Ndaaciarirũo mwaka wa 1954, taũni-inĩ ya St. Paul, Minnesota, bũrũri-inĩ wa Amerika (US) na famĩlĩ itũ yarĩ ya Gatoreki. Tũciarĩtwo tũrĩ atano, na niĩ nĩ niĩ wa kerĩ. Ndaathomeire cukuru yarĩ rungu rwa kanitha wa Gatoreki, na nĩ ndaatungataga ndĩ ũmwe wa tũmwana tũrĩa tũteithagĩrĩria atungatĩri. O na kũrĩ ũguo, ndiarĩ na ũmenyo mũingĩ wa Bibilia. O na gũtuĩka nĩ ndetĩkĩtie atĩ no mũhaka gũkorũo nĩ kũrĩ Ngai ũrĩa wombire indo ciothe, nĩ ndateire mwĩhoko harĩ kanitha wa Gatoreki.

Rĩrĩa ndaarĩ mwaka wakwa wa mbere ngĩthomera watho yunivasĩtĩ-inĩ ya William Mitchell nĩ ndaaceereirũo nĩ Aira a Jehova. Maangorire ngĩhũũra nguo na makĩnjĩra marĩ na wendo atĩ nĩ mangĩacokire rĩngĩ. Rĩrĩa maacokire nĩ ndaamoririe ciũria ici igĩrĩ: “Nĩ kĩĩ gĩtũmaga andũ arĩa oru magaacĩre ũtũũro-inĩ gũkĩra andũ arĩa ega?” na “Nĩ atĩa mũndũ angĩka nĩguo akorũo na gĩkeno?” Nĩ ndetĩkĩrire mandigĩre ibuku rĩa The Truth That Leads to Eternal Life na Bibilia ya New World Translation of the Holy Scriptures ĩrĩa yarĩ na ngothi thaka ya ngirini. Ningĩ nĩ ndetĩkĩrire wĩruti wa Bibilia. Wĩruti ũcio nĩ wahingũrire maitho. Nĩ ndaakenire mũno kwĩruta atĩ Ũthamaki wa Ngai  nĩguo thirikari ĩrĩa ĩgaathana gũkũ thĩ. Nĩ ndoonaga atĩ wathani wa andũ nĩ ũremetwo biũ gũteithia andũ na atĩ ũtũmĩte thĩ ĩkorũo ĩiyũire ruo, mĩnyamaro, wagi wa kĩhooto, na ikuũ.

Ndeyamũrĩire Jehova kĩambĩrĩria-inĩ kĩa mwaka wa 1982, na ngĩbatithio mwaka-inĩ o ũcio kĩgomano-inĩ gĩa “Kingdom Truth” kĩrĩa gĩekĩirũo nyũmba-inĩ ĩmwe nene taũni-inĩ ya St. Paul. Kiumia kĩrĩa kĩarũmĩrĩire nĩ ndaacokire taũni-inĩ ĩyo nĩguo njĩke kĩgeranio kĩa ũwakiri. Kĩambĩrĩria-inĩ kĩa Oktomba nĩ ndaamenyire atĩ nĩ ndahĩtũkĩte kĩgeranio kĩu, na kwoguo ngĩtĩkĩrio kũrutaga wĩra ndĩ wakiri.

Kĩgomano-inĩ kĩu, nĩ ndaacemanirie na mũndũ ũmwe watungataga Betheli ya Brooklyn wetagwo Mike Richardson, na akĩnjĩra atĩ nĩ kwambĩrĩirio wabici ya maũndũ ma watho wabici-inĩ nene ya Aira a Jehova. Ngĩririkana ciugo cia mũndũ ũrĩa Mũethiopia thĩinĩ wa Atũmwo 8:36 na ngĩĩũria ũũ: ‘Nĩ kĩĩ kĩngĩgiria njũrie ndutage wĩra wabici-inĩ ĩyo?’ Kwoguo ngĩiyũria fomu ya gũthiĩ gũtungataga Betheli.

Aciari akwa matiakenire ndatuĩka Mũira wa Jehova. Baba aanjũririe kana gũthiĩ gũtungata Betheli nĩ kũngĩakorirũo na ũguni harĩ wĩra ũrĩa ndathomeire wa ũwakiri. Ngĩmũtaarĩria atĩ ndĩĩrutaga wĩra wa kwĩrutĩra. Ngĩmwĩra atĩ o mweri ndĩheagwo dola 75 iria ciaheagwo arĩa maatungataga Betheli nĩ ũndũ wa mahũthĩro mao.

Thutha wa kũrĩkia wĩra ũrĩa ndaarutaga wa kwandĩkwo, nĩ ndaambĩrĩirie gũtungata Betheli ya Brooklyn, New York, mwaka wa 1984. Ndaaheirũo wĩra Wabici-inĩ ya Maũndũ ma Watho. Ũmenyeru ũrĩa ndagĩte naguo ngĩruta wĩra igooti-inĩ nĩ ũngĩandeithirie wĩra-inĩ wakwa mwerũ.

Nyũmba ya Mathaako ya Stanley taũni-inĩ ya Jersey, gĩcigo-inĩ kĩa New Jersey, yagũrirũo Novemba mwaka wa 1983. Ariũ a Ithe witũ nĩ maatũmire marũa ma kũhoya rũtha nĩguo metĩkĩrio gũthondeka thitima na mĩberethi ya nyũmba ĩyo. Rĩrĩa maacemanirie na anene a thirikari, ariũ a Ithe witũ nĩ maataarĩirie atĩ maabangaga kũhũthagĩra Nyũmba ya Stanley gwĩkagĩra igomano cia Aira a Jehova. Ũndũ ũcio nĩ warehire thĩna. Mawatho ma taũni ya Jersey megiĩ ũrĩa nyũmba ciagĩrĩire kũhũthĩrũo mooigĩte atĩ nyũmba cia ũthathaiya ciagĩrĩirũo gũkorũo kũrĩa andũ maikaraga tu. Anene a thirikari nĩ maaregire kũheana rũtha tondũ Nyũmba ĩyo ya Stanley yarĩ kũndũ kwa biacara. Ariũ a Ithe witũ nĩ maatwarire ciira igooti-inĩ no ũndũ ũcio ũkĩringa ihiga.

Kiumia gĩakwa kĩa mbere gũtungata Betheli, ithondeka nĩ rĩatwarire ũndũ ũcio igooti-inĩ inene.  Na tondũ ndakoretwo o hĩndĩ ndarĩkia kũruta wĩra mĩaka ĩĩrĩ ndĩ karani igooti-inĩ inene taũni-inĩ ya St. Paul, Minnesota, nĩ ndooĩ ũhoro wa ciira wa mũthemba ta ũcio. Wakiri ũmwe witũ ooigire atĩ Nyũmba ĩyo ya Stanley nĩ yakoretwo ĩkĩhũthĩrũo gwĩkĩrũo maũndũ matiganĩte ta kuonanĩrio thenema na nyĩmbo. Nĩ kĩĩ kĩngĩagĩtũmire gwĩkĩra maũndũ ma ũthathaiya kuo ũkorũo ũrĩ ũndũ ũtarĩ mwĩtĩkĩrĩku? Igooti rĩu nĩ rĩarĩrĩirie ũndũ ũcio, na rĩgĩtua atĩ Taũni ya Jersey nĩ yaagararĩte ihooto citũ cia ũthathaiya. Igooti rĩu nĩ rĩathire taũni ĩyo ya Jersey ĩheane rũtha rũrĩa rwabataranagia na ũndũ ũcio ũgĩtũma nyambĩrĩrie kuona ũrĩa Jehova aarathimaga njĩra iria ithondeka rĩahũthagĩra cia kĩĩwatho gũtwarithia na mbere wĩra wa kũhunjia. Nĩ ndaakenire mũno gũkorũo na itemi ũndũ-inĩ ũcio.

Ariũ a Ithe witũ nĩ maambĩrĩirie wĩra mũnene wa gũcokereria nyũmba ĩyo, na kũrĩ Septemba 8, 1985, ĩgĩkĩrũo mũcemanio wa kũrĩka gwa kĩrathi kĩa 79 kĩa Gileadi, ihinda rĩtakinyĩte mwaka ũmwe kuuma yambĩrĩria gũcokererio. Nĩ ndaakenire mũno gũtwarithia na mbere maũndũ ma Ũthamaki, ngĩrutithania wĩra na gĩkundi kĩa mawakiri. Ũndũ ũcio watũmire njigue njiganĩire gũkĩra ũrĩa ndaiguaga ngĩruta wĩra wa kwandĩkwo itanambĩrĩria gũtungata Betheli. Ndiamenyaga atĩ Jehova nĩ angĩanjĩhokeire maũndũ mangĩ makĩria.

Mĩaka-inĩ ya 1980, thibitarĩ o hamwe na mandagĩtarĩ, matiatĩaga matua ma Aira a Jehova ma kũrigitwo hatarĩ thakame. Aarĩ a Ithe witũ arĩa maarĩ na nda maakoragwo na thĩna o na makĩria tondũ manjanji moonaga atĩ mũtumia ũrĩ na nda ndarĩ na kĩhooto gĩa kuuga ndagekĩrũo thakame. Manjanji mooigaga atĩ mũtumia ũrĩ na nda angĩaga gwĩkĩrũo thakame, no akue na mwana ũrĩa ũgũciarũo atigwo atarĩ na nyina.

Dicemba 29, mwaka wa 1988, mwarĩ wa Ithe witũ Denise Nicoleau nĩ oorirũo nĩ thakame nyingĩ mũno thutha wa kũgĩa mwana wake wa kahĩĩ. Thakame yake yanyihire nginya ĩgĩthiĩ thĩ wa gĩthimi kĩa 5.0, na ndagĩtarĩ wake akĩmwĩra etĩkĩre gwĩkĩrũo thakame. Mwarĩ wa Ithe witũ Nicoleau akĩrega. Rũcinĩ rũrĩa rwarũmĩrĩire, thibitarĩ nĩ yoririe njanji arute watho wa gwĩtĩkĩria mwarĩ wa Ithe witũ ũcio ekĩrũo thakame. Njanji ũcio nĩ aarutire watho wa gwĩtĩkĩria thibitarĩ ĩkĩre mwarĩ wa Ithe witũ thakame o na atambĩte kũmenyithia kana gũthikĩrĩria mwarĩ wa Ithe witũ ũcio o na kana mũthuri wake makĩyaria.

Mũthenya wa Njumaa Dicemba 30, thibitarĩ ĩyo nĩ yekĩrire mwarĩ wa Ithe witũ ũcio thakame o na mũthuri wake o hamwe na andũ angĩ a famĩlĩ arĩa maarĩ nake hau makĩreganaga na ũndũ ũcio. Hwaĩ-inĩ ũcio, andũ aigana ũna a famĩlĩ yake, o hamwe na mũthuri ũmwe kana erĩ a kĩũngano nĩ maanyitirũo, na magĩthitangĩrũo atĩ nĩ maagirĩrĩirie mwarĩ wa Ithe witũ Nicoleau arĩ ũrĩrĩ thibitarĩ-inĩ  ndagekĩrũo thakame. Mũthenya ũyũ ũngĩ, ngathĩti, TV, o na redio kũndũ guothe thĩinĩ wa Taũni ya New York nĩ ciaheanaga ũhoro wa andũ acio maanyitirũo.

Mũthenya wa Njumatatũ rũcinĩ nĩ ndaaririe na njanji wa igooti inene wetagwo Milton Mollen. Nĩ ndaamũtaarĩirie ũhoro wĩgiĩ ciira ũcio, na ngĩtĩtĩrithia atĩ njanji ũcio ũngĩ aaheanĩte watho o na atambĩte gũthikĩrĩria mwarĩ wa Ithe witũ o na kana mũthuri wake. Mollen akĩnjĩra njũke wabici yake mathaa ma mĩaraho nĩguo twarĩrĩrie ciira ũcio na mawatho marĩa maahutanagia naguo. Twathiire wabici-inĩ ya Njanji Mollen tũrĩ hamwe na Philip Brumley, ũrĩa warĩ mũrori wa rũhonge rwitũ rwa kĩĩwatho. Njanji ũcio ningĩ nĩ eerire wakiri wa thibitarĩ ĩyo o nake akorũo ho. Ndeereti ĩyo yarĩ hiũ. O tũkĩaragia, mũrũ wa Ithe witũ Brumley aanyandĩkĩire harĩa aandĩkaga tũmaũndũ akĩnjĩra ngerie “kwaria na njĩra ya ũhooreri.” Ndaacokire kuona atĩ ũcio warĩ ũtaaro wa ũũgĩ tondũ nĩ ndaarakarĩte mũno ngĩgeria kuonia wakiri ũcio atĩ nĩ aahĩtĩtie.

Thutha wa kĩndũ ta ithaa rĩmwe, Njanji Mollen akiuga atĩ ciira ũcio nĩguo ũngĩambire gũthikĩrĩrio igooti-inĩ rũcinĩ rũrĩa rwarũmagĩrĩra. Tũkiuma wabici-inĩ yake, Njanji Mollen ooigire atĩ wakiri ũcio wa thibitarĩ nĩ angĩgakorũo na wĩra mũritũ rũcinĩ rũu. Eendaga kuuga atĩ wakiri ũcio nĩ angĩgatindĩkwo biũ ataarĩrie kĩrĩa gĩatũmĩte thibitarĩ ĩyo yoe ikinya rĩu. Ndoonire ta arĩ Jehova ũranyũmĩrĩria atĩ nĩ tũngĩahootanire ciira-inĩ ũcio. Nĩ ndaagegire kuona ũrĩa Jehova aatũhũthagĩra kũhingia wendi wake.

Twarutire wĩra mathaa maingĩ ũtukũ, tũkĩhaarĩria ũrĩa tũngĩoigire igooti-inĩ rũcinĩ rũrĩa rwarũmagĩrĩra. Kuuma harĩa Betheli ya Brooklyn yarĩ nginya igooti-inĩ rĩu ti handũ haraihu, kwoguo andũ aingĩ harĩ arĩa twateithanagia nao ciira-inĩ ũcio maathiire magũrũ. Thutha wa manjanji ana arĩa maarĩ ciira-inĩ ũcio gũtũthikĩrĩria, magĩtua atĩ watho wa gwĩtĩkĩria mwarĩ wa Ithe witũ ekĩrũo thakame ndwagĩrĩire. Igooti rĩu inene rĩatuire itua rĩanyitire mwarĩ wa Ithe witũ Nicoleau mbaru na rĩkiuga atĩ kũheana watho o na mũndũ atambĩte gũthikĩrĩrio nĩ kwagarara ihooto cia ũmũndũ.

Ihinda inini thutha ũcio, igooti inene thĩinĩ wa Taũni ya New York nĩ rĩoigire atĩ mwarĩ wa Ithe witũ Nicoleau aarĩ na kĩhooto gĩa kuuga athondekwo hatarĩ thakame. Ũcio warĩ ciira wa mbere, harĩ maciira mana makoniĩ thakame thĩinĩ wa magooti manene bũrũri-inĩ wa Amerika (US) ũrĩa ndagĩire na mweke wa kũnyita itemi.  ( Rora gathandũkũ “Ũhootani Magooti-inĩ Manene ma Bũrũri.”) Ningĩ ndananyitanĩra na mawakiri angĩ thĩinĩ wa Betheli maciira-inĩ megiĩ ũreri wa ciana, ndigano, mĩgũnda, na ũrĩa nyũmba na mĩgũnda ciagĩrĩire kũhũthĩrũo.

Rĩrĩa ndaacemanirie riita rĩa mbere na mũtumia wakwa Dawn, nĩ aatiganĩte na mũthuri wake na aarĩ na ciana ithatũ. Nĩ aarutaga wĩra o agĩtungataga arĩ painia. Nĩ aakoretwo agereire ũtũũro mũritũ, no nĩ ndakenirio mũno nĩ kĩyo gĩake gĩa gũtungatĩra Jehova. Mwaka wa 1992, nĩ twathiire kĩgomano-inĩ kĩarĩ na kĩongo “Arĩa Mamũrĩkagĩra Arĩa Angĩ” taũni-inĩ ya New York na ngĩmũũria kana no twambĩrĩrie ũrata nĩguo tũmenyane makĩria. Thutha wa mwaka ũmwe tũkĩhikania. Gũkorũo na mũtumia ũigaga maũndũ ma kĩĩroho mbere, na wendete gũkena nĩ kĩheo kuuma kũrĩ Jehova. Dawn akoretwo akĩnjĩkĩra maũndũ mega matukũ-inĩ mothe marĩa tũkoretwo hamwe.​—Thim. 31:12.

Hĩndĩ ĩrĩa twahikanagia, mwana wake ũmwe aarĩ wa ũkũrũ wa mĩaka 11, ũngĩ 13, na ũcio ũngĩ 16. Nĩ ndeendaga gũkorũo ndĩ ithe mwega harĩ o, kwoguo nĩ ndaathomaga na kinyi na ngahũthĩra maũndũ mothe ingĩonire mabuku-inĩ maitũ megiĩ gũkorũo ndĩ ithe mũreri. Kuuma hĩndĩ ĩyo gũtiagĩte mathĩna, no nĩ ngenaga tondũ ciana icio rĩu inyonaga ndĩ ithe ũrĩ wendo na mũrata ingĩhoka. Nĩ twetĩkĩrĩtie arata a ciana citũ maceere gwitũ hĩndĩ o yothe na nĩ twakenaga mũno kũhũthĩra mahinda hamwe na andũ acio ethĩ.

Mwaka wa 2013, tũrĩ na Dawn nĩ twathamĩire Wisconsin, nĩguo tũrũmbũiye aciari aitũ akũrũ. Ũtungata wakwa wa Betheli ndwathirire, ũndũ ũrĩa niĩ iteerĩgagĩrĩra. Nĩ nderirũo thiĩ na mbere gũteithĩrĩria ithondeka maũndũ-inĩ ma kĩĩwatho ndĩ ndungata ya kwĩrutĩra.

Septemba mwaka wa 2018, nĩ ndaambĩrĩirie gũthĩnio nĩ mũmero. Nĩ ndaarorirũo nĩ ndagĩtarĩ, no thĩna nduonekire. Thutha ũcio, ndagĩtarĩ ũngĩ akĩnjĩra ndorũo nĩ ndagĩtarĩ wa mĩkiha. Kũrĩ Janũarĩ 2019 ndagĩtarĩ ũcio akĩnjĩra atĩ no kũhoteke ndaarĩ na mũrimũ ũtakoragwo na andũ aingĩ ũngĩahutirie mwĩrĩ wakwa wothe na njĩra nene.

Thikũ ithatũ thutha ũcio, ngĩthaaka mũthaako wa kũnyororoka mbarabu-inĩ nĩ ndagũire na ngiunĩka guoko gwakwa kwa ũrĩo. Ngoretwo ngĩthaaka mũthaako ũcio ũtũũro wakwa wothe, na nĩ ndĩũĩ wega mũno. Kwoguo nĩ ndaamenyire atĩ ũhoti wakwa wa gũtwara mwĩrĩ ũrĩa ndĩrenda wathiaga ũgĩthiraga. Nĩ ndaamakirio nĩ ũrĩa mũrimũ ũcio wanenehire na ihenya ũgĩkorũo ũrĩ ũndũ mũritũ harĩ niĩ kwaria, gũthiĩ, na kũmeria kĩndũ.

Ũkoretwo ũrĩ mweke wa mwanya harĩ niĩ kũhũthĩra ũmenyeru wakwa ndĩ wakiri gũtwarithia na mbere maũndũ ma Ũthamaki. Nĩ ngenaga tondũ nĩ hotete kwandĩka icunjĩ nyingĩ thĩinĩ wa magathĩti iria ithomagwo nĩ mandagĩtarĩ, mawakiri, na manjanji. Ningĩ ndanaheo mweke wa kwarĩria andũ kũndũ kũingĩ thĩinĩ wa thĩ, na ngahũthĩra mweke ũcio kuonania atĩ andũ a Jehova marĩ na kĩhooto gĩa gũthuura kũrigitwo hatarĩ thakame. O rĩngĩ no njuge o ta ũrĩa Luka mwandĩki wa Bibilia aandĩkire thĩinĩ wa Luka 17:10: ‘Niĩ ndĩ ngombo ĩtarĩ kĩene. Njĩkĩte o ũrĩa njagĩrĩirũo nĩ gwĩka.’