1. Rĩandĩko rĩa 2 Akorintho 3:1-3 rĩtũteithagia atĩa gũtaũkĩrũo atĩ gũteithia mũrutwo wa Bibilia akinyĩrĩre kũbatithio nĩ mweke wa mwanya tũkoragwo naguo? (Rora mbica ngothi-inĩ.)

ŨIGUAGA atĩa rĩrĩa wona mũrutwo wa Bibilia kuuma kĩũngano-inĩ kĩanyu akĩbatithio? Hatarĩ nganja, ũndũ ũcio nĩ ũtũmaga ũkene mũno. (Mat. 28:19) Mũndũ nĩ akenaga o na makĩria angĩkorũo nĩwe ũrerutaga na mũndũ ũcio wabatithio. (1 Thes. 2:19, 20) Arutwo erũ arĩa mabatithio, makoragwo marĩ “marũa ma kũgaathĩrĩrio” to kũrĩ arĩa marerutaga Bibilia nao tu, no nĩ nginya kũrĩ kĩũngano gĩothe.​—Thoma 2 Akorintho 3:1-3.

2. (a) Nĩ kĩũria kĩrĩkũ kĩa bata twagĩrĩirũo gwĩciria ũhoro wakĩo, na nĩkĩ? (b) Wĩruti wa Bibilia nĩ kĩĩ? (Rora kohoro ka magũrũ-inĩ.)

² Nĩ ũndũ wa gwĩkĩra ngoro kuona atĩ, kwa ihinda rĩa mĩaka ĩna mĩhĩtũku, nĩ tũkoretwo tũkĩĩruta Bibilia * na andũ ta 10,000,000 o mweri thĩinĩ wa thĩ yothe. Na mĩaka-inĩ ĩyo, andũ makĩria ma 280,000 nĩ mabatithagio o mwaka magatuĩka Aira a Jehova, na arutwo a Jesu Kristo. Tũngĩteithia atĩa arutwo acio aingĩ ũguo a Bibilia mabatithio? Tondũ Jehova nĩ aheete andũ mahinda na mweke ma gũtuĩka arutwo a Kristo, twagĩrĩirũo kwĩrutanĩria ũrĩa wothe tũngĩhota kũmateithia makinyĩrĩre kũbatithio na ihenya o ũrĩa kwahoteka. Ihinda rĩrĩa rĩtigarĩte rĩa kũmateithia nĩ inini mũno!​—1 Kor. 7:29a; 1 Pet. 4:7.

3. Nĩ maũndũ marĩkũ tũkwĩruta gĩcunjĩ-inĩ gĩkĩ megiĩ kwĩruta na andũ Bibilia?

 ³ Tondũ wĩra wa gũtua andũ arutwo nĩ wa bata mũno ihinda-inĩ rĩrĩ, Kĩama Kĩrĩa Gĩtongoragia nĩ kĩoririe wabici cia honge ũrĩa ahunjia mangĩka nĩguo mateithie arutwo a Bibilia aingĩ makĩria makinyĩrĩre kũbatithio. Thĩinĩ wa gĩcunjĩ gĩkĩ na kĩrĩa kĩrũmĩrĩire, nĩ tũkuona maũndũ marĩa tũngĩĩruta kuuma kũrĩ mapainia arĩa marĩ na ũmenyeru, amishonarĩ, na arori a mũthiũrũrũko. * (Thim. 11:14; 15:22) Nĩ mataarĩirie maũndũ marĩa ahunjia na arutwo ao mangĩka nĩguo arutwo acio makinyĩrĩre kũbatithio. Thĩinĩ wa gĩcunjĩ gĩkĩ, nĩ tũkwarĩrĩria maũndũ matano mũrutwo wa Bibilia angĩka nĩguo akinyĩrĩre kũbatithio.

4. Ũgwati wa kwĩruta na andũ o ndagĩka nini nĩ ũrĩkũ?

⁴ Aarĩ na ariũ a Ithe witũ aingĩ nĩ merutaga Bibilia na andũ marũgamĩte mũrango-inĩ. O na gũtuĩka ĩyo nĩ njĩra njega ya gũteithia andũ mende kwĩruta ũhoro wa Bibilia, kaingĩ andũ maragia na njĩra nguhĩ, na no mage gwĩka ũguo o kiumia. Nĩguo makũrie wendi makĩria, aarĩ na ariũ a Ithe witũ amwe nĩ mahoyaga mũndũ ũrĩa wakenio nĩ ũhoro namba ya thimũ, na kamũira mamũcokerete, makamũhũũrĩra kana makamũtũmĩra ndũmĩrĩri ĩgiĩ Bibilia. Ahunjia amwe nĩ mathiaga na mbere kwaranĩria na andũ ta acio mahinda kwa mahinda kwa ihinda rĩa mĩeri mĩingĩ, matekwambĩrĩria wĩruti wa Bibilia ũrathiĩ na mbere. Hihi mũrutwo wa Bibilia no akinyĩrĩre kwĩyamũrĩra Jehova na kũbatithio angĩkorũo arahũthĩra o mahinda macio manini na ndarekĩra kĩyo gĩa kwĩruta Kiugo kĩa Ngai? Gũtingĩhoteka.

5. Kũringana na Luka 14:27-33, nĩ ũndũ ũrĩkũ Jesu aatĩtĩrithirie ũngĩtũteithia wĩra-inĩ witũ wa gũtua andũ arutwo?

⁵ Hĩndĩ ĩmwe, Jesu nĩ aahũthĩrire ngerekano gũtaarĩria ũrĩa mũndũ agĩrĩirũo gwĩka nĩguo atuĩke mũrutwo wake. Nĩ aaririe ũhoro wĩgiĩ mũndũ ũrenda gwaka nyũmba ndaya na igũrũ, na mũthamaki ũrenda gũthiĩ mbaara-inĩ. Jesu ooigire atĩ mũndũ ũcio ũrenda gwaka no mũhaka ‘ambe aikare thĩ atare kĩrĩa arabatara’ nĩguo ahote kũrĩkia nyũmba ĩyo, nake mũthamaki ũcio no mũhaka ‘ambe acokanie ndundu na andũ ake’ nĩguo one kana thigari ciake nĩ ikũhota kũhingia ũndũ ũrĩa arenda ihingie. (Thoma Luka 14:27-33.) O ũndũ ũmwe na ũcio, Jesu nĩ aamenyaga atĩ mũndũ ũrĩa ũrenda gũtuĩka mũrutwo wake no mũhaka ambe athuthurie wega amenye  ũrĩa arabatara gwĩka nĩguo ahote kũmũrũmĩrĩra. Nĩ ũndũ ũcio, nĩ twagĩrĩirũo kuonia arutwo aitũ bata wa kwĩrutaga Bibilia o kiumia. Tũngĩka ũguo atĩa?

6. Tũngĩka atĩa nĩguo tũteithie arutwo aitũ mathiĩ na mbere?

⁶ Ambĩrĩria na kuongerera ihinda rĩrĩa ũhũthagĩra na arutwo arĩa waragia nao na njĩra nguhĩ mũno. Handũ ha gũthoma o Rĩandĩko rĩmwe, no mũthome Maandĩko merĩ rĩrĩa wathiĩ. Thutha wa mwene nyũmba kũmenyera gũthoma ihinda iraiharaihu, no ũmũũrie kana he handũ mũngĩikaraga thĩ nĩguo mũthome. Ũndũ ũrĩa egũkwĩra nĩ ũgũgũteithia kũmenya kana nĩ onaga kwĩruta Bibilia kũrĩ ũndũ wa bata. Thutha-inĩ, nĩguo ũmũteithie gũkũra kĩĩroho na ihenya, no ũrie mũrutwo waku kana no ende mũthomage maita merĩ o kiumia. No harĩ na ũndũ ũngĩ ũrabatarania makĩria ma kwĩruta riita rĩmwe kana merĩ o kiumia.

7. Ũngĩĩhaarĩria wega atĩa nĩ ũndũ wa o mũrutwo?

⁷ Nĩ wagĩrĩirũo kũhaarĩria wega gĩcunjĩ kĩrĩa mũgũthoma na o mũrutwo. No wambĩrĩrie na gũthoma gĩcunjĩ kĩrĩa mũgũthoma na mũrutwo, o hamwe na maandĩko marĩa monanĩtio. Iga maũndũ marĩa manene meciria-inĩ maku. Wĩcirie ũhoro wa kĩongo kĩnene, ciongo nini, ciũria, maandĩko marĩa mandĩkĩtwo “thoma,” mbica, na video iria ingĩgũteithia gũtaarĩria ũndũ ũrĩa ũrarĩrĩrio. Ũgĩciria ũhoro wĩgiĩ mũrutwo waku, wĩcũranie kabere ũrĩa ũkũmũtaarĩria ũhoro ũcio na njĩra hũthũ ĩranyitĩka wega nĩguo ũmũteithie gũtaũkĩrũo na njĩra hũthũ na kũhũthĩra maũndũ macio.​—Neh. 8:8; Thim. 15:28a.

8. Ciugo cia mũtũmwo Paulo thĩinĩ wa Akolosai 1:9, 10 itũrutaga atĩa ũhoro wĩgiĩ kũhoya nĩ ũndũ wa arutwo aitũ a Bibilia?

⁸ Ũkĩhaarĩria, hoya Jehova igũrũ rĩgiĩ mũrutwo waku na mabataro make. Ĩra Jehova agũteithie kũrutana Bibilia na njĩra ĩgũkinyĩra mũrutwo ũcio ngoro. (Thoma Akolosai 1:9, 10.) Geria gwĩciria nĩ maũndũ marĩkũ mangĩkorũo marĩ maritũ harĩ mũrutwo ũcio gũtaũkĩrũo kana gwĩtĩkania namo. Ririkanaga atĩ muoroto waku nĩ kũmũteithia akinyĩrĩre kũbatithio.

9. Mwarimũ angĩteithia mũrutwo atĩa kũhaarĩria nĩ ũndũ wa wĩruti? Taarĩria.

⁹ Nĩ mwĩhoko witũ atĩ rĩrĩa tweruta Bibilia na mũrutwo tũtegũtĩrĩria, ũndũ ũcio nĩ ũkũmũteithia gũkorũo na ngatho harĩ Jehova na Jesu nĩ ũndũ wa maũndũ marĩa mamwĩkĩire  na ende gũthiĩ na mbere kwĩruta makĩria. (Mat. 5:3, 6) Nĩguo mũrutwo agunĩke biũ kuumana na wĩruti wa Bibilia, nĩ arabatara kũiga meciria make harĩ maũndũ marĩa mũreruta. Nĩ ũndũ ũcio, muonie atĩ nĩ ũndũ wa bata mũno kũhaarĩria gĩcunjĩ kĩrĩa mũreruta na njĩra ya gũgĩthoma kabere, na gwĩciria ũrĩa angĩhũthĩra maũndũ marĩa eruta. Ũngĩteithia mũrutwo atĩa kũhaarĩria? Haarĩria gĩcunjĩ kĩmwe hamwe na mũrutwo, nĩguo ũmuonie ũrĩa angĩka. * Mũtaarĩrie ũrĩa angĩona macokio ma ĩmwe kwa ĩmwe ma kĩũria kĩrĩa kĩũrĩtio, na ũmuonie atĩ gũkururĩra harĩa harĩ na ũndũ ũrĩa mũnene ũrarutanwo, no kũmũteithie kũririkana macokio. No ũmwĩkĩre ngoro arutage macokio akĩhũthĩra ciugo ciake mwene. Rĩrĩa eka ũguo, ũndũ ũcio nĩ ũrĩgũteithagia kũmenya kana nĩ ataũkĩrũo nĩ ũndũ ũrĩa mũrarĩrĩria. Harĩ o na ũndũ ũngĩ ũngĩkĩra mũrutwo waku ngoro gwĩka.

10. Nĩkĩ nĩ ũndũ wa bata gũthoma Bibilia o mũthenya? Mũrutwo arabatara gwĩka atĩa nĩguo agunĩke biũ nĩ ũthomi wake wa Bibilia?

¹⁰ Makĩria ma kwĩruta Bibilia o kiumia na mwarimũ wake, mũrutwo no agunĩke makĩria angĩĩruta gwĩkaga maũndũ mamwe arĩ wiki o mũthenya. Nĩ arabatara kwaranagĩria na Jehova. Na njĩra ĩrĩkũ? Na njĩra ya gũthikĩrĩria Jehova na kũmwarĩria. No athikĩrĩrie Ngai na njĩra ya gũthomaga Bibilia o mũthenya. (Josh. 1:8; Thab. 1:1-3) Muonie ũrĩa angĩhũthĩra “Mũtaratara wa Gũthoma Bibilia” ũrĩa ũrĩ thĩinĩ wa jw.org. * Nĩguo ũmũteithie kũgunĩka biũ nĩ ũthomi wake wa Bibilia, mwĩkĩre ngoro gwĩcũranagia maũndũ marĩa Bibilia ĩramũruta megiĩ Jehova na ũrĩa angĩmahũthĩra ũtũũro-inĩ wake.​—Atũm. 17:11; Jak. 1:25.

11. Mũrutwo angĩĩruta atĩa kũhoya na njĩra ĩrĩa yagĩrĩire? Nĩkĩ nĩ arabatara kũhoyaga Jehova kaingĩ?

¹¹ Ĩkĩra mũrutwo waku ngoro kwaragia na Jehova na njĩra ya kũhoyaga o mũthenya. Hoyaga mahoya ma kuuma ngoro mbere na thutha wa kwĩruta na mũrutwo, na ũkamũgweta mahoya-inĩ macio. O ũrĩa egũthiĩ na mbere kũigua mahoya maku, noguo ekwĩruta ũrĩa angĩhoya kuuma ngoro, akahoya Jehova Ngai kũgerera harĩ rĩĩtwa rĩa Jesu Kristo. (Mat. 6:9; Joh. 15:16) Na githĩ gũthoma Bibilia o mũthenya (gũthikĩrĩria Jehova) na kũhoya (kwaria na Jehova) to gũteithie mũrutwo waku gũkuhĩrĩria Ngai makĩria! (Jak. 4:8) Gwĩkaga maũndũ macio o mũthenya nĩ gũkũmũteithia gũkũra kĩĩroho nginya  akinyĩrĩre kwĩyamũrĩra Jehova na kũbatithio. Nĩ ũndũ ũrĩkũ ũngĩ ũngĩmũteithia?

12. Mwarimũ angĩteithia mũrutwo atĩa gũkũria ũrata hamwe na Jehova?

¹² Maũndũ marĩa mũrutwo ekwĩruta wĩruti-inĩ wake, matibatiĩ o kũhutia meciria make no nĩ nginya ngoro yake. Nĩkĩ? Tondũ angĩhutio ngoro, norĩo angĩhota gwĩka kũringana na maũndũ marĩa areruta. Jesu aarĩ mwarimũ mwega na andũ nĩ maakenagĩra maũndũ marĩa aamarutaga. No andũ maamũrũmagĩrĩra tondũ nĩ aahutagia ngoro ciao. (Luk. 24:15, 27, 32) Mũrutwo waku nĩ arabatara gũtaũkĩrũo wega nĩ Jehova, ataũkĩrũo atĩ no agĩe na ũrata hamwe nake, na atuĩke Ithe, Ngai wake, na Mũrata wake. (Thab. 25:4, 5) Rĩrĩa mũreruta nake, mũteithie kuona wega ngumo cia Ngai. (Tham. 34:5, 6; 1 Pet. 5:6, 7) Ũndũ-inĩ o wothe mũrarĩrĩria, mũteithagie kuona Jehova nĩ Ngai wa mũthemba ũrĩkũ. Teithia mũrutwo waku ataũkĩrũo nĩ ngumo cia Jehova ta wendo, ũtugi, na tha. Jesu ooigire atĩ “rĩathani rĩrĩa inene mũno na rĩa mbere” nĩ kwenda “Jehova Ngai waku.” (Mat. 22:37, 38) Teithia mũrutwo waku akũrie wendo mũnene harĩ Ngai ngoro-inĩ yake.

13. Heana ngerekano ĩronania ũrĩa mwarimũ angĩteithia mũrutwo kwĩruta ũhoro wĩgiĩ ngumo cia Jehova.

¹³ Rĩrĩa mũraranĩria na mũrutwo waku, mũtaarĩrie kĩrĩa gĩtũmaga wende Jehova. Ũndũ ũcio no ũteithie mũrutwo waku kũmenya atĩ nĩ arabatara gũkũria ũrata wa hakuhĩ hamwe na Ngai. (Thab. 73:28) Kwa ngerekano, hihi harĩ ciugo thĩinĩ wa kĩbungo kana rĩandĩko, iguũrĩtie wendo, ũũgĩ, kĩhooto, kana hinya wa Jehova ihutagia ngoro yaku? Gwetera mũrutwo waku ũndũ ũcio na ũmwĩre atĩ ũcio nĩ ũndũ ũmwe ũtũmaga wende Ithe witũ wa igũrũ. Harĩ ũndũ ũngĩ arutwo othe a Bibilia magĩrĩirũo gwĩka nĩguo magĩrĩre kũbatithio.

14. Nĩ maũndũ marĩkũ Ahibirania 10:24, 25 ĩgwetete megiĩ mĩcemanio mangĩteithia mũrutwo wa Bibilia gũkũra kĩĩroho?

¹⁴ Wendi witũ ithuothe nĩ arutwo aitũ makũre kĩĩroho nginya makinyĩrĩre kũbatithio. Njĩra ĩmwe nene tũngĩmateithia nayo nĩ kũmekĩra ngoro gũthiaga mĩcemanio. Ahunjia arĩa marĩ na ũmenyeru moigaga atĩ arutwo arĩa mambagĩrĩria gũthiĩ mĩcemanio o rĩo thutha wa kwambĩrĩria kwĩruta nĩ makũraga na ihenya kĩĩroho. (Thab. 111:1) Ahunjia amwe nĩ mataaragĩria arutwo ao atĩ nĩ harĩ  maũndũ maingĩ mangĩĩruta mĩcemanio-inĩ matangĩĩruta wĩruti-inĩ wao. Thoma Ahibirania 10:24, 25 hamwe na mũrutwo waku na ũmũtaarĩrie atĩ nĩ ekũgunĩka mũno nĩ ũndũ wa gũthiĩ mĩcemanio. Muonie video ya Nĩ Maũndũ Marĩkũ Mekagwo Nyũmba-inĩ ya Ũthamaki? * Teithia mũrutwo waku gũtigĩrĩra atĩ hatirĩ mũcemanio atĩra.

15. Nĩ maũndũ ta marĩkũ tũngĩka twĩkĩre mũrutwo ngoro gũthiaga mĩcemanio ategũtĩrĩria?

¹⁵ Ũngĩka atĩa angĩkorũo mũrutwo waku ndarĩ athiĩ mũcemanio o na ũmwe kana athiaga agĩtĩragĩria? No ũmũtaarĩrie ũkenete kaũndũ ũrerutire mũcemanio-inĩ. Ũndũ ũcio no ũtũme ende gũthiĩ gũkĩra o kũmwĩra athiĩ mĩcemanio. Mũhe Mũrangĩri kana Kabuku ka Mũcemanio wa Ũtũũro na Ũtungata karĩa karathomwo mũcemanio-inĩ ihinda-inĩ rĩu. Muonie maũndũ marĩa makaarĩrĩrio mũcemanio-inĩ ũrĩa ũrũmĩrĩire, na ũmũũrie nĩ gacunjĩ karĩkũ kamũkenia mũno. Maũndũ marĩa mũrutwo waku ekwĩyonera athiĩ mũcemanio riita rĩa mbere, makĩrĩte ũndũ ũngĩ o wothe aneyonera mĩcemanio-inĩ ya ndini iria ingĩ. (1 Kor. 14:24, 25) Nĩ egũcemania na andũ angĩ maigĩte kĩonereria kĩega angĩĩgerekania nakĩo, arĩa mekũmũteithia gũthiĩ na mbere nginya abatithio.

16. Ahunjia magĩrĩirũo gwĩka atĩa nĩguo mateithie arutwo makinyĩrĩre kũbatithio? Nĩ maũndũ marĩkũ tũkeeruta gĩcunjĩ-inĩ kĩrĩa kĩrũmĩrĩire?

¹⁶ Tũngĩteithia arutwo a Bibilia atĩa makinyĩrĩre kũbatithio? No tũteithie arutwo othe kuona atĩ kwĩruta nĩ ũndũ wa bata, na njĩra ya kũmekĩra ngoro merutage o kiumia na mahaaragĩrie gacunjĩ karĩa tũkwĩruta nao. Ningĩ no twĩkĩre mũrutwo ngoro aranagĩrie na Jehova o mũthenya na akũrie ũrata wa hakuhĩ hamwe nake. Na nĩ twagĩrĩirũo gwĩkĩra mũrutwo ngoro athiage mĩcemanio ya kĩũngano. (Rora gathandũkũ karĩ na kĩongo, “ Maũndũ Marĩa Arutwo Mangĩka Makinyĩrĩre Kũbatithio.”) No o ta ũrĩa tũkona gĩcunjĩ-inĩ kĩrĩa kĩrũmĩrĩire, harĩ na maũndũ mangĩ matano ahunjia mangĩka nĩguo mateithie arutwo gũkinyĩrĩra kũbatithio.