ITHUOTHE nĩ twĩtĩkĩtie atĩ Jehova nĩ aratongoria na akahe andũ ake kĩrĩa gĩothe marabatara nĩguo makorũo na hinya kĩĩroho “matukũ-inĩ ma kũrigĩrĩria.” (2 Tim. 3:1) No o ũmwe witũ nĩ arabatara gwathĩkĩra Jehova. No tũringithanie ũndũ ũcio na ũrĩa kwarĩ rĩrĩa Aisiraeli maarĩ werũ-inĩ. Nĩ maabataraga gwathĩkĩra mĩgambo ya karumbeta.

Jehova eerĩte Musa athondeke tũrumbeta twĩrĩ, atũture na nyundo tũrĩ twa betha, nĩguo atũhũthagĩre “gwĩta kĩrĩndĩ na hĩndĩ ya kwambũra hema.” (Ndar. 10:2) Athĩnjĩri-Ngai maahuuhaga tũrumbeta tũu na njĩra itiganĩte nĩguo mateithie andũ kũmenya ũrĩa maabataraga gwĩka. (Ndar. 10:3-8) Ũmũthĩ andũ a Ngai nĩ mamũkagĩra ũtongoria na njĩra itiganĩte. Tũkwarĩrĩria njĩra ithatũ iria twamũkagĩra ũtongoria nacio, na tuone ũrĩa ihaanaine na mĩgambo ya tũrumbeta mahinda-inĩ ma Isiraeli ya tene. Andũ a Ngai ũmũthĩ nĩ manyitagwo ũgeni igomano-inĩ nene, arori arĩa aamũre makamenyerio, na mĩbango ya ithondeka ĩrĩa ĩhutĩtie ciũngano ciothe ĩgekwo mogarũrũku.

Rĩrĩa Jehova eendaga “kĩrĩndĩ gĩothe” gĩcemanie mũromo-inĩ wa gĩikaro kĩrĩa kĩamũre, athĩnjĩri-Ngai maahuuhaga tũrumbeta tũu twerĩ. (Ndar. 10:3) Mĩhĩrĩga ĩyo yothe, ĩrĩa yagayanĩtio maita mana na yathiũrũrũkĩirie gĩikaro kĩu kĩamũre, nĩ yaiguaga mũgambo ũcio. Arĩa maaikaraga hakuhĩ na mũromo-inĩ wa gĩikaro kĩu no kũhoteke mookaga thutha wa ndagĩka cigana ũna. Nao arĩa maaikaraga haraihu, no kũhoteke nĩ maabataraga ihinda iraiharaihu na kĩyo makĩria nĩguo makinye. O ũrĩa kũngĩkorũo kwarĩ, Jehova eendaga othe magomane nĩguo marutwo.

Ũmũthĩ tũticemanagia gĩikaro-inĩ kĩrĩa kĩamũre, no nĩ twĩtagwo tũcemanie hamwe. Hĩndĩ ta ĩyo nĩ ta hĩndĩ ya igomano cia thikũ ithatũ, kana mĩcemanio ĩngĩ ya mwanya, kũrĩa tũthiaga kũrutwo maũndũ ma bata na tũkaheo ũtongoria. Kũndũ guothe thĩinĩ wa thĩ, andũ a Jehova marutagwo maũndũ mahaanaine. Nĩ ũndũ ũcio, arĩa metĩkagĩra gũthiĩ igomano-inĩ icio nĩ makenagĩra gũcemania hamwe marĩ gĩkundi kĩnene kĩa andũ akenu. Andũ amwe nĩ mabataraga gũthiĩ kũndũ kũraihu gũkĩra arĩa angĩ. O na kũrĩ ũguo, arĩa othe metĩkagĩra gũthiĩ igomano-inĩ icio nĩ magunĩkaga mũno.

Hihi arĩa maikaraga kũraihu mũno na kũrĩa igomano icio nene irekĩrũo nĩ magunĩkaga? Nĩ ũndũ wa tekinolonjĩ, andũ aingĩ ta acio nĩ magunĩkaga nĩ programu iria irutanagwo igomano-inĩ icio nene na makaigua ta moima kuo. Kwa ngerekano, hĩndĩ ĩmwe rĩrĩa wabici ya rũhonge ya Benin yaceereirũo nĩ mũrũ wa Ithe witũ kuuma wabici itũ nene ya Aira a Jehova, nĩ kwabangirũo ũrĩa programu ĩyo ĩgũthikĩrĩrio gataũni-inĩ kanini ka Arlit bũrũri-inĩ wa Niger, werũ-inĩ wa Sahara. Arĩa maagomanĩte kuo maarĩ aarĩ na ariũ a Ithe witũ mĩrongo ĩĩrĩ na ũmwe na andũ anini arĩa maakenagio nĩ ũhoro. O na gũtuĩka maarĩ kũraihu mũno, maaiguaga marĩ hamwe na andũ 44,131  arĩa maarĩ kĩgomano-inĩ kĩu kĩnene. Mũrũ wa Ithe witũ ũmwe aandĩkire ũũ: “Nĩ tũracokia ngatho cia kuuma ngoro-inĩ nĩ ũndũ wa gũtũteithia gũthikĩrĩria programu ĩyo. Ũndũ ũcio ũratuonirie atĩ nĩ mũtwendete mũno.”

Athĩnjĩri-Ngai Aisiraeli mangĩahuuhire karumbeta kamwe, “no atongoria oiki, atongoria a andũ ngiri nyingĩ” maathiaga hema-inĩ ya gũtũnganwo. (Ndar. 10:4) Maathiĩ nĩ maarutagwo na makamenyerio nĩ Musa. Ũndũ ũcio nĩ wamateithagia kũhingia maũndũ marĩa meehokeirũo mĩhĩrĩga-inĩ yao. Korũo warĩ ũmwe wa atongoria acio-rĩ, githĩ ndũngĩerutanĩirie ũrĩa wothe ũngĩahotire nĩguo ũthiĩ na ũgunĩke na maũndũ macio maarutanagwo?

Ũmũthĩ athuri a kĩũngano matikoragwo marĩ “atongoria,” na ningĩ matikoragwo marĩ anene igũrũ rĩa rũũru rwa Ngai rũrĩa marũmbũyagia. (1 Pet. 5:1-3) No nĩ mekaga ũrĩa wothe mangĩhota nĩguo marĩithie rũũru rũu. Nĩ ũndũ ũcio, nĩ makoragwo mehaarĩirie gũthiĩ rĩrĩa metwo makamenyerio ta thĩinĩ wa Cukuru ya Ũtungata wa Ũthamaki. Thĩinĩ wa cukuru ta icio, athuri nĩ marutagwo ũrĩa mangĩrũmbũiya maũndũ ma kĩũngano na njĩra njega makĩria. Ũndũ ũcio nĩ ũteithagia kĩũngano kĩrĩ gĩothe gũkũra kĩĩroho. O na angĩkorũo ndũrĩ wathiĩ cukuru ta icio, no kũhoteke nĩ wĩrutaga maũndũ kuumana na arĩa maanathiĩ cukuru icio.

Rĩmwe na rĩmwe athĩnjĩri-Ngai nĩ maahuuhaga karumbeta na mũgambo ũracenjacenjia. Ũndũ ũcio woonanagia atĩ Jehova eendaga kambĩ yothe ĩthame. (Ndar. 10:5, 6) Rĩrĩa kambĩ ĩyo ĩrathama, yekaga ũguo na njĩra ĩrĩ na mũbango, no ũndũ ũcio wabataraga o ũmwe wao erutanĩrie. No kũhoteke amwe ao matiaiguaga makĩenda gũthama. Nĩkĩ?

Kwahoteka amwe ao moonaga ta marathamio maita maingĩ mũno na materĩgĩrĩire. “Rĩmwe itu nĩ rĩngĩaikarire o kuuma hwaĩ-inĩ nginya rũcinĩ tu.” Mahinda mangĩ, itu rĩu rĩaikaraga “mĩthenya ĩĩrĩ, mweri ũmwe, kana o na makĩria” matanathama. (Ndar. 9:21, 22) Hihi kambĩ ĩyo yathamire maita maigana? Ndari mũrango wa 33 ĩgwetaga kũndũ ta 40 kũrĩa Aisiraeli maambire hema.

Rĩmwe Aisiraeli amwe nĩ mangĩambire hema kũndũ kũrĩ na kĩĩruru. Mũndũ nĩ angĩakenire kwamba hema handũ ta hau thĩinĩ wa werũ ũcio wothe ũrĩa warĩ “mũnene na wa gwĩtigĩrũo.” (Gũcok. 1:19) Nĩ ũndũ ũcio, mũndũ nĩ angĩeciririe atĩ mangĩerirũo mathame rĩngĩ ndangĩonire handũ hega ta hau.

Rĩrĩa kambĩ ĩyo yambagĩrĩria gũthama, andũ amwe nĩ mangĩaritũhĩirũo gweterera hĩndĩ yao ya gũthama ĩkinye. Andũ othe nĩ maaiguaga mũgambo ũcio wacenjacenjagia wa karumbeta, no matingĩathamire othe ihinda-inĩ rĩmwe. Mũgambo ũcio wacenjacenjagia wa karumbeta woonanagia atĩ mĩhĩrĩga ĩrĩa yaambĩte hema mwena wa irathĩro nĩyo Juda, Isakaru, na Zebuluni yabatiĩ kwambĩrĩria gũthama. (Ndar. 2:3-7; 10:5, 6) Thutha wao gũthama, athĩnjĩri-Ngai nĩ maahuuhaga karumbeta na mũgambo ũracenjacenjia riita rĩa kerĩ, makĩmenyithia gĩkundi kĩa mĩhĩrĩga ĩtatũ ĩrĩa yaambĩte hema mwena wa mũhuro yambĩrĩrie thabarĩ. Athĩnjĩri-Ngai maahũthagĩra mũtaratara ũcio nginya kambĩ yothe ĩrĩthama.

No kũhoteke wanaritũhĩrũo gwathĩkĩra mogarũrũku mamwe manekwo ithondeka-inĩ. No kũhoteke woonire ta gwekwo mogarũrũku maingĩ mũno andũ materĩgĩrĩire. Kana hihi no kũhoteke nĩ ũrakenagio nĩ ũrĩa maũndũ marekagwo na ndũngĩrendire gwĩkwo mogarũrũku. O ũrĩa kũngĩkorũo kũrĩ, no kũhoteke nĩ woire ihinda ũgĩkamenyera ũgarũrũku ũcio mwerũ. O na kũrĩ ũguo, tũngĩĩrutanĩria kũrũmĩrĩra ũgarũrũku ũcio mwerũ, nĩ tũrĩonaga warĩ mwega na tuone Jehova agĩtũrathima.

Matukũ-inĩ ma Musa, Jehova nĩ aatongoririe athuri, atumia, na ciana milioni nyingĩ werũ-inĩ. Korũo Jehova ndaamarũmbũirie na akĩmatongoria, matingĩahonokire. Ũmũthĩ, kũgerera ũtongoria wa Jehova nĩ tũhotaga gũikara tũrĩ na hinya kĩĩroho o na tũkagaacĩra. Nĩ ũndũ ũcio, rekei ithuothe tũtue itua rĩa gwathĩka o ta ũrĩa Aisiraeli arĩa maarĩ ehokeku maathĩkĩire mĩgambo ĩtiganĩte ya tũrumbeta!