BIBILIA nĩ ĩkoragwo na ciugo cia kuuma ngoro ciaririo nĩ ‘andũ o ta ithuĩ.’ (Jak. 5:17) Kwa ngerekano, no tũtaũkĩrũo na njĩra hũthũ nĩ ũrĩa Paulo eendaga kuuga rĩrĩa aaririe ciugo ici iria irĩ thĩinĩ wa Aroma 7:21-24: “Rĩrĩa ndĩrenda gwĩka ũndũ ũrĩa wagĩrĩire, ũndũ ũrĩa mũũru ũkoragwo hamwe na niĩ. . . . Kaĩ ndĩ na thĩna-ĩ!” Ciugo ta icio cia kuuma ngoro nĩ itũũmagĩrĩria rĩrĩa tũrahiũrania na kwaga gũkinyanĩra gwitũ.

Nĩ harĩ maũndũ mangĩ Paulo eeyaririe kuuma ngoro. Thĩinĩ wa Agalatia 2:20, ooigire arĩ na ma atĩ Jesu nĩ ‘aamwendire na akĩĩneana we mwene nĩ ũndũ wake’! Hihi wee nĩ ũiguaga ũguo? No wage kũigua ũguo hĩndĩ ciothe.

Angĩkorũo nĩ tũiguaga tũtarĩ kĩene nĩ ũndũ wa mehia twekire tene, no tuone arĩ ũndũ mũritũ gwĩtĩkĩra wendo na wohanĩri wa Jehova, na twage kuona igongona rĩa ũkũũri rĩrĩ kĩheo harĩ ithuĩ kĩũmbe. Hihi Jesu nĩ endaga tuone igongona rĩa ũkũũri rĩrĩ kĩheo? Angĩkorũo nĩ endaga tũrĩone ũguo-rĩ, nĩ kĩĩ kĩngĩtũteithia gwĩka ũguo? Rekei twarĩrĩrie ciũria icio cierĩ.

Jesu endaga tuone igongona rĩake rĩrĩ kĩheo harĩ ithuĩ kĩũmbe. Tũngĩkorũo na ma na ũndũ ũcio atĩa? Ta wĩcirie ũhoro ũrĩa ũrĩ thĩinĩ wa Luka 23:39-43. Mũndũ ũmwe aacuurĩtio hakuhĩ na Jesu mũtĩ-inĩ wa kũnyarirĩrũo. Nĩ eetĩkĩrire atĩ nĩ harĩ ũndũ mũũru eekĩte. No kũhoteke mũndũ ũcio eekĩte ũndũ mũũru mũno tondũ andũ arĩa meekaga maũndũ moru mũno nĩ o maaherithagio na njĩra ĩyo. Nĩ ũndũ wa mũndũ ũcio gũtangĩka, aathaithire Jesu akĩmwĩra ũũ: “Ũkaandirikana rĩrĩa ũkaaingĩra thĩinĩ wa Ũthamaki waku.”

Jesu eekire atĩa? Ta hũũra mbica Jesu akĩhũgũra mũtwe wake arĩ na ruo nĩguo arore mũndũ ũcio. O na Jesu arĩ na ruo, aahooreririe mũndũ ũcio na ciugo ici: “Ũmũthĩ ndakwĩra atĩrĩ na ma, nĩ ũgaakorũo hamwe na niĩ thĩinĩ wa Paradiso.” Jesu nĩ angĩaririkanirie mũndũ ũcio na njĩra hũthũ atĩ ‘Mũrũ wa mũndũ ookire nĩguo arute muoyo wake ũtuĩke ũkũũri nĩ ũndũ wa gũkũũra andũ aingĩ.’ (Mat. 20:28) Handũ ha ũguo, Jesu arĩ na tha nĩ aatĩtĩrithirie atĩ igongona rĩake nĩ rĩahutĩtie mũndũ ũcio we mwene. Aaririe na njĩra ya ũrata na akĩhũthĩra ciugo “ũgaakorũo” na “niĩ.” Na akĩonania atĩ ũndũ ũcio nĩ wahutĩtie mũndũ ũcio we mwene rĩrĩa aamwĩrire atĩ nĩ agaatũũra thĩinĩ wa thĩ paradiso.

Hatarĩ nganja Jesu eendaga mũndũ ũcio ataũkĩrũo atĩ igongona rĩake nĩ rĩngĩamũgunire. Angĩkorũo Jesu aarĩ na mawoni ta macio harĩ mwĩki-naĩ ũtaagĩte na mweke wa gũtungatĩra Ngai, nĩ kuonania akoragwo na mawoni ta macio kwerekera Mũkristiano mũbatithie ũratungatĩra Ngai. Gũkĩrĩ ũguo-rĩ, nĩ kĩĩ kĩngĩtũteithia gũkorũo na ma atĩ igongona rĩa Kristo no rĩtũteithie tũrĩ andũ kĩũmbe gũtekũmakania mehia marĩa twekĩte mbere ĩyo?

Nĩ ũndũ wa ũtungata ũrĩa Paulo eehokeirũo, nĩ aataũkagĩrũo atĩ igongona rĩa Jesu nĩ rĩamũhutagia. Na njĩra ĩrĩkũ? Aataarĩirie ũũ: “Nĩ njokagĩria Kristo Jesu Mwathani witũ ngatho, o we waheire hinya, tondũ nĩ oonire ndĩ mwĩhokeku akĩhe ũtungata, o na gũtuĩka tene ndarĩ mũrumi Ngai na mũnyarirani na mũndũ ũtaarĩ gĩtĩo.” (1 Tim. 1:12-14) Ũtungata ũrĩa Jesu eehokeire Paulo nĩ watũmaga etĩkie atĩ Jesu nĩ aamwendete, nĩ aamũiguagĩra tha, na nĩ aamwĩhokete. O na ithuĩ Jesu nĩ atwĩhokeire o ũmwe witũ ũtungata. (Mat. 28:19, 20) Hihi ũtungata ũcio no ũtũteithie gwĩtĩkia atĩ Jesu nĩ aatũkuĩrĩire?

Albert, ũrĩa wĩrĩga gũcokerera Jehova thutha wa gũkorũo eheretio kĩũngano-inĩ ihinda rĩa hakuhĩ mĩaka 34, aatarĩirie ũũ: “Mehia makwa makoragwo mbere yakwa hingo ciothe. No rĩrĩa ndĩ ũtungata-inĩ, nyonaga o ta mũtũmwo Paulo atĩ, nĩ ndĩhokeirũo ũtungata nĩ Jesu. Ũndũ ũcio nĩ ũtũmaga ngorũo na gĩkeno na ngorũo na mawoni mega kwĩyerekera, kwerekera ũtũũro wakwa wa ihinda rĩrĩ, na rĩrĩa rĩroka.”—Thab. 51:3.

Allan, ũrĩa watũũraga ũtũũro wa ũkora na kũhũthĩra ũhinya ataneruta ũhoro wa ma ooigire ũũ: “No ndĩĩciragia ũrĩa ndaiguithirie andũ ũũru. Rĩmwe ũndũ ũcio nĩ ũtũmaga ngue ngoro. No nĩ njokagĩria Jehova ngatho atĩ nĩ etĩkagĩria mũndũ mwĩhia ta niĩ akahunjĩrie andũ ũhoro mwega. Rĩrĩa ndona andũ magĩtĩkĩra ũhoro mwega, ũndũ ũcio nĩ ũndirikanagia atĩ Jehova nĩ mwega na nĩ atwendete. Nĩ nyonaga atĩ anjĩhokeire wĩra wa gũteithĩrĩria andũ angĩ maneka maũndũ moru hau kabere ta niĩ.”

Rĩrĩa tũrĩ ũtungata-inĩ nĩ tũhotaga gũkorũo na ciĩko njega na meciria mega. Nĩ ũtũmaga tũmenye atĩ Jesu nĩ atwendete, nĩ atũiguagĩra tha, na nĩ atwĩhokete.

O nginya rĩrĩa mũtabarĩre mũũru wa Shaitani ũkeeherio, ngoro citũ no irĩthiaga na mbere gũtũciirithia nĩ ũndũ wa mehia marĩa twekire tene. Nĩ kĩĩ kĩrĩtũteithagia kũhiũrania na ũndũ ũcio?

Jean, ũrĩa ũikaraga akĩiguaga ũũru nĩ ũndũ wa mũtũũrĩre wa ũhinga ũrĩa aatũũraga arĩ mũnini, ooigire ũũ: “Nĩ ngenaga atĩ ‘Ngai nĩ mũnene gũkĩra ngoro citũ.’” (1 Joh. 3:19, 20) O na ithuĩ no tũhoorerio nĩ kũmenya atĩ Jehova na Jesu nĩ mataũkagĩrũo biũ atĩ tũrĩ ehia o na gũkĩra ũrĩa ithuĩ ene tũtaũkagĩrũo. Ririkana atĩ, maarutire ũkũũri na njĩra ya wendo nĩ ũndũ wa andũ arĩa ehia meriraga, no ti tondũ wa andũ akinyanĩru.—1 Tim. 1:15.

Tũgĩaga na ma biũ atĩ ũkũũri nĩ ũtũhutĩtie ithuĩ kĩũmbe rĩrĩa twecũrania na njĩra ya mahoya ũrĩa Jesu eekagĩra andũ matarĩ akinyanĩru na twerutanĩria biũ ũtungata-inĩ ũrĩa atwĩhokeire. Tweka ũguo, o ta Paulo nĩ tũriugaga ũũ: Jesu ‘aanyendire na akĩĩneana we mwene nĩ ũndũ wakwa.’