Alawii amwe arĩa mataarĩ athĩnjĩri-Ngai nĩ maarutaga mawĩra mangĩ ta gũtungata marĩ thigari. Maarutaga wĩra ũcio magĩtongorio nĩ mũnene wa hekarũ. Mwandĩki ũmwe Mũyahudi wĩtagwo Philo aandĩkire ũũ ũhoro-inĩ wĩgiĩ wĩra ũrĩa thigari icio ciarutaga: “[Alawii] amwe maahetwo wĩra wa kũrangĩra marĩ arangĩri a ihingo, na angĩ [hekarũ-inĩ] mbere ya harĩa hatheru nĩguo gũtikagĩe mũndũ ũtetĩkĩrĩtio ũkũingĩra ho hihi akĩendaga kana atekwenda. Amwe maathiũrũrũkaga kũu hekarũ nĩguo makũrangĩre na maaikaraga magĩcenjanagia ũtukũ na mũthenya.”

Thigari icio nĩ ciateithagĩrĩria kĩama gĩa Sanhedrini. Gĩkundi kĩu gĩa thigari cia Kĩyahudi nokĩo tu gĩetĩkĩrĩtio gũkorũo na matharaita nĩ thirikari ya Roma.

Kũringana na ũrĩa mũthomi ũmwe wĩtagwo Joachim Jeremias aataarĩirie, “Ciugo cia Jesu iria ooigire rĩrĩa aanyitagwo atĩ o mũthenya aakoragwo hekarũ-inĩ akĩrutana no ndanyitirũo (Mat. 26.55), cionanagia wega atĩ no kũhoteke nĩ thigari icio cia hekarũ ciokĩte kũmũnyita.” Mũthomi ũcio etĩkĩtie atĩ thigari icio cia hekarũ nocio ciokĩte kũnyita Jesu ihinda-inĩ rĩna mbere ĩyo. (Joh. 7:32, 45, 46) Thutha ũcio, thigari icio hamwe na mũnene wao nĩ maatũmirũo magatware arutwo a Jesu mbere ya Sanhedrini, na no kũhoteke thigari icio nĩcio ciakururirie mũtũmwo Paulo ikĩmuumia nja ya hekarũ.—Atũm. 4:1-3; 5:17-27; 21:27-30.