1. Jehova atũheete kĩĩ?

JEHOVA nĩ atũheete wĩyathi wa gwĩthuurĩra ũrĩa tũkwenda gũtũũra. Nĩ atũrutaga ũrĩa tũngĩtua matua mega, na agatũteithia kũgaacĩra rĩrĩa twatua matua maramũkenia. (Thab. 119:173) Nĩ ũndũ ũcio, rĩrĩa twahũthĩra ũũgĩ ũrĩa umaga Kiugo-inĩ kĩa Ngai nĩ tũhotaga gũtua matua mega.—Ahib. 5:14.

2. Nĩ ũritũ ũrĩkũ tũngĩcemania naguo thutha wa gũtua itua?

² No o na tũngĩtua itua rĩa ũũgĩ, no ũkorũo ũrĩ ũndũ mũritũ kũrĩkia ũndũ ũrĩa twambĩrĩirie gwĩka. Ta wĩcirie ngerekano ici: Mũrũ wa Ithe witũ mwĩthĩ agatua itua rĩa gũthoma Bibilia yothe. Ageka wega ciumia cigana ũna no agacoka agatiga. Mwarĩ wa Ithe witũ agatua itua rĩa gũtungata arĩ painia wa hĩndĩ ciothe, no agaikara agĩtĩragia ihinda rĩrĩa ekwambĩrĩria. Kĩama gĩa athuri gĩkaiguanĩra kuongongerera maceera ma ũrĩithi harĩ aarĩ na ariũ a Ithe witũ kĩũngano-inĩ, no thutha wa mĩeri mĩingĩ gĩgakorũo gĩtirĩ kĩrambĩrĩria gwĩka ũguo. Maũndũ macio mothe nĩ ngũrani, no marĩ na ũndũ ũmwe ũhaanaine. Matua macio nĩ maatuirũo no matiahingirio. Akristiano a karine ya mbere thĩinĩ wa Korintho nĩ maacemanirie na ũritũ ta ũcio. Rekei twarĩrĩrie ũrĩa tũngĩĩruta kuumana nao.

3. Nĩ itua rĩrĩkũ Akorintho maatuire? No gwathiire atĩa?

³ Kĩndũ mwaka wa 55 Mahinda Maitũ, Akorintho nĩ maatuire itua rĩa bata. Nĩ maamenyire atĩ ariũ a Ithe wao thĩinĩ wa Jerusalemu na Judea nĩ maageragĩra moritũ na ũthĩni, na atĩ ciũngano ingĩ nĩ ciacokanagĩrĩria mbeca cia kũmateithia. Akorintho nĩ maatindĩkirũo nĩ tha na ũtaana, na nĩ ũndũ ũcio  magĩtua itua rĩa gũteithia ũndũ-inĩ ũcio na makĩũria mũtũmwo Paulo ũrĩa mangĩateithirie. Mũtũmwo Paulo nĩ aatũmĩire kĩũngano kĩu ũtongoria ũrĩa kĩngĩarũmĩrĩire na akĩamũra Tito ateithĩrĩrie harĩ gũcokanĩrĩria mbeca. (1 Kor. 16:1; 2 Kor. 8:6) O na kũrĩ ũguo, mĩeri ĩigana ũna thutha ũcio Paulo nĩ aamenyire atĩ Akorintho matiarutĩte mĩhothi ĩrĩa mooigĩte nĩ mekũruta. Nĩ ũndũ ũcio, no kũhoteke kĩheo kĩao gĩtingĩakorirũo kĩhaarĩirio ihinda rĩrĩa rĩagĩrĩire nĩguo gĩtwarũo Jerusalemu hamwe na mĩhothi ya ciũngano icio ingĩ.—2 Kor. 9:4, 5.

4. O ta ũrĩa 2 Akorintho 8:7, 10, 11 yonanĩtie-rĩ, Paulo eekĩrire ngoro Akorintho meke atĩa?

⁴ Akorintho nĩ maatuire itua rĩega, na Paulo nĩ aamagathĩrĩirie nĩ ũndũ wa wĩtĩkio wao mũrũmu o na wendi wao wa kuonania ũtaana. No ningĩ nĩ aamekĩrire ngoro marĩkie ũndũ ũrĩa maambĩrĩirie gwĩka. (Thoma 2 Akorintho 8:7, 10, 11.) Ũndũ ũcio ũratuonia atĩ o na Akristiano ehokeku no maritũhĩrũo kũhingia ũrĩa matuĩte gwĩka.

5. Tũkwarĩrĩria ciũria irĩkũ?

⁵ O ta Akorintho, rĩmwe na rĩmwe no tũritũhĩrũo kũhingia maũndũ marĩa tũtuĩte gwĩka. Nĩkĩ? Nĩ ũndũ wa kwaga gũkinyanĩra, no twĩkore tũgĩtĩria ihinda rĩrĩa tũbangĩte gwĩka ũndũ. Ningĩ maũndũ materĩgĩrĩirũo mangĩkĩka no matũme tũremwo kũhingia ũndũ ũrĩa tũtuĩte gwĩka. (Koh. 9:11; Rom. 7:18) Tũngĩhota atĩa gũthuthuria itua rĩna tũtuĩte nĩgetha tuone kana nĩ tũrabatara kũrĩcenjia? Na tũngĩhota atĩa gũtigĩrĩra atĩ nĩ twarĩkia ũndũ ũrĩa twambĩrĩirie?

6. Nĩkĩ no tũbatare kũgarũra itua rĩna?

⁶ Nĩ harĩ matua mamwe ma bata tũtangĩcenjia. Kwa ngerekano, nĩ tũrũmagia itua ritũ rĩa gũtungatĩra Jehova, na tũkoragwo tũtuĩte itua irũmu rĩa gũtũũra tũrĩ ehokeku harĩ ũrĩa tũhikanĩtie nake. (Mat. 16:24; 19:6) O na kũrĩ ũguo, nĩ harĩ matua mangĩbatara kũgarũrũo. Nĩkĩ? Tondũ maũndũ nĩ macenjagia. Nĩ makinya marĩkũ mangĩtũteithia gũtua matua mega o ũrĩa kwahoteka?

7. Twagĩrĩirũo kũhoya tũheo kĩĩ, na nĩkĩ?

⁷ Hoya ũheo ũũgĩ. Jehova kũgerera roho aateithirie Jakubu kwandĩka ũũ: “Mũndũ o na ũrĩkũ wanyu angĩkorũo atarĩ na ũũgĩ, nĩ athiĩ na mbere kũhoya Ngai . . ., nĩ gũkorũo Ngai aheaga andũ othe arĩ na ũtaana.” (Jak. 1:5) Ithuothe nĩ tũkoragwo ‘tũtarĩ na ũũgĩ’ na njĩra ĩmwe kana ĩrĩa ĩngĩ. Kwoguo wĩhokage Jehova hĩndĩ ĩrĩa ũratua itua, na rĩrĩa ũreciria gũcenjia itua rĩu. Weka ũguo, Jehova nĩ arĩgũteithagia gũtua matua mega.

8. Nĩ ũthuthuria ũrĩkũ twagĩrĩirũo gwĩka mbere ya gũtua itua?

⁸ Ĩka ũthuthuria na kĩyo. Thomaga Kiugo kĩa Ngai na mabuku ma ithondeka rĩa Jehova, na waragie na andũ arĩa mangĩkũhee ũtaaro wa ũũgĩ. (Thim. 20:18) Gwĩka ũthuthuria ta ũcio nĩ kwa bata mbere ya gũtua itua kana nĩ ũgũcenjia wĩra, nĩ ũgũthama, kana rĩrĩa ũrathuura ũgũthomera ũndũ ũrĩkũ ũngĩgũteithia kũhingia mabataro maku ũgĩtungatĩra Jehova.

9. Gũkorũo tũrĩ ehokeku harĩ ithuĩ ene kũngĩkorũo na ũguni ũrĩkũ?

⁹ Wĩcũranie kĩrĩa kĩratũma ũtue itua rĩna. Jehova nĩ aroraga kĩrĩa kĩratũma twĩke ũndũ mũna. (Thim. 16:2) Endaga tũkorũo tũrĩ ehokeku maũndũ-inĩ mothe. Kwoguo rĩrĩa tũratua matua, nĩ twagĩrĩirũo gũkorũo tũrĩ ehokeku harĩ ithuĩ ene, na harĩ andũ arĩa angĩ. Tũngĩaga gũkorũo tũrĩ ehokeku biũ, no tũremwo kũhingia itua ritũ. Kwa ngerekano, mũrũ wa Ithe witũ mwĩthĩ no atue itua rĩa gũtuĩka painia wa hĩndĩ ciothe. No thutha wa ihinda, akaremwo kũhingia mathaa na ũndũ ũcio ũgatũma age gũkenera ũtungata wake. No gũkorũo hihi eeciragia atĩ muoroto wake mũnene agĩtuĩka  painia warĩ gũkenia Jehova. No rĩrĩ, na githĩ to kũhoteke atĩ muoroto wake mũnene warĩ gũkenia aciari ake kana mũndũ ũngĩ?

10. Nĩ ũndũ ũrĩkũ ũngĩteithia mũndũ gwĩka mogarũrũku?

¹⁰ Ta wĩcirie ũhoro wa mũrutwo wa Bibilia ũtuĩte itua rĩa gũtiga kũnyua thigara. Akaga kũnyua ihinda rĩa kiumia kĩmwe kana igĩrĩ o na gũtuĩka ti ũndũ mũhũthũ harĩ we, no agacoka akambĩrĩria kũnyua o rĩngĩ. No thutha-inĩ akahota gũtiga biũ kũnyua thigara! Wendo wake harĩ Jehova na kwenda kũmũkenia ikamũteithia gũtooria mũtugo ũcio.—Kol. 1:10; 3:23.

11. Nĩkĩ nĩ wagĩrĩirũo kũbanga maũndũ marĩa ũrenda gwĩka?

¹¹ Banga maũndũ marĩa ũrenda gwĩka. Angĩkorũo nĩ ũbangĩte maũndũ marĩa ũrenda gwĩka, no ũkorũo ũrĩ ũndũ mũhũthũ kũmahingia. Kwa ngerekano, no ũtue itua rĩa gũthomaga Bibilia kaingĩ. No angĩkorũo ndũrĩ na mũtaratara mũna wa gwĩka ũguo, no wage kũhingia muoroto waku. * Athuri a kĩũngano nao no makorũo matuĩte itua rĩa gwĩkaga maceera ma ũrĩithi kaingĩ, no thutha wa ihinda magakora matirĩ mareka ũguo. Nĩguo mahote kũhingia itua rĩao, nĩ magĩrĩirũo kwĩyũria ciũria ta ici: “Hihi nĩ twambĩte kũmenya nĩ aarĩ na ariũ a Ithe witũ arĩkũ marabatara iceera rĩa ũrĩithi? Hihi nĩ tũtuĩte nĩ rĩ tũkũmaceerera?”

12. Nĩ ũndũ ũrĩkũ tũngĩbatara gwĩka, na nĩkĩ?

¹² Korũo na ũigananĩru. Tũtikoragwo na mahinda, indo, kana hinya wa gwĩka maũndũ marĩa mothe tũngĩenda gwĩka. Kwoguo koragwo na ũigananĩru. Rĩmwe na rĩmwe, no ũbatare gũcenjia itua watuĩte ũngĩona atĩ ndũngĩhota kũrĩhingia. (Koh. 3:6) Ĩ ũngĩthuthuria itua watuĩte, wĩke mogarũrũku marĩa marabatarania, na wone atĩ rĩu no ũhote kũrĩhingia? Reke tuone maũndũ matano mangĩgũteithia kũrĩkia ũndũ ũrĩa wambĩrĩirie.

13. Ũngĩgĩa na hinya atĩa wa kũhingia itua rĩna?

¹³ Hoya ũheo hinya wa gwĩka maũndũ. Ngai no akũhe “ũhoti wa gwĩka maũndũ” na kũhingia matua maku. (Afil. 2:13) Nĩ ũndũ ũcio, hoyaga Jehova akũhe roho wake mũtheru nĩguo ũkũheage hinya ũrĩa ũrabatara. Thiĩ na mbere kũhoya o na angĩkorũo mahoya maku maroneka ta maroya ihinda magĩgacokio. O ta ũrĩa Jesu ooigire: “Thiĩi na mbere kũhoya, na nĩ mũkũheo [roho mũtheru].”—Luk. 11:9, 13.

14. Ũtaaro ũrĩa ũrĩ thĩinĩ wa Thimo 21:5 ũngĩgũteithia atĩa kũhingia itua rĩaku?

¹⁴ Banga maũndũ marĩa ũrĩrũmagĩrĩra. (Thoma Thimo 21:5.) Nĩguo ũhote kũrĩkia ũndũ ũrĩa ũrenda kwambĩrĩria, nĩ ũbataraga kũbanga maũndũ marĩa ũrĩrũmagĩrĩra. Ũcoke ũrũmĩrĩre maũndũ macio. Ũndũ ũmwe na ũcio, rĩrĩa watua itua, andĩka maũndũ marĩa ũrabatara kũrũmĩrĩra nĩgetha ũrĩhingie. Kũgayania maũndũ manene ũkamahingia marĩ tũmaũndũ tũnini tũnini no gũgũteithie na njĩra hũthũ kuona ũrĩa ũrathiĩ na mbere. Paulo eekĩrire ngoro Akorintho maigage kĩndũ mwanya “mũthenya wa mbere wa o kiumia” handũ ha gweterera nginya rĩrĩa agoka nĩguo monganie mĩhothi. (1 Kor. 16:2) Ningĩ kũgayania maũndũ manene ũkamahingia marĩ tũmaũndũ tũnini tũnini no gũgũteithie kwaga kũigua ũgũmĩirũo mũno.

15. Nĩ ikinya rĩrĩkũ ũngĩoya thutha wa kũbanga ũndũ?

¹⁵ Ũngĩandĩka maũndũ marĩa ũbangĩte gwĩka nĩ ũrĩkoragwo ũrĩ ũndũ mũhũthũ harĩ we kũmahingia. (1 Kor. 14:40) Kwa ngerekano, ciama cia athuri ciĩragwo ithuure mũthuri ũmwe wa kwandĩka matua marĩa kĩama gĩa athuri gĩatua, o hamwe na ũrĩa waheo wĩra  mũna, na ihinda rĩrĩa angĩrĩgĩrĩrũo kũũrĩkia. Athuri arĩa marũmagĩrĩra ũtongoria ũcio, nĩ ũkoragwo ũrĩ ũndũ mũhũthũ harĩ o kũhingia matua mao. (1 Kor. 9:26) O nawe no ũgerie gwĩka ũndũ ta ũcio maũndũ-inĩ maku kĩũmbe. Kwa ngerekano, no wandĩke maũndũ marĩa ũrabatara gwĩka o mũthenya na wandĩke ũndũ ũrĩa ũrenda kwambĩrĩria naguo ũrĩ wa mbere. Ũndũ ũcio no ũgũteithie kũrĩkia ũndũ ũrĩa wambĩrĩria, na kũhingia maũndũ maingĩ ũkĩhũthĩra ihinda inini.

16. Nĩ ũndũ ũrĩkũ ũbataranagia nĩguo mũndũ ahote kũhingia itua rĩake? Aroma 12:11 ĩnyitaga ũndũ ũcio mbaru atĩa?

¹⁶ Wĩrutanĩrie. Kĩyo nĩ kĩbataranagia nĩguo mũndũ ahote kũrũmĩrĩra ũndũ ũrĩa abangĩte na kũũrĩkia. (Thoma Aroma 12:11.) Paulo eerire Timotheo ‘athiĩ na mbere kwĩrutanĩria’ na ‘atũũre ekaga’ ũguo nĩgetha atuĩke mũrutani mwega. Ũtaaro ũcio no ũhũthĩke nginya harĩ mĩoroto ĩngĩ ya kĩĩroho.—1 Tim. 4:13, 16.

17. Tũngĩhũthĩra atĩa ũtaaro wa Aefeso 5:15, 16 harĩ kũhingia itua?

¹⁷ Hũthĩra mahinda maku wega. (Thoma Aefeso 5:15, 16.) Thuura mahinda marĩa ũkũhingia itua rĩaku na ndũgacenjie. Ndũgeterere ihinda rĩa gwĩka ũndũ rĩĩrehe rĩo rĩene, tondũ no kũhoteke ihinda rĩu rĩtigakinya. (Koh. 11:4) Wĩmenyerere ndũgetĩkĩrie maũndũ matarĩ ma bata mũno moe mahinda na hinya waku ũrĩa ũrabatara wa gwĩka maũndũ marĩa ma bata makĩria. (Afil. 1:10) Kũngĩhoteka thuura mahinda marĩa ũtegũthumbũrũo. No ũmenyithie arĩa angĩ atĩ nĩ ũrabatara mahinda ma kũhingia ũndũ ũcio. No woe ikinya rĩa kũhoria thimũ yaku na ũthome ndũmĩrĩri cia thimũ thutha-inĩ. *

18-19. Nĩ ũndũ ũrĩkũ ũngĩgũteithia kwaga gũkua ngoro kũhingia itua rĩaku o na wacemania na moritũ?

¹⁸ Iga meciria maku harĩ moimĩrĩro mega ma itua rĩaku. Moimĩrĩro ma itua rĩaku matariĩ ta kũrĩkia rũgendo. Angĩkorũo nĩ ũrenda biũ gũkinya kũrĩa ũrathiĩ, ũgũthiĩ na mbere na rũgendo o na angĩkorũo ũkũbatara kũhũthĩra njĩra ĩngĩ tondũ ĩrĩa ũkũhũthagĩra nĩ hinge. Ũndũ ũmwe na ũcio, tũngĩiga meciria harĩ moimĩrĩro ma itua ritũ, tũtigũkua ngoro o na twacemania na maũndũ maritũ kana mĩhĩnga.—Gal. 6:9.

¹⁹ Gũtua matua mega ti ũndũ mũhũthũ, na kũhingia matua macio no ũkorũo ũtarĩ ũndũ mũhũthũ. No Jehova no atũteithie atũhe ũũgĩ na hinya ũrĩa tũrabatara nĩguo tũrĩkie ũndũ ũrĩa twambĩrĩirie.