Andũ amwe arĩa mathomaga rũgano rũu ihenya ihenya nĩ meyũragia kĩũria kĩu. No mĩhari-inĩ ĩyo hagwetetwo andũ erĩ meetagwo Mefiboshethu, na harĩ ũndũ tũngĩĩruta twathuthuria ũrĩa gwathiire.

Mũthamaki Saulu wa Isiraeli aarĩ na ariũ mũgwanja na airĩtu erĩ. Jonathani nĩwe warĩ irigithathi rĩake. Thutha ũcio Saulu nĩ aagĩire mũriũ wetagwo Mefiboshethu, ũrĩa waciarirũo nĩ thuriya yake Rizipa. Jonathani o nake aarĩ na mũrũ wetagwo Mefiboshethu. Gũkĩrĩ ũguo, Mũthamaki Saulu aarĩ na mũriũ wetagwo Mefiboshethu na kaguka kaarĩ na rĩĩtwa o ta rĩu.

Hĩndĩ ĩmwe Mũthamaki Saulu nĩ aambĩrĩirie gũũkĩrĩra Agibeoni arĩa maaikaraga hamwe na Aisiraeli, na akĩgeria kũmaniina othe na aingĩ ao makĩũragwo. Ũndũ ũcio warĩ mũũru. Nĩkĩ? Tondũ mbere ĩyo matukũ-inĩ ma Joshua, atongoria a Aisiraeli nĩ maagĩte na kĩrĩkanĩro gĩa thayũ hamwe na Agibeoni.​—Josh. 9:3-27.

Kĩrĩkanĩro kĩu kĩarĩ o ho nginya matukũ-inĩ ma Mũthamaki Saulu. Saulu nĩ aagararire kĩrĩkanĩro kĩu rĩrĩa aageririe kũniina Agibeoni. Kũgeria gwĩka ũguo nĩ kwarehire “mahĩtia ma ũiti wa thakame harĩ Saulu na harĩ nyũmba yake.” (2 Sam. 21:1) Thutha ũcio, Daudi agĩtuĩka mũthamaki. Agibeoni arĩa maatigarĩte, makĩaria nake ũhoro wĩgiĩ mehia macio meekĩtwo nĩ Saulu. Daudi akĩmoria ũrĩa maangĩendire eke nĩguo ahumbĩre mehia macio na nĩguo Jehova arathime bũrũri wa Isiraeli. Handũ ha gwĩtia mbeca, Agibeoni mooririe manengerũo ariũ mũgwanja a mũndũ ũrĩa ‘wabangĩte njama ya kũmeheria biũ’ nĩguo mamoorage. (Ndar. 35:30, 31) Daudi nĩ aamahingĩirie ihoya rĩao.​—2 Sam. 21:2-6.

Gũkinyĩria hĩndĩ ĩyo, Saulu na Jonathani nĩ maakuĩte mbaara-inĩ no Mefiboshethu mũrũ wa Jonathani aarĩ o muoyo. Aagwĩte arĩ mwana na akonja na ndaanyitanĩire na gukawe Saulu harĩ gũũkĩrĩra Agibeoni. Daudi nĩ aagĩte na kĩrĩkanĩro kĩa ũrata na Jonathani, kĩrĩa kĩngĩagunire njiarũa cia Jonathani hamwe na mũrũ wake Mefiboshethu. (1 Sam. 18:1; 20:42) Bibilia yugaga ũũ: “Mũthamaki [Daudi] agĩcaĩra Mefiboshethu, mũrũ wa Jonathani mũrũ wa Saulu, nĩ ũndũ wa mwĩhĩtwa ũrĩa wehĩtirũo mbere ya Jehova.”​—2 Sam. 21:7.

O na kũrĩ ũguo, Daudi no aatĩire ihoya rĩa Agibeoni. Aaneanire ariũ erĩ a Saulu, na ũmwe wao eetagwo Mefiboshethu, hamwe na ariũ atano a mwarĩ wa Saulu. (2 Sam. 21:8, 9) Ikinya rĩu Daudi ooire nĩ rĩeheririe mahĩtia ma ũiti wa thakame thĩinĩ wa Isiraeli.

Nĩ harĩ ũndũ tũngĩĩruta kuumana na rũgano rũu. Watho wa Ngai nĩ waugĩte wega atĩ “ciana itiagĩrĩire kũũragwo tondũ wa ũndũ wĩkĩtwo nĩ maithe ma cio.” (Gũcok. 24:16) Jehova ndangĩetĩkĩririe ariũ erĩ a Saulu hamwe na ariũ atano a mwarĩ moragwo korũo matiarĩ na mahĩtia. Watho ũcio wathiĩte na mbere kuuga: “O mũndũ agĩrĩire kũũragwo nĩ ũndũ wa mehia make mwene.” No gũkorũo ariũ acio erĩ a Saulu hamwe na ariũ atano a mwarĩ arĩa mooragirũo, nĩ maanyitanĩire na Saulu harĩ kũgeria kũniina Agibeoni. Gũkĩrĩ ũguo, othe mũgwanja maakuire nĩ ũndũ wa mehia mao.

Rũgano rũrũ rũratũruta atĩ mũndũ ndangĩĩtetera nĩ ũndũ wa gwĩka ũndũ mũũru na njĩra ya gwĩciria kana kuuga atĩ nĩ mawatho ararũmagĩrĩra. No mũhaka akorũo ehaarĩirie gwĩtĩkĩra maumĩrĩro ma ciĩko ciake. Thimo ĩmwe yugaga ũũ: “Aragania njĩra ya magũrũ maku, na njĩra ciaku ciothe irĩkoragwo ciĩhandĩte wega. Ndũkanehũgũre na mwena wa ũrĩo kana wa ũmotho. Eheragia magũrũ maku kuuma harĩ ũndũ ũrĩa mũũru.”​—Thim. 4:24-27; Ef. 5:15