Jehova nĩ Akenagio nĩ “Ameni” Yaku
JEHOVA nĩ onaga ũthathaiya witũ harĩ we ũrĩ wa bata. Nĩ ‘ategaga gũtũ na agathikĩrĩria’ ndungata ciake, na ũndũ ũrĩa wothe twĩkaga wa kũmũgooca o na ũngĩkorũo ũrĩ mũnini atĩa nĩ onaga ũrĩ wa bata. (Mal. 3:16) Kwa ngerekano-rĩ, ta wĩcirie ũhoro wa kiugo kĩmwe tũgwetaga maita maingĩ. Kiugo kĩu nĩ “ameni.” Hihi Jehova nĩ onaga nginya kiugo ta kĩu kĩrĩ kĩa bata? Ĩĩ nĩ onaga kĩrĩ kĩa bata! Nĩguo tuone kĩrĩa gĩtũmaga kiugo kĩu gĩkorũo kĩrĩ kĩa bata, rekei tũthuthurie ũrĩa kiugĩte na ũrĩa kĩhũthĩrĩtwo thĩinĩ wa Bibilia.
‘NAO ANDŨ OTHE MOIGE, “AMENI!”’
Kiugo “ameni” kiugĩte “nĩ gũtuĩke guo,” kana “na ma.” Kiumanĩte na kiugo gĩa Kĩhibirania kĩrĩa kiugĩte “gũkorũo ũrĩ mwĩhokeku.” Kiugo kĩu rĩmwe nĩ kĩahũthagĩrũo maciira-inĩ. Thutha wa mũndũ kwĩhĩta mwĩhĩtwa, nĩ aagĩrĩirũo kuuga “ameni” kuonania atĩ ũndũ ũcio ehĩta nĩ wa ma na atĩ nĩ egwĩtĩkĩra moimĩrĩro ma ũndũ ũcio oiga. (Ndar. 5:22) Kuuga “ameni” mbere ya andũ nĩ gwatũmaga mũndũ atue itua o na makĩria rĩa kũhingia mwĩhĩtwa wake.—Neh. 5:13.
Hĩndĩ ĩmwe rĩrĩa kiugo “ameni” kĩahũthĩrirũo na njĩra nene nĩ ũhoro-inĩ ũrĩa ũrĩ thĩinĩ wa Gũcokerithia Maathani 27. Thutha wa Aisiraeli kũingĩra Bũrũri wa Kĩĩranĩro, nĩ maabatiĩ kũgomana gatagatĩ ga Kĩrĩma kĩa Ebali na Kĩrĩma kĩa Gerizimu nĩguo mathikĩrĩrie Watho ũgĩthomwo. Matiarĩ hau nĩgetha mathikĩrĩrie tu, no nĩgetha nginya moige atĩ nĩ metĩkĩra Watho ũcio. Meekaga ũguo na njĩra ya kuuga “Ameni!” rĩrĩa mathomerũo moimĩrĩro ma kwaga gwathĩka. (Gũcok. 27:15-26) Ta hũũra mbica mũgambo ũrĩa waiguĩkaga wa andũ ngiri nyingĩ rĩrĩa athuri, atumia, na ciana maanagĩrĩra makoiga “ameni.” (Josh. 8:30-35) Hatarĩ nganja matiigana kũriganĩrũo nĩ ciugo iria mooigire mũthenya ũcio. Aisiraeli acio nĩ maahingirie mwĩhĩtwa wao tondũ Bibilia yugaga: “Andũ a Isiraeli magĩthiĩ na mbere gũtungatĩra Jehova matukũ mothe ma Joshua na matukũ mothe ma athuri arĩa maatigirũo muoyo thutha wa Joshua gũkua, arĩa mooĩ mawĩko mothe marĩa Jehova eekĩire andũ a Isiraeli.”—Josh. 24:31.
Jesu o nake nĩ aahũthagĩra kiugo “ameni” kuonania atĩ ũndũ ũrĩa aroiga nĩ wa ma, ĩndĩ eekaga ũguo na njĩra ya mwanya. Handũ ha kũhũthĩra kiugo kĩu agĩtĩkania na ũndũ uugĩtwo nĩ mũndũ ũngĩ, aahũthagĩra “ameni” (kiugo kĩrĩa gĩtaũrĩtwo “o ma”) mbere ya kuuga ũndũ nĩguo atĩtĩrithie atĩ ũndũ ũcio nĩ wa ma. Kũrĩ hĩndĩ aacokagĩra kiugo kĩu akoiga “ameni ameni.” (Mat. 5:18; Joh. 1:51) Kwoguo agatũma athikĩrĩria ake makorũo na ma atĩ ciugo ciake nĩ cia ma biũ. Jesu nĩ aahotaga kwaria arĩ na ũũma biũ tondũ nĩwe Ngai aamũrĩte gũtigĩrĩra atĩ ciĩranĩro ciake ciothe nĩ ciahinga.—2 Kor. 1:20; Kũg. 3:14.
“ANDŨ . . . MAKIUGA, ‘AMENI!’ NA MAKĨGOOCA JEHOVA”
O na Aisiraeli nĩ maahũthagĩra kiugo “ameni” makĩgooca na makĩhoya Jehova. (Neh. 8:6; Thab. 41:13) Arĩa marathikĩrĩria moiga kiugo kĩu thutha wa mahoya, moonanagia atĩ nĩ metĩkania na maũndũ marĩa moigwo. Na njĩra ĩyo andũ othe nĩ maanyitanagĩra mahoya-inĩ, na gwĩka ũguo gũgatũma makenere gũthathaiya Jehova hamwe. Ũguo nĩguo gwathire rĩrĩa Mũthamaki Daudi aatwarire Ithandũkũ rĩa Kĩrĩkanĩro kĩa Jehova Jerusalemu. Gĩkũngũĩro-inĩ kĩrĩa meekire thutha wa ũndũ ũcio, Daudi nĩ aahoire ihoya rĩa kuuma ngoro na njĩra ya kũina rwĩmbo rũrĩa rwandĩkĩtwo thĩinĩ wa 1 Maũndũ ma Matukũ ma Tene 16:8-36. Andũ arĩa maathikagĩrĩria nĩ maahutirio ngoro mũno nĩ ciugo ciake nginya “andũ othe makiuga, ‘Ameni!’ na makĩgooca Jehova.” Hatarĩ nganja, nĩ maakeneire gũthathaiya Jehova marĩ hamwe mũthenya ũcio.
Akristiano a karine ya mbere o nao nĩ maahũthagĩra kiugo “ameni” makĩgooca Jehova. Aandĩki a Bibilia kaingĩ nĩ maahũthagĩra kiugo kĩu marũa-inĩ mao. (Rom. 1:25; 16:27; 1 Pet. 4:11) O na ibuku rĩa Kũguũrĩrio nĩ rĩonanagia ciũmbe cia kĩĩroho kũrĩa igũrũ ikĩgooca Jehova na ciugo ici: “Ameni! Goocai Ja!” (Kũg. 19:1, 4) Akristiano a tene marĩ mĩcemanio-inĩ nĩ maarĩ hũthĩra ya kuuga “ameni” thutha wa mahoya. (1 Kor. 14:16) O na kũrĩ ũguo, matioigaga kiugo kĩu nogetha tu moige.
KUUGA “AMENI” NĨ KWA BATA
Thutha wa gũthuthuria ũrĩa kiugo “ameni” kĩahũthagĩrũo, no tũhote gũtaũkĩrũo nĩkĩ kũrĩkia mahoya na kiugo kĩu nĩ kwa bata. Rĩrĩa twoiga kiugo kĩu tũkĩrĩkĩrĩria mahoya maitũ, tuonanagia atĩ nĩ tũretĩkania na ũrĩa twoiga. Na rĩrĩa twoiga “ameni” o na angĩkorũo nĩ na ngoro harĩ mahoya ma mũndũ ũngĩ, tuonanagia atĩ nĩ twetĩkania na maũndũ marĩa oiga. Reke tuone maũndũ mangĩ matũmaga kuuga “ameni” gũkorũo kũrĩ kwa bata.
Nĩ gũtũmaga tũthikĩrĩrie mahoya tondũ nĩ gĩcunjĩ kĩa ũthathaiya witũ. Nĩ tũthathayagia Jehova hĩndĩ ya mahoya kũgerera maũndũ marĩa tugaga na marĩa twĩkaga. Wendi witũ wa kuuga “ameni” kuuma ngoro no ũtũteithie gũkorũo na mwerekera ũrĩa wagĩrĩire rĩrĩa mahoya marathiĩ na mbere na gũthikĩrĩria na kinyi.
Nĩ gũtũmaga tũkorũo na ũrũmwe. Hĩndĩ ya mahoya, kĩũngano gĩothe gĩkoragwo gĩgĩthikĩrĩria ũndũ ũmwe. (Atũm. 1:14; 12:5) Rĩrĩa twoiganĩra “ameni” hamwe na aarĩ na ariũ a Ithe witũ arĩa angĩ, ũrũmwe witũ nĩ ũrũmaga o na makĩria. Kuuga “ameni” twĩ hamwe twanĩrĩire kana na ngoro, no gũtũme Jehova atũhingĩrie ũndũ ũrĩa twamũhoya.
“Ameni” itũ nĩ ĩgoocithagia Jehova
Nĩ tũgoocaga Jehova. Jehova nĩ onaga nginya tũmaũndũ tũnini tũrĩa twĩkaga twĩgiĩ ũthathaiya witũ. (Luk. 21:2, 3) Nĩ amenyaga muoroto witũ nĩ ũrĩkũ na ũndũ ũrĩa ũrĩ ngoro-inĩ citũ. O na angĩkorũo tũrathikĩrĩria mĩcemanio na njĩra ya kũnyitithanio na thimũ, tũbatiĩ gũkorũo na ma atĩ rĩrĩa twoiga “ameni” Jehova nĩ onaga. Rĩrĩa twoiga “ameni” tũkoragwo tũkĩnyitanĩra na arĩa marĩ mĩcemanio-inĩ kũgooca Jehova.
Kiugo “ameni” no kĩoneke ta gĩtarĩ kĩa bata mũno, no tiguo kũrĩ. Ibuku rĩmwe rĩa gũtaarĩria Bibilia riugĩte atĩ ndungata cia Ngai no ihote kuonania “ũũma ũrĩa irĩ naguo, na atĩ nĩ iretĩkania biũ na ũndũ ũrĩa woigwo, na kĩĩrĩgĩrĩro kĩrĩa kĩrĩ ngoro-inĩ ciacio kũgerera kiugo kĩu kĩmwe.” Reke “ameni” itũ ĩgoocithagie Jehova hingo ciothe.—Thab. 19:14.
