MĨAKA-INĨ ya 1910, aciari akwa maathamire Tbilisi bũrũri-inĩ wa Georgia, na magĩthiĩ gũikara kanyũmba kaarĩ kanini kũndũ kĩeni-inĩ hakuhĩ na Pelly, Saskatchewan mwena wa ithũĩro wa bũrũri wa Canada. Ndaciarirũo mwaka wa 1928 ndĩ kĩhinga nda harĩ ciana ithathatũ. Baba aakuĩte mĩeri ĩtandatũ mbere ĩyo, nake mami aakuire ndĩ o gakenge. Mwarĩ wa maitũ ũrĩa warĩ mũkũrũ, Lucy, aakuire ihinda inini thutha ũcio arĩ na mĩaka 17. Thutha ũcio tuoirũo nĩ mama witũ Nick, na nĩwe watũrũmbũyagia.

Mũthenya ũmwe ndĩ mwana, andũ a famĩlĩ itũ nĩ monire ngĩgucia mũting’oe wa mbarathi ĩmwe kũu mũgũnda-inĩ. Makĩnjugĩrĩria na hinya nĩ ũndũ wa gwĩtigĩra ndikagũthwo nĩyo, no ndiatindanĩire nao. Maarĩ thutha wakwa na ndiaiguire makĩnjugĩrĩria. Wega nĩ atĩ mbarathi ĩyo ndĩangũthire, no mũthenya ũcio nĩguo andũ a famĩlĩ itũ maamenyire atĩ ndiarĩ na ũhoti wa kũigua.

Mũrata ũmwe wa famĩlĩ itũ nĩ aatũtaarire atĩ thiĩ ngathomithio hamwe na ciana ingĩ iria itarĩ na ũhoti wa kũigua, na kwoguo Mama Nick akĩndwara cukuru ya andũ arĩa matarĩ ũhoti wa kũigua, ĩrĩa yarĩ taũni-inĩ ya Saskatoon gĩcigo-inĩ kĩa Saskatchewan. Ndatwarirũo kũndũ kwarĩ kwa mathaa maigana ũna kuuma kũrĩa famĩlĩ itũ yaikaraga, na tondũ ndarĩ o na mĩaka ĩtano tu, nĩ ndetigĩraga mũno. Ingĩaceereire famĩlĩ itũ o rĩrĩa tu kũrĩ na thigũkũ, kana cukuru ciahingwo. Mũthia-inĩ ngĩmenya rũthiomi rwa kwaria na ciĩko na nĩ ndakenagĩra gũthaka na ciana iria ingĩ.

Mwaka-inĩ wa 1939, mwarĩ wa maitũ Marion, ũrĩa wacokete Lucy, aahikirio nĩ Bill Danylchuck, na makĩnjoya tũrĩ na mwarĩ wa maitũ Frances tũikarage nao. Acio nĩo maarĩ a mbere kwaranĩria na Aira a Jehova famĩlĩ-inĩ itũ. Cukuru ciahingwo, nĩ maandutaga maũndũ maingĩ o ũrĩa mangĩahotire kuumana na maũndũ marĩa merutaga Bibilia-inĩ. Ũhoro wa ma nĩ atĩ ndwarĩ ũndũ mũhũthũ kwaranĩria nao tondũ matioĩ rũthiomi rwa kwaria na ciĩko. No nĩ monaga  atĩ hatarĩ nganja nĩ ndendete maũndũ ma kĩĩroho kuuma ngoro-inĩ. Nĩ ndataũkagĩrũo atĩ ũrĩa meekaga nĩ wahutanĩtie na ũrĩa Bibilia yugaga na kwoguo nĩ ndathiaga nao magĩthiĩ kũhunjia. Thutha wa ihinda inini, nĩ nderirĩirie kũbatithio na kũrĩ Septemba 5, 1941, Bill akĩbatithĩria gatangi-inĩ geekĩrĩtwo maĩ maahũrĩtwo na mbombo kuuma gĩthima-inĩ. Maĩ macio maarĩ mahehu mũno!

Mwaka-inĩ wa 1946 rĩrĩa ndacokire mũciĩ twahinga, nĩ twathire kĩgomano taũni-inĩ ya Cleveland, Ohio, U.S.A. Mũthenya wa mbere wa kĩgomano, aarĩ a maitũ nĩ maateithanagia kũnyandĩkĩra ũhoro ũrĩa waragĩrĩrio nĩguo hote gũtwarana na programu. No mũthenya wa kerĩ nĩ ndakenire mũno ndamenya atĩ nĩ kwarĩ na gĩkundi kĩa andũ mataarĩ na ũhoti wa kũigua na nĩ kwarĩ na mũndũ wamataũragĩra na rũthiomi rwa kwaria na ciĩko. Kuuma hau ngĩhota gũkenera kĩgomano na ngĩigua wega mũno nĩ ũndũ wa gũtaũkĩrũo nĩ ma ya Bibilia wega makĩria.

Mbaara ya Kerĩ ya Thĩ yakoretwo o hĩndĩ yathira na maũndũ megiĩ kũgathĩrĩria bũrũri nĩ maanyitaga thing’a. Ngĩcoka kuuma kĩgomano-inĩ nĩ ndatuĩte itua rĩa kũrũĩrĩra wĩtĩkio wakwa ndacoka cukuru. Kwoguo ngĩtiga kũhũragĩra bendera thurutia na ngĩtiga kũinaga rwĩmbo rwa bũrũri. Ningĩ ngĩtiga kũnyitanagĩra harĩ gũkũngũĩra thigũkũ kana maũndũ-inĩ ma kanitha marĩa maarĩ ma o mũhaka. Anene a cukuru matiakenire na kwoguo makĩgeria kũhũthĩra maheeni na kũnjiguithia guoya nĩguo ngarũrĩre itua rĩakwa. Maũndũ macio mothe nĩ maatũmire arutwo arĩa angĩ mamake, no nĩ maaheire mweke wa kũruta ũira. Arutwo amwe twathomaga nao ta Larry Androsoff, Norman Dittrick, na Emil Schneider, thutha-inĩ nĩ metĩkĩrire ũhoro wa ma na matungatagĩra Jehova marĩ ehokeku nginya ũmũthĩ ũyũ.

Rĩrĩa ndĩraceera mataũni-inĩ mangĩ, nĩ ngoragwo nduĩte itua rĩa kũhunjĩria andũ arĩa matakoragwo na ũhoti wa kũigua. Kwa ngerekano, taũni-inĩ ya Montreal, nĩ ndathire handũ andũ arĩa matarĩ ũhoti wa kũigua maacemanagia, na ngĩhunjĩria Eddie Taeger mwanake waingĩrĩte gĩkundi-inĩ kĩa ũkora. Aakoragwo kĩũngano-inĩ kĩa rũthiomi rwa kwaria na ciĩko kĩrĩa kĩrĩ Laval, Quebec nginya rĩrĩa aakuire mwaka mũthiru. Ningĩ nĩ ndacemanirie na mwanake wetagwo Juan Ardanez ũrĩa wathuthuririe Maandĩko o ta andũ a Beroia nĩguo ekĩre ũũma ndũmĩrĩri ya Bibilia. (Atũm. 17:10, 11) O nake nĩ eetĩkĩrire ũhoro wa ma na aatungatire arĩ mwĩhokeku na arĩ mũthuri wa kĩũngano taũni-inĩ ya Ottawa, Ontario nginya gũkua gwake.

Mwaka-inĩ wa 1950, ngĩthamĩra Vancouver. O na gũtuĩka nĩ nyendete kũhunjĩria andũ arĩa matarĩ ũhoti wa kũigua, ndikariganĩrũo nĩ ũrĩa gwathire rĩrĩa ndahunjĩirie mũtumia ũmwe barabara-inĩ wetagwo  Chris Spicer warĩ na ũhoti wa kũigua. Nĩ eetĩkĩrire kwĩyandĩkithia atũmagĩrũo ngathĩti o mweri na akiuga no ende tũcemanie na mũthuri wake wĩtagwo Gary. Kwoguo ngĩmaceerera kwao mũciĩ na tũkĩaria ihinda iraya na njĩra ya kwandĩkanĩra karatathi-inĩ. Rĩu nĩrĩo rĩarĩ rĩa mbere na rĩa mũico kwaranĩria, o nginya mĩaka mĩnini thutha ũcio rĩrĩa maanyonire kĩgomano-inĩ kĩarĩ Toronto, Ontario, kĩrĩa kĩarĩ na andũ aingĩ mũno, ũndũ ũrĩa wangegirie. Gary aarĩ abatithio mũthenya ũcio. Ũndũ ũcio nĩ wandirikanirie bata wa gũthiĩ na mbere kũhunjia tondũ tũtiũĩ nĩrĩ kana nĩ ha ũhoro wa ma ũngĩmera.

Thutha ũcio ngĩcoka Saskatoon. Ndĩ kũu nĩ ndacemanirie na mũtumia ũmwe ũrĩa wanjũririe ndĩrute Bibilia na airĩtu ake erĩ a mahatha, Jean na Joan Rothenberger, arĩa mataarĩ na ũhoti wa kũigua na maathomagĩra cukuru o ĩrĩa ndathomeire ya andũ matarĩ na ũhoti wa kũigua. Thutha wa ihinda inini, airĩtu acio makĩambĩrĩria kwĩra arutwo a kĩrathi kĩao maũndũ marĩa meerutaga. Mũthia-inĩ, andũ atano kuuma kĩrathi kĩao nĩ maatuĩkire Aira a Jehova. Ũmwe wao aarĩ Eunice Colin. Ndacemanirie na Eunice rĩa mbere ndĩ cukuru mwaka-inĩ wakwa wa kũrĩkĩrĩria. Hĩndĩ ĩyo aaheire theremende na akĩnjũria kana no tũtuĩke arata. Eunice angĩacokire atuĩke mũndũ wa bata mũno ũtũũro-inĩ wakwa. Nĩwe watuĩkire mũtumia wakwa.

Rĩrĩa nyina wa Eunice aamenyire atĩ mwarĩ nĩ eerutaga Bibilia, eerire mwarimũ mũnene wa cukuru ĩyo agerie kũhenereria Eunice nĩguo atige kwĩruta. Mwarimũ ũcio o na nĩ oire mabuku marĩa Eunice aahũthagĩra kwĩruta. O na kũrĩ ũguo, Eunice nĩ aatuĩte itua rĩa kũiga Jehova mbere. Rĩrĩa eendaga kũbatithio, aciari ake maamwĩrire, “Ũtuĩke Mũira wa Jehova nawe uume gũkũ!” Eunice oimire mũciĩ arĩ na mĩaka 17, na famĩlĩ ĩmwe ya Aira a Jehova ĩkĩmuoya ĩmũrũmbũyagie. Aathire na mbere kwĩruta na thutha-inĩ akĩbatithio. Rĩrĩa twahikanirie mwaka-inĩ wa 1960, aciari ake matiokire ũhiki witũ. No o ũrĩa mĩaka yahĩtũkire, nĩ maambĩrĩirie gũtũhe gĩtĩo nĩ ũndũ wa wĩtĩkio witũ na ũrĩa twareraga ciana citũ.

Tũrĩ aciari matarĩ na ũhoti wa kũigua, nĩ tũrerete anake mũgwanja marĩ na ũhoti wa kũigua. Ũndũ ũcio ndwarĩ mũhũthũ no nĩ twatigĩrĩire atĩ nĩ mamenya rũthiomi rwa kwaria na ciĩko nĩguo tũhote kwaranagĩria nao wega na kũmaruta ũhoro wa ma. Aarĩ na ariũ a Ithe witũ thĩinĩ wa kĩũngano nĩ maatũteithirie mũno. Kwa ngerekano, mũciari ũmwe aatwandĩkĩire agĩtwĩra atĩ kahĩĩ kamwe gaitũ nĩ koigaga ciugo itaarĩ njega tũrĩ thĩinĩ wa Nyũmba ya Ũthamaki. Nĩ twahotire kũhiũrania na ũndũ ũcio o hĩndĩ ĩyo. Ariũ akwa ana, James, Jerry, Nicholas, na Steven maratungatĩra Jehova marĩ ehokeku hamwe na famĩlĩ ciao. Othe ana matungataga marĩ athuri a ciũngano. Makĩria ma ũguo, Nicholas na mũtumia wake Deborah, mateithagĩrĩria ũtaũri wa rũthiomi rwa kwaria na ciĩko wabici-inĩ ya rũhonge ya Ngeretha, nao Steven na mũtumia wake Shannan, mateithagĩrĩria ũtaũri wa rũthiomi rwa kwaria na ciĩko wabici-inĩ ya rũhonge ya Amerika (US).

Eunice aakuire nĩ mũrimũ wa kansa tũtigairie mweri ũmwe tũniine mĩaka 40 kuuma rĩrĩa twahikanirie. Aarĩ na ũmĩrĩru mũno ihinda rĩu rĩothe iritũ. Wĩtĩkio ũrĩa aarĩ naguo harĩ kũriũkio nĩ wamwĩkĩraga hinya. Nĩ ndĩriragĩria mũno mũthenya ũrĩa ngaamuona rĩngĩ.

Mweri-inĩ wa Februarĩ mwaka wa 2012, nĩ ndagũire na ngiunĩka ihĩndĩ rĩa njohero na kwoguo nĩ ingĩabatarire ũteithio. Nĩ ũndũ ũcio, ngĩthiĩ gũikara na mũrũ wakwa ũmwe hamwe na mũtumia wake. Rĩu tũkoragwo Kĩũngano kĩa Rũthiomi rwa Kwaria na Ciĩko gĩa Calgary na no ndungataga ndĩ mũthuri wa kĩũngano. Ũhoro wa ma nĩ atĩ, rĩrĩ nĩrĩo rita rĩakwa rĩa mbere gũkorũo kĩũngano-inĩ kĩa rũthiomi rwa kwaria na ciĩko. Ta wĩcirie ũndũ ũcio! Ndathiaga na mbere atĩa kĩĩroho ndĩ kĩũngano-inĩ kĩa rũthiomi rwa gĩthũngũ mĩaka ĩyo yothe kuuma mwaka wa 1946? Jehova nĩ ahingĩtie kĩĩranĩro gĩake gĩa kũrũmbũiya mwana ũrĩa ũtarĩ na ithe. (Thab. 10:14) Nĩ njokagia ngatho nĩ ũndũ wa kĩyo kĩa arĩa othe manerutĩra kũnyandĩkĩra, makeruta rũthiomi rwa kwaria na ciĩko, na makandaũrĩra kũringana na ũhoti wao.

Nĩ ma, kũrĩ hĩndĩ ndanaigua nguĩte ngoro na ngaigua ndingĩhota gũthiĩ na mbere rĩngĩ tondũ wa kwaga gũtaũkĩrũo nĩ ũrĩa kũreerũo na kuona ta mabataro ma arĩa matarĩ ũhoti wa kũigua mataarũmbũyagio. O na kũrĩ ũguo, mahinda-inĩ ta macio nĩ ndeciragia ciugo cia Petero rĩrĩa oririe Jesu ũũ: “Mwathani, tũgũgĩthiĩ kũrĩ ũ? Wee ũrĩ na ciugo cia muoyo wa tene na tene.” (Joh. 6:66-68) O ta aarĩ na ariũ a Ithe witũ angĩ aingĩ arĩa tũtũũrĩte ihinda-inĩ rĩmwe na matarĩ ũhoti wa kũigua, nĩ ndĩrutĩte gũkorũo na wetereri. Nĩ ndĩrutĩte gwetagĩrĩra Jehova na ithondeka rĩake na nĩ ndeithĩkĩte mũno nĩ ũndũ ũcio. Rĩu ndĩ na ũtonga mũnene wa irio cia kĩĩroho cia rũthiomi rwakwa, na no hote gũkenera kũnyitanĩra na arĩa angĩ mĩcemanio-inĩ na igomano-inĩ cia Rũthiomi rwa Kwaria na Ciĩko rwa Amerika. Nĩ ndathimĩtwo mũno ũtũũro-inĩ na ngagĩa na gĩkeno ngĩtungatĩra Jehova, Ngai witũ mũnene.