GĨCUNJĨ KĨA WĨRUTI KĨA 25
“Niĩ Mwene nĩ Ngaacaria Ng’ondu Ciakwa”
“Niĩ mwene nĩ ngaacaria ng’ondu ciakwa, na nĩ ngaacirũmbũiya.”—EZEK. 34:11.
RWĨMBO NA. 105 “Ngai nĩ Wendo”
GĨCUNJĨ-INĨ GĨKĨ *
1. Jehova eeringithanirie na mũtumia ũrongithia nĩkĩ?
“HIHI mũtumia no ariganĩrũo nĩ kaana karĩa arongithia?” Jehova ooririe kĩũria kĩu matukũ-inĩ ma mũnabii Isaia. Ngai eerire andũ ake ũũ: “O na atumia acio mangĩriganĩrũo, niĩ ndirĩ hĩndĩ ingĩriganĩrũo nĩwe.” (Isa. 49:15) Ti kaingĩ Jehova eringithanagia na mũtumia ũrĩ na kaana. No nĩ eekire ũguo hĩndĩ ĩyo. Jehova aaringithanirie wendo mũnene ũrĩa ũkoragwo gatagatĩ ka nyina na kaana gake akĩonania wendo ũrĩa akoragwo naguo kwerekera ndungata ciake. Atumia aingĩ no metĩkanie na ciugo cia mwarĩ wa Ithe witũ ũmwe wĩtagwo Jasmin. Ooigire ũũ: “Rĩrĩa ũrongithia kaana gaku, nĩ mũkũragia wendo mũnene gatagatĩ-inĩ kanyu, na wendo ũcio nĩ ũtũũraga mĩaka mĩingĩ.”
2. Jehova aiguaga atĩa rĩrĩa ona ndungata yake ĩmwe ĩkĩmweherera?
2 Jehova nĩ amenyaga rĩrĩa ndungata yake ĩmwe yatiga kũnyitanĩra na kĩũngano gĩa Gĩkristiano na wĩra-inĩ wa kũhunjia. Kwoguo no mũhaka akorũo nĩ aiguaga ũũru mũno ona ndungata ciake ngiri nyingĩ igĩtiga kũnyitanĩra na kĩũngano na gũtiga kũhunjia * o mwaka.
3. Nĩ ũndũ ũrĩkũ Jehova endaga?
3 Aarĩ na ariũ a Ithe witũ aingĩ arĩa matigĩte kũnyitanĩra na kĩũngano nĩ macokaga makambĩrĩria kũnyitanĩra na kĩũngano rĩngĩ, na nĩ tũmanyitaga ũgeni tũkenete. Jehova nĩ endaga mũno macoke na nginya o na ithuĩ. (1 Pet. 2:25) Hihi tũngĩmateithia atĩa macoke? Tũtanacokia kĩũria kĩu, nĩ wega twambe tũmenye kĩrĩa gĩtũmaga andũ amwe matige gũka mĩcemanio na kũnyitanĩra ũtungata-inĩ.
ANDŨ AMWE MATIGAGA GŨTUNGATĨRA JEHOVA NĨKĨ?
4. Wĩra ũtũmaga andũ amwe meke atĩa?
4 Andũ amwe makoragwo matahĩtwo mũno nĩ wĩra wao. Mũrũ wa Ithe witũ ũmwe wĩtagwo Hung * ũikaraga Asia ooigire ũũ: “Nĩ ndaahũthagĩra mathaa maingĩ na hinya mũingĩ wĩra-inĩ wakwa. Ndeeciragia na njĩra ĩtarĩ ya ũũgĩ atĩ ingĩgĩa na mbeca nyingĩ, no hote gũtungatĩra Jehova wega. Kwoguo ngĩambĩrĩria kũruta wĩra mathaa maingĩ. Ngĩambĩrĩria gũtĩraga kaingĩ mĩcemanio, na thutha-inĩ ngĩtiga biũ kũnyitanĩra na kĩũngano. Shaitani ahũthagĩra thĩ kũhĩngĩca andũ nĩguo meherere Jehova o kahora kahora.”
5. Mwarĩ wa Ithe witũ ũmwe eekire atĩa nĩ ũndũ wa mathĩna marĩa aacemanirie namo?
5 Aarĩ na ariũ a Ithe witũ amwe nĩ maritũhagĩrũo mũno nĩ mathĩna. Mwarĩ wa Ithe witũ Anne kuuma Ngeretha, ũrĩa ũkoragwo na ciana ithano ooigire ũũ: “Mwana ũmwe wakwa aaciarirũo arĩ na mathĩna manene ma mwĩrĩ. Thutha-inĩ, mũirĩtu wakwa ũmwe akĩeherio kĩũngano-inĩ, nake mwanake ũngĩ wakwa akĩgĩa na thĩna wa meciria. Nĩ ndaritũhĩirũo mũno nĩ maũndũ macio, nginya ngĩtiga gũthiaga mĩcemanio na kũhunjia. Thutha-inĩ ngĩtiga biũ kũnyitanĩra na kĩũngano.” No tũiyũrũo nĩ kĩeha tweciria ũhoro wa Anne na famĩlĩ yake na angĩ arĩa macemanagia na mathĩna ta macio.
6. Kwaga kũhũthĩra ũtaaro ũrĩa ũrĩ thĩinĩ wa Akolosai 3:13, kũngĩtũma atĩa andũ amwe mage kũnyitanĩra na andũ a Jehova?
6 Thoma Akolosai 3:13. Ndungata imwe cia Jehova cianatuurithio nĩ Mũkristiano ũngĩ. Mũtũmwo Paulo ooigire atĩ rĩmwe no tũkorũo na gĩtũmi gĩa gũteta nĩ ũndũ wa mũrũ kana mwarĩ wa Ithe witũ. O na no tũkorũo twĩkĩtwo ũndũ ũtarĩ wa kĩhooto. Na tũngĩaga kwĩmenyerera, no tũige muku ngoro-inĩ citũ. Marakara mũthia-inĩ no matũme mũndũ atige kũnyitanĩra na andũ a Jehova. Ta wĩcirie ngerekano ya mũrũ wa Ithe witũ wĩtagwo Pablo kuuma South America. Nĩ aatuĩrĩirũo ũrĩa gũtarĩ atĩ nĩ ekĩte ũũru, na ũndũ ũcio ũgĩtũma orũo nĩ mweke wa ũtungata kĩũngano-inĩ. Eekire atĩa? Pablo ooigire ũũ: “Nĩ ndaarakarire, na o kahora ngĩtiga kũnyitanĩra na kĩũngano.”
7. Mũndũ angĩka atĩa nĩ ũndũ wa gũthumbũrũo nĩ thamiri?
7 Ningĩ thamiri ĩrĩ na ũcuke no ĩthumbũre mũndũ wanaga gwathĩkĩra watho wa Jehova mahinda mahĩtũku, na ũndũ ũcio ũtũme aigue ta Ngai atangĩmwenda. O na angĩkorũo nĩ eeririre na akĩonio tha, no kũhoteke aigue ta atagĩrĩire gũkorũo arĩ ndungata ya Ngai. Harĩ hĩndĩ ĩmwe Mũrũ wa Ithe witũ wĩtagwo Francisco aaiguaga ũguo. Ooigire ũũ: “Nĩ ndaarũngirũo nĩ ũndũ wa kwĩingĩria ngomanio-inĩ itagĩrĩire. O na gũtuĩka kĩambĩrĩria-inĩ thutha wa kũrũngwo nĩ ndaathiaga mĩcemanio, ũndũ ũcio nĩ wanditũhĩire mũno na ngĩigua itagĩrĩire gũkorũo gatagatĩ-inĩ ka andũ a Jehova. Thamiri yakwa nĩ yathumbũraga, na ngaigua biũ Jehova ndanjoheire. Thutha wa ihinda, nĩ ndaatigire kũnyitanĩra na kĩũngano.” Wee wonaga atĩa aarĩ na ariũ a Ithe witũ arĩa macemanagia na maũndũ ta macio twarĩrĩria? Hihi nĩ ũmacayagĩra? Na ũndũ ũrĩa wa bata makĩria-rĩ, hihi Jehova amonaga atĩa?
JEHOVA NĨ ENDETE NG’ONDU CIAKE
Mũrĩithi Mũisiraeli nĩ aarũmbũyagia mũno ng’ondu ĩrĩa yorĩte (Rora kĩbungo gĩa 8-9) *
8. Hihi Jehova nĩ ariganagĩrũo nĩ andũ arĩa manamũtungatĩra? Taarĩria.
8 Jehova ndangĩriganĩrũo nĩ andũ manamũtungatĩra arĩa matigĩte kũnyitanĩra na andũ ake kwa ihinda, na ndangĩriganĩrũo nĩ ũtungata ũrĩa manamũrutĩra. (Ahib. 6:10) Mũnabii Isaia nĩ aandĩkire ngerekano njega mũno yonanagia ũrĩa Jehova arũmbũyagia andũ ake. Aandĩkire ũũ: “O ta mũrĩithi, nĩ akaarũmbũiya rũũru rwake. Natuo tũgondu atũcokanĩrĩrie na guoko gwake, na atũkuue gĩthũri-inĩ gĩake.” (Isa. 40:11) Mũrĩithi Ũrĩa Mũnene aiguaga atĩa rĩrĩa ng’ondu ĩmwe yake yehera rũũru-inĩ? Jesu nĩ oonanirie ũrĩa Jehova aiguaga rĩrĩa ooririe arutwo ake ũũ: “Hihi mũgwĩciria atĩa? Mũndũ angĩkorũo na ng’ondu 100, na ĩmwe yacio yũre-rĩ, githĩ ndangĩtiga icio 99 irĩma-inĩ na athiĩ agacarie ĩyo ĩmwe yũrĩte? Na angĩmĩona, ngũmwĩra na ma atĩrĩ, angĩkena nĩ ũndũ wayo gũkĩra icio 99 itekũũrĩte.”—Mat. 18:12, 13.
9. Arĩithi ega mahinda-inĩ ma Bibilia maarũmbũyagia atĩa ng’ondu ciao? (Rora mbica ngothi-inĩ.)
9 Nĩkĩ nĩ ũndũ mwagĩrĩru kũringithania Jehova na mũrĩithi? Tondũ mũrĩithi mwega mahinda-inĩ ma Bibilia, nĩ aarũmbũyagia ng’ondu ciake mũno. Kwa ngerekano, Daudi nĩ aarũire na mũrũthi na nduba nĩguo agitĩre rũũru rwake. (1 Sam. 17:34, 35) Mũrĩithi mwega nĩ angĩamenyire ng’ondu ĩmwe yake yũrĩte. (Joh. 10:3, 14) Mũrĩithi ta ũcio nĩ angĩatigire ng’ondu icio ingĩ 99 kiugũ-inĩ kana acitigĩre arĩithi angĩ nĩguo agacarie ĩyo yũrĩte. Jesu aahũthĩrire ngerekano ĩyo kũrutana ũndũ ũyũ wa bata: ‘Awa ũrĩa ũrĩ igũrũ ndangĩenda o na ũmwe wa aya matariĩ ta twana ore.’—Mat. 18:14.
Mũrĩithi thĩinĩ wa Isiraeli ya tene akĩrũmbũiya kagondu gake gekũũrĩte (Rora kĩbungo gĩa 9)
JEHOVA NĨ ACARAGIA NG’ONDU CIAKE
10. Kũringana na Ezekieli 34:11-16, nĩ ũndũ ũrĩkũ Jehova eeranĩire angĩgeka nĩ ũndũ wa ng’ondu ciake iria ciũrĩte?
10 Jehova nĩ endete o ũmwe witũ o hamwe na arĩa “matariĩ ta twana” meherete rũũru-inĩ. Ngai nĩ eeranĩire kũgerera mũnabii Ezekieli atĩ nĩ angĩgaacaria ng’ondu ciake iria ciũrĩte na aciteithie gũcokereria hinya kĩĩroho. Ningĩ nĩ aagwetire ĩmwe kwa ĩmwe maũndũ marĩa angĩekire nĩguo acihonokie, maũndũ marĩa mũrĩithi Mũisiraeli angĩekire ng’ondu yake ĩngĩorire. (Thoma Ezekieli 34:11-16.) Wa mbere, mũrĩithi nĩ angĩacaririe ng’ondu, ũndũ ũrĩa wabataraga mahinda maingĩ na kĩyo kĩingĩ. Na angĩonire ng’ondu ĩyo yorĩte, nĩ aamĩcokagia rũũru-inĩ. Makĩria ma ũguo, ng’ondu ĩyo ĩngĩakorirũo ĩgurarĩte kana ĩrĩ hũtu, mũrĩithi nĩ aamĩteithagia na njĩra ya wendo, akamĩoha ironda, akamĩkuua, na akamĩhe irio. Athuri a kĩũngano arĩa nĩo arĩithi a “rũũru rwa Ngai” nĩ marabatara gwĩka maũndũ o ta macio nĩguo mateithie arĩa matigĩte kũnyitanĩra na kĩũngano. (1 Pet. 5:2, 3) Athuri a kĩũngano nĩ macaragia andũ ta acio makamateithia gũcoka rũũru-inĩ, na makamonia wendo na njĩra ya kũmahe ũteithio ũrĩa marabatara wa kĩĩroho. *
11. Nĩ ũndũ ũrĩkũ mũrĩithi mwega aamenyaga?
11 Mũrĩithi mwega nĩ aamenyaga atĩ ng’ondu no yũre. Na ng’ondu ĩngĩeherire rũũru-inĩ, mũrĩithi ndangĩamĩherithirie. Rekei tuone kĩonereria kĩrĩa Ngai aaigire rĩrĩa aateithirie ndungata imwe ciake iria ciamwehereire kwa ihinda.
12. Jehova aarũmbũyanirie atĩa na Jona?
12 Mũnabii Jona nĩ oorire akĩaga kũhingia wĩra ũrĩa Jehova aamũheete. O na kũrĩ ũguo, Jehova ndaahiũhire gũtua atĩ ndakamũhũthĩra rĩngĩ. O ta mũrĩithi mwega, Jehova nĩ aamũhonokirie na akĩmũhe hinya ũrĩa aabataraga nĩguo ahingie wĩra ũrĩa aamũheete. (Jona 2:7; 3:1, 2) Thutha-inĩ Ngai nĩ aahũthĩrire mũũngũ gũteithia Jona kuona atĩ muoyo wa mũndũ nĩ wa bata mũno. (Jona 4:10, 11) Tũreruta atĩa? Athuri a kĩũngano matiagĩrĩirũo gũtiganĩria o na ihenya andũ arĩa matigĩte kũnyitanĩra na kĩũngano. Handũ ha ũguo, nĩ mageragia gũtaũkĩrũo kĩrĩa gĩtũmĩte ng’ondu yehere rũũru-inĩ. Na rĩrĩa ng’ondu ĩyo yacokerera Jehova, athuri nĩ mathiaga na mbere kũmĩonia wendo.
13. Tũreruta atĩa kuumana na ũrĩa Jehova aarũmbũyanirie na mwandĩki wa Thaburi ya 73?
13 Mwandĩki wa Thaburi ya 73 nĩ aakuire ngoro mũno rĩrĩa oonire ũrĩa andũ aganu moonekaga makĩgaacĩra. Nĩ eeyũragia kana gũthiĩ na mbere gwĩka wendi wa Ngai kwarĩ na ũguni. (Thab. 73:12, 13, 16) Hihi Jehova eekire atĩa? Ndoonire mwandĩki ũcio ta mũndũ ũtagĩrĩire. O na nĩ aarekire ciugo ciake ciandĩkwo thĩinĩ wa Bibilia. Thutha-inĩ mwandĩki ũcio wa Thaburi nĩ aataũkĩirũo atĩ ũrata mwega hamwe na Jehova nĩ kĩndũ gĩa bata gũkĩra ũndũ ũngĩ o wothe ũtũũro-inĩ. (Thab. 73:23, 24, 26, 28) Tũreruta atĩa? Athuri a kĩũngano matiagĩrĩirũo kũhiũha gũtuĩra andũ arĩa marekĩrĩra nganja kana gũtungatĩra Jehova nĩ kũrĩ ũguni. Handũ ha kũmatuĩra matiagĩrĩire, athuri nĩ mageragia gũtaũkĩrũo nĩ kĩĩ kĩratũma andũ acio marie kana meke maũndũ na njĩra ĩyo. Athuri mangĩka ũguo norĩo tu mangĩhota kũmenya nĩ Maandĩko marĩkũ mangĩhũthĩra kũũmĩrĩria andũ acio.
14. Nĩkĩ Elija nĩ aabataraga ũteithio, na Jehova aamũteithirie atĩa?
14 Mũnabii Elija nĩ oorĩire Jezebeli. (1 Ath. 19:1-3) Eeciragia gũtirĩ mũndũ ũngĩ watungataga arĩ mũnabii wa Jehova, na oonaga ta wĩra ũrĩa aarutĩte warĩ wa tũhũ. Elija nĩ aakuire ngoro mũno nginya akĩĩrirĩria gũkua. (1 Ath. 19:4, 10) Handũ ha Jehova kuona Elija ta atagĩrĩire, nĩ aamũmĩrĩirie na akĩmwĩra ndarĩ wiki na atĩ nĩ angĩehokire hinya wa Ngai na akĩmwĩra kwarĩ o na wĩra mũingĩ angĩarutire. Jehova nĩ aamũthikĩrĩirie arĩ na wendo na akĩmũhe wĩra ũngĩ. (1 Ath. 19:11-16, 18) Tũreruta atĩa? Ithuothe na makĩria athuri a kĩũngano, twagĩrĩirũo kũrũmbũyania na ng’ondu cia Jehova na njĩra ya wendo. O na mũndũ angĩkorũo nĩ aronania marakara, kana akona ta atagĩrĩire kuonio tha cia Jehova, athuri nĩ mamũthikagĩrĩria akĩĩyaria kuuma ngoro. Thutha ũcio nĩ mageragia kũũmĩrĩria mũndũ ũcio makamuonia atĩ Jehova nĩ amwendete.
MAWONI MARĨA MAGĨRĨIRE KWEREKERA NG’ONDU CIA NGAI IRIA CIŨRĨTE
15. Kũringana na Johana 6:39, Jesu oonaga atĩa ng’ondu cia Ithe?
15 Jehova endaga tũkorũo na mawoni marĩkũ kwerekera ng’ondu ciake iria ciũrĩte? Jesu nĩ aatũigĩire kĩonereria gĩa kũrũmĩrĩra. Nĩ aamenyaga atĩ ng’ondu ciothe cia Jehova ciarĩ cia bata maitho-inĩ make, na kwoguo nĩ eekire ũrĩa wothe angĩahotire nĩguo ateithie “ng’ondu iria ciũrĩte cia nyũmba ya Isiraeli” icokerere Jehova. (Mat. 15:24; Luk. 19:9, 10) Ningĩ Jesu arĩ mũrĩithi ũrĩa mwega, nĩ eekire ũrĩa wothe angĩahotire nĩguo hatikagĩe ng’ondu ya Jehova ĩkũra.—Thoma Johana 6:39.
16-17. Athuri a kĩũngano magĩrĩirũo gũkorũo na mawoni marĩkũ megiĩ gũteithia arĩa mehereire Jehova? (Rora gathandũkũ “ Ũrĩa Ng’ondu Yũrĩte Ĩngĩkorũo Ĩkĩigua.”)
16 Mũtũmwo Paulo nĩ eekĩrire ngoro athuri a kĩũngano kĩa Efeso megerekanie na kĩonereria kĩa Jesu. Aameerire ũũ: “Mũteithagie arĩa matarĩ na hinya na no mũhaka mũririkanage ciugo cia Mwathani Jesu, hĩndĩ ĩrĩa we mwene ooigire ũũ: ‘Kũheana nĩ kũrĩ gĩkeno kĩnene gũkĩra kwamũkĩra.’” (Atũm. 20:17, 35) Rĩandĩko rĩu rĩronania atĩ athuri a kĩũngano marĩ na wĩra wa bata wa kũrũmbũiya andũ a Jehova. Mũthuri ũmwe wa kĩũngano wĩtagwo Salvador kuuma Spain ooigire ũũ: “Rĩrĩa ndeciria ũrĩa Jehova arũmbũyagia na njĩra nene ng’ondu ciake iria ciũrĩte, ũndũ ũcio nĩ ũnjĩkĩraga ngoro gwĩka ũrĩa wothe ingĩhota nĩguo ndeithie arĩa meherete rũũru-inĩ. Tondũ nĩ ndĩĩhokeirũo kũrĩithia rũũru rwa Ngai, ndĩna ma atĩ Jehova nĩ endaga ndĩmarũmbũiye.”
17 Andũ arĩa othe magwetetwo gĩcunjĩ-inĩ gĩkĩ arĩa maatigĩte kũnyitanĩra na kĩũngano, nĩ maateithirio na magĩcokerera Jehova. O na ihinda-inĩ rĩrĩ, andũ aingĩ arĩa mehereire Jehova no mende kũmũcokerera. Gĩcunjĩ kĩrĩa kĩrũmĩrĩire nĩ kĩarĩrĩirie na njĩra ndikĩru ũrĩa tũngĩka nĩguo tũmateithie gũcokerera Jehova.
RWĨMBO NA. 139 Hũũra Mbica Ũrĩ Thĩ Njerũ
^ kĩb. 5 Nĩ kĩĩ gĩtũmaga andũ amwe manatungatĩra Jehova marĩ na wĩhokeku kwa ihinda rĩa mĩaka mĩingĩ matige kũnyitanĩra na kĩũngano gĩake? Hihi Ngai amonaga atĩa? Gĩcunjĩ gĩkĩ nĩ gĩgũcokia ciũria icio. Ningĩ nĩ gĩkwarĩrĩria maũndũ marĩa tũngĩĩruta kuumana na ũrĩa Jehova aateithirie andũ amwe mahinda-inĩ ma Bibilia arĩa maamwehereire kwa ihinda.
^ kĩb. 2 GŨTAARĨRIA CIUGO: Mũndũ ũtigĩte kũhunjia nĩ ũrĩa ũtanyitanĩire na kĩũngano wĩra-inĩ wa kũhunjia na gũtua andũ arutwo kwa ihinda rĩa mĩeri ĩtandatũ kana makĩria. O na kũrĩ ũguo, andũ acio matitigĩte gũtuĩka aarĩ na ariũ a Ithe witũ, na no tũmendete.
^ kĩb. 4 Marĩĩtwa mamwe nĩ macenjetio.
^ kĩb. 10 Gĩcunjĩ kĩrĩa kĩrũmĩrĩire nĩ gĩkaarĩrĩria njĩra cia ĩmwe kwa ĩmwe iria athuri mangĩhũthĩra kũhingia maũndũ macio.
^ kĩb. 60 GŨTAARĨRIA MBICA: Ng’ondu ĩngĩorire, mũrĩithi Mũisiraeli nĩ angĩamĩcaririe na amĩteithie gũcoka rũũru-inĩ. Arĩithi a rũũru rwa Ngai nĩ mekaga ũguo mahinda-inĩ maya.
^ kĩb. 64 GŨTAARĨRIA MBICA: Mwarĩ wa Ithe witũ ũtigĩte kũnyitanĩra na kĩũngano arĩ mbathi-inĩ etereire ĩkũũre, akĩĩrorera Aira a Jehova erĩ makĩhunjia kũndũ kwa mũingĩ makenete.
