GĨCUNJĨ KĨA WĨRUTI GĨA 19
Wendo na Kĩhooto o na Kũrĩ na Waganu Mũingĩ
“Wee ũrĩ Ngai ũtakenagio nĩ waganu; gũtirĩ mũndũ mũũru ũngĩtũũra hamwe nawe.”—THAB. 5:4.
RWĨMBO NA. 142 Kũrũmia Kĩĩrĩgĩrĩro Gitũ
GĨCUNJĨ-INĨ GĨKĨ *
1-3. (a) Kũringana na Thaburi 5:4-6, Jehova aiguaga atĩa igũrũ rĩgiĩ waganu? (b) Nĩ kĩĩ kĩngĩtũma tuuge atĩ gwĩka ciana maũndũ moru nĩ kũreganĩte na “watho wa Kristo”?
JEHOVA NGAI nĩ athũire waganu wa mũthemba o wothe. (Thoma Thaburi 5:4-6.) Kwoguo no mũhaka akorũo nĩ athũire mũno kuona ciana igĩkwo maũndũ moru megiĩ ngomanio tondũ nĩ gĩĩko kĩrĩ magigi. Ithuĩ tondũ tũrĩ Aira a Jehova, nĩ twĩgerekanagia nake harĩ gũthũũra ciĩko icio cia gwĩka ciana maũndũ moru na tũticiĩtĩkagĩria thĩinĩ wa kĩũngano gĩa Gĩkristiano.—Rom. 12:9; Ahib. 12:15, 16.
2 Ũndũ o wothe wĩgiĩ gwĩka ciana maũndũ moru megiĩ ngomanio ũkoragwo ũkĩregana na “watho wa Kristo”! (Gal. 6:2) Nĩ kĩĩ kĩngĩtũma tuuge ũguo? O ta ũrĩa twerutire thĩinĩ wa gĩcunjĩ kĩhĩtũku, watho wa Kristo, nĩ maũndũ mothe marĩa Jesu aarutanire kũgerera ciugo na ciĩko. Watho ũcio ũkoragwo wĩhocetie harĩ wendo na nĩ ũtetagĩra kĩhooto. Tondũ Akristiano a ma matongoragio nĩ watho ũcio, mendaga gwĩkĩra ciana maũndũ na njĩra ĩgũtũma ciigue irĩ na ũgitĩri na ciendetwo biũ. No andũ arĩa mekaga ciana maũndũ moru megiĩ ngomanio makoragwo matongoretio nĩ mwĩyendo na ũndũ ũcio ũtũmaga ciana cigue itarĩ na ũgitĩri na itendetwo.
3 Ũndũ wa kĩeha nĩ atĩ, ũhoro wĩgiĩ ciana gwĩkwo maũndũ moru megiĩ ngomanio ũtheremete kũndũ guothe thĩinĩ wa thĩ, na nginya Akristiano a ma nĩ mahutĩtio nĩ ũndũ ũcio. Nĩkĩ? Nĩ tondũ “andũ aganu na arĩa metuaga ũrĩa matarĩ” nĩ aingĩ, na amwe ao no makorũo mehithanĩtie thĩinĩ wa kĩũngano. (2 Tim. 3:13) Ningĩ andũ amwe maarĩ thĩinĩ wa kĩũngano nĩ metĩkĩrĩte gũtoorio nĩ merirĩria moru ma mwĩrĩ na mageka ciana maũndũ moru. Rekei twarĩrĩrie nĩkĩ gwĩka ciana maũndũ moru megiĩ ngomanio nĩ rĩhia iritũ. Nĩ tũgũcoka twarĩrĩrie ũrĩa athuri a kĩũngano mekaga rĩrĩa mũndũ kĩũngano-inĩ eka rĩhia iritũ, na ũguo nĩ kuuga nginya gwĩka ciana maũndũ moru, na ũrĩa aciari mangĩgitĩra ciana ciao. *
NĨ RĨHIA IRITŨ MŨNO
4-5. Nĩkĩ gwĩka mwana maũndũ moru nĩ rĩhia kũmwerekera?
4 Ũhoro wĩgiĩ ciana gwĩkwo maũndũ moru nĩ ũthumbũraga andũ ihinda iraihu mũno. Ũndũ ũcio ũtuurithagia mũndũ ũrĩa wĩkĩtwo gĩĩko kĩu o hamwe na andũ angĩ arĩa mamũrũmbũyagia, ta andũ a famĩlĩ, na aarĩ na ariũ a Ithe witũ. Gwĩka mwana maũndũ moru megiĩ ngomanio nĩ rĩhia iritũ mũno.
5 Nĩ rĩhia kwerekera ũrĩa wĩkĩtwo maũndũ moru. * Gũtũma mũndũ ũngĩ aigue ruo rwa ngoro na anyarirĩke nĩ rĩhia. O ta ũrĩa tũkoona thĩinĩ wa gĩcunjĩ kĩrĩa kĩrũmĩrĩire, mũndũ ũrĩa wĩkĩte mwana maũndũ moru megiĩ ngomanio, atũmaga mwana ũcio anyarirĩke na njĩra nene mũno. Atũmaga mwana ũcio age kwĩhoka andũ rĩngĩ na akaigua atarĩ na ũgitĩri. No mũhaka tũgitĩre ciana kuumana na gĩĩko kĩu kĩa waganu, na tũũmĩrĩrie ciana iria ciĩkĩtwo maũndũ ta macio na tũciteithie.—1 Thes. 5:14.
6-7. Nĩkĩ gwĩka mwana maũndũ moru nĩ rĩhia kwerekera kĩũngano na thirikari?
6 Nĩ rĩhia kwerekera kĩũngano. Mũndũ thĩinĩ wa kĩũngano angĩka mwana maũndũ moru nĩ acambithagia kĩũngano. (Mat. 5:16; 1 Pet. 2:12) Ũcio nĩ ũndũ ũtarĩ mwega o na hanini tondũ aarĩ na ariũ a Ithe witũ aingĩ nĩ ‘mararũa mbaara nene ya wĩtĩkio.’ (Jud. 3) Tũtiĩtĩkagĩria andũ arĩa mekaga ciĩko njũru matekwĩrira mathiĩ na mbere gũikara kĩũngano-inĩ tondũ nĩ macambithagia rĩĩtwa rĩega rĩa kĩũngano.
7 Nĩ rĩhia kwerekera thirikari. Akristiano nĩ magĩrĩirũo ‘gwathĩkagĩra athani arĩa anene.’ (Rom. 13:1) Tuonanagia atĩ nĩ tũrathĩkĩra thirikari na njĩra ya gwathĩkĩra mawatho marĩa ciigĩte. Mũndũ thĩinĩ wa kĩũngano angiuna watho wa thirikari na njĩra ya gwĩka mwana maũndũ moru megiĩ ngomanio, angĩkorũo akĩhĩtĩria thirikari. (Ringithania Atũmwo 25:8.) O na gũtuĩka wĩra wa athuri ti kũherithia mũndũ rĩrĩa aga gwathĩkĩra watho wa thirikari, matingĩgirĩrĩria mũndũ wĩkĩte maũndũ moru kũherithio nĩ thirikari. (Rom. 13:4) Mũndũ ũrĩa wehia agethaga kĩrĩa ahandĩte.—Gal. 6:7.
8. Jehova aiguaga atĩa igũrũ rĩgiĩ mũndũ kũhĩtĩria mũndũ ũrĩa ũngĩ?
8 Ũndũ ũrĩa mũũru mũno nĩ atĩ nĩ rĩhia kwerekera Ngai. (Thab. 51:4) Rĩrĩa mũndũ arahĩtĩria mũndũ ũrĩa ũngĩ akoragwo akĩhĩtĩria Jehova. Ta wĩcirie ngerekano ĩmwe kuuma Watho-inĩ ũrĩa Ngai aaheete Aisiraeli. Watho woigĩte atĩ mũndũ angĩaiyire kĩndũ kĩa mũndũ ũrĩa ũngĩ kana amũkungie wara, angĩakorirũo ‘aagĩte wĩhokeku harĩ Jehova.’ (Alaw. 6:2-4) Gũkĩrĩ ũguo-rĩ, mũndũ thĩinĩ wa kĩũngano angĩka mwana maũndũ moru megiĩ ngomanio, kũu nĩ kwaga wĩhokeku harĩ Ngai tondũ nĩ gũtunya atunya mwana ũcio ũgitĩri wake. Mũndũ ũcio akoragwo acambithĩtie rĩĩtwa rĩa Jehova na gĩkĩro kĩnene mũno. Nĩkĩo nĩ twagĩrĩirũo kũregana biũ na ciĩko cia gwĩka ciana maũndũ moru tondũ nĩ mehia marĩ magigi mbere ya Ngai.
9. Ithondeka rĩa Jehova rĩandĩkĩte ũhoro ũrĩkũ kwa ihinda rĩa mĩaka mĩingĩ? Na rĩandĩkĩte ũhoro ũcio nĩkĩ?
9 Kwa ihinda rĩa mĩaka mĩingĩ, ithondeka rĩa Jehova nĩ rĩandĩkĩte ũhoro mũingĩ wa Kĩĩmaandĩko wĩgiĩ ciana gwĩkwo maũndũ moru. Kwa ngerekano, icunjĩ itiganĩte thĩinĩ wa Mũrangĩri na Amkeni! nĩ ciarĩrĩirie ũrĩa andũ arĩa manekwo maũndũ moru megiĩ ngomanio mangĩhiũrania na ruo rwa ngoro, na ũrĩa andũ angĩ mangĩmateithia na mamekĩre ngoro, na ũrĩa aciari mangĩgitĩra ciana ciao. Ningĩ athuri a kĩũngano nĩ maheetwo ũtaaro mũingĩ wa Kĩĩmandĩko wĩgiĩ ũrĩa mangĩka rĩrĩa mũndũ eka mwana maũndũ moru. Ithondeka no rĩrathiĩ na mbere kũheana motaaro megiĩ ũrĩa athuri a kĩũngano magĩrĩirũo gwĩka rĩrĩa marahiũrania na ũndũ ũcio. Nĩkĩ? Nĩgetha rĩtigĩrĩre atĩ athuri nĩ marahiũrania na ũndũ ũcio kũringana na watho wa Kristo.
ŨRĨA ATHURI MEKAGA RĨRĨA MŨNDŨ EKA RĨHIA IRITŨ
10-12. (a) Nĩ ũndũ ũrĩkũ athuri maririkanaga rĩrĩa marahiũrania na ũndũ o wothe wĩgiĩ mehia maritũ? Na meciragia mũno ũhoro wĩgiĩ maũndũ marĩkũ? (b) Kũringana na Jakubu 5:14, 15, athuri merutanagĩria gwĩka atĩa?
10 Rĩrĩa athuri marahiũrania na ũndũ o wothe wĩgiĩ mehia maritũ, nĩ maririkanaga atĩ kũringana na watho wa Kristo merĩgagĩrĩrũo mekĩre ng’ondu maũndũ na njĩra ya wendo na meke maũndũ marĩa magĩrĩire na ma kĩhooto maitho-inĩ ma Ngai. Nĩ ũndũ ũcio, nĩ meciragia maũndũ matiganĩte rĩrĩa manyita riboti ĩgiĩ mũndũ wĩkĩte rĩhia iritũ. Ũndũ ũrĩa athuri marũmbũyagia mũno nĩ gũtigĩrĩra atĩ rĩĩtwa rĩa Ngai rĩtinahakwo gĩko. (Alaw. 22:31, 32; Mat. 6:9) Ningĩ ũndũ ũngĩ ũrĩa marũmbũyagia mũno nĩ ũhoro wĩgiĩ ũgima wa kĩĩroho wa aarĩ na ariũ a Ithe witũ arĩa angĩ kĩũngano-inĩ na gũteithia arĩa mekĩtwo ũndũ ũcio mũũru.
11 Ningĩ, angĩkorũo ũrĩa wĩkĩte rĩhia iritũ arĩ thĩinĩ wa kĩũngano na nĩ erirĩte, athuri nĩ mageragia kũmũteithia athondeke rĩngĩ ũrata wake na Jehova. (Thoma Jakubu 5:14, 15.) Mũkristiano angĩtoorio nĩ merirĩria moru na eke mehia maritũ nĩ kuonania nĩ mũrwaru kĩĩroho. Ũndũ ũcio ũronania atĩ ũrata wake na Jehova ti mwega. * Athuri a kĩũngano no maringithanio na mandagĩtarĩ. Nĩ merutanagĩria gũteithia “mũndũ ũcio mũrwaru kana ũcio wĩhĩtie ahone.” Ũtaaro wao wa Kĩĩmandĩko no ũteithie mũndũ ũcio athondeke rĩngĩ ũrata wake hamwe na Ngai, no ũndũ ũcio ũngĩhoteka tu angĩkorũo mũndũ ũcio nĩ erirĩte biũ kuuma ngoro.—Atũm. 3:19; 2 Kor. 2:5-10.
12 Ũhoro wa ma nĩ atĩ, athuri nĩ mehokeirũo wĩra mũritũ. Nĩ marũmbũyagia mũno ng’ondu iria mehokeirũo nĩ Ngai. (1 Pet. 5:1-3) Mendaga aarĩ na ariũ a Ithe witũ maigue marĩ na ũgitĩri marĩ thĩinĩ wa kĩũngano. Nĩ ũndũ ũcio, matirĩaga marĩĩgu rĩrĩa maigua riboti ĩgiĩ mũndũ wĩkĩte rĩhia iritũ ta gwĩka mwana maũndũ moru megiĩ ngomanio. Hihi mekaga atĩa? Rekei twĩcirie ũhoro wa ciũria iria irĩ kĩambĩrĩria-inĩ gĩa kĩbungo gĩa 13, 15, na 17.
13-14. Hihi athuri nĩ mathĩkagĩra watho wa thirikari ũhoro-inĩ wĩgiĩ gũthitanga mũndũ kũratuĩka nĩ ekĩte mwana maũndũ moru? Taarĩria.
13 Hihi athuri nĩ mathĩkagĩra watho wa thirikari ũhoro-inĩ wĩgiĩ gũthitanga mũndũ kũratuĩka nĩ ekĩte mwana maũndũ moru? Ĩĩ. Kũngĩkorũo na mawatho ta macio, athuri nĩ merutanagĩria gwathĩkĩra watho wa thirikari wĩgiĩ gũthitanga mũndũ kũratuĩka atĩ nĩ ekĩte mwana maũndũ moru. (Rom. 13:1) Mawatho ta macio matireganĩte na watho wa Ngai. (Atũm. 5:28, 29) Kwoguo athuri mangĩrũo atĩ kũrĩ mũndũ wĩkĩte mwana maũndũ moru, nĩ merutanagĩria gwĩka o na ihenya kũhoya ũteithio wabici-inĩ ya rũhonge nĩguo mamenye ũrĩa mangĩathĩkĩra mawatho megiĩ gũthitanga ũndũ ũcio.
14 Athuri makĩaria na arĩa mekĩtwo maũndũ moru, aciari ao, na andũ angĩ arĩa mangĩkorũo moĩ ũndũ ũcio, nĩ mamaririkanagia atĩ marĩ na wĩyathi wa gũthitanga mũndũ ũcio. No rĩrĩ, ĩ angĩkorũo mũndũ ũrĩa wĩkĩte ũndũ ũcio arĩ thĩinĩ wa kĩũngano na ũndũ ũcio rĩu nĩ ũmenyekete itũũra-inĩ? Hihi Mũkristiano ũrĩa warehire ũhoro nĩ agĩrĩirũo kũigua ta acambithĩtie rĩĩtwa rĩa Jehova? Aca. Mũndũ ũcio wĩkĩte mwana maũndũ moru nĩwe ũcambithĩtie Jehova.
15-16. (a) Kũringana na 1 Timotheo 5:19, kũbataranagia aira matanyihĩire erĩ nĩkĩ nĩguo athuri a kĩũngano mathondeke kamĩtĩ ya ciira? (b) Athuri a kĩũngano mekaga atĩa rĩrĩa mamenya atĩ kũrĩ mũndũ thĩinĩ wa kĩũngano kũratuĩka nĩ ekĩte mwana maũndũ moru?
15 Kũbataranagia aira matanyihĩire erĩ nĩkĩ nĩguo athuri a kĩũngano mamenye kana mũndũ nĩ ekĩte rĩhia iritũ? Nĩ tondũ Bibilia yonanĩtie atĩ ũguo nĩguo kwagĩrĩire nĩguo maũndũ matuo na njĩra ya kĩhooto. Mũndũ angĩkorũo ekĩte rĩhia iritũ, nowe nĩ aroiga ndekĩte, nĩ kũbataranagia aira erĩ a kuonania ũndũ ũcio nĩ wĩkĩkĩte nĩgetha athuri mahote gũthondeka kamĩtĩ ya ciira. (Gũcok. 19:15; Mat. 18:16; thoma 1 Timotheo 5:19.) Hihi ũguo nĩ kuuga atĩ angĩkorũo nĩ kũratuĩka mũndũ nĩ ekĩte mwana maũndũ moru no mũhaka gũkorũo na aira erĩ nĩgetha mũndũ ũcio athitangwo kũrĩ thirikari? Aca. Mũndũ ũcio oinĩte watho wa thirikari na watho ũcio ndũbataraga gũkorũo na aira erĩ atĩ nĩgetha mũndũ kũratuĩka nĩ ekĩte ihĩtia athitangwo.
16 Athuri mangĩrũo ũhoro wĩgiĩ mũndũ ũrĩ thĩinĩ wa kĩũngano kũratuĩka atĩ nĩ ekĩte mwana maũndũ moru, nĩ merutanagĩria kũrũmĩrĩra ũrĩa watho wa thirikari uugĩte igũrũ rĩgiĩ gũthitanga ũndũ ũcio, na thutha-inĩ mageka ũthuthuria wa Kĩĩmandĩko kũmenya kana nĩ megũthondeka kamĩtĩ ya ciira. Mũndũ ũrĩa kũratuĩka nĩ ekĩte rĩhia angĩkaana oige ndekĩte, athuri macokaga mageta andũ angĩ arĩa mangĩkorũo moĩ ũhoro wĩgiĩ ũndũ ũcio wahaanĩkire. Angĩkorũo mũndũ ũrĩa ũrehete ũhoro na mũndũ ũngĩ ũmwe marĩ na ũira ũronania wega atĩ mũndũ ũcio nĩ ekĩte mwana maũndũ moru kana aneka ũguo ihinda ihĩtũku, athuri rĩu no mathondeke kamĩtĩ ya ciira. * Kũngĩkorũo gũtirĩ na mũira wa kerĩ ti kuuga atĩ mũndũ ũrĩa ũrehete ũhoro araria maheeni. O na kũngĩkorũo gũtirĩ na aira erĩ a kuonania atĩ mũndũ ũcio nĩ ekĩte rĩhia iritũ, athuri nĩ mamenyaga atĩ mũndũ ũcio no gũkorũo nĩ ekĩte ũndũ mũũru mũno ũgatuurithia andũ. Athuri nĩ mathiaga na mbere kũũmĩrĩria na gũteithĩrĩria mũndũ ũrĩa ũngĩkorũo ekĩtwo ũndũ wa kũmũtuurithia. Ningĩ athuri nĩ mathiaga na mbere kũmenyerera kĩũngano kuumana na ũndũ o wothe mũũru ũngĩrehwo nĩ mũndũ ũcio kũratuĩka nĩ ekĩte mwana maũndũ moru.—Atũm. 20:28.
17-18. Taarĩria itemi rĩa kamĩtĩ ya ciira nĩ rĩrĩkũ.
17 Itemi rĩa kamĩtĩ ya ciira nĩ rĩrĩkũ? Kiugo “ciira” gĩtironania atĩ athuri nĩo megũtua kana mũndũ ũrĩa wĩkĩte mwana maũndũ moru nĩ ekũherithio nĩ thirikari nĩ ũndũ wa kuuna watho. Athuri matiingagĩrĩra ũrĩa thirikari ĩgũtua ciira, no marekaga thirikari ĩtue ũrĩa ĩkuona kwagĩrĩire rĩrĩa mũndũ oina watho. (Rom. 13:2-4; Tit. 3:1) Ciira ũrĩa athuri matuaga nĩ kana mũndũ ũcio nĩ egũthiĩ na mbere gũikara thĩinĩ wa kĩũngano.
18 Wĩra wa athuri arĩa makoragwo kamĩtĩ-inĩ ya ciira, nĩ gũtua maũndũ marĩa mahutanĩtie na ũrata wa mũndũ ũcio na Jehova na athathaiya arĩa angĩ. Mahũthagĩra Maandĩko gũtua kana mũndũ ũcio nĩ erirĩte kana ca. Angĩkorũo ndarenda kwĩrira, nĩ eheragio kĩũngano-inĩ na gũkanĩrĩrũo atĩ ti Mũira wa Jehova rĩngĩ. (1 Kor. 5:11-13) Angĩkorũo nĩ erirĩte, no age kweherio kĩũngano-inĩ. O na kũrĩ ũguo, athuri nĩ mamũmenyithagia atĩ no age kũheo mĩeke o yothe ya ũtungata kĩũngano-inĩ kwa ihinda rĩa mĩaka mĩingĩ kana ũtũũro-inĩ wake wothe. Nĩ ũndũ wa kũrũmbũiya ciana, athuri no mere aciari thĩinĩ wa kĩũngano marĩ mũndũ ũmwe ũmwe mamenyerere ciana ciao kuumana na mũndũ ũcio. Rĩrĩa athuri mareka ũguo, nĩ magĩrĩirũo kũmenyerera nĩguo ũhoro wa mwana ũrĩa wĩkĩtwo maũndũ moru ũikare ũrĩ hitho.
ŨRĨA ŨNGĨGITĨRA CIANA CIAKU
Aciari makĩruta ciana ciao ũhoro ũrĩa ũciagĩrĩire wĩgiĩ ngomanio, ĩrĩ njĩra ya gũcigitĩra kuumana na gwĩkwo maũndũ moru. Nĩguo mahote gwĩka ũguo, marahũthĩra indo iria iheanĩtwo nĩ ithondeka rĩa Ngai. (Rora kĩbungo gĩa 19-22)
19-22. Nĩ maũndũ marĩkũ aciari mangĩka nĩguo magitĩre ciana ciao? (Rora mbica ngothi-inĩ.)
19 Nĩ a mehokeirũo wĩra wa kũgitĩra ciana nĩguo itigathũkio? Nĩ aciari. * Ciana ciaku nĩ kĩheo kuuma kũrĩ Ngai, na “nĩ igai kuuma kũrĩ Jehova.” (Thab. 127:3) Wee nĩwe Jehova aheete wĩra wa kũgitĩra ciana ciaku. Ũngĩka atĩa nĩguo ũgitĩre ciana ciaku itigekwo maũndũ moru?
20 Wa mbere, thuthuria ũhoro wĩgiĩ ciana gwĩkwo maũndũ moru. Thuthuria ũmenye nĩ andũ a mũthemba ũrĩkũ mekaga ciana maũndũ moru, na wara ũrĩa mahũthagĩra gũciheenereria. Geria gwĩciria kũrĩa ũgwati ũngiumĩra na andũ arĩa mangĩkorũo marĩ ũgwati harĩ ciana. (Thim. 22:3; 24:3) Ririkanaga atĩ, maita maingĩ andũ arĩa mekaga ciana maũndũ moru makoragwo marĩ andũ arĩa ciana icio ciũĩ na ciĩhokete.
21 Wa kerĩ, aranagĩriai mumĩranĩtie ngoro na ciana ciaku. (Gũcok. 6:6, 7) Ũguo nĩ kuuga atĩ nĩ wagĩrĩirũo gũthikagĩrĩria ciana ciaku na kinyi. (Jak. 1:19) Ririkanaga atĩ kaingĩ ciana iria ciĩkagwo maũndũ moru nĩ ciĩtigagĩra kuuga. Cionaga ta andũ mekuona ta arĩ itherũ, kana igetigĩra nĩ ũndũ wa gũkorũo ciĩrĩtwo nĩ ũrĩa ũciĩkĩte maũndũ moru itikagerie kuuga. Ũngĩona ta harĩ ũndũ ũtarathiĩ wega harĩ mwana waku, mũrie ciũria na njĩra ya ũhooreri, nĩguo agũtaarĩrie na ũmũthikĩrĩrie ũtekũmũtinia.
22 Wa gatatũ, ruta mwana waku. Marute maũndũ marĩa maringaine na mĩaka yao megiĩ ngomanio. Marute ũrĩa magĩrĩirũo kuuga na gwĩka mũndũ angĩgeria kũmahutahutia na njĩra ĩtagĩrĩire. Hũthĩra ũhoro ũrĩa ithondeka rĩa Jehova rĩheanĩte wĩgiĩ kũgitĩra ciana ciaku.—Rora gathandũkũ “ Wĩrute Maũndũ na Ũrute Ciana Ciaku.”
23. Tuonaga atĩa ũhoro wa ciana gwĩkwo maũndũ moru?
23 Tũrĩ Aira a Jehova, tuonaga ũhoro wa ciana gwĩkwo maũndũ moru ũrĩ mehia maritũ na marĩ magigi. Tondũ ciũngano citũ itongoragio nĩ watho wa Kristo, tũtihithagĩrĩra andũ arĩa mekaga ciana maũndũ moru atĩ nĩguo matikone moimĩrĩro ma ciĩko ciao njũru. No tũngĩka atĩa nĩguo tũteithie aarĩ na ariũ a Ithe witũ arĩa manekwo maũndũ ta macio moru? Gĩcunjĩ kĩrĩa kĩrũmĩrĩire nĩ kĩarĩrĩirie ũndũ ũcio.
RWĨMBO NA. 103 Arĩithi nĩ Iheo
^ kĩb. 5 Gĩcunjĩ gĩkĩ gĩkwarĩrĩria ũrĩa ciana ingĩgitĩrũo nĩguo itigekwo maũndũ moru megiĩ ngomanio. Nĩ tũkwĩruta ũrĩa athuri magitagĩra kĩũngano na ũrĩa aciari mangĩgitĩra ciana ciao.
^ kĩb. 3 GŨTAARĨRIA CIUGO: Gwĩka ciana maũndũ moru megiĩ ngomanio nĩ rĩrĩa mũndũ mũgima angĩhũthĩra mwana ũũru akĩenda kũhingia merirĩria make ma ngomanio. Ũndũ ũcio ũhutĩtie maũndũ ta ngomanio; kũingĩra mũndũ ũrĩa ũngĩ na thutha kana kanua; kũhambata ciĩga cia ũciari, na gũkũ thutha, nyondo; kana ciĩko ingĩ ta icio cia waganu. O na gũtuĩka tũirĩtu kaingĩ nĩtuo twĩkagwo maũndũ macio, o na tũmwana tũingĩ nĩ twĩkagwo maũndũ ta macio. Ningĩ o na gũtuĩka arũme kaingĩ nĩo mekaga ciĩko icio, nĩ kũrĩ atumia amwe mekaga maũndũ ta macio.
^ kĩb. 5 GŨTAARĨRIA CIUGO: Thĩinĩ wa gĩcunjĩ gĩkĩ na kĩrĩa kĩrũmĩrĩire, ciugo “ũrĩa wĩkĩtwo maũndũ moru” iraria ũhoro wa mũndũ wanekwo maũndũ moru megiĩ ngomanio arĩ mwana. Tũrahũthĩra ciugo icio kuonania wega atĩ mwana ũcio nĩ ekĩtwo ũndũ mũũru na akahũthĩrũo ũũru, na atĩ we ndarĩ na mahĩtia.
^ kĩb. 11 Mũndũ ndagĩrĩirũo kwĩgwatia atĩ ekĩte mehia maritũ atĩ tondũ ndararĩ na ũrata mwega na Jehova. We mwene nĩwe ũngĩũrio nĩ ũndũ wa mahĩtia make na nĩ agaacirithio nĩ Jehova nĩ ũndũ wamo.—Rom. 14:12.
^ kĩb. 16 Mwana ndagĩrĩirũo gũkorũo ho rĩrĩa athuri mararia na ũrĩa kũratuĩka nĩ amwĩkĩte maũndũ moru. Mũciari kana mũndũ ũngĩ ũrĩa mwana araigua arĩ na wĩyathi wa kwaria nake no athikĩrĩrie ũrĩa mwana aroiga gwathire na mbere, acoke arie na athuri arĩ we nĩgetha mwana ndakae kuongererũo ruo rwa ngoro.
^ kĩb. 19 Ũhoro ũrĩa ũrerekerio harĩ aciari, noguo ũngĩhũthĩka harĩ andũ angĩ arĩa mangĩkorũo makĩrera ciana itarĩ ciao.
