GĨCUNJĨ KĨA WĨRUTI KĨA 42
Ũrĩa Tũngĩteithia Arutwo a Bibilia Makinyĩrĩre Kũbatithio—Gĩcunjĩ gĩa Kerĩ
“Wĩmenyagĩrĩre wee mwene na ũrutani waku.” —1 TIM. 4:16.
RWĨMBO NA. 77 Ũtheri Thĩinĩ wa Thĩ ĩrĩ na Nduma
GĨCUNJĨ-INĨ GĨKĨ *
1. Tũmenyaga atĩa atĩ wĩra wa gũtua andũ arutwo nĩ ũhonokagia mĩoyo?
WĨRA wa gũtua andũ arutwo, nĩ wĩra ũhonokagia mĩoyo. Tũroiga ũguo nĩkĩ? Rĩrĩa Jesu aaheanire watho ũrĩa ũkoragwo thĩinĩ wa Mathayo 28:19, 20, ooigire: “Thiĩi mũgatue andũ arutwo . . . , mũkĩmabatithagia.” Kũbatithio nĩ ũndũ wa bata nĩkĩ? Nĩ tondũ mũndũ ũrenda gũkaahonokio no mũhaka abatithio. Andũ arĩa marenda kũbatithio no mũhaka metĩkie atĩ ũndũ ũrĩa ũgaatũma andũ mahonokio nĩ gũkorũo atĩ Jesu nĩ aakuire nĩ ũndũ witũ na akĩriũkio. Nĩkĩo mũtũmwo Petero eerire Akristiano ũũ: “Ũbatithio, . . . nĩ ũramũhonokia inyuĩ . . . kũgerera kũriũkio kwa Jesu Kristo.” (1 Pet. 3:21) Kwoguo rĩrĩa mũrutwo abatithio nĩ agĩaga na kĩĩrĩgĩrĩro gĩa gũkaahonokio.
2. 2 Timotheo 4:1, 2 yonanagia twagĩrĩirũo gũkorũo tũrĩ arutani mahaana atĩa?
2 Nĩguo tũhote gũtua andũ arutwo nĩ tũrabatara gũkorũo na “ũhoti mwega wa kũrutana.” (Thoma 2 Timotheo 4:1, 2.) Nĩkĩ? Tondũ Jesu aatwathire ũũ: “Thiĩi mũgatue andũ arutwo . . . , mũkĩmarutaga.” Mũtũmwo Paulo ooigire ‘tũtũũre’ tũrutaga wĩra ũcio ‘nĩ gũkorũo tweka ũguo nĩ tũkeehonokia ithuĩ ene na tũhonokie arĩa matũthikagĩrĩria.’ Nĩ ũndũ ũcio, Paulo ooigire, ‘Menyagĩrĩra ũrutani waku.’ (1 Tim. 4:16) Tondũ kũrutana nĩ kũhutanĩtie na wĩra wa gũtua andũ arutwo, twagĩrĩirũo gũtigĩrĩra atĩ ũrutani witũ nĩ mwega biũ.
3. Tũkwarĩrĩria maũndũ marĩkũ gĩcunjĩ-inĩ gĩkĩ megiĩ kũruta andũ Bibilia?
3 Nĩ tũrutaga andũ aingĩ ũhoro wa ma ũrĩa ũrĩ thĩinĩ wa Bibilia. No o ta ũrĩa gĩcunjĩ kĩrĩa kĩhĩtũku kĩoonanirie, muoroto witũ nĩ gũteithia arutwo aingĩ harĩ acio matuĩke arutwo abatithie a Jesu Kristo. Gĩcunjĩ gĩkĩ kĩarĩrĩirie maũndũ mangĩ matano arutani magĩrĩirũo gwĩka nĩguo mateithie arutwo ao makinyĩrĩre kũbatithio.
HŨTHAGĨRA BIBILIA KŨRUTANA
No ũrie mũhunjia ũrĩ na ũmenyeru agũteithie kwagagĩria ũhoti waku wa kũhũthĩra Bibilia ũkĩrutana (Rora kĩbungo gĩa 4-6) *
4. Mwarimũ agĩrĩirũo kwĩgirĩrĩria kwaria mũno rĩrĩa araruta mũndũ Bibilia nĩkĩ? (Ningĩ rora kohoro ka magũrũ-inĩ.)
4 Nĩ twendete maũndũ marĩa tũrutanaga kuuma Kiugo-inĩ kĩa Ngai. Kwoguo no tũigue tũkĩenda kwaria na njĩra ndaihu maũndũ macio twendete. O na kũrĩ ũguo, rĩrĩa mũndũ aratongoria Wĩruti wa Mũrangĩri, Wĩruti wa Bibilia wa Kĩũngano, kana akĩĩruta na mũndũ Bibilia ndagĩrĩirũo kwaria mũno. Nĩguo ũrĩa ũrarutana ahũthĩre Bibilia wega, nĩ agĩrĩirũo kwĩgirĩrĩria gũtaarĩria ũndũ o wothe oĩ wĩgiĩ mũhari mũna wa Bibilia kana ũndũ ũrĩa ũrarĩrĩrio. * (Joh. 16:12) Ta geria kũringithania ũmenyo wa Bibilia ũrĩa warĩ naguo rĩrĩa wabatithirio na ũrĩa ũrĩ naguo rĩu. No kũhoteke hĩndĩ ĩyo woĩ o morutani ma mũthingi. (Ahib. 6:1) Ũhũthĩrĩte mĩaka mĩingĩ kwĩruta maũndũ marĩa ũĩ ũmũthĩ, kwoguo ndũkageragie kũruta mũrutwo waku maũndũ mothe ihinda-inĩ rĩmwe.
5. (a) O ta ũrĩa 1 Athesalonike 2:13 yonanagia, twagĩrĩirũo gũteithia mũrutwo witũ ataũkĩrũo nĩ ũndũ ũrĩkũ rĩrĩa tũreruta nake? (b) Tũngĩkĩra mũrutwo ngoro atĩa aragie maũndũ marĩa areruta na andũ arĩa angĩ?
5 Nĩ twagĩrĩirũo gũteithia mũrutwo witũ ataũkĩrũo atĩ maũndũ marĩa areruta moimĩte Kiugo-inĩ kĩa Ngai kĩrĩa gĩtongoretio nĩ roho. (Thoma 1 Athesalonike 2:13.) Tũngĩka ũguo atĩa? Ĩkĩra mũrutwo waku ngoro kwĩraga andũ arĩa angĩ maũndũ marĩa areruta. Handũ ha gũtaaragĩria mũrutwo maandĩko ma Bibilia hingo ciothe, mwĩrage o nake agagũtaarĩria mamwe. Mũteithie one ũrĩa maũndũ marĩa areruta Kiugo-inĩ kĩa Ngai maramũhutia we mwene. Mũragie ciũria igũtũma eyarie, ciĩgiĩ ũrĩa areciria igũrũ rĩgiĩ maandĩko marĩa arathoma. (Luk. 10:25-28) Kwa ngerekano, no ũmũũrie ũũ: “Rĩandĩko rĩrĩ rĩagũteithia kuona ngumo ĩrĩkũ ya Jehova?” “Ũhoro ũyũ twathoma ũngĩgũteithia atĩa?” “Mawoni maku nĩ marĩkũ megiĩ ũndũ ũyũ tweruta?” (Thim. 20:5) Ũndũ ũrĩa wa bata makĩria ti maũndũ marĩa mũrutwo oĩ, no nĩ kana nĩ endete na akahũthĩra maũndũ marĩa oĩ.
6. Nĩkĩ no ũkorũo ũrĩ ũndũ mwega gũthiĩ na mũhunjia ũrĩ na ũmenyeru kwĩruta na mũrutwo waku?
6 Rĩrĩa ũrathiĩ kwĩruta na mũrutwo wa Bibilia, hihi rĩmwe nĩ ũthiaga na ahunjia marĩ na ũmenyeru? Angĩkorũo nĩ wĩkaga ũguo, no ũmorie mawoni mao igũrũ rĩgiĩ njĩra yaku ya kũrutana na kana hihi nĩ ũrahũthĩra Bibilia wega kũrutana. Nĩ ũrabatara wĩnyihia nĩguo ũhote kwagagĩria ũhoti waku wa kũrutana. (Ringithania Atũmwo 18:24-26.) Thutha ũcio, no wĩre mũhunjia ũcio ũrĩ na ũmenyeru akwĩre kana mũrutwo waku nĩ arataũkĩrũo nĩ maũndũ marĩa areruta. Ningĩ no wĩre mũhunjia ũcio athome na mũrutwo ũcio angĩkorũo ndũgũkorũo kuo ihinda rĩa kiumia kĩmwe kana igĩrĩ. Ũndũ ũcio nĩ ũgũteithia mũrutwo erute ategũtĩrĩria na kũmũteithie kuona atĩ wĩruti ũcio nĩ wa bata. Ndũgakorũo na mawoni atĩ ũcio nĩ mũrutwo waku na gũtirĩ mũndũ ũngĩ ũngĩthoma nake. Ririkana atĩ wendi waku nĩ mũrutwo waku ateithĩke biũ nĩguo athiĩ na mbere gũkũra kĩĩroho.
RUTANAGA ŨRĨ NA ŨCANJAMŨKU NA ŨRĨ NA ŨŨMA
Ĩraga mũrutwo waku maũndũ ma andũ arĩa mekĩte mogarũrũku ũtũũro-inĩ nĩguo ũmũteithie kuona ũrĩa angĩhũthĩra morutani ma Bibilia (Rora kĩbungo kĩa 7-9) *
7. Nĩ kĩĩ kĩngĩteithia mũrutwo kwenda maũndũ marĩa areruta?
7 Rekaga mũrutwo waku one atĩ nĩ ũkenagio nĩ ma iria irĩ thĩinĩ wa Bibilia na atĩ nĩ ũciĩtĩkĩtie. (1 Thes. 1:5) Gwĩka ũguo no kũmũteithie gũkenera maũndũ marĩa areruta. O na no ũmwĩre ũrĩa ũteithĩkĩte nĩ ũndũ wa gũtũũra kũringana na motaaro ma Bibilia. Na njĩra ĩyo nĩ ekuona atĩ Bibilia nĩ ĩkoragwo na ũtaaro ũngĩmũteithia.
8. Nĩ maũndũ ta marĩkũ mangĩ ũngĩka nĩguo ũteithie mũrutwo waku, na ũngĩka ũguo nĩkĩ?
8 Hĩndĩ ĩrĩa mũreruta no wĩre mũrutwo waku ũhoro wĩgiĩ aarĩ na ariũ a Ithe witũ amwe arĩa maahiũranagia na moritũ ta marĩa arahiũrania namo na makĩmatooria. O na no ũthiĩ na mũndũ kuuma kĩũngano-inĩ ũrĩa wanahiũrania na moritũ ta marĩa mũrutwo ũcio arahiũrania namo. Ningĩ no ũrore ũhoro ũngĩmwĩkĩra ngoro thĩinĩ wa jw.org/ki gĩcunjĩ-inĩ kĩa “Bibilia nĩ Ĩgarũraga Mĩtũũrĩre ya Andũ.” * Icunjĩ ta icio kana video no iteithie mũrutwo waku kuona atĩ nĩ ũndũ wa ũũgĩ kũhũthĩra motaaro ma Bibilia ũtũũro-inĩ wake.
9. Ũngĩkĩra mũrutwo ngoro atĩa erage arata na andũ a famĩlĩ maũndũ marĩa areruta?
9 Angĩkorũo mũndũ ũcio mũreruta nake arĩ kĩhiko-inĩ-rĩ, hihi ũrĩa mahikanĩtie nake nĩ erutaga? Angĩkorũo nderutaga no ũmũnyite ũgeni mwĩrute hamwe. Ĩkĩra mũrutwo waku ngoro erage arata na andũ a famĩlĩ maũndũ marĩa areruta. (Joh. 1:40-45) Ũngĩka ũguo atĩa? No ũrie mũrutwo waku ũũ: “Ũngĩtaarĩria mũndũ wa famĩlĩ yanyu ũndũ ũyũ atĩa?” kana “Nĩ rĩandĩko rĩrĩkũ ũngĩhũthĩra gũtaarĩria mũrata ũndũ ũyũ?” Na njĩra ĩyo ũgũkorũo ũgĩteithia mũrutwo waku gũtuĩka mũrutani. Hĩndĩ ĩrĩa arĩagĩrĩra, no ambĩrĩrie kũhunjia arĩ mũhunjia ũtarĩ mũbatithie. No ũrie mũrutwo kana nĩ oĩ mũndũ ũngĩ ũngĩenda kwĩruta Bibilia. Angĩkorũo nĩ harĩ, aranĩria na mũndũ ũcio na ihenya o ũrĩa kwahoteka na wambĩrĩrie kwĩruta nake. Muonie video ya Wĩruti wa Bibilia Wĩkagwo Atĩa? *
ĨKĨRA MŨRUTWO NGORO AGĨE NA ARATA KĨŨNGANO-INĨ
Ĩkĩra mũrutwo waku ngoro kũgĩa na arata kĩũngano-inĩ (Rora kĩbungo gĩa 10-11) *
10. O ta ũrĩa 1 Athesalonike 2:7, 8 yonanĩtie-rĩ, mwarimũ angĩĩgerekania atĩa na Paulo?
10 Mwarimũ nĩ agĩrĩire kuonia mũrutwo atĩ nĩ amũrũmbũyagia. Ririkanaga atĩ, ica ikuhĩ ahota gũtuĩka mũrũ kana mwarĩ wa Ithe witũ. (Thoma 1 Athesalonike 2:7, 8.) Arutwo no maritũhĩrũo gũtigana na arata arĩa mararĩ nao na gwĩka mogarũrũku marĩa marabatarania nĩguo matungatĩre Jehova. Kwoguo nĩ twagĩrĩirũo kũmateithia kũgĩa na arata a ma kĩũngano-inĩ. Tuĩka mũrata wa mũrutwo waku na njĩra ya kũhũthagĩra mahinda hamwe nake, na to rĩrĩa mũreruta no nĩ nginya hĩndĩ ĩngĩ. Kũmũhũũrĩra thimũ, kũmwandĩkĩra ndũmĩrĩri, kana kũmũceeragĩra mahinda kwa mahinda no kũmuonie atĩ nĩ ũmũrũmbũyagia.
11. Twagĩrĩirũo gũteithia arutwo a Bibilia magĩe na kĩĩ kĩũngano-inĩ, na nĩkĩ?
11 Thimo ya bũrũri ũmwe yugaga: “Mwana areragwo nĩ itũũra rĩothe.” Kwoguo no tuuge: “Mũrutwo athomithagio nĩ kĩũngano gĩothe.” Mwarimũ angĩteithia mũrutwo kũmenyana na andũ arĩa angĩ kĩũngano-inĩ, andũ acio no mamũteithie gũkũra kĩĩroho. Ningĩ ũndũ ũcio no ũmũteithie kũgĩa na arata gatagatĩ-inĩ ka andũ a Jehova, na andũ acio no mamũteithie kĩĩroho na rĩrĩa arĩ na mathĩna. Twagĩrĩirũo gũteithia arutwo othe a Bibilia meigue marĩ gĩcunjĩ kĩa bata gĩa kĩũngano. Mũrutwo wa Bibilia nĩ agĩrĩire kũgucĩrĩrio nĩ wendo wa aarĩ na ariũ a Ithe witũ. Ũndũ ũcio no ũmũteithie gũtigana na arata arĩa ararĩ nao arĩa matangĩmũteithia kwenda Jehova. (Thim. 13:20) Kwoguo o na atigana na arata arĩa ararĩ nao mbere ĩyo, nĩ egũkorũo akĩmenya atĩ nĩ ekuona arata a ma ithondeka-inĩ rĩa Jehova.—Mar. 10:29, 30; 1 Pet. 4:4.
TĨTĨRITHAGIA BATA WA KWĨYAMŨRĨRA NGAI NA KŨBATITHIO
Nĩguo mũrutwo wa Bibilia abatithio nĩ arabatara gũkorũo ekĩte maũndũ maigana ũna (Rora kĩbungo gĩa 12-13)
12. Twagĩrĩirũo kwĩra mũrutwo witũ ũhoro wĩgiĩ kwĩyamũrĩra Ngai na kũbatithio nĩkĩ?
12 Ikaraga ũkĩgwetagĩra mũrutwo waku ũrĩa ũrĩ ũndũ wa bata kwĩyamũrĩra Ngai na kũbatithio. O na muoroto witũ mũnene wa kũruta andũ Bibilia ũkoragwo arĩ kũmateithia mabatithio. Thutha wa kwĩruta na mũrutwo mĩeri ĩigana ũna mũtegũtĩrĩria, na makĩria thutha wake kwambĩrĩria gũthiĩ mĩcemanio, nĩ agĩrĩirũo gũtaũkĩrũo atĩ gĩtũmi kĩnene kĩrĩa kĩratũma erute nĩguo ambĩrĩrie gũtungatĩra Jehova arĩ Mũira Wake.
13. Mũrutwo abataraga kuoya makinya marĩkũ nĩguo agĩrĩre kũbatithio?
13 Mũrutwo wa Bibilia nĩ abataraga gwĩka maũndũ maigana ũna nĩguo agĩrĩre kũbatithio. Ũndũ wa mbere nĩ kũmenya Jehova na kũmwenda na gũkorũo na wĩtĩkio harĩ we. (Joh. 3:16; 17:3) Mũrutwo acokaga agakũria ũrata hamwe na Jehova na akambĩrĩria kũnyitanĩra na kĩũngano. (Ahib. 10:24, 25; Jak. 4:8) Mũthia-inĩ mũrutwo ũcio agatigana na maũndũ moru marĩa arekaga na akerira mehia make. (Atũm. 3:19) Ningĩ wĩtĩkio wake nĩ ũmũtindĩkaga kũhunjĩria andũ arĩa angĩ. (2 Kor. 4:13) Acokaga akeyamũrĩra Jehova na akonania wĩyamũrĩri wake na njĩra ya kũbatithio. (1 Pet. 3:21; 4:2) Ũndũ ũcio nĩ ũtũmaga andũ othe makene. Hĩndĩ ĩrĩa mũrutwo aroya makinya macio, koragwo wĩhaarĩirie kũmũgaathĩrĩria na kũmwĩkĩra ngoro athiĩ na mbere gũkũra kĩĩroho.
RORAGA KANA MŨRUTWO NĨ ARAKŨRA KĨĨROHO
14. Mwarimũ angĩmenya atĩa kana mũrutwo nĩ arakũra kĩĩroho?
14 No tũbatare gũkorũo na wetereri rĩrĩa tũrateithia mũrutwo akinyĩrĩre kwĩyamũrĩra Ngai na kũbatithio. No ningĩ nĩ tũrabatara kũmenya kana mũrutwo arĩ na wendi wa gũtungatĩra Jehova Ngai. Hihi mũrutwo nĩ arerutanĩria gwĩka maũndũ marĩa Jesu atwathĩte twĩke? Kana hihi no kwenda arenda kũmenya maũndũ marĩa marĩ Bibilia-inĩ?
15. Nĩ maũndũ ta marĩkũ mwarimũ angĩrora nĩguo amenye kana mũrutwo nĩ arakũra kĩĩroho?
15 Ikaraga ũkĩroraga kana mũrutwo nĩ arakũra kĩĩroho. Kwa ngerekano-rĩ, hihi nĩ onanagia atĩ nĩ endete Jehova? Hihi nĩ ahoyaga Jehova? (Thab. 116:1, 2) Hihi nĩ akenagĩra gũthoma Bibilia? (Thab. 119:97) Hihi nĩ athiaga mĩcemanio ategũtĩrĩria? (Thab. 22:22) Hihi nĩ areka mogarũrũku o mothe ũtũũro-inĩ wake? (Thab. 119:112) Hihi nĩ ambĩrĩirie kwĩra arata na andũ a famĩlĩ maũndũ marĩa areruta? (Thab. 9:1) Na ũndũ ũrĩa wa bata makĩria-rĩ, hihi nĩ ehaarĩirie gũtuĩka Mũira wa Jehova? (Thab. 40:8) Angĩkorũo mũrutwo ndahingĩtie ũndũ ũmwe wa macio, hũthĩra njĩra ya ũũgĩ kũmenya nĩkĩ gĩtũmi na mwarĩrĩrie nake ũndũ ũcio na njĩra ya wendo kuuma ngoro. *
16. Nĩ hĩndĩ ta ĩrĩkũ ũngĩbatara gũtiga kwĩruta na mũndũ Bibilia?
16 Nĩ wega ũgaikara ũkĩyũragia kana nĩ wagĩrĩirũo gũthiĩ na mbere kwĩruta na mũndũ. Wĩyũrie ũũ: ‘Hihi mũrutwo nĩ agaga kũhaarĩria nĩ ũndũ wa wĩruti? Hihi nĩ araga wendi wa gũthiĩ mĩcemanio? Hihi no arathiĩ na mbere gwĩka maũndũ marĩa matagĩrĩire? Hihi no anyitanagĩra na ndini ya maheeni?’ Angĩkorũo macokio ma ciũria icio nĩ ĩĩ, gũthiĩ na mbere kwĩruta nake nĩ ta kũgeria kũruta mũndũ ũtendete kũhutia maĩ gũtubĩra. Angĩkorũo mũrutwo ndarakenio nĩ maũndũ marĩa areruta na ndarenda gwĩka mogarũrũku hatirĩ bata wa gũthiĩ na mbere kwĩruta nake.
17. Kũringana na 1 Timotheo 4:16, nĩ ũndũ ũrĩkũ arimũ othe a Bibilia mabatiĩ gwĩka?
17 Nĩ tuoyaga na ũritũ wĩra ũrĩa tũheetwo wa gũtua andũ arutwo, na twendaga gũteithia arutwo aitũ a Bibilia mabatithio. Nĩ ũndũ ũcio no twende kũhũthagĩra Bibilia rĩrĩa tũrarutana, na tũkarutanaga tũcanjamũkĩte na tũkonania nĩ twĩtĩkĩtie maũndũ marĩa tũrarutana. Ningĩ nĩ tũrĩkĩraga arutwo ngoro magĩe na arata kĩũngano-inĩ. Na nĩ tũrĩraga mũrutwo kaingĩ bata wa kwĩyamũrĩra Ngai na kũbatithio na tũgaikara tũkĩroraga kana nĩ arakũra kĩĩroho. (Rora gathandũkũ karĩ na kĩongo, “ Maũndũ Marĩa Arimũ Mangĩka Mateithie Arutwo Makinyĩrĩre Kũbatithio.”) Nĩ tũkenaga gũkorũo na itemi wĩra-inĩ ũyũ wa kũhonokia mĩoyo. Rekei tũtue itua rĩa gwĩka ũrĩa wothe tũngĩhota gũteithia arutwo a Bibilia makinyĩrĩre kũbatithio.
RWĨMBO NA. 79 Marutage Kwĩhanda Wega
^ kĩb. 5 Hĩndĩ ĩrĩa tũraruta andũ Bibilia, tũkoragwo na mweke wa kũmateithia nĩguo mambĩrĩrie gwĩciria ta ũrĩa Jehova endaga na mambĩrĩrie gwĩka maũndũ ta ũrĩa Jehova angĩenda. Gĩcunjĩ gĩkĩ nĩ gĩgũtaarĩria makĩria ũrĩa tũngĩagagĩria ũhoti witũ wa kũrutana.
^ kĩb. 4 Rora gĩcunjĩ kĩrĩ na kĩongo “Wĩtheme Maũndũ Maya Rĩrĩa Ũreruta Bibilia na Mũndũ” thĩinĩ wa Kabuku ka Mũcemanio wa Ũtũũro na Ũtungata ga Septemba 2016.
^ kĩb. 8 Hingũra ŨHORO WITŨ > MAŨNDŨ MONETWO.
^ kĩb. 9 Thĩinĩ wa JW Library®, hingũra MEDIA > OUR MEETINGS AND MINISTRY > TOOLS FOR THE MINISTRY.
^ kĩb. 15 Rora gĩcunjĩ kĩrĩ na kĩongo “Ngatho na Wendo Harĩ Jehova no Igũtindĩke Kũbatithio” na “Hihi nĩ Wĩhaarĩirie Kũbatithio?” thĩinĩ wa ngathĩti ya Mũrangĩri ya Machi 2020.
^ kĩb. 77 GŨTAARĨRIA MBICA: Ihinda rĩna thutha wa kũrĩkia gũthoma na mũrutwo, mwarĩ wa Ithe witũ ũrĩ na ũmenyeru agĩteithia mwarĩ wa Ithe witũ ũrĩa ũgũthomithagia kuona atĩ ndagĩrĩirũo kwaria mũno rĩrĩa ararutana.
^ kĩb. 79 GŨTAARĨRIA MBICA: Hĩndĩ ya wĩruti, mũrutwo ũcio akeruta ũrĩa angĩkorũo arĩ mũtumia mwega. Thutha ũcio akeera mũthuri wake maũndũ marĩa areruta.
^ kĩb. 81 GŨTAARĨRIA MBICA: Mũrutwo ũcio marĩ na mũthuri wake maceerete kwa mwarĩ wa Ithe witũ ũmwe maamenyanĩire Nyũmba-inĩ ya Ũthamaki.
