1. Nĩ kĩĩ kĩngĩtũma andũ amwe maigue matekwenda kwĩruta?

MATUKŨ-INĨ maya, andũ nĩ mabataraga kũruta wĩra na kĩyo mũno nĩguo mahingie mabataro mao. Aarĩ na ariũ a Ithe witũ aingĩ mabataraga kũruta wĩra mathaa maingĩ o mũthenya nĩguo mahingĩrie famĩlĩ ciao mabataro. Angĩ nao nĩ mahũthagĩra mathaa maingĩ o mũthenya magĩthiĩ na makiuma kũrĩa marutagĩra wĩra. Angĩ mabataraga kũruta wĩra mũritũ mũno nĩguo mahingie mabataro mao na ma famĩlĩ ciao. Mũthenya ũkiuga ũthire, aarĩ na ariũ a Ithe witũ acio makoragwo manogete mũno! Kwoguo matikoragwo matigĩtie hinya wa kwĩruta.

2. Wee wĩrutaga hĩndĩ ĩrĩkũ?

² O na kũrĩ ũguo, ũhoro wa ma nĩ atĩ no mũhaka twethe mahinda ma kwĩruta biũ Kiugo kĩa Ngai o hamwe na mabuku maitũ. Gwĩka ũguo nĩ kwa bata mũno angĩkorũo nĩ tũkwenda gũkorũo na ũrata mwega na Jehova na tũkoona muoyo wa tene na tene! (1 Tim. 4:15) Andũ amwe mokĩraga tene o mũthenya nĩguo merute tondũ hĩndĩ ĩyo kwao mĩciĩ gũtikoragwo na inegene, na meciria mao makoragwo mahurũkĩte thutha wa gũkoma ũtukũ mũgima. Angĩ nao methaga ndagĩka nini rĩrĩa kũhoorerete matanakoma nĩguo marĩe irio cia kĩĩroho na mecũranie.

3-4. Nĩ mogarũrũku marĩkũ mekĩtwo megiĩ indo iria icabagwo na iria ciĩkĩragwo Intaneti-inĩ? Mogarũrũku macio mekĩtwo nĩkĩ?

³ Hatarĩ nganja nĩ ũĩ atĩ nĩ harĩ bata gwetha mahinda ma kwĩruta. No rĩrĩ, twagĩrĩirũo kwĩruta kĩĩ? Mũndũ no oige, ‘Tũkoragwo na indo nyingĩ mũno cia gũthoma, nginya mũndũ nĩ arigagwo kana no ahote gũthoma ciothe.’ Andũ amwe nĩ mahotaga gũthoma na kwĩrorera indo ciothe iria tũheagwo, no aarĩ na ariũ a Ithe witũ amwe matihotaga. Kĩama Kĩrĩa Gĩtongoragia  nĩ kĩũĩ ũguo. Nĩ ũndũ ũcio, kĩama kĩu nĩ kĩĩrĩga gũtua itua rĩa kũnyihanyihia indo iria icabagwo na iria ciĩkĩragwo Intaneti-inĩ.

⁴ Kwa ngerekano, thikũ ici gũtikoragwo na Kitabu cha Mwaka cha Mashahidi wa Yehova, tondũ maũndũ maingĩ ma gwĩkĩra ngoro marĩa monetwo makoragwo thĩinĩ wa jw.org^® na programu cia o mweri cia JW Broadcasting^®. Naguo Mũrangĩri wa andũ othe na Amkeni! icabagwo o maita matatũ tu harĩ mwaka. Mogarũrũku macio matiekirũo nĩguo tũgĩe na mahinda makĩria ma gwĩka maũndũ mangĩ. Handũ ha ũguo, meekirũo nĩguo tũgĩe na mahinda maingaingĩ ma gwĩka “maũndũ marĩa ma bata makĩria.” (Afil. 1:10) Reke twarĩrĩrie ũrĩa ũngĩmenya maũndũ marĩa ma bata makĩria na ũrĩa ũngĩgunĩka biũ kuumana na wĩruti waku kĩũmbe wa Bibilia.

5-6. Nĩ indo irĩkũ twagĩrĩirũo kwĩruta na kinyi?

⁵ Mbere ndaya-rĩ, twagĩrĩirũo kwĩruta kĩĩ? Nĩ twagĩrĩirũo gwetha ihinda rĩa kwĩruta Kiugo kĩa Ngai o mũthenya. Thikũ ici mĩrango ya Bibilia ĩrĩa tũkoragwo tũgaĩirũo thĩinĩ wa ũthomi wa Bibilia wa o kiumia, ĩkoragwo ĩtarĩ mĩingĩ nĩgetha tũgĩe na ihinda rĩa gwĩcũrania ũhoro ũrĩa twathoma na gwĩka ũthuthuria makĩria. Muoroto witũ ndwagĩrĩirũo gũkorũo arĩ kũrĩkia mĩrango ĩrĩa tũgaĩirũo o kiumia, no nĩ kũreka ũhoro ũrĩa twathoma Bibilia-inĩ ũhutie ngoro citũ nĩguo tũkuhĩrĩrie Jehova makĩria.—Thab. 19:14.

⁶ Nĩ kĩĩ kĩngĩ twagĩrĩirũo kwĩruta na kinyi? Nĩ twagĩrĩirũo kũhaarĩria wega Mũrangĩri wa wĩruti, Wĩruti wa Bibilia wa Kĩũngano, o hamwe na icunjĩ icio ingĩ cia Mũcemanio wa Ũtũũro na Ũtungata. Ningĩ nĩ twagĩrĩirũo gũthoma ngathĩti iria cioima cia Mũrangĩri wa andũ othe, wa wĩruti, na Amkeni!

7. Hihi nĩ twagĩrĩirũo gũkua ngoro angĩkorũo tũtihotaga gũthoma kana kwĩrorera indo ciothe iria irĩ thĩinĩ wa jw.org na JW Broadcasting?

⁷ No mũndũ no oige, ‘Ndirarega atĩ nĩ batiĩ gwĩka ũguo-ĩ, no githĩ indo iria ciothe ikoragwo thĩinĩ wa jw.org na video iria ikoragwo thĩinĩ wa JW Broadcasting ti nyingĩ mũno?’ Ta wĩcirie ngerekano ĩno: Thĩinĩ wa maruga maingĩ, nĩ gũkoragwo na irio mĩthemba ĩtiganĩte, ciothe irugĩtwo wega. Mũndũ ũrĩa ũngĩkorũo okĩte iruga-inĩ, no aremwo kũrĩa indo ciothe iria irugĩtwo. Kwoguo no athuure indo nyinyi harĩ iria irĩ ho. Na njĩra o ta ĩyo, angĩkorũo ndũhotaga gũthoma kana kwĩrorera indo ciothe iria cionekaga thĩinĩ wa website citũ, ndũgakue ngoro. Thomaga kana ũkerorera kĩrĩa ũngĩhota. Reke rĩu tuone kwĩruta nĩ kuuga atĩa, na ũrĩa tũngĩka nĩguo tũgunĩke biũ kuumana na wĩruti witũ.

8. Nĩ maũndũ marĩkũ ũngĩka rĩrĩa ũreruta Mũrangĩri, na ũkũgunĩka atĩa?

⁸ Kwĩruta nĩ gũthoma ũkindĩirie ũrĩ na muoroto wa gũtaũkĩrũo nĩ ũndũ. Kwĩruta to kũhĩtũkĩra gĩcunjĩ kĩna igũrũ igũrũ mũndũ agĩkururagĩra harĩa macokio marĩ. Kwa ngerekano, rĩrĩa ũrahaarĩria Mũrangĩri ambaga ũgathoma kohoro karĩa gakoragwo kĩambĩrĩria-inĩ gĩa gĩcunjĩ, karĩa getagwo Gĩcunjĩ-inĩ Gĩkĩ. Ũcoke ũthome na wĩcirie ũhoro wĩgiĩ kĩongo gĩa gĩcunjĩ, ciongo nini, na ciũria cia gũcokera. Thutha ũcio, thoma gĩcunjĩ kĩu ũtarĩ na ihenya na ũkindĩirie. Wĩcirie mũno ũhoro wĩgiĩ sentensi ĩrĩa yonanagia kĩbungo kĩrarĩrĩria ũndũ ũrĩkũ, na kaingĩ ĩkoragwo ĩrĩ sentensi ya mbere. Sentensi ĩyo kaingĩ nĩ ĩteithagia mũndũ kũmenya ũndũ ũrĩa kĩbungo kĩrataarĩria. Ũgĩthoma gĩcunjĩ gĩothe, thiĩ ũgĩciragia ũrĩa o kĩbungo kĩranyita mbaru kĩongo kĩnini o hamwe na kĩongo gĩa gĩcunjĩ. Andĩka  ciugo iria ũtanataũkĩrũo na maũndũ mageni marĩa wona marĩa ũngĩenda gwĩka ũthuthuria makĩria thutha-inĩ.

9. (a) Rĩrĩa tũreruta Mũrangĩri twagĩrĩirũo gwĩciria ũhoro wa maandĩko marĩa monanĩtio nĩkĩ na tũngĩka ũguo na njĩra ĩrĩkũ? (b) O ta ũrĩa Joshua 1:8 yonanĩtie-rĩ, nĩ atĩa ũngĩ tũbatiĩ gwĩka makĩria ma gũthoma maandĩko?

⁹ Rĩrĩa tũreruta Mũrangĩri tũkoragwo tũkĩĩruta Bibilia. Nĩ ũndũ ũcio, hũthagĩra mahinda kũrora maandĩko marĩa monanĩtio, makĩria marĩa magaathomwo kĩũngano-inĩ. Geria kũrora ũrĩa ciugo iria irĩ thĩinĩ wa maandĩko macio iranyita mbaru ũhoro ũrĩa ũrĩ kĩbungo-inĩ. Makĩria ma ũguo, hũthĩra ihinda gwĩcũrania maandĩko marĩa wathoma, na wĩcirie na njĩra ndikĩru ũrĩa ũngĩhũthĩra ũhoro ũcio ũtũũro-inĩ waku.—Thoma Joshua 1:8.

10. Kũringana na Ahibirania 5:14, aciari magĩrĩirũo kũhũthĩra ihinda hĩndĩ ya ũthathayia wa famĩlĩ kuonia ciana kwĩruta na gwĩka ũthuthuria nĩkĩ?

¹⁰ Aciari nĩ mendaga ciana ciao ikenere Ũthathaiya wa Famĩlĩ wa o kiumia. Ĩndĩ o na gũtuĩka hingo ciothe aciari nĩ magĩrĩirũo gũkorũo mabangĩte ũhoro ũrĩa mangĩenda kwarĩrĩria ũthathayia-inĩ wa famĩlĩ, matiagĩrĩirũo gwĩciria atĩ no mũhaka mahaaragĩrie maũndũ ma mwanya o kiumia o kiumia. O na gũtuĩka famĩlĩ no ihũthĩre hwaĩ-inĩ ũmwe wa ũthathaiya kwĩrorera JW Broadcasting ya mweri ũcio kana gwĩka tũũndũ tũngĩ twa mwanya, hihi ta gũthondeka thabina ya Nuhu, aciari nĩ magĩrĩirũo kuonia ciana ciao kwĩruta. Kwa ngerekano, ciana nĩ ciagĩrĩirũo kũmenya kũhaarĩria mĩcemanio kana gwĩka ũthuthuria wĩgiĩ ũndũ wĩyumĩrĩtie irĩ cukuru. (Thoma Ahibirania 5:14.) Ciana ingĩhũthagĩra mahinda kwĩruta ũndũ mũna kuuma Bibilia-inĩ irĩ mũciĩ, nĩ ũrĩkoragwo ũrĩ ũndũ mũhũthũ harĩ cio gũkindĩria nginya hĩndĩ ya icunjĩ iria itakoragwo na video mĩcemanio-inĩ, na igomano-inĩ. Ũrĩa kũrĩ nĩ atĩ, ihinda rĩrĩa mũciari ekũhũthĩra kũruta mwana nĩ rĩkũringana na mwana we mwene na mĩaka ĩrĩa arĩ nayo.

11. Nĩkĩ nĩ ũndũ wa bata kũruta arutwo aitũ a Bibilia kwĩruta na njĩra ndikĩru marĩ oiki?

¹¹ O na arutwo aitũ a Bibilia nĩ mabatiĩ kũmenya kwĩruta. Twambĩrĩria kwĩruta Bibilia nao, nĩ tũkenaga kuona makĩhaarĩria harĩa tũrathoma, o hamwe na mĩcemanio ya kĩũngano na njĩra ya gũkururĩra harĩa macokio marĩ. No nĩ tũrabatara kũmonia gwĩka ũthuthuria na kwĩruta na njĩra ndikĩru o na marĩ oiki. Tũngĩka ũguo, rĩrĩa kuoimĩra mathĩna, arutwo aitũ nĩ marĩmenyaga ũrĩa mangĩona ũtaaro ũngĩmateithia mabuku-inĩ maitũ, handũ ha gũteng’era kũhoya ũteithio kũrĩ andũ arĩa angĩ kĩũngano-inĩ.

12. Nĩ mĩoroto ta ĩrĩkũ tũngĩigĩra rĩrĩa tũreruta?

¹² Angĩkorũo ndwendete gũthoma, no gũkorũo wĩciragia gũtirĩ hingo ũgaakenera kwĩruta. No no ũhote. Ambĩrĩria na kwĩrutaga ihinda inini, ũcoke ũthiĩ wongereire mahinda kahora kahora. Wĩrutage ũrĩ na muoroto meciria-inĩ. Muoroto witũ ũrĩa mũnene wagĩrĩire gũkorũo ũrĩ gũthiĩ na mbere gũkuhĩrĩria Jehova. Ningĩ, no wĩigĩre mĩoroto ĩrĩa ũngĩkinyĩra na ihenya, ta gwĩka ũthuthuria wĩgiĩ kĩũria mũndũ arakũũrĩtie kana wĩgiĩ ũndũ mũritũ ũrahiũrania naguo.

13. (a) Taarĩria ũrĩa mũndũ mwĩthĩ angĩka nĩguo ahote gũtetera wĩtĩkio wake biũ. (b) Ũngĩhũthĩra atĩa ũtaaro wa Akolosai 4:6?

¹³ Kwa ngerekano-rĩ, hihi ũrĩ mũndũ mwĩthĩ ũrĩ cukuru? Andũ arĩa mũthomaga nao no makũingĩrĩre nĩ ũndũ wa kwaga kũina rwĩmbo rwa bũrũri. No gũkorũo no wende gũtetera ũrĩa Bibilia yugaga ũndũ-inĩ ũcio no ndũiguaga ta ũngĩhota. Ũndũ ũcio ũkũbatara wĩke ũthuthuria! Muoroto waku wagĩrĩirũo gũkorũo ũrĩ kũhingia maũndũ merĩ: (1) gwĩkĩra hinya wĩtĩkio waku atĩ nĩ wagĩrĩirũo kwĩyamũrania na thĩ, na (2) kwagagĩria ũhoti waku wa gũtetera ũhoro ũrĩa wa ma. (Joh. 17:16; 1 Pet. 3:15) No wambe wĩyũrie ũũ: ‘Andũ arĩa tũthomaga nao mahũthagĩra maũndũ marĩkũ kũnyita mbaru ũhoro wĩgiĩ kũina rwĩmbo rwa bũrũri?’ Thutha ũcio no ũhũthĩre mabuku maitũ gwĩka ũthuthuria na njĩra ndikĩru. Gũtetera wĩtĩkio waku ti kũritũ ta ũrĩa ũngĩciria. Andũ aingĩ mainaga rwĩmbo rwa bũrũri tondũ tu mũndũ maheete gĩtĩo nĩ aameerire nĩ magĩrĩirũo kũina. Ũngĩka ũthuthuria wone ũndũ ũmwe kana merĩ no ũhote gũteithia mũndũ ũrenda biũ kũmenya macokio.—Thoma Akolosai 4:6.

14-16. (a) Ũngĩka atĩa nĩguo ũtaũkĩrũo nĩ ibuku rĩna rĩa Bibilia ũtoĩ mũno ũhoro warĩo? (b) Taarĩria ũrĩa maandĩko macio magwetwo kĩbungo-inĩ mangĩgũteithia gũtaũkĩrũo nĩ ibuku rĩa Amosi. (Ningĩ rora gathandũkũ, “ Wĩrutage Bibilia na Njĩra Ndikĩru!”)

¹⁴ Ta nĩ tũtue atĩ thĩinĩ wa mũcemanio tũrathuthuria ibuku rĩmwe harĩ mabuku marĩa makuhĩ ma anabii, na hihi ndũĩ mũnabii ũcio wega. Ũndũ wa mbere ũngĩka nĩ gũkũria wendi wĩgiĩ maũndũ marĩa mũnabii ũcio aandĩkire. Ũngĩka ũguo atĩa?

¹⁵ Amba wĩyũrie ũũ: ‘Nĩ maũndũ marĩkũ njũĩ megiĩ mwandĩki ũcio? Aarĩ ũ, aaikaraga kũ, na aarutaga wĩra ũrĩkũ?’ Ũngĩmenya maũndũ megiĩ mwandĩki mũna, no ũhote gũtaũkĩrũo wegega kĩrĩa gĩtũmĩte agwete ciugo imwe na ahũthĩre ngerekano ihaana ũndũ mũna. Ũgĩthoma Bibilia, geria kũrora maũndũ marĩa mangĩgũteithia kũmenya mwandĩki aarĩ mũndũ wa mũthemba ũrĩkũ.

¹⁶ Ũndũ ũngĩ ũngĩka, nĩ gũtuĩria ibuku rĩu rĩandĩkirũo rĩ. No wĩke ũguo na njĩra ya kũrora gacunjĩ getagwo “Mũtaratara wa Mabuku ma Bibilia” mwena wa thutha wa Bibilia ya New World Translation. Ningĩ no ũrore mũcoro wa anabii na athamaki thĩinĩ wa Ũhoro Muongerere wa A6. Angĩkorũo ibuku rĩrĩa ũrathoma nĩ rĩa ũrathi, nĩ wega gũthuthuria maũndũ maahaanaga atĩa hĩndĩ ĩrĩa ũrathi ũcio waandĩkagwo. Hihi mũnabii ũcio aatũmĩtwo gũteithia andũ matige mĩerekera na mĩtugo ĩrĩkũ mĩũru? Nĩ a maatũũraga ihinda-inĩ rĩmwe na mwandĩki ũcio? Nĩguo ũtaũkĩrũo nĩ ũndũ mũna, nĩ ũkũbatara kũrora ũhoro kuuma mabuku-inĩ mangĩ ma Bibilia. Kwa ngerekano, nĩguo ũtaũkĩrũo wega nĩ maũndũ marĩa maathiaga na mbere hĩndĩ ya mũnabii Amosi, no ũbatare gũthoma mĩhari ya 2 Athamaki na 2 Maũndũ ma  Matukũ ma Tene, ĩrĩa yonanĩtio gacunjĩ-inĩ ka maandĩko ma gwathĩrĩra ka Amosi 1:1. Ningĩ, no ũthuthurie ibuku rĩa Hosea, ũrĩa no kũhoteke aatũũraga ihinda-inĩ rĩmwe na Amosi. Ũngĩthoma mabuku macio ma Bibilia no ũhote gũtaũkĩrũo ũrĩa maũndũ maahaanaga hĩndĩ ya Amosi.—2 Ath. 14:25-28; 2 Maũ. 26:1-15; Hos. 1:1-11; Amos 1:1.

17-18. Hũthĩra ngerekano iria irĩ ibungo-inĩ kana ngerekano yaku kuonania ũrĩa ũhoro ũrĩa wonekaga ta ũtarĩ wa bata ũngĩtũma ũkenere kwĩruta Bibilia makĩria.

¹⁷ Nĩ wega gũthoma Bibilia ũrĩ na wendi mũnene wa kwĩruta maũndũ makĩria. Kwa ngerekano, ta nĩ tũtue ũrathoma mũrango wa 12 wa ibuku rĩa Zekaria, ũrĩa warathĩte gĩkuũ kĩa Mesia. (Zek. 12:10) Wakinya mũhari wa 12 ũkona harĩa hoigĩte atĩ “famĩlĩ ya nyũmba ya Nathani” nĩ ĩgaacakaya mũno nĩ ũndũ wa gĩkuũ kĩa Mesia. Handũ ha kũhĩtũka ũndũ ũcio, ũgatithia ũkeyũria, ‘Famĩlĩ ya nyũmba ya Nathani ĩhutanĩtie atĩa na Mesia? Hihi nĩ harĩ ũndũ ingĩka menye ũhoro makĩria?’ Ũkenjenjera makĩria. Rĩandĩko rĩmwe rĩa gwathĩrĩra rĩheanĩtwo mũhari-inĩ ũcio nĩ 2 Samueli 5:13, 14, rĩrĩa rĩonanagia atĩ Nathani aarĩ ũmwe wa ariũ a Mũthamaki Daudi. Rĩandĩko rĩu rĩngĩ rĩa gwathĩrĩra rĩrĩa rĩheanĩtwo nĩ Luka 3:23, 31, rĩrĩa rĩonanagia atĩ Mariamu nyina wa Jesu ooimanĩte na famĩlĩ ya Nathani. (Rora Mũrangĩri wa andũ othe Na. 3, 2016, kar. 9, “Hihi Ũrĩ Wamenya?”) Kaũndũ kau gagatũma ũcanjamũke mũno! Nĩ ũĩ atĩ ũrathi nĩ woigĩte atĩ Jesu akoima famĩlĩ-inĩ ya Daudi. (Mat. 22:42) No ariũ a Daudi maarĩ makĩria ma 20. Na githĩ ti ũndũ wa kũgegania kuona atĩ Zekaria aagwetete ĩmwe kwa ĩmwe atĩ famĩlĩ ya Nathani nĩ ĩgaacakaya mũno nĩ ũndũ gĩkuũ kĩa Jesu?

 ¹⁸ Ta wĩcirie ngerekano ĩngĩ. Mũrango wa 1 wa ibuku rĩa Luka wonanagia atĩ mũraika Gaburieli aaceereire Mariamu na akĩmwĩra ciugo ici ciĩgiĩ mwana wa kahĩĩ ũrĩa aangĩagĩire: “Ũcio agaakorũo arĩ mũnene na ageetwo Mũrũ wa Ũrĩa ũrĩ Igũrũ Mũno, na Jehova Ngai nĩ akaamũhe gĩtĩ kĩa ũnene gĩa ithe Daudi, na nĩ agaatha nyũmba ya Jakubu arĩ Mũthamaki tene na tene.” (Luk. 1:32, 33) Nĩ ũndũ mũhũthũ harĩ ithuĩ kĩambĩrĩria-inĩ gwĩciria o ũhoro wa ciugo cia mbere cia Gaburieli atĩ Jesu angĩgeetagwo “Mũrũ wa Ũrĩa ũrĩ Igũrũ Mũno.” No Gaburieli no aarathire atĩ Jesu nĩ angĩgaathana “arĩ Mũthamaki.” Nĩ ũndũ ũcio, no twĩyũrie Mariamu eeciririe atĩa aigua ciugo icio cia Gaburieli. Hihi nĩ eeciririe atĩ Gaburieli eendaga kũmwĩra atĩ Jesu nĩ aangĩatuĩkire mũthamaki ithenya rĩa Herode kana mũthamaki ũngĩ wa Isiraeli? Korũo Jesu aarĩ atuĩke mũthamaki, nĩ kuonania atĩ Mariamu aangĩatuĩkire nyina wa mũthamaki, na kwoguo famĩlĩ yake ĩngĩaikarire nyũmba-inĩ ya mũthamaki. No gũtirĩ handũ Bibilia yonanagia atĩ Mariamu nĩ eerire Gaburieli ũndũ ta ũcio, kana akĩũria akaaheo gaturũa ka wathani ta ũrĩa arutwo a Jesu erĩ mooririe. (Mat. 20:20-23) Na githĩ ũndũ ũcio ndũratũteithia gũtaũkĩrũo wega makĩria atĩ Mariamu aarĩ mũtumia mwĩnyihia mũno!

19-20. Kũringana na Jakubu 1:22-25 na 4:8, muoroto witũ wagĩrĩirũo gũkorũo ũrĩ ũrĩkũ rĩrĩa tũreruta?

¹⁹ Rekei tũririkanage atĩ muoroto ũrĩa mũnene rĩrĩa tũrathoma Kiugo kĩa Ngai na mabuku maitũ wagĩrĩirũo gũkorũo arĩ gũthiĩ na mbere gũkuhĩrĩria Jehova. Ningĩ nĩ twagĩrĩirũo kũmenya wega ‘ũrĩa tũtariĩ,’ na nĩ mogarũrũku marĩkũ tũrabatara gwĩka nĩguo tũkenie Ngai. (Thoma Jakubu 1:22-25; 4:8.) Nĩ ũndũ ũcio, hingo ciothe tũtanambĩrĩria kwĩruta nĩ twagĩrĩirũo kũhoya Jehova atũhe roho wake. Twagĩrĩirũo kũmũthaitha atũteithie nĩguo tũgunĩke biũ na ũhoro ũrĩa tũrathoma na nĩgetha tũmenye nĩ mogarũrũku marĩkũ twagĩrĩirũo gwĩka.

²⁰ Rekei ithuothe tũhaane ta ndungata njĩhokeku ya Ngai ĩrĩa mwandĩki wa thaburi ooigire ũũ igũrũ rĩmĩgiĩ: “Watho wa Jehova nĩguo ũmũkenagia, na athomaga watho ũcio Wake na mĩheehũ ũtukũ na mũthenya. . . . Na ũndũ o wothe ekaga nĩ ũrĩgaacagĩra.”—Thab. 1:2, 3.