DANIEL NA MIRIAM maahikanirie mwaka wa 2000 na magĩikara Barcelona, bũrũri-inĩ wa Spain. Daniel oigaga ũũ: “Twaikaraga mũtũũrĩre ũrĩa andũ monaga arĩ guo ũtũũro mwega. Mawĩra maitũ nĩ maatũhotithagia kũrĩa mĩkawa-inĩ ĩrĩa mĩega, gũceera mabũrũri-inĩ mangĩ, na kwĩhumba nguo njega. Ningĩ nĩ twathiaga ũtungata-inĩ tũtegũtĩrĩria.” No maũndũ makĩgarũrũka.

Marĩ kĩgomano-inĩ mwaka wa 2006, Daniel nĩ aahutirio mũno nĩ mĩario yarĩ na kĩũria gĩkĩ: “Hihi nĩ tũreka ũrĩa wothe tũngĩhota nĩguo tũteithĩrĩrie arĩa ‘makiriĩ kũũragwo’ maingĩre njĩra-inĩ ya muoyo wa tene na tene?” (Thim. 24:11) Mĩario ĩyo yatĩtĩrithagia itemi rĩa kũmenyithania ndũmĩrĩri ya kũhonokia muoyo ya Bibilia. (Atũm. 20:26, 27) Daniel aririkanaga ũũ: “Ndaiguaga ta arĩ niĩ Jehova aaragĩria.” Ningĩ mĩario ĩyo nĩ yataarĩirie atĩ kwandandũra ũtungata nĩ kũrehagĩra mũndũ gĩkeno makĩria. Daniel nĩ aamenyaga atĩ ũcio nĩ ũhoro wa ma. Miriam nĩ aakoretwo ambĩrĩirie kũpainia na nĩ onaga irathimo nyingĩ ciamũrehagĩra gĩkeno.

Daniel oigaga atĩ aatuire itua rĩa gwĩka ũgarũrũku biũ mũtũũrĩre-inĩ wake. Na nĩguo eekire. Aanyihanyihirie mathaa marĩa aarutaga wĩra, akĩambĩrĩria kũpainia na agĩciria gĩkeno kĩrĩa we na Miriam mangĩagĩire nakĩo magĩtungata kũrĩa kũrĩ na bata mũnene wa ahunjia a Ũthamaki.

Kũrĩ Mĩĩ 2007, Daniel na Miriam nĩ maatigire mawĩra mao na magĩthiĩ bũrũri maaceerete hau kabere wa Panama. Gĩcigo kĩao kĩerũ gĩa kũhunjia gĩakoragwo na icigĩrĩra cigana ũna cia Bocas del Toro thĩinĩ wa Iria rĩa Caribbean na andũ aingĩ arĩa makoragwo kuo nĩ a Guaymi (aikari a kuo a tene). Daniel na Miriam meeciragia atĩ mahũthĩra mbeca iria maigĩte, nĩ mangĩahotire gũikara Panama ihinda rĩa mĩeri ĩnana.

Maatuĩkanagia icigĩrĩra-inĩ icio makĩhũthĩra tũtarũ na mĩithikiri, na nĩ maririkanaga rũgendo rwao rwa mbere rũrĩa maathire na mĩithikiri rwa kĩndũ kilomita 32 magereire kũndũ kwarĩ na irĩma nene magĩcinagwo nĩ riũa. Daniel aarĩ hakuhĩ kũringĩka nĩ ũndũ wa kũnoga. No nĩ maanyitagwo ũgeni nĩ famĩlĩ cia Aguaymi arĩa mĩciĩ yao yarĩ njĩra-inĩ iria maageragĩra, makĩria rĩrĩa meerutire ciugo imwe cia rũthiomi rũrĩa rwaragio kũu. Thutha wa ihinda inini, meerutaga Bibilia na andũ 23.

O na kũrĩ ũguo, rĩrĩa mbeca iria maarĩ nacio ciathirire, nĩ maanyitirũo nĩ kĩeha. Daniel aririkanaga ũũ: “Twambĩrĩirie gwĩcũrania tũrĩ na maithori ũrĩa tũgũcoka Spain. Twarĩ na kĩeha mũno nĩ ũndũ wa gũtiga arutwo aitũ a Bibilia.” No thutha wa mweri ũmwe, nĩ maamũkĩrire ũhoro wa kũmacanjamũra. Miriam oigaga: “Nĩ twaheirũo marũa ma gũtungata tũrĩ mapainia a mwanya. Kĩarĩ gĩkeno kĩnene mũno kũmenya atĩ nĩ tũngĩathire na mbere gũikara bũrũri-inĩ ũcio!”

Nĩ ũndũ wa mogarũrũku marĩa maagĩire ithondeka-inĩ mwaka wa 2015, Daniel na Miriam meerirũo mathiĩ na mbere gũtungata marĩ mapainia a hĩndĩ ciothe. Mangĩekire atĩa? Meehokire kĩĩranĩro kĩrĩa kĩrĩ thĩinĩ wa Thaburi 37:5: “Ũhoro wa njĩra yaku, rekagĩrĩria Jehova; mwĩhokage o we, nake nĩwe ũrĩgũthondekagĩra.” Nĩ monire wĩra wa kũmateithia kwĩrũgamagĩrĩra, na rĩu matungataga kĩũngano-inĩ kĩrĩ Veraguas bũrũri-inĩ wa Panama marĩ mapainia.

Daniel oigaga ũũ: “Tũtanoima Spain tũtiarĩ na ma kana no tũhote gũikara ũtũũro mũhũthũ. Ũmũthĩ ũyũ nĩ tũhotaga na gũtirĩ kĩndũ kĩa bata twagaga.” Gĩkeno kĩao kĩnene nĩ kĩrĩkũ? Moigaga, “Gũteithia andũ enyihia merute ũhoro wa Jehova nĩ gĩkeno gĩtangĩringithanio na kĩndũ kĩngĩ o gĩothe!”