GĨCUNJĨ KĨA WĨRUTI GĨA 10
Ngatho na Wendo Harĩ Jehova no Igũtindĩke Kũbatithio
“Nĩ kĩĩ kĩngĩgiria batithio?”—ATŨM. 8:36.
RWĨMBO NA. 37 Gũtungatĩra Jehova na Ngoro Yothe
GĨCUNJĨ-INĨ GĨKĨ *
1-2. Kũringana na Atũmwo 8:27-31, 35-38, nĩ kĩĩ gĩatindĩkire Mũethiopia kũbatithio?
HIHI nĩ wendaga kũbatithio ũtuĩke mũrutwo wa Kristo? Andũ aingĩ nĩ matuĩte itua rĩu, nĩ ũndũ wa gũtindĩkwo nĩ wendo na kwenda gũcokia ngatho. Kwa ngerekano, ta wĩcirie ũhoro wĩgiĩ mũndũ ũmwe warĩ na wathani rungu rwa mũtumia ũrĩa warĩ mũthamaki wa Ethiopia.
2 Mũndũ ũcio ũrĩa warĩ Mũethiopia aabatithirio o na ihenya, rĩrĩa eerutire ũrĩa aabataire gwĩka kuuma kũrĩ Maandĩko. (Thoma Atũmwo 8:27-31, 35-38.) Nĩ kĩĩ kĩamũtindĩkire gwĩka ũguo? Hatarĩ nganja nĩ aatĩĩte Kiugo kĩa Ngai, tondũ aathomaga gĩcunjĩ kĩa ibuku rĩa Isaia akuuĩtwo nĩ ngaari ya mbarathi. Rĩrĩa Filipu aamwarĩirie, mũndũ ũcio nĩ aakenire rĩrĩa aataũkĩirũo ũrĩa Jesu eekĩte nĩ ũndũ wake. No nĩ kĩĩ gĩatũmĩte mũndũ ũcio athiĩ Jerusalemu? Tondũ nĩ aakũrĩtie wendo harĩ Jehova. Tũmenyaga ũguo atĩa? Aakoretwo oima gũthathaiya Jehova Jerusalemu. No kũhoteke mũndũ ũcio nĩ ooimĩte ndini-inĩ ĩrĩa aaciarĩirũo, na akambĩrĩria kũnyitanĩra na rũrĩrĩ rũrĩa tu rwamũrĩirũo Ngai ũrĩa wa ma. Kwenda Jehova ningĩ nokuo gwatũmire oe ikinya rĩngĩ rĩa bata, ikinya rĩa kũbatithio nĩguo atuĩke mũrutwo wa Kristo.—Mat. 28:19.
3. Nĩ kĩĩ kĩngĩgirĩrĩria andũ amwe kũbatithio? (Rora gathandũkũ “ Hihi Ngoro Yaku Ĩtariĩ Atĩa?”)
3 Wendo waku harĩ Jehova no ũgũtindĩke kũbatithio. No ningĩ wendo no ũkũgirĩrĩrie gwĩka ũguo. Na njĩra ĩrĩkũ? Ta wĩcirie maũndũ maya. No gũkorũo nĩ wendete andũ anyu a famĩlĩ na arata aku ũũ atĩ nĩ wonaga ũngĩbatithio no makũmene. (Mat. 10:37) Ningĩ no gũkorũo nĩ wendete mĩtugo ĩmwe Ngai athũire, na nĩ wonaga arĩ ũndũ mũritũ gũtigana nayo. (Thab. 97:10) O na hihi no gũkorũo ũtũire ũkũngũyagĩra ikũngũĩro imwe ihutanĩtie na ndini cia maheeni. No gũkorũo nĩ wendete maũndũ mega marĩa mekĩkaga hĩndĩ ya ikũngũĩro icio. Ũndũ ũcio no ũtũme wone arĩ ũndũ mũritũ gũtiga gũkũngũĩra ikũngũĩro icio itakenagia Jehova. (1 Kor. 10:20, 21) Kwoguo no ũbatare kwĩyũria ũũ: “Nũũ kana nĩ kĩĩ njagĩrĩirũo kwenda makĩria?”
NŨŨ TWAGĨRĨIRŨO KWENDA MAKĨRIA?
4. Ũndũ mũnene ũrĩa ũbatiĩ gũtindĩka mũndũ ende kũbatithio nĩ ũrĩkũ?
4 No kũhoteke nĩ ũkoragwo na indo nyingĩ cia bata ũkoragwo wendete na ũgacitĩa. Kwa ngerekano, no kũhoteke o na ũtaneruta Bibilia na Aira a Jehova, nĩ waheete Bibilia gĩtĩo kĩnene. Ningĩ no kũhoteke nĩ weendete Jesu. Rĩu tondũ nĩ ũmenyete Aira a Jehova, no kũhoteke nĩ wendaga kũnyitanĩra nao. No gũkorũo na wendo harĩ maũndũ ta macio tokuo tu kũngĩgũteithia wende kwĩyamũrĩra Jehova na kũbatithio. Ũndũ ũrĩa mũnene ũbatiĩ gũtũma wende kũbatithio nĩ wendo waku harĩ Jehova we mwene. Ũngĩenda Jehova gũkĩra ũndũ ũngĩ o wothe, ndũngĩreka kĩndũ kana mũndũ o wothe akũgirĩrĩrie kũmũtungatĩra. Kwenda Jehova nĩ gũgũgũtindĩka ũbatithio na nĩ gũgũgũteithia gũikara ũrĩ mwĩhokeku o na thutha wa kũbatithio.
5. Tũkwarĩrĩria ciũria irĩkũ?
5 Jesu ooigire atĩ twagĩrĩirũo kwenda Jehova na ngoro, muoyo, meciria, na hinya witũ wothe. (Mar. 12:30) Ũngĩhota atĩa kwenda na gũtĩa Jehova na njĩra ta ĩyo? Gwĩciria ũrĩa Jehova atwendete, no gũtũme o na ithuĩ tũmwende. (1 Joh. 4:19) Wakũria wendo harĩ Jehova-rĩ, nĩ maũndũ marĩkũ megũcoka marũmĩrĩre? *
6. Kũringana na Aroma 1:20, njĩra ĩmwe ĩngĩgũteithia kwĩruta ũhoro wĩgiĩ Jehova nĩ ĩrĩkũ?
6 Wĩrute ũhoro wĩgiĩ Jehova kũgerera ũũmbi wake. (Thoma Aroma 1:20; Kũg. 4:11) Wĩcũranagie ũrĩa ũũgĩ wa Jehova wonekaga kũgerera mĩmera, na nyamũ iria ombĩte. Wĩciragie ũrĩa mwĩrĩ waku ũmbĩtwo na njĩra ya magegania. (Thab. 139:14) Wĩcirie ũhoro wĩgiĩ hinya ũrĩa Jehova ekĩrĩte riũa-inĩ, ũkĩririkanaga atĩ riũa no njata ĩmwe tu harĩ njata bilioni nyingĩ. * (Isa. 40:26) Gwĩka ũguo nĩ gũgũgũteithia gũtĩa Jehova o na makĩria. O na kũrĩ ũguo, kũmenya ũhoro wĩgiĩ ũũgĩ na hinya wa Jehova no kĩambĩrĩria tu kĩa ũrata waku hamwe nake. Nĩguo ũgĩe na ũrata wa hakuhĩ hamwe na Jehova, nĩ wagĩrĩirũo kũmenya maũndũ mangĩ makĩria mamwĩgiĩ.
7. Ũrabatara gũkorũo na ma na ũndũ ũrĩkũ nĩguo ũhote kwenda Jehova biũ?
7 Nĩ wagĩrĩirũo gũkorũo na ma atĩ Jehova nĩ akwendete. Hihi nĩ wonaga arĩ ũndũ mũritũ gwĩtĩkia atĩ Mũũmbi wa igũrũ na thĩ nĩ akũũĩ na atĩ nĩ akũrũmbũyagia? Angĩkorũo nĩ wonaga ũguo, ririkanaga atĩ Jehova “ndarĩ haraya na o ũmwe witũ.” (Atũm. 17:26-28) Nĩ “athuthuragia ngoro ciothe,” na akwĩraga ũũ o ta ũrĩa Daudi eerire Suleimani, “angĩkorũo nĩ ũkũmũcaria, nĩ ekũreka ũmuone.” (1 Maũ. 28:9) O na ũndũ ũrĩa ũratũma ũkorũo ũkĩĩruta Bibilia, nĩ tondũ Jehova nĩ ‘akũgucĩrĩirie harĩ we.’ (Jer. 31:3) O ũrĩa ũrataũkĩrũo nĩ maũndũ maingĩ marĩa Jehova agwĩkĩire, noguo wendo waku harĩ we ũgũkũra.
8. Ũngĩonania nĩ wendete Jehova na njĩra ĩrĩkũ?
8 Njĩra ĩmwe ũngĩonia Jehova nayo atĩ nĩ ũmwendete, nĩ kũgerera kwaria nake mahoya-inĩ. Wendo waku harĩ Ngai nĩ ũrĩongererekaga o ũrĩa ũramwĩra maũndũ marĩa maratũma ũtangĩke, na ũkamũcokeria ngatho nĩ ũndũ wa maũndũ mothe marĩa agwĩkĩire. Ningĩ, ũrata waku na Jehova nĩ ũrĩgĩaga hinya wona ũrĩa aracokia mahoya maku. (Thab. 116:1) Nĩ ũrĩkoragwo na ma atĩ nĩ ataũkagĩrũo nĩwe. No nĩguo ũkuhĩrĩrie Jehova, nĩ ũrabatara gũtaũkĩrũo nĩ njĩra yake ya gwĩciria. Ningĩ nĩ ũrabatara kũmenya nĩ maũndũ marĩkũ arerĩgĩrĩra kuuma harĩ wee. Njĩra ĩrĩa tu ĩngĩgũteithia kũmenya ũndũ ũcio, nĩ kwĩruta Kiugo gĩake Bibilia.
Njĩra ĩrĩa njega biũ ĩngĩtũteithia gũkuhĩrĩria Ngai na kũmenya maũndũ marĩa arerĩgĩrĩra kuuma kũrĩ ithuĩ nĩ kwĩruta Bibilia (Rora kĩbungo gĩa 9) *
9. Ũngĩonania na njĩra irĩkũ atĩ nĩ ũtĩĩte Bibilia?
9 Wĩrute gũtĩa Kiugo kĩa Ngai Bibilia. Bibilia noyo tu ĩkoragwo na ũhoro wa ma wĩgiĩ Jehova, na muoroto wake harĩ wee. No wonanie atĩ nĩ ũtĩĩte Bibilia na njĩra ya kũmĩthoma o mũthenya, kũhaarĩria wega mbere ya mũthomete na mwarimũ waku, na kũhũthĩra maũndũ marĩa weruta. (Thab. 119:97, 99; Joh. 17:17) Hihi nĩ ũkoragwo na mũtaratara wa gũthoma Bibilia? Hihi nĩ ũrũmagĩrĩra mũtaratara ũcio wa gũthoma Bibilia o mũthenya?
10. Ũndũ ũmwe wa mwanya wĩgiĩ Bibilia nĩ ũrĩkũ?
10 Ũndũ ũmwe wa mwanya wĩgiĩ Bibilia, nĩ atĩ nĩ ĩkoragwo na ũhoro ũtaarĩirio nĩ andũ meeyoneire maũndũ marĩa Jesu eekaga. Bibilia norĩo ibuku rĩkoragwo na ũhoro wa kwĩhokeka ũrĩa ũtaarĩirie ũrĩa Jesu ekĩte nĩ ũndũ waku. O ũrĩa ũkwĩruta ũhoro wĩgiĩ maũndũ marĩa Jesu ooigire na agĩka, noguo ũkũigua ũkĩenda kũgĩa na ũrata wa hakuhĩ hamwe nake.
11. Nĩ kĩĩ kĩngĩgũteithia kwenda Jehova?
11 Wĩrute kwenda Jesu, na wendo waku harĩ Jehova nĩ ũgũkũra. Nĩkĩ? Tondũ Jesu eegerekanagia na Ithe biũ. (Joh. 14:9) Kwoguo, o ũrĩa ũkwĩruta makĩria igũrũ rĩgiĩ Jesu, noguo ũgũtaũkĩrũo wega makĩria nĩ Jehova na ũmwende. Kwa ngerekano, ta wĩcirie ũrĩa Jesu aacayagĩra andũ arĩa moonagwo matarĩ kĩene nĩ ũndũ wa gũkorũo marĩ athĩni, marĩ arwaru, na matarĩ na hinya. Ningĩ ta wĩcirie ũrĩa akoragwo aheanĩte ũtaaro ũngĩgũteithia ũtũũro-inĩ waku wa o mũthenya, na ũrĩa ũtũũro waku wagĩraga rĩrĩa warũmĩrĩra motaaro macio.—Mat. 5:1-11; 7:24-27.
12. Kwĩruta ũhoro wĩgiĩ Jesu kũngĩgũteithia gwĩka atĩa?
12 Wendo waku harĩ Jesu no wongerereke makĩria, ũngĩciria na njĩra ndikĩru igũrũ rĩgiĩ igongona rĩrĩa aarutire nĩgetha tuoherũo mehia maitũ. (Mat. 20:28) Gũtaũkĩrũo atĩ Jesu nĩ eehaarĩirie gũkua nĩ ũndũ waku, no gũgũteithie kwĩrira na kũhoya Jehova akuohere. (Atũm. 3:19, 20; 1 Joh. 1:9) Ningĩ o ũrĩa ũkwenda Jesu na Jehova, noguo ũkũigua ũkĩenda gũkorũo hamwe na andũ angĩ arĩa mamendete.
13. Nĩ kĩĩ Jehova akũheete?
13 Wĩrute kwenda famĩlĩ ya Jehova. Arata aku na andũ anyu a famĩlĩ arĩa matarĩ Aira a Jehova no mage gũtaũkĩrũo nĩ kĩĩ kĩratũma wende kwĩyamũrĩra Jehova. O na no magũkararie. Jehova nĩ arĩgũteithagia, tondũ aarĩ na ariũ a Ithe witũ megũtuĩka ta andũ a famĩlĩ harĩ wee. Ũngĩikara hakuhĩ na aarĩ na ariũ a Ithe witũ, nĩ marĩkuonagia wendo na magagwĩkĩra ngoro. (Mar. 10:29, 30; Ahib. 10:24, 25) Thutha wa ihinda, andũ a famĩlĩ yanyu no metĩkĩre gũtungatĩra Jehova na gũtũũra kũringana na ithimi ciake.—1 Pet. 2:12.
14. O ta ũrĩa 1 Johana 5:3 yonanagia-rĩ, nĩ ũndũ ũrĩkũ wĩrutĩte igũrũ rĩgiĩ ithimi cia Jehova?
14 Wĩrute gũtĩa na gwathĩkĩra ithimi cia Jehova. No gũkorũo ũtanamenya Jehova nĩwe wetuagĩra wega na ũũru, no rĩu nĩ ũũĩ atĩ ithimi cia Jehova nĩcio njega. (Thab. 1:1-3; thoma 1 Johana 5:3.) Ta wĩcirie ũhoro wĩgiĩ ũtaaro ũrĩa Bibilia ĩheaga athuri, atumia, aciari, na ciana. (Ef. 5:22–6:4) Hihi nĩ wonete ũtũũro wa famĩlĩ yaku ũkĩagĩra nĩ ũndũ wa kũrũmĩrĩra motaaro macio? Hihi nĩ wonete ũgĩtuĩka mũndũ mwega makĩria nĩ ũndũ wa gwathĩkĩra motaaro ma Jehova megiĩ gũthuura arata na ũũgĩ? Hihi gĩkeno gĩaku nĩ kĩongererekete? (Thim. 13:20; 1 Kor. 15:33) No kũhoteke macokio maku megiĩ ciũria icio nĩ ĩĩ.
15. Nĩ atĩa ũngĩka ũngĩbatara kũmenya ũrĩa ũngĩhũthĩra motaaro ma Bibilia?
15 Rĩmwe no wone arĩ ũndũ mũritũ kũmenya ũrĩa ũngĩhũthĩra ithimi cia Bibilia iria ũreruta. Kĩu nĩkĩo gĩtũmaga Jehova ahũthĩre ithondeka rĩake kũheana indo itiganĩte ciĩgiĩ Bibilia nĩguo igũteithie gũkũũrana wega na ũũru. (Ahib. 5:13, 14) Ũngĩthomaga na ũkeruta indo icio, nĩ ũkuona ũrĩa irĩ na ũhoro ũngĩgũteithia maũndũ-inĩ matiganĩte, na ũndũ ũcio no kũhoteke nĩ ũgũtũma wende gũkorũo ithondeka-inĩ rĩa Jehova.
16. Nĩ mũbango ũrĩkũ Jehova ahaarĩirie nĩ ũndũ wa andũ ake?
16 Wĩrute kwenda na kũnyita ithondeka rĩa Jehova mbaru. Jehova nĩ abangĩte gũkorũo na ciũngano nĩ ũndũ wa andũ ake, na Mũrũ wake Jesu nĩwe ũtongoragia ciũngano ciothe. (Ef. 1:22; 5:23) Jesu nĩ amũrĩte gakundi kanini ka arũme aitĩrĩrie maguta, nĩguo matongorie wĩra ũrĩa arenda ũrutwo. Gakundi kau ka arũme acio nĩko Jesu eetire “ngombo ĩrĩa njĩhokeku na njũgĩ,” na nĩ moyaga na ũritũ wĩra ũrĩa amaheete wa gũkũhe irio cia kĩĩroho na gũkũgitĩra kĩĩroho. (Mat. 24:45-47) Ũndũ ũmwe ngombo ĩyo njĩhokeku ĩkaga nĩguo ĩkũrũmbũiye, nĩ gũtigĩrĩra atĩ arũme arĩa magĩrĩire nĩ mamũrũo matuĩka athuri a ciũngano nĩguo magũtongorie na makũgitĩre. (Isa. 32:1, 2; Ahib. 13:17; 1 Pet. 5:2, 3) Athuri nĩ makoragwo mehaarĩirie gwĩka ũrĩa wothe mangĩhota nĩ ũndũ waku nĩguo makũmĩrĩrie, na magũteithie gũkuhĩrĩria Jehova. No ũndũ wa bata makĩria ũrĩa mangĩgwĩkĩra nĩ gũkũruta ũrĩa ũngĩruta andũ arĩa angĩ igũrũ rĩgiĩ Jehova.—Ef. 4:11-13.
17. Kũringana na Aroma 10:10, 13, 14, nĩ kĩĩ gĩtũmaga twĩre andũ arĩa angĩ ũhoro wĩgiĩ Jehova?
17 Teithia andũ arĩa angĩ merute kwenda Jehova. Jesu eerire arũmĩrĩri ake marute andũ arĩa angĩ ũhoro wĩgiĩ Jehova. (Mat. 28:19, 20) Mũndũ no athĩkĩre ũndũ ũcio nogetha ahingie watho. Ĩndĩ o ũrĩa wendo waku harĩ Jehova ũgũthiĩ ũkũrĩte, ũrĩiguaga ta mũtũmwo Petero na Johana arĩa mooigire ũũ: “Tũtingĩtiga kwaria ũhoro wa maũndũ marĩa tuonete na tũkaigua.” (Atũm. 4:20) Gũteithia mũndũ ũngĩ ende Jehova nĩ kũrĩ gĩkeno kĩnene. Ta wĩcirie gĩkeno kĩrĩa Filipu ũrĩa warĩ mũhunjia aagĩire nakĩo rĩrĩa aateithirie Mũethiopia kũmenya ũhoro wa ma ũrĩa warĩ Maandĩko-inĩ na akĩbatithio! Ũngĩĩgerekania na Filipu na wathĩkĩre watho wa Jesu wĩgiĩ kũhunjia, nĩ ũkuonania atĩ nĩ ũrenda gũtuĩka Mũira wa Jehova. (Thoma Aroma 10:10, 13, 14.) Weka ũguo, no kũhoteke ũkũũria kĩũria o ta kĩrĩa Mũethiopia ooririe: “Nĩ kĩĩ kĩngĩgiria batithio?”—Atũm. 8:36.
18. Gĩcunjĩ kĩrĩa kĩrũmĩrĩire kĩarĩrĩirie maũndũ marĩkũ?
18 Itua rĩa kũbatithio nĩrĩo itua rĩrĩa rĩa bata mũno ũngĩtua ũtũũro-inĩ waku. Tondũ kũbatithio nĩ itua rĩa bata mũno, nĩ wagĩrĩirũo gwĩciria na njĩra ndikĩru kũbatithio nĩ kuuga atĩa. Nĩ maũndũ marĩkũ ũbatiĩ kũmenya megiĩ kũbatithio? Ũbataire gwĩka atĩa mbere na thutha wa kũbatithio? Ciũria icio nĩ ciarĩrĩirio gĩcunjĩ-inĩ kĩrĩa kĩrũmĩrĩire.
RWĨMBO NA. 2 Wĩtagwo Jehova
^ kĩb. 5 Andũ amwe mendete Jehova matiiguaga ta mehaarĩirie kũbatithio matuĩke Aira a Jehova. Angĩkorũo nĩ ũiguaga ũguo, gĩcunjĩ gĩkĩ nĩ gĩgũgũteithia gwĩciria maũndũ mamwe ũngĩka magũteithie kũbatithio.
^ kĩb. 5 Tondũ o mũndũ nĩ ngũrani, andũ amwe no meke maũndũ marĩa magwetetwo gĩcunjĩ-inĩ gĩkĩ makĩhũthĩra mũtaratara ngũrani na ũrĩa wonanĩtio.
^ kĩb. 6 Nĩguo wone ngerekano ingĩ rora broshua, Uhai—Ulitokana na Muumba? na Maswali Matano Muhimu Kuhusu Chanzo cha Uhai.
^ kĩb. 61 GŨTAARĨRIA MBICA: Mwarĩ wa Ithe witũ akĩhe mũirĩtu trakti marĩ thoko-inĩ.
