwetetwo kĩambĩrĩria-inĩ, o hamwe na andũ angĩ ngiri nyingĩ nĩ maatigire kũrĩaga mũgate na kũnyua ndibei hĩndĩ ya Irio cia Hwaĩ-inĩ cia Mwathani. Mũrũ wa Ithe witũ ũmwe mwĩnyihia nĩ oonanirie mawoni marĩa maarĩ na andũ aingĩ rĩrĩa ooigire ũũ: “Ndaatigire kũrĩa mũgate na kũnyua ndibei hĩndĩ ya Kĩririkano kĩa mwaka wa 1935. Nĩ ndaamenyire atĩ Jehova ndaahũthĩrĩte roho wake mũtheru kũhe kĩĩrĩgĩrĩro gĩa gũgaatũũra kũrĩa igũrũ, handũ ha ũguo ndaarĩ na kĩĩrĩgĩrĩro gĩa gũgaatũũra gũkũ thĩ na gũteithĩrĩria kũmĩtua paradiso.” (Rom. 8:16, 17; 2 Kor. 1:21, 22) Kuuma hĩndĩ ĩyo, andũ a kĩrĩndĩ kĩnene mathiĩte na mbere kuongerereka na nĩ manyitanagĩra hamwe na aitĩrĩrie maguta arĩa matigarĩte.

5. Jehova aiguaga atĩa igũrũ rĩgiĩ andũ arĩa matigaga kũrĩa mũgate na kũnyua ndibei hĩndĩ ya Kĩririkano?

⁵ Jehova aaiguire atĩa nĩ ũndũ wa andũ arĩa maatigire kũrĩaga mũgate na kũnyua ndibei kuuma mwaka wa 1935? Na hihi aiguaga atĩa mahinda-inĩ maya ona Mũkristiano mũbatithie ũrĩa weciragia atĩ nĩ agĩrĩirũo kũrĩa mũgate na kũnyua ndibei hĩndĩ ya Irio cia Hwaĩ-inĩ cia Mwathani, no thutha-inĩ akamenya atĩ ti mũitĩrĩrie maguta kũgerera roho mũtheru? (1 Kor. 11:28) Andũ amwe manarĩa mũgate na makanyua ndibei nĩ ũndũ wa kwaga gũtaũkĩrũo wega nĩ kĩĩrĩgĩrĩro kĩao. No mangĩtĩkĩra atĩ nĩ makoretwo makĩhĩtia, matige kũrĩa mũgate na kũnyua ndibei na mathiĩ na mbere gũtungatĩra Jehova marĩ ehokeku, Jehova no ametĩkĩre marĩ a ng’ondu ingĩ. O na akorũo andũ a ng’ondu ingĩ matirĩaga mũgate na makanyua ndibei nĩ mathiaga Kĩririkano, tondũ nĩ makoragwo na ngatho nyingĩ kũrĩ Jehova na Jesu nĩ ũndũ wa maũndũ marĩa mamekĩire.

6. Jesu athĩte araika meke atĩa?

⁶ Tondũ thĩna ũrĩa mũnene ũrĩ hakuhĩ mũno, no twĩkĩrũo ngoro tũngĩthuthuria ũrĩa Kũguũrĩrio mũrango wa 7 yugaga igũrũ rĩgiĩ Akristiano arĩa aitĩrĩrie maguta na igũrũ rĩgiĩ kĩrĩndĩ kĩnene kĩa ng’ondu ingĩ. Jesu athĩte araika mathiĩ na mbere kũgirĩrĩria huho iria inya cia kũrehe mwanangĩko. Magĩrĩirũo kũnyitĩrĩra huho icio, nginya Akristiano othe aitĩrĩrie maguta mekĩrũo mũhũũri na ũguo nĩ kuuga nginya Jehova atue atĩ nĩ ehokeku. (Kũg. 7:1-4) Ariũ acio a Ithe na Kristo maakorũo marĩ ehokeku nĩ maheagwo ngerenwa ya gũthiĩ kũrĩa igũrũ magatuĩke athamaki na athĩnjĩri-Ngai hamwe na Kristo. (Kũg. 20:6) Jehova, Jesu, na araika nĩ magaakena mũno hĩndĩ ĩrĩa aitĩrĩrie maguta othe 144,000 makaaheo ngerenwa yao kũrĩa igũrũ.

7. Kũringana na Kũguũrĩrio 7:9, 10, nĩa Johana oonire thĩinĩ wa kĩoneki, na meekaga atĩa? (Rora mbica ngothi-inĩ.)

⁷ Thutha wa kwaria ũhoro wĩgiĩ andũ 144,000 arĩa magaakorũo marĩ athamaki na athĩnjĩri-Ngai, Johana aacokire akĩona ũndũ ũngĩ wa gũcanjamũra, akĩona andũ “kĩrĩndĩ kĩnene” arĩa mangĩkaahonoka Hari–Magedoni. Gĩkundi kĩu gĩa kerĩ oonire nĩ ngũrani na kĩa mbere tondũ kĩarĩ na andũ aingĩ makĩria na mũigana wao ndũgwetetwo. (Thoma Kũguũrĩrio 7:9, 10.) Meehumbĩte “kanjũ cia rangi mwerũ,” kuonania atĩ maaikarire ‘matarĩ na kameni’ kuuma kũrĩ thĩ ĩno ĩtongoragio nĩ Shaitani, na maaikarire marĩ ehokeku harĩ Ngai na Kristo. (Jak. 1:27) Maanagĩrĩra na mũgambo mũnene makoiga atĩ nĩ mahonoketio, nĩ ũndũ wa maũndũ marĩa Jehova na Jesu, o we Gatũrũme ka Ngai maamekĩire. Ningĩ nĩ maanyitĩte mathĩgĩ ma mĩtĩ ya mĩkĩndũ, kuonania atĩ nĩ maanyitaga Jesu mbaru makenete arĩ we Mũthamaki ũrĩa ũthuurĩtwo nĩ Jehova.—Ringithania Johana 12:12, 13.

8. Kũguũrĩrio 7:11, 12 ĩtwĩraga atĩa igũrũ rĩgiĩ famĩlĩ ya Jehova ya kũrĩa igũrũ?

⁸ Thoma Kũguũrĩrio 7:11, 12. Arĩa maarĩ kũrĩa igũrũ meekire atĩa mona kĩrĩndĩ kĩu kĩnene? Johana oonire makenete na makĩgooca Ngai nĩ ũndũ wa kuona andũ a kĩrĩndĩ kĩu kĩnene. Famĩlĩ ya Jehova ya kũrĩa igũrũ nĩ ĩgaakena rĩrĩa kĩoneki kĩu gĩkaahinga, hĩndĩ ĩrĩa kĩrĩndĩ kĩnene gĩkaahonoka thĩna ũrĩa mũnene.

9. Kũringana na Kũguũrĩrio 7:13-15, andũ a kĩrĩndĩ kĩnene mareka atĩa mahinda-inĩ maya?

⁹ Thoma Kũguũrĩrio 7:13-15. Johana aandĩkire atĩ andũ a kĩrĩndĩ kĩu kĩnene nĩ “mathambĩtie kanjũ ciao na thakame ya Gatũrũme igatuĩka cia rangi mwerũ.” Ũndũ ũcio ũronania atĩ nĩ makoragwo na thamiri theru na mũrũgamo mwega mbere ya Jehova. (Isa. 1:18) Nĩ Akristiano meyamũrĩire Ngai na makabatithio na makoragwo na wĩtĩkio ũrĩ na hinya harĩ igongona rĩa ũkũũri rĩa Jesu na ũrata mwega hamwe na Jehova. (Joh. 3:36; 1 Pet. 3:21) Ũndũ ũcio nĩguo ũgaatũma makorũo magĩrĩire kũrũgama mbere ya gĩtĩ kĩa Ngai kĩa ũnene makĩmũrutĩra “ũtungata mũtheru mũthenya na ũtukũ” gũkũ thĩ. O na mahinda-inĩ maya, nĩo marutaga wĩra ũrĩa mũnene wa kũhunjia na kũrutana ũhoro ũrĩa mwega wa Ũthamaki, makaiga Ũthamaki wa Ngai mbere ya maũndũ mao.—Mat. 6:33; 24:14; 28:19, 20.

10. Nĩ ũndũ ũrĩkũ andũ a kĩrĩndĩ kĩnene magaakorũo na ma naguo, na nĩ ũndũ ũrĩkũ makoona ũkĩhinga?

¹⁰ Andũ a kĩrĩndĩ kĩnene arĩa makaahonoka thĩna ũrĩa mũnene nĩ magaakorũo na ma atĩ Ngai nĩ agaathiĩ na mbere kũmarũmbũiya, tondũ “Ũcio ũikarĩire gĩtĩ kĩa ũnene nĩ agaatambũrũkia hema yake igũrũ rĩao.” Kĩĩranĩro gĩkĩ kĩrĩa andũ a ng’ondu ingĩ matũire merĩgĩrĩire nĩ gĩkaahinga: “[Ngai] nĩ ekũmagiria maithori mothe mathire maitho-inĩ mao, na gĩkuũ gĩtigaacoka gũkorũo kuo rĩngĩ, o na gũcakaya kana kĩrĩro kana ruo.”—Kũg. 21:3, 4.

11-12. (a) O ta ũrĩa Kũguũrĩrio 7:16, 17 yonanĩtie-rĩ, nĩ irathimo irĩkũ andũ a kĩrĩndĩ kĩnene merĩgagĩrĩra mahinda marĩa maroka? (b) Nĩ ũndũ ũrĩkũ andũ a ng’ondu ingĩ mekaga hĩndĩ ya Kĩririkano, na mekaga ũguo nĩkĩ?

 ¹¹ Thoma Kũguũrĩrio 7:16, 17. Mahinda-inĩ maya, andũ amwe a Jehova matirĩ na irio cia kũigana nĩ ũndũ wa mathĩna ma kĩĩmbeca kana mathĩna marĩa moimanaga na mbaara. Nao angĩ marĩ njera nĩ ũndũ wa wĩtĩkio wao. O na kũrĩ ũguo, andũ a kĩrĩndĩ kĩnene nĩ mekĩragwo ngoro kũmenya atĩ thutha wa mũtabarĩre ũyũ mũũru kũniinwo, nĩ magaakoragwo na irio nyingĩ cia kĩĩmwĩrĩ na cia kĩĩroho. Rĩrĩa Jehova akaaniina thĩ ĩno njũru ya Shaitani, nĩ agaatigĩrĩra atĩ andũ a kĩrĩndĩ kĩnene nĩ magitĩrũo kuumana na marakara make marĩa mahaananĩtio na ‘ũrugarĩ mũnene.’ Thutha wa thĩna ũrĩa mũnene gũthira, Jesu nĩ agaatongoria andũ acio makaahonoka amatware “maĩ-inĩ ma muoyo” wa tene na tene. Hatarĩ nganja, andũ a kĩrĩndĩ kĩnene marĩ na kĩĩrĩgĩrĩro kĩa magegania. Ngũrani na andũ bilioni nyingĩ arĩa manatũũra thĩinĩ wa thĩ, no kũhoteke o gũtirĩ hĩndĩ magaakua!—Joh. 11:26.

¹² Andũ a ng’ondu ingĩ makoragwo na kĩĩrĩgĩrĩro kĩa magegania, na ũndũ ũcio nĩ ũtũmaga macokerie Jehova ngatho o hamwe na Jesu. Matithuurĩtwo nĩguo mathiĩ magatũũre kũrĩa igũrũ, no ũguo ti kuuga atĩ Jehova ndamendete ta ũrĩa endete arĩa aitĩrĩrie maguta. Arĩa aitĩrĩrie maguta na arĩa a ng’ondu ingĩ nĩ mahotaga kũgooca Ngai na Kristo. Njĩra ĩmwe mekaga ũguo nayo nĩ gũkorũo kuo hĩndĩ ya Irio cia Hwaĩ-inĩ cia Mwathani.

13-14. Nĩkĩ mũndũ o wothe nĩ agĩrĩirũo gũthiĩ Kĩririkano gĩa gĩkuũ kĩa Jesu?

¹³ Mĩaka-inĩ ya ica ikuhĩ, harĩ andũ ta 1,000 arĩa makoragwo mathiĩte Kĩririkano, no mũndũ ta ũmwe ũrĩaga mũgate na akanyua ndibei. Ũguo nĩ kuuga atĩ thĩinĩ wa ciũngano nyingĩ, gũtirĩ mũndũ o na ũmwe ũrĩaga mũgate na akanyua ndibei hĩndĩ ya Kĩririkano. Ũndũ ũcio ũronania atĩ andũ aingĩ arĩa mathiaga Kĩririkano makoragwo na kĩĩrĩgĩrĩro gĩa gũgaatũũra gũkũ thĩ. Gũkĩrĩ ũguo-rĩ, magĩthiaga Kĩririkano nĩkĩ? Nĩ ũndũ wa gĩtũmi o ta kĩrĩa gĩtũmaga andũ mathiĩ ũhiki wa mũrata. Andũ mathiaga ũhiki nĩguo monanie atĩ nĩ mendete arĩa marahikania na atĩ nĩ maramanyita mbaru. Na njĩra o ta ĩyo, andũ a ng’ondu ingĩ mathiaga Kĩririkano tondũ nĩ mendaga kuonania atĩ nĩ maranyita mbaru Kristo na arĩa aitĩrĩrie maguta na nĩ mamendete. Ũndũ ũngĩ  ũtũmaga andũ a ng’ondu ingĩ mathiĩ Kĩririkano, nĩgetha monanie ngatho ciao nĩ ũndũ wa igongona rĩa ũkũũri rĩa Jesu rĩrĩa rĩkaamahotithia gũtũũra thĩinĩ wa thĩ tene na tene.

¹⁴ Ũndũ ũngĩ wa bata ũtũmaga andũ a ng’ondu ingĩ mathiĩ Kĩririkano, nĩ gwathĩkĩra rĩathani rĩa Jesu. Rĩrĩa Jesu aambĩrĩirie Irio cia Hwaĩ-inĩ cia Mwathani, eerire atũmwo ake ehokeku ũũ: “Ĩkagai ũũ nĩguo mũndirikanage.” (1 Kor. 11:23-26) Kwoguo ihinda rĩrĩa rĩothe arĩa aitĩrĩrie maguta makoretwo gũkũ thĩ, andũ a ng’ondu ingĩ nĩ mathiaga na mbere gũkorũo kuo hĩndĩ ya Irio cia Hwaĩ-inĩ cia Mwathani. Ningĩ, andũ a ng’ondu ingĩ nĩ manyitaga andũ ũgeni nĩguo manyitanĩre hamwe nao hĩndĩ ya Kĩririkano.

15. Tũngĩka atĩa nĩguo tũgooce Ngai na Kristo hĩndĩ ya Kĩririkano?

¹⁵ Rĩrĩa twathiĩ Kĩririkano, nĩ tũkoragwo na mweke wa kũgooca Ngai na Kristo kũgerera nyĩmbo na mahoya. Kĩongo kĩa mĩario ya mwaka ũyũ nĩ, “Cokia Ngatho nĩ Ũrĩa Kristo Ekĩte nĩ Ũndũ Waku!” Mĩario ĩyo nĩ ĩgaatũma tuongerere ngatho citũ harĩ Jehova na Kristo. Rĩrĩa mũgate na ndibei igaakorũo ikĩhĩtũkio, nĩ igaatũririkania kĩrĩa irũgamĩrĩire, mwĩrĩ na thakame ya Jesu. Ningĩ nĩ igaatũma twĩcũranie igũrũ rĩgiĩ wendo ũrĩa Jehova aatuonirie, rĩrĩa eetĩkĩririe Mũrũ wake akue nĩ ũndũ witũ. (Mat. 20:28) Mũndũ wothe wendete Ithe witũ wa igũrũ na Mũrũwe nĩ akenda mũno gũka Kĩririkano-inĩ kĩu.

16. Nĩ maũndũ marĩkũ arĩa aitĩrĩrie maguta mahaanainie na arĩa a ng’ondu ingĩ?

¹⁶ Maitho-inĩ ma Jehova, arĩa aitĩrĩrie maguta na arĩa a ng’ondu ingĩ matikoragwo na ngũrani. Othe amonaga marĩ a bata. Tũmenyaga ũguo tondũ aarutire muoyo wa Mũrũ wake ũrĩa endete kũrĩha thogora nĩ ũndũ wa arĩa aitĩrĩrie maguta o hamwe na arĩa a ng’ondu ingĩ. Ngũrani ĩrĩa ĩrĩ ho gatagatĩ ga ikundi icio cierĩ nĩ atĩ o gĩkundi kĩrĩ na kĩĩrĩgĩrĩro gĩakĩo ngũrani. Andũ a ikundi icio cierĩ no mũhaka matũũre marĩ ehokeku harĩ Ngai na Kristo. (Thab. 31:23) Ningĩ ririkana atĩ roho wa Ngai ũrutaga wĩra ũndũ ũmwe harĩ ithuĩ ithuothe. Ũguo nĩ kuuga atĩ Jehova aheaga mũndũ roho wake mũtheru kũringana na mabataro make, gũtekũmakania kana nĩ mũitĩrĩrie maguta kana ti mũitĩrĩrie maguta.

17. Nĩ ũndũ ũrĩkũ aitĩrĩrie maguta arĩa matigarĩte gũkũ thĩ merĩgagĩrĩra?

¹⁷ Arĩa aitĩrĩrie maguta maticiaragũo marĩ na kĩĩrĩgĩrĩro gĩa gũthiĩ kũrĩa igũrũ. Ngai nĩwe ũmaheaga kĩĩrĩgĩrĩro kĩu. Nĩ meciragia ũhoro wĩgiĩ kĩĩrĩgĩrĩro kĩao, makahoya nĩ ũndũ wakĩo, na nĩ meriragĩria mũno kwamũkĩra ngerenwa yao kũrĩa igũrũ. Matikoragwo moĩ ũrĩa mĩĩrĩ ĩrĩa makaaheo kũrĩa igũrũ ĩgaakorũo ĩtariĩ. (Afil. 3:20, 21; 1 Joh. 3:2) O na kũrĩ ũguo, nĩ merĩgagĩrĩra mũno gũgaakorũo hamwe na Jehova, Jesu, araika, o hamwe na arĩa angĩ aitĩrĩrie  maguta. Nĩ meriragĩria kũnyitanĩra nao Ũthamaki-inĩ wa kũrĩa igũrũ.

18. Nĩ maũndũ marĩkũ andũ a ng’ondu ingĩ merĩgagĩrĩra?

¹⁸ Andũ a ng’ondu ingĩ nĩ merĩgagĩrĩra mũno gũgaatũũra thĩinĩ wa thĩ tene na tene. Ũcio ũkoragwo ũrĩ wendi wa mũndũ wothe. (Koh. 3:11) Nĩ meriragĩria mũno rĩrĩa magaateithĩrĩria gũtua thĩ paradiso. Ningĩ nĩ meriragĩria rĩrĩa magaaka nyũmba ciao, mahande irio mĩgũnda-inĩ yao, na marere ciana irĩ na ũgima mũkinyanĩru wa mwĩrĩ. (Isa. 65:21-23) Nĩ meriragĩria mũno gũgaaceera kũndũ kũingĩ thĩinĩ wa thĩ nĩguo merorere irĩma, mĩtitũ, iria, na merute maũndũ maingĩ megiĩ ũũmbi wa Jehova. Makĩria ma ũguo, nĩ makenaga kũmenya atĩ ũrata wao hamwe na Jehova ũgaathiĩ na mbere ũgĩte na hinya.

19. Kĩririkano kĩheaga o ũmwe witũ mweke ũrĩkũ? Gĩgeekwo mũthenya ũrĩkũ mwaka ũyũ?

¹⁹ Jehova nĩ aheete ndungata ciake ciothe kĩĩrĩgĩrĩro kĩa magegania kĩa mahinda marĩa maroka. (Jer. 29:11) Kĩririkano gĩa gĩkuũ gĩa Kristo nĩ kĩheaga o ũmwe witũ mweke wa kũgooca Ngai na Kristo nĩ ũndũ wa maũndũ marĩa matwĩkĩire nĩguo tũgaakenera muoyo wa tene na tene. Hatarĩ nganja, Kĩririkano nĩkĩo mũcemanio ũrĩa wa bata mũno Akristiano a ma makoragwo naguo o mwaka. Gĩgeekwo mũthenya wa Njuuma, Machi 27, 2021 thutha wa riũa gũthũa. Mwaka-inĩ ũyũ andũ aingĩ nĩ magaakorũo na wĩyathi wa gũthiĩ mũcemanio-inĩ ũcio wa bata. Angĩ nao nĩ magaathiĩ o na magĩcemanagia na ũkararia. Kũrĩ angĩ nao magaakũngũĩra Kĩririkano marĩ njera. No twende kũmwendithĩria Kĩririkano kĩega mũrĩ kĩũngano, gĩkundi, o na kana mũndũ ũmwe ũmwe mũthenya ũcio, ũrĩa Jehova, Jesu, na famĩlĩ yothe ya kũrĩa igũrũ magaakorũo meroreire!