GĨCUNJĨ KĨA WĨRUTI GĨA 4
Tũthiaga Kĩririkano Nĩkĩ?
“Ĩkagai ũũ nĩguo mũndirikanage.”—LUK. 22:19.
RWĨMBO NA. 20 Nĩ Warutire Mũrũ Waku Ũrĩa Wendete Mũno
GĨCUNJĨ-INĨ GĨKĨ a
1-2. (a) Nĩ rĩ twĩciragia mũno ũhoro wĩgiĩ endwa aitũ arĩa makuĩte? (b) Nĩ gĩkũngũĩro kĩrĩkũ Jesu aambĩrĩirie ũtukũ wa mũico atanakua?
O NA gũtuĩka ihinda iraihu no rĩkorũo rĩhĩtũkĩte kuuma rĩrĩa endwa aitũ maakuire, no tũmaririkanaga. Nĩ twĩciragia ũhoro wao makĩria twakinya ihinda-inĩ rĩa mwaka rĩrĩa maakuire.
2 O mwaka nĩ tũnyitanagĩra na andũ milioni nyingĩ thĩinĩ wa thĩ kũririkana gĩkuũ kĩa mũndũ twendete mũno, nĩwe Jesu Kristo. (1 Pet. 1:8) Tũcemanagia hamwe nĩguo tũririkane Jesu, o we warutire muoyo wake ũrĩ ũkũũri nĩguo atũkũũre kuuma harĩ mehia na gĩkuũ. (Mat. 20:28) Jesu nĩ eendaga arũmĩrĩri ake maririkanage gĩkuũ gĩake. Ũtukũ wa mũico atanakua, nĩ aambĩrĩirie gĩkũngũĩro kĩa mwanya kĩa irio cia hwaĩ-inĩ na akĩra arutwo ake ũũ: “Ĩkagai ũũ nĩguo mũndirikanage.”—Luk. 22:19.
3. Tũkwarĩrĩria maũndũ marĩkũ gĩcunjĩ-inĩ gĩkĩ?
3 Andũ gakundi kanini arĩa mathiaga Kĩririkano gĩa gĩkuũ gĩa Kristo makoragwo na kĩĩrĩgĩrĩro gĩa gũgaatũũra igũrũ. No andũ milioni nyingĩ arĩa marĩ na kĩĩrĩgĩrĩro gĩa gũgaatũũra gũkũ thĩ o nao nĩ mathiaga. Gĩcunjĩ-inĩ gĩkĩ nĩ tũkwarĩrĩria itũmi iria itũmaga ikundi icio cierĩ ciĩrirĩrie gũthiĩ Kĩririkano o mwaka. Ningĩ nĩ tũkuona ũrĩa tũgunĩkaga rĩrĩa twathiĩ. Rekei twambe twarĩrĩrie itũmi iria itũmaga arĩa aitĩrĩrie maguta mathiĩ Kĩririkano.
KĨRĨA GĨTŨMAGA ARĨA AITĨRĨRIE MAGUTA MATHIĨ KĨRIRIKANO
4. Arĩa aitĩrĩrie maguta marĩaga mũgate na makanyua ndibei nĩkĩ hĩndĩ ya Kĩririkano?
4 O mwaka, aitĩrĩrie maguta arĩa mathiaga Kĩririkano nĩ marĩaga mũgate na makanyua ndibei. Mekaga ũguo nĩkĩ? Nĩguo tuone macokio ma kĩũria kĩu, ta wĩcirie ũndũ ũrĩa wekĩkire ũtukũ wa mũico wa ũtũũro wa Jesu gũkũ thĩ. Thutha wa gũkũngũĩra Pasaka, Jesu nĩ aambĩrĩirie gĩkũngũĩro kĩngĩ kĩrĩa gĩtagwo Irio cia Hwaĩ-inĩ cia Mwathani. Nĩ aanengerire atũmwo ake ehokeku 11 mũgate na ndibei na akĩmeera marĩe na manyue. Jesu nĩ aaririe nao igũrũ rĩgiĩ irĩkanĩro igĩrĩ, kĩrĩkanĩro kĩrĩa kĩerũ na kĩrĩkanĩro kĩa Ũthamaki. b (Luk. 22:19, 20, 28-30) Irĩkanĩro icio nĩ ciahotithirie atũmwo acio na andũ angĩ anini gũgaatuĩka athamaki na athĩnjĩri-Ngai kũrĩa igũrũ. (Kũg. 5:10; 14:1) Aitĩrĩrie maguta arĩa matigarĩte, arĩa marĩ thĩinĩ wa irĩkanĩro icio, no o tu mangĩrĩa mũgate na manyue ndibei hĩndĩ ya Kĩririkano.
5. Nĩ ũndũ ũrĩkũ arĩa aitĩrĩrie maguta mamenyaga wĩgiĩ kĩĩrĩgĩrĩro kĩao?
5 Gĩtũmi kĩngĩ gĩtũmaga arĩa aitĩrĩrie maguta merĩgĩrĩre gũthiĩ Kĩririkano nĩ atĩ: Gĩkũngũĩro kĩu nĩ kĩmaheaga mweke wa gwĩcũrania ũhoro wĩgiĩ kĩĩrĩgĩrĩro kĩao. Jehova nĩ amaheete kĩĩrĩgĩrĩro kĩa magegania gĩa gũkorũo na muoyo ũtangĩkua kana ũbuthe kũrĩa igũrũ, gĩa gũtungata hamwe na Jesu Kristo na arĩa 144,000, na makĩria ma ũguo, gũkorũo marĩ mbere ya Jehova Ngai. (1 Kor. 15:51-53; 1 Joh. 3:2) Arĩa aitĩrĩrie maguta nĩ mamenyaga atĩ nĩ maheetwo mweke wa gũgaakenera maũndũ macio kũrĩa igũrũ. No nĩguo metĩkĩrio gũgaathiĩ igũrũ, no mũhaka matũũrie wĩhokeku wao nginya gĩkuũ. (2 Tim. 4:7, 8) Arĩa aitĩrĩrie maguta nĩ makenaga mũno mecũrania ũhoro wĩgiĩ kĩĩrĩgĩrĩro kĩao gĩa gũthiĩ igũrũ. (Tit. 2:13) Ĩ nao arĩa a “ngʼondu ingĩ”? (Joh. 10:16) Mathiaga Kĩririkano nĩkĩ?
KĨRĨA GĨTŨMAGA ARĨA A NGʼONDU INGĨ MATHIĨ KĨRIRIKANO
6. Arĩa a ngʼondu ingĩ mathiaga Kĩririkano o mwaka nĩkĩ?
6 Arĩa a ngʼondu ingĩ matirĩaga mũgate kana makanyua ndibei hĩndĩ ya Kĩririkano, no nĩ makenagĩra gũkorũo kuo. Mwaka wa 1938, arĩa maarĩ na kĩĩrĩgĩrĩro gĩa gũgatũũra gũkũ thĩ, nĩ maanyitirũo ũgeni riita rĩa mbere gũkorũo kuo hĩndĩ ya Kĩririkano. Ngathĩti ya The Watchtower ya Machi 1, 1938, yaugĩte ũũ: “Nĩ wega arĩa [a ngʼondu ingĩ] gũkorũo mũcemanio-inĩ ta ũcio, kana gĩkũngũĩro-inĩ ta kĩu. . . . Ihinda rĩu rĩagĩrĩirũo gũkorũo rĩrĩ rĩa gĩkeno, na nĩguo rĩtariĩ.” O ta ũrĩa andũ arĩa manyitĩtwo ũgeni ũhiki-inĩ makenagĩra gũthiĩ ũhiki, arĩa a ngʼondu ingĩ nĩ makenagĩra gũkorũo kuo hĩndĩ ya Kĩririkano.
7. Nĩ kĩĩ gĩtũmaga arĩa a ngʼondu ingĩ merirĩrie gũthikĩrĩria mĩario ya Kĩririkano?
7 O na arĩa a ngʼondu ingĩ nĩ mecũranagia ũhoro wa kĩĩrĩgĩrĩro kĩao. Nĩ meriragĩria gũthikĩrĩria mĩario ya Kĩririkano tondũ gĩcunjĩ kĩnene kĩa mĩario ĩyo kĩaragĩrĩria maũndũ marĩa Kristo na andũ 144,000 arĩa magaathana nake mageekĩra andũ hĩndĩ ya Wathani wa Mĩaka Ngiri. Rungu rwa ũtongoria wa Mũthamaki wao, Jesu Kristo, acio magaathana nake kũrĩa igũrũ nĩ magaateithia gũthondeka thĩ ĩtuĩke paradiso, na mateithie andũ matuĩke akinyanĩru. Andũ milioni nyingĩ a ngʼondu ingĩ arĩa mathiaga Kĩririkano nĩ makenaga mũno mecũrania igũrũ rĩgiĩ kũhinga kwa morathi ma Bibilia, ta marĩa marĩ thĩinĩ wa Isaia 35:5, 6; 65:21-23; na Kũguũrĩrio 21:3, 4. Rĩrĩa mahũũra mbica marĩ thĩinĩ wa thĩ njerũ hamwe na endwa ao, nĩ mekĩraga hinya kĩĩrĩgĩrĩro kĩao kĩa ihinda rĩũkĩte, na itua rĩao rĩa gũthiĩ na mbere gũtungatĩra Jehova.—Mat. 24:13; Gal. 6:9.
8. Gĩtũmi kĩngĩ gĩtũmaga arĩa a ngʼondu ingĩ mathiĩ Kĩririkano nĩ kĩrĩkũ?
8 Gĩtũmi kĩngĩ gĩtũmaga arĩa a ngʼondu ingĩ mathiĩ Kĩririkano nĩ tondũ nĩ mendaga kuonania atĩ nĩ manyitaga mbaru arĩa aitĩrĩrie maguta na nĩ mamendete. Kiugo kĩa Ngai kĩarathĩte atĩ arĩa aitĩrĩrie maguta nĩ mangĩkarutithania wĩra na ũrũmwe hamwe na arĩa marĩ na kĩĩrĩgĩrĩro gĩa gũgaatũũra gũkũ thĩ. Mangĩgeeka ũguo na njĩra irĩkũ? Rekei twarĩrĩrie njĩra cigana ũna.
9. Ũrathi wa Zekaria 8:23 wonanagia arĩa a ngʼondu ingĩ mekaga atĩa kwerekera arĩa aitĩrĩrie maguta?
9 Thoma Zekaria 8:23. Ũrathi ũcio nĩ ũtaaragĩria wega ũrĩa arĩa a ngʼondu ingĩ mekaga kwerekera aarĩ na ariũ a Ithe witũ arĩa aitĩrĩrie maguta. Ciugo “Mũyahudi” na “hamwe na inyuĩ” iraria ũhoro wa gĩkundi kĩmwe, kĩa arĩa aitĩrĩrie maguta. (Rom. 2:28, 29) Ciugo “andũ ikũmi kuuma harĩ thiomi ciothe cia ndũrĩrĩ” iraria ũhoro wa arĩa a ngʼondu ingĩ. ‘Manyitaga marũmĩtie’ kana makenyitithania na arĩa aitĩrĩrie maguta na njĩra ya kũnyitanĩra nao ũthathaiya-inĩ mũtheru. Nĩ ũndũ ũcio, ũtukũ wa Kĩririkano, arĩa a ngʼondu ingĩ nĩ monanagia atĩ nĩ maranyitanĩra na arĩa aitĩrĩrie maguta na njĩra ya gũkorũo hamwe nao.
10. Jehova ahingĩtie atĩa ũrathi ũrĩa ũrĩ thĩinĩ wa Ezekieli 37:15-19, 24, 25?
10 Thoma Ezekieli 37:15-19, 24, 25. Jehova ahingĩtie ũrathi ũcio na njĩra ya gũtũma arĩa aitĩrĩrie maguta makorũo na ũrũmwe mũnene hamwe na arĩa a ngʼondu ingĩ. Ũrathi ũcio ũgwetete ũhoro wa tũmĩtĩ twĩrĩ. Arĩa marĩ na kĩĩrĩgĩrĩro gĩa gũgathiĩ igũrũ marũgamĩrĩirũo nĩ kamũtĩ “ka Juda” (mũhĩrĩga ũrĩa athamaki a Isiraeli maaumanaga naguo), nao arĩa marĩ na kĩĩrĩgĩrĩro gĩa gũgatũũra gũkũ thĩ marũgamĩrĩirũo nĩ kamũtĩ “ka Efiraimu.” c Jehova nĩ angĩanyitithanirie ikundi icio cierĩ ituĩke “kamũtĩ kamwe.” Ũguo nĩ kuuga mangĩgakorũo na ũrũmwe rungu rwa Mũthamaki ũmwe, nĩwe Jesu Kristo. O mwaka, arĩa aitĩrĩrie maguta na arĩa a ngʼondu ingĩ nĩ mathiaga Kĩririkano, ti marĩ ikundi igĩrĩ no nĩ marĩ “rũũru rũmwe” rungu rwa “mũrĩithi ũmwe.”—Joh. 10:16.
11. Andũ arĩa mahaananĩtio na ngʼondu thĩinĩ wa Mathayo 25:31-36, 40 manyitaga ariũ a Ithe na Kristo mbaru na njĩra ĩrĩkũ nene?
11 Thoma Mathayo 25:31-36, 40. Thĩinĩ wa ngerekano ĩyo, “ngʼondu” irũgamĩrĩire andũ athingu arĩa mangĩgaakorũo kuo matukũ-inĩ ma mũthia na marĩ na kĩĩrĩgĩrĩro gĩa gũgatũũra gũkũ thĩ, na nĩo metagwo arĩa a ngʼondu ingĩ. Nĩ manyitaga mbaru ariũ a Ithe na Kristo marĩ ehokeku. Njĩra ĩrĩa nene mekaga ũguo nayo nĩ kũmateithĩrĩria wĩra-inĩ ũrĩa mũnene wa kũhunjia na gũtua andũ arutwo thĩinĩ wa thĩ yothe.—Mat. 24:14; 28:19, 20.
12-13. Arĩa a ngʼondu ingĩ mateithagĩrĩria ariũ a Ithe na Kristo na njĩra irĩkũ ingĩ?
12 O mwaka ciumia cigana ũna mbere ya Kĩririkano, arĩa a ngʼondu ingĩ nĩ manyitaga mbaru ariũ a Ithe na Kristo na njĩra ya kũnyitanĩra kambĩini-inĩ ya thĩ yothe ya gwĩta andũ moke Kĩririkano. (Rora gathandũkũ, “ Hihi nĩ Wĩhaarĩirie nĩ Ũndũ wa Ihinda rĩa Kĩririkano?”) Ningĩ nĩ mateithagĩrĩria harĩ gwĩka mĩbango ĩrĩa yothe ĩrabatarania nĩguo Kĩririkano gĩkwo ciũngano-inĩ ciothe thĩinĩ wa thĩ, o na akorũo ciũngano nyingĩ itikoragwo na andũ mararĩa mũgate na makanyua ndibei. Arĩa a ngʼondu ingĩ nĩ makenagĩra gũteithĩrĩria ariũ a Ithe na Kristo na njĩra ta icio. Nĩ mamenyaga atĩ Jesu onaga ũndũ o wothe marekĩra arĩa aitĩrĩrie maguta ta arĩ we mwene marekĩra.—Mat. 25:37-40.
13 Nĩ itũmi irĩkũ ingĩ itũmaga ithuothe, gũtekũmakania kĩĩrĩgĩrĩro gitũ, tũthiĩ Kĩririkano?
KĨRĨA GĨTŨMAGA ITHUOTHE TŨTHIĨ KĨRIRIKANO
14. Jehova na Jesu matuonetie wendo mũnene na njĩra ĩrĩkũ?
14 Gũthiĩ nĩ kuonanagia ngatho nĩ ũndũ wa wendo ũrĩa Jehova na Jesu matuonetie. Jehova nĩ atuonetie wendo kũgerera njĩra nyingĩ, no njĩra ĩrĩa nene aatuonirie wendo nayo nĩ kũruta Mũrũ wake ũrĩa eendete anyarirĩke na akue nĩ ũndũ witũ. (Joh. 3:16) Jesu o nake nĩ aatuonirie wendo mũnene na njĩra ya kũruta muoyo wake eyendeire nĩ ũndũ witũ. (Joh. 15:13) Tũtingĩhota kũrĩha Jehova na Jesu nĩ ũndũ wa wendo ũcio matuonetie. Ĩndĩ no tuonanie atĩ tũrĩ na ngatho kũgerera mũtũũrĩre witũ wa o mũthenya. (Kol. 3:15) Ningĩ nĩ tũthiaga Kĩririkano nĩguo twĩcũranie ũhoro wa wendo ũcio maatuonirie na tuonanie atĩ o na ithuĩ nĩ tũmendete.
15. Arĩa aitĩrĩrie maguta na arĩa a ngʼondu ingĩ macokagia ngatho nĩkĩ nĩ ũndũ wa ũkũũri?
15 Gũthiĩ nĩ kuonanagia ngatho citũ harĩ ũkũũri. (Mat. 20:28) Arĩa aitĩrĩrie maguta nĩ monaga ũkũũri ũrĩ wa bata mũno tondũ nĩ ũmahotithĩtie kũgĩa na kĩĩrĩgĩrĩro kĩa magegania. Nĩ ũndũ wa gũkorũo na wĩtĩkio harĩ igongona rĩa Kristo, Jehova nĩ amatuĩte athingu na akamatua ciana ciake. (Rom. 5:1; 8:15-17, 23) Arĩa a ngʼondu ingĩ o nao nĩ macokagia ngatho nĩ ũndũ wa ũkũũri. Nĩ ũndũ wa gũkorũo na wĩtĩkio harĩ igongona rĩa ũkũũri rĩa Kristo, nĩ magĩaga na mũrũgamo mwega mbere ya Ngai, makamũrutĩra ũtungata mũtheru, na makagĩa na kĩĩrĩgĩrĩro gĩa kũhonoka kuuma “thĩna-inĩ ũrĩa mũnene.” (Kũg. 7:13-15) Njĩra ĩmwe arĩa aitĩrĩrie maguta na arĩa a ngʼondu ingĩ monanagia ngatho harĩ ũkũũri nĩ gũkorũo kuo Kĩririkano-inĩ o mwaka.
16. Nĩ ũndũ ũrĩkũ ũngĩ ũtũmaga tũthiĩ Kĩririkano?
16 Ũndũ ũngĩ ũtũmaga tũthiĩ Kĩririkano nĩ atĩ nĩ twendaga gwathĩkĩra Jesu. Gũtekũmakania kĩĩrĩgĩrĩro gitũ kĩa ihinda rĩũkĩte nĩ kĩrĩkũ, ithuothe nĩ twendaga gwathĩkĩra rĩathani rĩrĩ Jesu aaheanire ũtukũ ũrĩa aambĩrĩirie Kĩririkano: “Ĩkagai ũũ nĩguo mũndirikanage.”—1 Kor. 11:23, 24.
ŨRĨA ITHUOTHE TŨGUNĨKAGA TWATHIĨ KĨRIRIKANO
17. Kĩririkano gĩtũteithagia atĩa gũkuhĩrĩria Jehova makĩria?
17 Nĩ tũkuhagĩrĩria Jehova makĩria. (Jak. 4:8) O ta ũrĩa tweruta, Kĩririkano nĩ gĩtũheaga mweke wa gwĩcũrania igũrũ rĩgiĩ kĩĩrĩgĩrĩro kĩrĩa Jehova atũheete na wendo mũnene ũrĩa atuonetie. (Jer. 29:11; 1 Joh. 4:8-10) Rĩrĩa twecũrania ũhoro wa kĩĩrĩgĩrĩro gitũ kĩa mahinda mokĩte na wendo mũingĩ ũrĩa Jehova atuonetie, wendo witũ harĩ Jehova nĩ wongererekaga na ũrata witũ hamwe nake ũkarũma makĩria.—Rom. 8:38, 39.
18. Gwĩcũrania igũrũ rĩgiĩ kĩonereria kĩa Jesu gũtũtindĩkaga gwĩka atĩa?
18 Nĩ tũtindĩkagwo kwĩgerekania na kĩonereria kĩa Jesu. (1 Pet. 2:21) Thikũ nini mbere ya Kĩririkano, nĩ tũthomaga na tũgecũrania maandĩko marĩa maragĩrĩria thikũ cia mũico cia Jesu gũkũ thĩ, gĩkuũ gĩake, na kũriũka gwake. Naguo hwaĩ-inĩ wa Kĩririkano, nĩ tũrutagĩrũo mĩario ĩtũririkanagia ũrĩa Jesu aatuonirie wendo. (Ef. 5:2; 1 Joh. 3:16) Rĩrĩa twathoma ũhoro wĩgiĩ kĩonereria kĩa Jesu gĩa kwĩima na twecũrania ũhoro wakĩo, nĩ tũtindĩkagwo “gũthiaga o ta ũrĩa . . . aathiaga.”—1 Joh. 2:6.
19. Tũngĩtũũra wendo-inĩ wa Ngai atĩa?
19 Nĩ twĩhotoraga o na makĩria gũtũũra wendo-inĩ wa Ngai. (Jud. 20, 21) Tũtũũraga wendo-inĩ wa Ngai na njĩra ya gwĩka ũrĩa wothe tũngĩhota kũmwathĩkĩra, gũtheria rĩĩtwa rĩake, na gũkenia ngoro yake. (Thim. 27:11; Mat. 6:9; 1 Joh. 5:3) Kĩririkano nĩ gĩtũtindĩkaga kwĩhotora o na makĩria gũtũũra o mũthenya na njĩra ĩronania atĩ tũrera Jehova, ‘Nĩ ndĩrenda gũtũũra wendo-inĩ waku tene na tene!’
20. Tũrĩ na itũmi irĩkũ njega cia gũthiĩ Kĩririkano?
20 Tũrĩ na itũmi njega cia gũthiaga Kĩririkano gũtekũmakania kĩĩrĩgĩrĩro gitũ nĩ gĩa gũgatũũra kũrĩa igũrũ kana gũkũ thĩ tene na tene. O mwaka rĩrĩa twagomana tarĩki cia Kĩririkano, nĩ tũririkanaga gĩkuũ kĩa Jesu Kristo, o we twendete mũno. Na ũndũ wa bata makĩria, nĩ tũririkanaga gĩĩko kĩa bata mũno kĩa wendo, ũrĩa Jehova oonanirie na njĩra ya kũruta Mũrũwe arĩ ũkũũri. Mwaka ũyũ, Kĩririkano gĩgeekwo mũthenya wa Njumaa hwaĩ-inĩ Ĩpuro 15, 2022. Nĩ twendete Jehova na Mũrũ wake, kwoguo mũthenya ũcio wa kũririkana gĩkuũ kĩa Jesu, ũndũ ũrĩa ũgaakorũo ũrĩ wa bata mũno harĩ ithuĩ nĩ gũkorũo kuo Kĩririkano-inĩ.
RWĨMBO NA. 16 Goocai Jehova nĩ Ũndũ wa Mũrũwe
a Gũtekũmania kana kĩĩrĩgĩrĩro gitũ nĩ gĩa gũgaatũũra igũrũ kana gũkũ thĩ ĩrĩ paradiso, o mwaka nĩ twĩrĩgagĩrĩra mũno gũthiĩ Kĩririkano. Gĩcunjĩ gĩkĩ nĩ gĩkwarĩrĩria itũmi njega cia Kĩĩmaandĩko cia gũthiĩ Kĩririkano, na ũrĩa tũgunĩkaga twathiĩ.
b Nĩguo wone ũhoro makĩria wĩgiĩ kĩrĩkanĩro kĩrĩa kĩerũ na kĩrĩkanĩro kĩa Ũthamaki, rora gĩcunjĩ kĩrĩ na kĩongo, “Nĩ Mũgaatuĩka ‘Rũciaro rũa Athĩnjĩri-Ngai’” thĩinĩ wa ngathĩti ya Mũrangĩri ya Oktomba 15, 2014, kar. 15-17.
c Nĩguo wone ũhoro makĩria wĩgiĩ ũrathi wa tũmĩtĩ twĩrĩ ũrĩa ũrĩ thĩinĩ wa Ezekieli mũrango wa 37, rora ibuku rĩa Ũthathaiya Mũtheru wa Jehova Nĩ Ũcoketio! kar. 130-135, kĩb. 3-17.
