TA HŨŨRA MBICA ũgĩthiĩ ũtukũ. O ũthiĩte ũkaigua harĩ mũndũ ũkũrũmĩrĩire. Warũgama, nake akarũgama na wambĩrĩria gũthiĩ ũhiũhĩte, akahiũhania nawe. Ũgeciria ũteng’ere ũrorete kwa mũrata waku. Mũrata ũcio waku agakũhingũrĩra mũrango na waingĩra ũkaigua wacokwo nĩ thayũ.

No gũkorũo ndũrĩ wacemania na ũndũ ta ũcio, no mĩtangĩko ya ũtũũro no ĩtũme ũtangĩke. Kwa ngerekano, hihi nĩ harĩ mwerekera mũru ũgeragia gwĩthema no ũgakorũo ti ũndũ mũhũthũ gwĩka ũguo? Hihi nĩ ũkoretwo ũtarĩ mwandĩke wĩra kwa ihinda iraihu na o na wageria gwetha nduonaga? Nĩ wĩciragia ũhoro wa matukũ maku ma ũkũrũ-inĩ na mathĩna ma mwĩrĩ marĩa magaagũkora? Kana hihi nĩ harĩ ũndũ ũngĩ ũtũmaga ũtangĩke?

O ũrĩa kũngĩkorũo kũrĩ, githĩ to ũkene ũngĩkorũo na mũndũ ũngĩaria nake ũhoro wa mĩtangĩko yaku na ũngĩkũhe ũteithio rĩrĩa ũraũbatara? Hihi nĩ ũrĩ mũrata ta ũcio? Hatarĩ nganja nĩ ũrĩ. Jehova nĩ mũrata ta ũcio harĩ we, o ta ũrĩa aarĩ mũrata wa Iburahimu ta ũrĩa Isaia 41:8-13 yonanagia. Thĩinĩ wa mũhari wa 10 na 13, Jehova eraga ndungata ciake ũũ: “Atĩrĩrĩ, tiga gwĩtigĩra, nĩ gũkorũo ndĩ hamwe nawe; menya ũmake nĩ ũndũ niĩ nĩ niĩ Ngai waku; nĩngũkuongerera hinya waku, ĩĩ, ti-itherũ nĩndĩĩgũteithagia, na ti itherũ nĩndĩĩgũtiiragĩrĩra na guoko gwakwa kwa ũrĩo gwa ũthingu. Nĩ gũkorũo niĩ, Jehova Ngai waku, nĩngakũnyita guoko gwaku kwa ũrĩo, ngĩkwĩraga atĩrĩ, Tiga gwĩtigĩra, amu nĩngũgũteithia.”

Githĩ ciugo icio ti cia gwĩkĩra ngoro? Ta hũũra mbica Jehova agĩka ũguo aroiga harĩ we. Ta rora wone hatironania atĩ mũratwarana na Jehova akũnyitĩte guoko. Korũo nĩ gũtwarana mũratwarana, guoko gwake kwa ũrĩo kũngĩkorũo kũnyitĩte gwaku kwa ũmotho. Ngũrani na ũguo, Jehova aratambũrũkia ‘guoko gwake kwa ũrĩo kwa ũthingu’ agakũnyita “guoko gwaku kwa ũrĩo,” ta arĩ gũkũruta arakũruta ũndũ-inĩ mũritũ ũragerera ũtũũro-inĩ. Na o hingo ĩyo akũnyitĩte, agakuongerera hinya na gũkwĩra ciugo ici: “Tiga gwĩtigĩra, amu nĩngũgũteithia.”

Hihi nĩ wonaga Jehova arĩ Mũrata waku na Baba ũkwendete, ũrĩa ũgũteithagia rĩrĩa ũrĩ na mathĩna? Nĩ akenagio nĩwe, nĩ akũrũmbũyagia, na nĩ akoragwo ehaarĩirie gũgũteithia. Rĩrĩa wacemania na mathĩna, Jehova nĩ arenda wĩigue ũrĩ na ũgitĩri tondũ nĩ akwendete mũno. “Akoragwo e na ũteithio mũno, wa hingo ya mĩnyamaro.”—Thab. 46:1.

Andũ amwe nĩ magiĩkaga mũno nĩ ũndũ wa mahĩtia mekĩte tene na nĩ meyũragia kana Ngai  nĩ aamoheire. Angĩkorũo nĩ ũragerera ũndũ-inĩ ta ũcio, wĩcirie ũhoro wa mũthuri mwĩhokeku Ayubu ũrĩa wetĩkĩrire ‘mawaganu marĩa eekĩte rĩrĩa aarĩ mũnyinyi.’ (Ayub. 13:26) Daudi nĩ aagereire ũndũ-inĩ ta ũcio na aathaithire Jehova ũũ: “Ndũkaririkane mahĩtia marĩa ma ũnyinyi wakwa, o na kana mehia makwa ma ũremi.” (Thab. 25:7) Tondũ ithuothe tũtirĩ akinyanĩru, ‘nĩ twĩhĩtie na tũkanyihĩrũo nĩ riri wa Ngai.’—Rom. 3:23.

Ũhoro ũrĩa ũrĩ thĩinĩ wa Isaia 41 wandĩkĩirũo ndungata cia Jehova cia tene. Nĩ meehĩirie Jehova mũno nginya agĩtĩkĩria matwarũo ithamĩrio-inĩ Babuloni. (Isa. 39:6, 7) O na kũrĩ ũguo, Jehova no aabangaga ihinda rĩrĩa angĩahonokirie arĩa mangĩeririre na mamũcokerere. (Isa. 41:8, 9; 49:8) O na ũmũthĩ, Jehova nĩ ohagĩra arĩa monanagia kuuma ngoro atĩ no mende kũgunĩka nĩ wega wake.—Thab. 51:1.

Ta wĩcirie ngerekano ya Takuya, * ũrĩa wageragia gũtooria mĩtugo ĩtarĩ mĩega ya kwĩrorera mbica cia ũũra thoni na kũhambata ciĩga ciake cia ũciari. Mahinda kwa mahinda nĩ eekoraga agĩcokerera mĩtugo ĩyo. Aaiguaga atĩa? Oigaga ũũ: “Ndeiguaga itaagĩrĩire o na hanini, no ndahoya Jehova anjohere nĩ aandeithagia.” Jehova aamũteithagia atĩa? Athuri a kĩũngano kĩao maamwĩrire atĩ rĩrĩa rĩothe angĩekorire agĩcokerera mĩtugo ĩyo akamamenyithagia. Oigaga: “Ndwarĩ ũndũ mũhũthũ kũmamenyithia no ingĩekire ũguo nĩ maanjĩkĩraga ngoro mũno.” Ningĩ athuri a kĩũngano kĩao nĩ maabangire ũrĩa mũrori wa mũthiũrũrũko angĩacereire Takuya. Mũrori wa mũthiũrũrũko aamwĩrire ũũ: “Ndinoka o ũguo hatarĩ gĩtũmi no nĩ athuri mabangĩte iceera rĩrĩ.” Takuya oigaga: “O na gũtuĩka nĩ niĩ ndeehagia, Jehova nĩ aandeithagia kũgerera athuri.” Nĩ eekire mogarũrũku na agĩtuĩka painia, na rĩu atungataga wabici-inĩ ĩmwe ya rũhonge. O ta Takuya, Jehova nĩ arĩgũteithagia gũtooria ũndũ mũritũ.

Wagi wa mawĩra nĩ ũndũ ũmwe ũrehagĩra andũ mĩtangĩko. Thutha wa andũ amwe kũbutwo wĩra, nĩ makoragwo na ihinda iritũ rĩa kuona wĩra ũngĩ. Ta hũũra mbica ũrĩa ũngĩigua angĩkorũo o kũrĩa woria wĩra ũrerũo gũtirĩ. Andũ amwe nĩ memenaga rĩrĩa mekora ũndũ-inĩ ta ũcio. Jehova angĩgũteithia atĩa? To nginya akũhe wĩra ũrĩa ũrenda ihinda-inĩ rĩu, ĩndĩ no agũteithie na njĩra ya gũkũririkania ciugo ici cia Mũthamaki Daudi: “Ndarĩ mũnyinyi, na rĩu ndĩ mũkũrũ, na ndirĩ ndona mũndũ mũthingu atiganĩirio, kana mbeũ yake ĩkĩhoyanga irio.” (Thab. 37:25) Jehova akuonaga ũrĩ wa bata na akĩhũthĩra ‘guoko gwake kwa ũrĩo kwa ũthingu’ no agũteithie na kĩrĩa ũrabatara nĩguo ũthiĩ na mbere kũmũtungatĩra.

Sara kuuma Colombia nĩ eeyoneire guoko kwa Jehova. Aandĩkĩtwo nĩ kambuni ĩmwe yarĩ igweta. No o na gũtuĩka nĩ aarĩhagwo wega, nĩ aahũthagĩra mahinda maingĩ wĩra-inĩ. Na tondũ nĩ eendaga gũtungatĩra Jehova makĩria, agĩtiga wĩra  ũcio na akĩambĩrĩria ũpainia. No warĩ ũndũ mũritũ kuona wĩra ũtaahũthagĩra mahinda maingĩ. Nĩ aahingũrire gatuka, no o kahora gagĩthiĩ kaharĩte na kwoguo agĩkahinga. Sara oigaga: “Jehova nĩ aandeithirie ngĩhota gũkirĩrĩria mĩaka ĩtatũ ndĩ na mathĩna ma kĩĩmbeca.” Nĩ aahotire kũmenya ngũrani ya indo cia o mũhaka na iria itarĩ cia o mũhaka, na kwagaga gũtangĩka nĩ ũndũ wa rũciũ. (Mat. 6:33, 34) Thutha-inĩ, aacokire akĩhũrĩrũo thimũ nĩ ũrĩa wamwandĩkĩte wĩra na akĩrũo acoke wĩra. Sara aamwĩrire atĩ angĩetĩkĩrire wĩra ũtekũhũthĩra mahinda maingĩ, na angĩkorũo nĩ angĩetĩkĩrire kũmũheaga rũtha nĩ ũndũ wa maũndũ ma kĩĩroho. O na gũtuĩka Sara ndathũkũmaga mbeca nyingĩ ta hau kabere, nĩ ahotaga gũthiĩ na mbere na ũpainia. Thutha wa kũhĩtũkĩra maũndũ macio mothe, oigaga ũũ: “Nĩ nyonete guoko kwa Jehova.”

Ũndũ ũngĩ ũtũmaga andũ matangĩke, nĩ ũkũrũ. Thutha wa andũ aingĩ gũkinyia mĩaka ya kũritaya nĩ meyũragia kana nĩ magakorũo na mbeca cia kũigana ũtũũro wao wa thutha-inĩ. Ningĩ nĩ matangĩkaga nĩ ũndũ wa gwĩciria ũhoro wa mathĩna ma mwĩrĩ marĩa mangĩgĩa namo ũkũrũ-inĩ. Kwahoteka nĩ Daudi wathaithire Jehova ũũ: “Ndũkae kũnde hingo ya ũkũrũ; menya gũkandiganĩria hinya wakwa watua kũnyihĩrĩra.”​—Thab. 71:9, 18.

Nĩ na njĩra ĩrĩkũ ndungata cia Jehova ingĩthema mĩtangĩko ũkũrũ-inĩ? Marabatara gũthiĩ na mbere gũkũria wĩtĩkio harĩ Jehova, makĩĩhoka atĩ nĩ arĩmaheaga mabataro mao. Angĩkorũo amwe ao nĩ maamenyerete gũikara ũtũũro wa igũrũ, hihi no mabatare kũhũthahũthia mũtũũrĩre wao. O na no mone kũrĩa “rũĩga rũa nyeni” kũrĩ kwega, o na harĩ ũgima wao wa mwĩrĩ, gũkĩra kũrĩa “njaũ ya gĩtuĩro [noru].” (Thim. 15:17) Angĩkorũo muoroto waku nĩ gũkenia Jehova, nĩ arĩkũheaga kĩrĩa ũrabatara nginya ũkũrũ-inĩ waku.

Ta wĩcirie ũhoro wa José na mũtumia wake Rose arĩa makoretwo ũtungata-inĩ wa mahinda mothe makĩria ma mĩaka 65. Mĩaka ĩigana ũna nĩ maatungatire ithe wa Rose ũrĩa wabataraga kũrorũo mahinda mothe. Ningĩ José nĩ aathĩnjĩtwo na nĩ aikaraga akĩrigitagwo nĩ ũndũ wa mũrimũ wa kansa. Hihi Jehova nĩ amateithĩtie? Ĩĩ. Na njĩra ĩrĩkũ? Aahũthĩrire Tony na mũtumia wake Wendy a kĩũngano kĩao, arĩa maamaheire nyũmba. Meendaga nyũmba ĩyo ĩikaragwo nĩ mapainia hatarĩ marĩhi. Rĩrĩa Tony aarĩ cukuru nĩ onaga José na Rose magĩthiĩ ũtungata kaingĩ. Nĩ aamendete nĩ ũndũ wa kĩyo kĩrĩa maarĩ nakĩo na ũndũ ũcio nĩ wamũhutirie ngoro mũno. Nĩ ũndũ wa Tony na Wendy kuona ũrĩa José na Rose arĩa rĩu nĩ akũrũ, meerutĩire ũtũũro-inĩ wao harĩ Jehova, makĩona arĩ wega mamahe ha gũikara. Kwa ihinda rĩa mĩaka 15, makoretwo magĩteithia José na Rose arĩa rĩu marĩ na mĩaka mĩrongo ĩnana na kĩndũ. José na Rose monaga ũteithio ũcio maheagwo ũrĩ kĩheo kuuma kũrĩ Jehova.

O nawe Jehova nĩ aragũtambũrũkĩria ‘guoko gwake kwa ũrĩo kwa ũthingu.’ Hihi nĩ ũgũtwĩkĩra kũnyitwo guoko nĩ Ũrĩa wĩranĩire ciugo ici: “Tiga gwĩtigĩra, amu nĩngũgũteithia”?