Ũira nĩ wonanagia atĩ Jesu aatuĩkire Mũthĩnjĩri-Ngai Ũrĩa Mũnene rĩrĩa aabatithirio mwaka wa 29 Mahinda Maitũ. Tũroiga ũguo nĩkĩ? Rĩrĩa Jesu aabatithirio oonanirie atĩ nĩ eehaarĩirie kũruta muoyo wake ũrĩ igongona, ũrutwo kĩgongona-inĩ kĩa mũhaano kĩrĩa kĩrũgamĩrĩire “wendi” wa Ngai. (Gal. 1:4; Ahib. 10:5-10) Tondũ kĩgongona nĩ gĩcunjĩ kĩa bata kĩa hekarũ, nĩ kuonania atĩ no kũhoteke o na hekarũ nene ya kĩĩroho yaambĩrĩirie gũkorũo kuo rĩrĩa Jesu aabatithirio. Hekarũ nene ya kĩĩroho nĩ mũbango wa Jehova wĩgiĩ ũthathaiya mũtheru wĩhocetie harĩ igongona rĩa ũkũũri rĩa Jesu.—Mat. 3:16, 17; Ahib. 5:4-6.

Kwagĩa hekarũ nene ya kĩĩroho, nĩ kwabataranagia Mũthĩnjĩri-Ngai Mũnene wa gũtungata hekarũ-inĩ ĩyo. Kwoguo Jehova nĩ aaitĩrĩirie Jesu maguta “kũgerera roho mũtheru na hinya,” agĩtuĩka Mũthĩnjĩri-Ngai Ũrĩa Mũnene. (Atũm. 10:37, 38; Mar. 1:9-11) No tũngĩkorũo na ma atĩa atĩ Jesu aamũrirũo nĩguo atuĩke Mũthĩnjĩri-Ngai Ũrĩa Mũnene mbere ya gũkua na kũriũka gwake? No tũtaũkĩrũo nĩ ũndũ ũcio tũngĩĩciria ũhoro wĩgiĩ Haruni na athĩnjĩri-Ngai arĩa maatungatire thutha wake rungu rwa watho wa Musa.

Watho wa Musa woigĩte atĩ, no Mũthĩnjĩri-Ngai Ũrĩa Mũnene tu waagĩrĩirũo kũingĩra Harĩa Hatheru Mũno thĩinĩ wa gĩikaro kĩrĩa kĩamũre, na thutha ũcio Harĩa Hatheru Mũno thĩinĩ wa hekarũ. Harĩa Hatheru Mũno haagayanĩtio kuuma harĩ Harĩa Hatheru na gĩtaama. Mũthĩnjĩri-Ngai ũrĩa mũnene aahĩtũkaga gĩtaama kĩu, akaingĩra Harĩa Hatheru Mũno o Mũthenya wa Kũhumbĩra Mehia tu. (Ahib. 9:1-3, 6, 7) Haruni na athĩnjĩri-Ngai arĩa maatungatire thutha wake maaitagĩrĩrio maguta nĩguo matungate marĩ athĩnjĩri-Ngai mbere ya “kũgerera harĩ gĩtaama” gĩa gĩikaro kĩrĩa kĩamũre. Ũguo nĩ kuonania atĩ no mũhaka angĩkorũo Jesu aaitĩrĩirio maguta nĩguo atuĩke Mũthĩnjĩri-Ngai Ũrĩa Mũnene mbere ya gũkua, ũguo nĩ kuuga “kũgerera harĩ gĩtaama, [kana] mwĩrĩ wake,” na gũcoka gũthiĩ gũtũũra igũrũ. (Ahib. 10:20) Ũndũ ũcio nĩguo watũmire mũtũmwo Paulo oige atĩ Jesu ookire “arĩ mũthĩnjĩri-Ngai mũnene” agĩcoka akĩgerera “hema-inĩ ĩrĩa nene makĩria na nginyanĩru makĩria ĩtathondeketwo na moko,” agĩthiĩ “igũrũ kuo kwene.”—Ahib. 9:11, 24.

Hatirĩ ngũrani gatagatĩ ka rĩrĩa kĩrĩkanĩro kĩrĩa kĩerũ gĩekĩrirũo hinya na rĩrĩa kĩarugũririo. Nĩkĩ? Rĩrĩa Jesu aathiire igũrũ na akĩneana thogora wa muoyo wake mũkinyanĩru handũ-inĩ haitũ, ooire ikinya rĩa mbere harĩ makinya matatũ marĩa maatũmire kĩrĩkanĩro kĩrĩa kĩerũ gĩĩkĩrũo hinya kana gĩtĩkĩrĩke. Makinya macio matatũ nomo maatũmire kĩrĩkanĩro kĩu kĩrugũrio, kana kĩambĩrĩrie kũruta wĩra. Makinya macio nĩ marĩkũ?

Wa mbere, Jesu aathiire kũrĩ Jehova; wa kerĩ, Jesu akĩnengera Jehova thogora wa igongona rĩake; na wa gatatũ, Jehova agĩtĩkĩra thogora wa thakame ĩrĩa Jesu aaitire. Kĩrĩkanĩro kĩrĩa kĩerũ gĩtiambĩrĩirie kũruta wĩra maũndũ macio matatũ matekĩtwo.

Bibilia ndĩgwetete ĩmwe kwa ĩmwe rĩrĩa Jehova eetĩkĩrire thogora wa igongona rĩa Jesu. Nĩ ũndũ ũcio tũtingĩhota kũmenya wega rĩrĩa kĩrĩkanĩro kĩrĩa kĩerũ gĩekĩrirũo hinya na rĩrĩa kĩambĩrĩirie kũruta wĩra. O na kũrĩ ũguo, nĩ tũĩ atĩ Jesu aambatire igũrũ thikũ ikũmi mbere ya mũthenya wa Pentekoste. (Atũm. 1:3) Ihinda rĩna harĩ thikũ icio, nĩrĩo aanengerire Jehova thogora wa igongona rĩake na Jehova agĩtĩkĩra. (Ahib. 9:12) Ũira wa ũndũ ũcio nĩ wonekire wega mũthenya wa Pentekoste. (Atũm. 2:1-4, 32, 33) Ũguo nĩ kuonania atĩ kĩrĩkanĩro kĩrĩa kĩerũ nĩ gĩekĩrĩtwo hinya na gĩkambĩrĩria kũruta wĩra.

Na njĩra nguhĩ kĩrĩkanĩro kĩrĩa kĩerũ gĩekĩrirũo hinya na gĩkĩrugũrio thutha wa Jehova gwĩtĩkĩra thogora wa thakame ĩrĩa Jesu aaitire. Kwoguo kĩrĩkanĩro kĩrĩa kĩerũ gĩkĩambĩrĩria kũruta wĩra, Jesu Kristo, Mũthĩnjĩri-Ngai Ũrĩa Mũnene, arĩ we Mũiguithania.—Ahib. 7:25; 8:1-3, 6; 9:13-15.