1-2. (a) Wĩra mũnene wa kĩũngano gĩa Gĩkristiano nĩ ũrĩkũ kũringana na ciugo cia Jesu thĩinĩ wa Mathayo 28:18-20? (b) Nĩ ciũria irĩkũ tũkwarĩrĩria thĩinĩ wa gĩcunjĩ gĩkĩ?

NO MŨHAKA ngoro cia atũmwo ikorũo nĩ ciahĩahĩaga rĩrĩa maacemanirie kĩrĩma-inĩ. Thutha wa Jesu kũriũka nĩ aabangire gũcemania nao hau kĩrĩma-inĩ. (Mat. 28:16) No kũhoteke hĩndĩ ĩyo nĩrĩo ‘ooimĩrĩire ariũ a Ithe witũ makĩria ma 500 ihinda-inĩ rĩmwe.’ (1 Kor. 15:6) Nĩ kĩĩ gĩatũmire Jesu abange gũcemania na arutwo ake? Eekire ũguo nĩguo amahe wĩra wa gũcanjamũra, akĩmeera: “Nĩ ũndũ ũcio-rĩ, thiĩi mũgatue andũ arutwo kuuma ndũrĩrĩ-inĩ ciothe.”—Thoma Mathayo 28:18-20.

² Arutwo arĩa maaiguire ciugo icio cia Jesu maarĩ amwe a arĩa maathondekire kĩũngano gĩa karine ya mbere gĩa Gĩkristiano thutha ũcio. Wĩra mũnene wa kĩũngano kĩu warĩ wa gũtua andũ aingĩ arutwo a Kristo. * Mahinda-inĩ maya kũrĩ na ciũngano ngiri nyingĩ cia Akristiano a ma kũndũ guothe thĩinĩ wa thĩ, na wĩra mũnene wa ciũngano icio no ta ũcio wa kĩũngano gĩa karine ya mbere wa gũtua andũ arutwo. Thĩinĩ wa gĩcunjĩ gĩkĩ, nĩ tũkwarĩrĩria ciũria ici inya: Nĩkĩ wĩra wa gũtua andũ arutwo nĩ wa bata mũno? Ũbatiĩ kũrutwo na njĩra ĩrĩkũ? Hihi Akristiano othe nĩ makoragwo na itemi wĩra-inĩ wa gũtua  andũ arutwo? Na nĩkĩ nĩ tũrabatara gũkorũo na wetereri tũkĩruta wĩra ũcio?

3. Nĩkĩ wĩra wa gũtua andũ arutwo nĩ wa bata mũno kũringana na Johana 14:6 na 17:3?

³ Nĩkĩ wĩra wa gũtua andũ arutwo nĩ wa bata mũno? Tondũ arutwo a Kristo no o tu mangĩtuĩka arata a Ngai. Makĩria ma ũguo, arĩa marũmagĩrĩra Kristo nĩ makoragwo na ũtũũro mwega na kĩĩrĩgĩrĩro gĩa gũgaatũũra tene na tene mahinda marĩa maroka. (Thoma Johana 14:6; 17:3.) Hatarĩ nganja Jesu nĩ atwĩhokeire wĩra wa bata, no tũtirutaga wĩra ũcio tũrĩ ithuiki. Mũtũmwo Paulo akĩandĩka ũhoro wake mwene na andũ angĩ aarutithanagia wĩra nao, ooigire ũũ: “Ithuĩ tũrĩ arutithania wĩra hamwe na Ngai.” (1 Kor. 3:9) Na githĩ kĩu ti gĩtĩo kĩnene andũ matarĩ akinyanĩru maheetwo nĩ Jehova na Kristo!

4. Nĩ ũndũ ũrĩkũ tũreruta kuumana na ũhoro wa Ivan na Matilde?

⁴ Wĩra wa gũtua andũ arutwo no ũtũrehere gĩkeno kĩnene. Wĩcirie ũhoro wĩgiĩ Ivan na mũtumia wake Matilde, arĩa maikaraga bũrũri-inĩ wa Colombia. Maahunjĩirie mwanake ũmwe wĩtagwo Davier, nake akĩmeera: “Nĩ nyendaga gũcenjia mũtũũrĩre wakwa no ndihotaga.” Davier nĩ aathaakaga mũthaako wa kũrũa ngundi, nĩ aahũthagĩra ndawa cia kũrebia, akanyua gũkĩria njano, na aaikaraga hamwe na mũirĩtu maarĩ ndũgũ wetagwo Erika. Ivan aataarĩirie ũũ: “Nĩ twaambĩrĩirie gũthiĩ kũmũceerera gĩcagi-inĩ kĩao kĩrĩa kĩarĩ kũraihu, na twabataraga gũtwarithia mĩithikiri mathaa maingĩ barabara-inĩ irĩ na ndoro. Thutha wa kuona Davier agĩka mogarũrũku harĩ mĩtugo na mwerekera wake, Erika o nake nĩ aambĩrĩirie kwĩruta Bibilia.” Thutha wa ihinda, Davier agĩtiga kũhũthĩra ndawa cia kũrebia, kũnyua, na kũrũa ngundi. Ningĩ nĩ aahikirie Erika kĩĩwatho. Matilde ooigire ũũ: “Rĩrĩa Davier na Erika maabatithirio mwaka wa 2016, twaririkanire ũndũ ũrĩa Davier ooigaga kaingĩ, ‘Nĩ nyendaga gũcenjia no ndihotaga.’ Ũndũ ũcio watũmire tũite maithori.” Hatarĩ nganja, nĩ tũkenaga mũno rĩrĩa twateithia andũ matuĩke arutwo a Kristo.

5. Ikinya rĩa mbere harĩ gũtua andũ arutwo nĩ rĩrĩkũ?

⁵ Tuoyaga ikinya rĩa mbere rĩa gũtua andũ arutwo rĩrĩa ‘twacaria’ arĩa marĩ na mwerekera mwega wa ngoro. (Mat. 10:11) Tuonanagia kũna atĩ tũrĩ Aira a Jehova rĩrĩa twahunjĩria andũ arĩa othe tũracemania nao. Tuonanagia atĩ tũrĩ Akristiano a ma na njĩra ya gwathĩkĩra watho wa Jesu wĩgiĩ kũhunjia.

6. Nĩ ũndũ ũrĩkũ ũngĩtũteithia kũgĩa na moimĩrĩro mega ũtungata-inĩ?

⁶ Andũ amwe nĩ mendaga mũno kwĩruta ma cia Bibilia, no andũ aingĩ arĩa tũhunjagĩria matiambaga gũkenio nĩ ũhoro ũrĩa tũramahunjĩria. Tũbataraga kwamba kwarahũra wendi wao. Nĩguo tũkorũo na moimĩrĩro mega ũtungata-inĩ, nĩ tũrabatara kwĩhaarĩria wega. Thuura maũndũ marĩa ũngĩarĩrĩria makenie andũ arĩa ũkũhunjĩria. Ũcoke ũbange ũrĩa ũkwarĩrĩria ũndũ ũcio na mũndũ ũrĩa ũrahunjĩria.

7. Ũngĩambĩrĩria atĩa ndeereti hamwe na mũndũ, na nĩkĩ nĩ wega gũthikĩrĩria andũ arĩa tũrahunjĩria na kũmahe gĩtĩo?

⁷ Kwa ngerekano no ũrie mwene nyũmba ũũ: “No nyende gũkũria kĩũria, ũkuona atĩa? Mathĩna maingĩ marĩa marĩ kuo mahinda-inĩ maya nĩ mahutagia andũ kũndũ guothe thĩinĩ wa thĩ. Hihi nĩ ũkuona ta thirikari cia andũ ingĩhota kũniina mathĩna thĩinĩ wa thĩ?” Ũcoke warĩrĩrie Danieli 2:44. Ningĩ no ũrie mũndũ wa itũũra rĩanyu ũũ: “No nyende  kũigua mawoni maku. Hihi ũkuona ta arĩ ũndũ ũrĩkũ ũngĩteithia mũndũ kũrera ciana irĩ na mĩtugo mĩega?” Ũcoke warĩrĩrie Gũcokerithia Maathani 6:6, 7. Ũgĩthuura ũndũ ũrĩa ũkwarĩrĩria, wĩcirie ũhoro wa andũ arĩa ũkwaria nao. Wĩcirie ũrĩa mekũgunĩka meruta maũndũ marĩa Bibilia ĩrutanaga. Rĩrĩa ũraranĩria hamwe nao, nĩ wega ũmathikagĩrĩrie na ũgatĩa mawoni mao. Gwĩka ũguo no gũgũteithie ũmamenye wega, na no gũtũme mende gũgũthikĩrĩria.

8. Nĩkĩ nĩ tũrabatara wetereri rĩrĩa tũracokera andũ?

⁸ Nĩgetha mũndũ etĩkĩre kwĩruta Bibilia, no ũbatare kũhũthĩra mahinda na kwĩrutanĩria kũmũcokera. Nĩkĩ? Tondũ no ũkore mũndũ ũrĩa wahunjĩirie atarĩ kuo wacoka rĩngĩ. Ningĩ nĩguo mwene nyũmba aigue arĩ na wĩyathi wa kwĩruta Bibilia hamwe nawe, no ũbatare gũcoka maita maigana ũna. Ririkana atĩ, mũmera no ũkũre wega ũngĩitagĩrĩrio maĩ hingo ciothe. Ũndũ ũmwe na ũcio, mũndũ ũrakenio nĩ ũhoro no ongerere wendo wake harĩ Jehova na Kristo tũngĩaragĩrĩria nake Kiugo kĩa Ngai maita maingĩ.

9-10. Nĩkĩ kĩngĩtũma tuuge atĩ Akristiano othe marĩ na itemi harĩ gũcaria arĩa marĩ na mwerekera mwega wa ngoro?

⁹ Mũkristiano o wothe nĩ akoragwo na itemi harĩ gũcaria andũ arĩa marĩ na mwerekera mwega wa ngoro. Wĩra ũcio wa gũcaria no tũũringithanie na wĩra wa gũcaria mwana ũrĩte. Na njĩra ĩrĩkũ? Ta wĩcirie ũhoro wĩgiĩ kahĩĩ kamwe ka mĩaka ĩtatũ koorire kuuma kwao mũciĩ. Andũ ta 500 nĩ maanyitire itemi harĩ gũgacaria. Mũthia-inĩ, mũndũ ũmwe harĩ acio nĩ oonire kahĩĩ kau mũgũnda-inĩ wa mbembe, mathaa ta 20 kuuma rĩrĩa kaagire. Mũndũ ũcio nĩ aaregire kũgaathĩrĩrio tondũ  atĩ nĩwe woonire kahĩĩ kau. Ooigire ũũ: “Kahĩĩ kau koonekire tondũ wa kĩyo kĩa andũ magana maingĩ.”

¹⁰ Andũ aingĩ maiguaga morĩte o ta kahĩĩ kau. Matikoragwo na kĩĩrĩgĩrĩro, no nĩ meriragĩria gũteithio. (Ef. 2:12) Aira a Jehova makĩria ma milioni inyanya nĩ merutanagĩria gũcaria andũ acio marĩ na mwerekera mwega. Wee mwene no wage kuona mũndũ ũngĩĩruta Bibilia hamwe nake. O na kũrĩ ũguo, ahunjia arĩa angĩ mũrahunjia nao gĩcigo-inĩ kĩu no mone mũndũ ũrenda kwĩruta ma iria irĩ Kiugo-inĩ kĩa Ngai. Rĩrĩa mũrũ kana mwarĩ wa Ithe witũ ahunjĩria mũndũ na agatuĩka mũrutwo wa Kristo, andũ arĩa othe manyitĩte itemi harĩ wĩra wa gũcaria o nao nĩ makenaga.

11. O na angĩkorũo ndũrĩ mũndũ ũreruta Bibilia nake-rĩ, nĩ njĩra irĩkũ ingĩ ũngĩteithĩrĩria nacio gũtua andũ arutwo?

¹¹ O na angĩkorũo ndũrĩ mũndũ ũreruta Bibilia nake ihinda-inĩ rĩrĩ, no ũteithĩrĩrie harĩ gũtua andũ arutwo na njĩra ingĩ. Kwa ngerekano, no ũnyitage ũgeni ageni arĩa moka Nyũmba-inĩ ya Ũthamaki na ũkamatua arata aku. Ũngĩmonia wendo na njĩra ĩyo, nĩ ũrĩmateithagia kuona atĩ ithuĩ nĩ ithuĩ Akristiano a ma. (Joh. 13:34, 35) Macokio marĩa ũraruta mĩcemanio-inĩ o na mangĩkorũo marĩ makuhĩ, no mateithie andũ acio ageni kuona ũrĩa o nao mangĩtaarĩria wĩtĩkio wao na njĩra ya gĩtĩo. Ningĩ no ũthiĩ hamwe na mũhunjia mwerũ ũtungata-inĩ na ũmũteithie ũrĩa angĩhũthĩra Maandĩko akĩaria na andũ. Weka ũguo, ũrĩkoragwo ũkĩmũruta kwĩgerekania na Kristo.—Luk. 10:25-28.

12. Hihi nĩ tũrabatara gũkorũo na ũhoti wa mwanya nĩguo tũtue andũ arutwo? Taarĩria.

¹² Tũtiagĩrĩirũo gwĩciria atĩ tũrabatara gũkorũo na ũhoti wa mwanya nĩguo tũrute andũ arĩa angĩ gũtuĩka arutwo a Jesu. Nĩkĩ? Ta wĩcirie ũhoro wĩgiĩ mũtumia ũmwe wĩtagwo Faustina, ũrĩa ũikaraga Bolivia. Ndaahotaga gũthoma rĩrĩa aambĩrĩirie kũnyitanĩra na Aira a Jehova. No kuuma hĩndĩ ĩyo nĩ erutĩte, na nĩ ahotaga gũthoma na gĩkĩro kĩna. Nĩ mũbatithie na nĩ akenagĩra kũruta andũ arĩa angĩ. Erutaga Bibilia na andũ atano o kiumia. O na gũtuĩka Faustina ndahotaga gũthoma wega ta andũ aingĩ arĩa arutaga Bibilia, nĩ ahotete gũteithia andũ atandatũ nginya magabatithio.—Luk. 10:21.

13. O na tũrĩ na maũndũ maingĩ ma gwĩka-rĩ, nĩ irathimo irĩkũ tũngĩgĩa nacio wĩra-inĩ wa gũtua andũ arutwo?

¹³ Akristiano aingĩ mahũthagĩra mahinda maingĩ makĩhingia maũndũ ma bata. O na kũrĩ ũguo, nĩ methaga mahinda ma kwĩruta Bibilia hamwe na andũ, na ũndũ ũcio nĩ ũmarehagĩra gĩkeno kĩnene. Ta wĩcirie  ũhoro wa Melanie. Aaikaraga Alaska, na aareraga kairĩtu gake ka mĩaka ĩnana arĩ wiki. Ningĩ aarutaga wĩra mahinda mothe na nĩ aarũmbũyagia mũciari wake warĩ na mũrimũ wa kansa. Melanie nowe warĩ Mũira wa Jehova taũni-inĩ ya kwao ĩrĩa yarĩ kũndũ kũraihu. Nĩ aahoyaga aheo hinya nĩguo ahote gũthiĩ kũhunjia o na kũrĩ na heho, tondũ nĩ eendaga mũno kuona mũndũ angĩĩruta nake Bibilia. Mũthia-inĩ nĩ aacemanirie na Sara, ũrĩa wakenire mũno kwĩruta atĩ Ngai nĩ arĩ rĩĩtwa. Thutha wa ihinda, Sara nĩ eetĩkĩrire kwĩruta Bibilia. Melanie ooigire ũũ: “Mũthenya wa Njumaa hwaĩ-inĩ ndaakoragwo nogete, ĩndĩ nĩ twagunĩkaga twathiĩ na kairĩtu gakwa kwĩruta na Sara. Nĩ twakenagĩra gwĩka ũthuthuria wa ciũria iria Sara ooragia, na nĩ twakenaga kuona agĩtuĩka mũrata wa Jehova.” Sara nĩ aakirĩrĩirie ũkararia arĩ na ũmĩrĩru, akiuma kanitha ũrĩa aathiaga, na akĩbatithio.

14. (a) Wĩra wa gũtua andũ arutwo ũhaanaine atĩa na wĩra wa gũtega thamaki? (b) Ũhũthagĩra atĩa ciugo cia Paulo thĩinĩ wa 2 Timotheo 4:1, 2?

¹⁴ O na angĩkorũo nĩ ũrona ta ũtungata waku ũtarĩ na moimĩrĩro mega, ndũgakue ngoro gũcaria andũ arĩa marĩ na mwerekera mwega. Ririkana atĩ Jesu aaringithanirie wĩra wa gũtua andũ arutwo na wĩra wa gũtega thamaki. Ategi a thamaki no maniine mathaa maingĩ mangĩkanyita thamaki. Kaingĩ mategaga ũtukũ gatagatĩ kana rũcinĩ tene, na rĩmwe mathiaga gũtega kũndũ kũraihu. (Luk. 5:5) Ũndũ ũmwe na ũcio, ahunjia amwe mahũthagĩra mathaa maingĩ kũndũ gũtiganĩte  mathaa-inĩ matiganĩte magĩcaria marĩ na wetereri andũ mangĩtuĩka arutwo. Nĩkĩ? Nĩguo mone andũ aingĩ mangĩhunjĩria. Ahunjia arĩa merutanagĩria na njĩra ĩyo nĩ marathimagwo na njĩra ya kuona andũ marakenio nĩ ndũmĩrĩri itũ. Hihi no ũgerie kũhunjia mathaa marĩa andũ aingĩ mangĩoneka kana kũndũ kũrĩa ũngĩkora andũ?—Thoma 2 Timotheo 4:1, 2.

15. Nĩkĩ nĩ tũrabatara gũkorũo na wetereri tũkĩĩruta na andũ Bibilia?

¹⁵ Nĩkĩ kwĩruta na andũ Bibilia nĩ kũbataraga wetereri? Gĩtũmi kĩmwe nĩ tondũ tũtiendaga o gũteithia mũrutwo kũmenya na kwenda morutani marĩa marĩ thĩinĩ wa Bibilia. Nĩ tũrabatara gũteithia mũrutwo amenye na ende Jehova, Mũtungi wa Bibilia. Na makĩria ma kũruta mũrutwo maũndũ marĩa Jesu endaga arutwo ake meke, nĩ tũrabatara gũteithia mũrutwo amenye ũrĩa agĩrĩirũo gũikara arĩ Mũkristiano wa ma. Nĩ tũbatiĩ kũmũteithia tũrĩ na wetereri, akĩĩrutanĩria kũhũthĩra morutani ma Bibilia. Arutwo amwe nĩ mahotaga gũcenjia mwĩcirĩrie na mĩtugo yao thutha wa mĩeri ĩigana ũna tu, nao angĩ moyaga ihinda inene mangĩgeka ũguo.

16. Weruta ũndũ ũrĩkũ kuumana na ngerekano ya Raúl?

¹⁶ Mũmishonarĩ ũmwe kuuma Peru nĩ eeyoneire ũndũ ũronania bata wa gũkorũo na wetereri. Ooigire ũũ: “Twerutĩte mabuku merĩ na mũrutwo wa Bibilia wetagwo Raúl. O na kũrĩ ũguo, mũtũũrĩre wake nĩ warĩ na mathĩna maingĩ. Kĩhiko gĩake gĩakoragwo na mathĩna kaingĩ, nĩ aarumanaga mũno, na ciana ciake itiamũheete gĩtĩo nĩ ũndũ wa mĩtugo yake. Nĩ ookaga mĩcemanio kaingĩ, kwoguo nĩ ndaathiaga na mbere kũmũceerera nĩguo ndĩmateithie marĩ na famĩlĩ yake. Makĩria ma mĩaka ĩtatũ kuuma rĩrĩa twacemanirie, nĩ aabatithirio.”

17. Nĩ ũndũ ũrĩkũ tũkaarĩrĩria gĩcunjĩ-inĩ kĩrĩa kĩrũmĩrĩire?

¹⁷ Jesu aatwĩrire ũũ: “Thiĩi mũgatue andũ arutwo kuuma ndũrĩrĩ-inĩ ciothe.” Nĩguo tũhingie wĩra ũcio, nĩ tũbataraga kaingĩ kwaria na andũ marĩ na mwĩcirĩrie ngũrani mũno na witũ, o hamwe na arĩa matanyitanagĩra na ndini o yothe kana arĩa matetĩkĩtie atĩ Ngai arĩ kuo. Gĩcunjĩ kĩrĩa kĩrũmĩrĩire nĩ kĩarĩrĩirie ũrĩa tũngĩhunjĩria andũ ta acio ũhoro mwega.