1. Mũtũmwo Johana aageragĩra maũndũ marĩkũ kĩndũ mwaka wa 95 M.M.?

MŨTŨMWO JOHANA nĩ aageragĩra maũndũ maritũ mũno kĩndũ mwaka-inĩ wa 95 Mahinda Maitũ (M.M.). Aarĩ mũkũrũ, ohetwo gĩcigĩrĩra-inĩ gĩa Patimosi, na no kũhoteke nowe mũtũmwo ũrĩa watigarĩte arĩ muoyo. (Kũg. 1:9) Nĩ aamenyaga atĩ akararia nĩ maahĩtithagia ciũngano na magatũma Akristiano magayũkane. Maũndũ macio nĩ mangĩatũmire kuoneke ta Ũkristiano ũngĩathirire.—Jud. 4; Kũg. 2:15, 20; 3:1, 17.

2. Kũringana na Kũguũrĩrio 7:9-14, nĩ kĩoneki kĩrĩkũ gĩa gũcanjamũra Johana oonirio? (Rora mbica ngothi-inĩ.)

² Ihinda-inĩ o rĩu Johana aageragĩra maũndũ macio maritũ, nĩ oonirio kĩoneki gĩa gũcanjamũra. Thĩinĩ wa kĩoneki kĩu, araika meerirũo manyitĩrĩre huho cia kwananga cia thĩna ũrĩa mũnene nginya gĩkundi kĩa ngombo kĩrĩkie gwĩkĩrũo mũhũũri. (Kũg. 7:1-3) Gĩkundi kĩu nĩ kĩa andũ 144,000, arĩa magaathana na Jesu kũrĩa igũrũ. (Luk. 12:32; Kũg. 7:4) Thutha ũcio, Johana akagweta gĩkundi kĩngĩ kĩnene mũno nginya akahũthĩra ciugo: “Na rĩrĩ,” iria ironania atĩ no kũhoteke ũndũ ũrĩa oonire nĩ wamũgegirie. Kaĩ Johana oonire kĩĩ? Oonire “andũ kĩrĩndĩ kĩnene, arĩa gũtarĩ mũndũ ũngĩahotire gũtara, kuuma ndũrĩrĩ-inĩ ciothe, na mĩhĩrĩga, na ikundi cia andũ, na thiomi, marũgamĩte mbere ya gĩtĩ kĩrĩa kĩa ũnene na mbere ya Gatũrũme.” (Thoma Kũguũrĩrio 7:9-14.) Ta hũũra mbica ũrĩa Johana angĩkorũo aakenire nĩ ũndũ wa kũmenya atĩ ihinda rĩrĩa rĩroka nĩ kũngĩgaakorũo na andũ aingĩ marathathaiya Ngai na njĩra ĩrĩa yagĩrĩire!

3. (a) Kĩoneki kĩa Johana kĩagĩrĩirũo gwĩkĩra wĩtĩkio witũ hinya nĩkĩ? (b) Tũkwĩruta maũndũ marĩkũ gĩcunjĩ-inĩ gĩkĩ?

³ Hatarĩ nganja kĩoneki kĩu nĩ gĩekĩrire hinya wĩtĩkio wa  Johana. Na githĩ kĩoneki kĩu gĩtikĩagĩrĩirũo gwĩkĩra wĩtĩkio witũ hinya o na makĩria tondũ kĩrahinga mahinda-inĩ maya maitũ? Nĩ twĩyoneire andũ aingĩ magĩũka ũthathaiya-inĩ wa ma makagĩa na kĩĩrĩgĩrĩro gĩa gũkaahonoka thĩna ũrĩa mũnene na gũtũũra tene na tene thĩinĩ wa thĩ. Thĩinĩ wa gĩcunjĩ gĩkĩ, tũkwarĩrĩria ũrĩa Jehova aateithirie andũ ake makĩria ma mĩaka 80 mĩhĩtũku kũmenya nĩa mangĩgaakorũo marĩ a kĩrĩndĩ kĩnene. Nĩ tũgũcoka twarĩrĩrie maũndũ merĩ megiĩ kĩrĩndĩ kĩu: (1) ũrĩa kĩigana, na (2) kũrĩa andũ a kĩrĩndĩ kĩu mangĩkoima. Maũndũ macio nĩ megwĩkĩra hinya wĩtĩkio wa arĩa marĩ na kĩĩrĩgĩrĩro gĩa gũgaakorũo gĩkundi-inĩ kĩu kĩrathime.

4. Nĩ ũrutani ũrĩkũ ũrĩ Maandĩko-inĩ ũtarutanagwo nĩ ndini iria ciĩĩtaga cia Gĩkristiano? Na Arutwo a Bibilia maarĩ ngũrani na njĩra ĩrĩkũ?

⁴ Ndini iria ciĩĩtaga cia Gĩkristiano itirutanaga ũhoro ũrĩa ũrĩ Maandĩko-inĩ atĩ kũrĩ hingo andũ arĩa athĩki magaatũũra tene na tene thĩinĩ wa thĩ. (2 Kor. 4:3, 4) Ndini nyingĩ ũmũthĩ irutanaga atĩ andũ othe ega mathiaga igũrũ makua. No gĩkundi kĩnini kĩa Arutwo a Bibilia arĩa maacabaga ngathĩti ya Mũrangĩri kuuma mwaka wa 1879 matiarutanaga ũguo. Nĩ maataũkĩirũo atĩ Ngai nĩ angĩgaacokia Paradiso rĩngĩ gũkũ thĩ na atĩ andũ milioni nyingĩ arĩa athĩki nĩ mangĩgaatũũra gũkũ thĩ, no ti kũrĩa igũrũ. O na kũrĩ ũguo, nĩ maaikarire ihinda inene matarĩ mamenya wega andũ acio athĩki mangĩgaakorũo marĩ a.—Mat. 6:10.

5. Nĩ ũndũ ũrĩkũ Arutwo a Bibilia maataũkĩirũo wĩgiĩ arĩa 144,000?

⁵ Arutwo a Bibilia ningĩ nĩ maataũkĩirũo kuuma Maandĩko-inĩ atĩ harĩ andũ angĩ “magũrĩtwo kuuma thĩ” arĩa magaathana na Jesu kũrĩa igũrũ. (Kũg. 14:3) Gĩkundi kĩu kĩngĩgaakorũo kĩrĩ kĩa Akristiano 144,000 meyamũrĩire Ngai na marĩ kĩyo arĩa maatungatĩire Ngai marĩ ehokeku rĩrĩa maarĩ gũkũ thĩ. Ĩ nakĩo kĩrĩndĩ kĩnene?

6. Arutwo a Bibilia maataũkĩirũo atĩa igũrũ rĩgiĩ andũ a kĩrĩndĩ kĩnene?

⁶ Thĩinĩ wa kĩoneki kĩu, Johana oonire andũ a gĩkundi kĩu “marũgamĩte mbere ya gĩtĩ kĩrĩa kĩa ũnene na mbere ya Gatũrũme.” (Kũg. 7:9) Ũndũ ũcio watũmĩte Arutwo a Bibilia mecirie atĩ o ta arĩa 144,000, andũ a kĩrĩndĩ kĩnene mangĩgaathiĩ igũrũ. Angĩkorũo arĩa 144,000 na andũ a kĩrĩndĩ kĩnene mangĩgaathiĩ gũtũũra igũrũ-rĩ, ngũrani ĩngĩakorirũo ĩrĩ ĩrĩkũ gatagatĩ ga ikundi icio cierĩ? Arutwo a Bibilia meeciragia atĩ andũ a kĩrĩndĩ kĩnene nĩ arĩa mataathĩkĩire Ngai na njĩra nginyanĩru rĩrĩa maarĩ gũkũ thĩ. Meeciragia atĩ nginya andũ amwe arĩa maarĩ thĩinĩ wa ndini iria ciĩĩtaga cia Gĩkristiano arĩa maarũmagĩrĩra ithimi cia Bibilia cia mĩtugo o nao maarĩ thĩinĩ wa gĩkundi kĩu. Arutwo a Bibilia meeciragia atĩ andũ ta acio nĩ meendete Ngai na gĩkĩro kĩna no ti na gĩkĩro ta kĩa arĩa mangĩgaathana na Jesu. Meeciragia atĩ, nĩ ũndũ wa gũkorũo wendo wao harĩ Ngai ndwarĩ mũiganu, andũ a kĩrĩndĩ kĩnene nĩ mangĩathiire igũrũ no mangĩakorirũo marĩ mbere ya gĩtĩ kĩa ũnene no ti gũikarĩra itĩ cia ũnene.

7. Kũringana na Arutwo a Bibilia-rĩ, nĩa mangĩgaatũũra thĩ ihinda-inĩ rĩa Mĩaka Ngiri? Arutwo a Bibilia meeciragia atĩa igũrũ rĩgiĩ athuri ehokeku a tene?

⁷ Gũkĩrĩ ũguo-rĩ, Arutwo a Bibilia meeciragia nĩa mangĩgaatũũra thĩinĩ wa thĩ? Meetĩkĩtie atĩ thutha wa arĩa 144,000 na kĩrĩndĩ kĩnene gũthiĩ igũrũ, nĩ kũngĩgaakorũo na andũ angĩ milioni nyingĩ arĩa mangĩkaaheo muoyo gũkũ thĩ nĩguo makenere irathimo cia Wathani wa Mĩaka Ngiri wa Kristo. Arutwo a Bibilia matieciragia atĩ andũ acio milioni nyingĩ nĩ  mangĩgaatungatĩra Jehova mbere ya Wathani ũcio wa Kristo kwambĩrĩria. Handũ ha ũguo, meeciragia atĩ gĩkundi kĩu kĩngĩkeruta ũhoro wa Jehova ihinda-inĩ rĩu rĩa Mĩaka Ngiri. Thutha ũcio, arĩa mangĩgetĩkĩra kũrũmĩrĩra ithimi cia Jehova nĩ mangĩkaaheo muoyo wa tene na tene gũkũ thĩ, nao arĩa mangĩkaarega gwathĩkĩra Jehova maniinwo. Ningĩ Arutwo a Bibilia meeciragia atĩ no kũhoteke amwe arĩa mangĩgaatungata marĩ “anene” ihinda-inĩ rĩu, ta andũ ehokeku a tene arĩa makaariũkio (athuri ehokeku arĩa maakuire mbere ya Kristo), nĩ mangĩkaaheo muoyo kũrĩa igũrũ mũthia-inĩ wa Mĩaka Ngiri.—Thab. 45:16.

8. Gweciragĩrio kũngĩgaakorũo na ikundi irĩkũ ithatũ mũbango-inĩ wa Ngai?

⁸ Kwoguo Arutwo a Bibilia maataũkĩirũo atĩ kũngĩgaakorũo na ikundi ici ithatũ: (1) andũ 144,000, arĩa mangĩgaathana na Jesu kũrĩa igũrũ; (2) gĩkundi kĩnene kĩa Akristiano arĩa mataarĩ na kĩyo mũno arĩa mangĩkaarũgama mbere ya gĩtĩ kĩa ũnene kĩa Jesu kũrĩa igũrũ; na (3) andũ milioni nyingĩ arĩa mangĩkaarutwo ithimi cia Jehova marĩ gũkũ thĩ ihinda-inĩ rĩa Wathani wa Mĩaka Ngiri wa Kristo. * O na kũrĩ ũguo, ihinda rĩa Jehova rĩakinya, ũtheri wĩgiĩ ũndũ ũcio nĩ waambĩrĩirie kuongerereka makĩria.—Thim. 4:18.

9. (a) Kĩrĩndĩ kĩnene kĩrũgamaga “mbere ya gĩtĩ kĩrĩa kĩa ũnene na mbere ya Gatũrũme” na njĩra ĩrĩkũ? (b) Ũtheri ũcio wa Kũguũrĩrio 7:9 ũtaũkĩkaga na njĩra njega nĩkĩ?

⁹ Mwaka-inĩ wa 1935, Aira a Jehova nĩ maamenyire wega ũhoro wĩgiĩ kĩrĩndĩ kĩnene kĩrĩa kĩrĩ kĩoneki-inĩ kĩa Johana. Nĩ maataũkĩirũo atĩ to mũhaka andũ a kĩrĩndĩ kĩu kĩnene makorũo igũrũ nĩguo marũgame “mbere ya gĩtĩ kĩrĩa kĩa ũnene na mbere ya Gatũrũme.” Mekaga ũguo na njĩra ya mũhaano. O na gũtuĩka andũ a kĩrĩndĩ kĩnene magatũũra thĩinĩ wa thĩ, marũgamaga “mbere ya gĩtĩ kĩrĩa kĩa ũnene” na njĩra ya gwĩtĩkĩra wathani wa Jehova na kwĩnyihĩria ũnene wake. (Isa. 66:1) Ningĩ nĩ marũgamaga “mbere ya Gatũrũme” na njĩra ya kuonania wĩtĩkio harĩ igongona rĩa ũkũũri rĩa Jesu. Na njĩra o ta ĩyo, Mathayo 25:31, 32 yonanagia atĩ “ndũrĩrĩ ciothe,” nginya andũ arĩa aganu, nĩ “igaacokanĩrĩrio mbere” ya gĩtĩ kĩa ũnene kĩrĩ na riri kĩa Jesu. Hatarĩ nganja, ndũrĩrĩ ciothe ikoragwo gũkũ thĩ, no ti kũrĩa igũrũ. Ũtheri ũcio nĩ ũtaũkĩkaga wega. Nĩ ũtaaragĩria kĩrĩa gĩtũmaga Bibilia yage kuuga atĩ andũ a kĩrĩndĩ kĩnene nĩ mathiaga igũrũ. Gĩkundi o kĩmwe tu kĩa arĩa 144,000, nokĩo kĩrĩirũo muoyo wa tene na tene kũrĩa igũrũ, na nĩo magaathiĩ “gwathana marĩ athamaki igũrũ rĩa thĩ” marĩ hamwe na Jesu.—Kũg. 5:10.

10. Nĩkĩ no mũhaka kĩrĩndĩ kĩnene kĩambe kĩrutwo ithimi cia Jehova mbere ya Mĩaka Ngiri?

¹⁰ Kuuma 1935, Aira a Jehova makoretwo mataũkĩirũo atĩ kĩrĩndĩ kĩrĩa kĩnene kĩgwetetwo kĩoneki-inĩ kĩa Johana, nĩ gĩkundi kĩa Akristiano ehokeku arĩa marĩ na kĩĩrĩgĩrĩro gĩa gũgaatũũra tene na tene gũkũ thĩ. Nĩgetha kĩrĩndĩ kĩu kĩnene gĩkaahonoka thĩna ũrĩa mũnene, no mũhaka kĩambe kĩrutwo ithimi cia Jehova mbere ya Mĩaka Ngiri kwambĩrĩria. No mũhaka andũ a kĩrĩndĩ kĩu monanie wĩtĩkio mũrũmu nĩguo makaahota “kũhonoka maũndũ-inĩ macio mothe marĩa arĩ o mũhaka mekĩke” mbere ya Wathani wa Mĩaka Ngiri wa Kristo.—Luk. 21:34-36.

11. Nĩ kĩĩ kĩngĩkorũo gĩatũmĩte Arutwo amwe a Bibilia mecirie atĩ nĩ kũrĩ andũ magaathiĩ igũrũ thutha wa Mĩaka Ngiri?

¹¹ Ĩ narĩo rĩciria rĩa atĩ nĩ harĩ andũ ehokeku  magaathiĩ igũrũ thutha wa Mĩaka Ngiri? Ũndũ ũcio wagwetetwo mĩaka mĩingĩ mĩhĩtũku nĩ The Watch Tower ya Februarĩ 15, 1913. Mũndũ nĩ angĩeyũririe atĩrĩ, ‘Nĩ kĩĩ kĩngĩtũma andũ ehokeku a tene maheo muoyo gũkũ thĩ nao Akristiano arĩa hihi mataarĩ ehokeku tao mathiĩ igũrũ?’ Rĩciria rĩu rĩoimanĩte na maũndũ maya merĩ Arutwo a Bibilia meetĩkĩtie na njĩra ya mahĩtia: (1) atĩ kĩrĩndĩ kĩrĩa kĩnene kĩngĩgaathiĩ gũtũũra igũrũ na (2) atĩ kĩrĩndĩ kĩu kĩnene nĩ kĩa Akristiano arĩa mataarĩ na kĩyo mũno.

12-13. Nĩ ũndũ ũrĩkũ arĩa aitĩrĩrie maguta na arĩa a kĩrĩndĩ kĩnene moĩ?

¹² O ta ũrĩa tuona, kuuma mwaka wa 1935, Aira a Jehova nĩ makoretwo mataũkĩirũo ũrĩa kwagĩrĩire atĩ andũ arĩa makaahonoka Hari–Magedoni nĩo kĩrĩndĩ kĩnene kĩrĩa kĩgwetetwo kĩoneki-inĩ kĩa Johana. Magaakorũo “moimĩte thĩna-inĩ ũrĩa mũnene” gũkũ thĩ, na ‘makaanagĩrĩra na mũgambo mũnene makoiga: “Ũhonokio uumaga kũrĩ Ngai witũ, o ũcio ũikarĩire gĩtĩ kĩa ũnene, na kũrĩ Gatũrũme.”’ (Kũg. 7:10, 14) Makĩria ma ũguo, Maandĩko monanagia atĩ arĩa mariũkaga magathiĩ igũrũ mamũkagĩra “ũndũ mwega makĩria” ma andũ ehokeku a tene. (Ahib. 11:40) Nĩ ũndũ ũcio, ariũ a Ithe witũ nĩ maambĩrĩirie kũhunjĩria arĩa angĩ moke matungatĩre Jehova marĩ na kĩĩrĩgĩrĩro gĩa gũgaatũũra tene na tene gũkũ thĩ.

¹³ Andũ a kĩrĩndĩ kĩrĩa kĩnene nĩ makenagĩra kĩĩrĩgĩrĩro kĩu kĩao. Nĩ mataũkagĩrũo atĩ Jehova nĩwe ũthuuraga kana ndungata yake njĩhokeku ĩkũmũtungatĩra kũrĩa igũrũ kana gũkũ thĩ. Arĩa aitĩrĩrie maguta na nginya arĩa a kĩrĩndĩ kĩnene nĩ mataũkagĩrũo atĩ makaaheo kĩheo kĩao nĩ ũndũ tu wa ũtugi mũnene wa Jehova ũrĩa wonanĩtio kũgerera igongona rĩa ũkũũri rĩa Jesu Kristo.—Rom. 3:24.

14. Thutha wa 1935, nĩ kĩĩ gĩatũmaga andũ aingĩ marigwo ũrĩa ũrathi wĩgiĩ kĩrĩndĩ kĩnene ũngĩahingire?

¹⁴ Rĩrĩa andũ a Jehova maataũkĩirũo nĩ ũtheri ũcio mwerũ mwaka-inĩ wa 1935, aingĩ nĩ maarigagwo kũngĩahotekire atĩa andũ arĩa maarĩ na kĩĩrĩgĩrĩro gĩa gũtũũra gũkũ thĩ matuĩke kĩrĩndĩ kĩnene. Kwa ngerekano, Ronald Parkin aarĩ na mĩaka 12 rĩrĩa andũ maataũkĩirũo nĩa mangĩgaakorũo marĩ a kĩrĩndĩ kĩnene. Akĩririkana ũndũ ũcio ooigire ũũ: “Ihinda-inĩ rĩu, kwarĩ na ahunjia ta 56,000 thĩinĩ wa thĩ yothe, na aingĩ ao maarĩ aitĩrĩrie maguta. Kwoguo kĩrĩndĩ kĩrĩa kĩnene gĩtioonekaga kĩrĩ kĩnene ũguo.”

15. Kĩrĩndĩ kĩnene gĩthiĩte na mbere gũcokanĩrĩrio na njĩra ĩrĩkũ?

¹⁵ O na kũrĩ ũguo, mĩaka-inĩ ĩrĩa yarũmĩrĩire,  amishonarĩ nĩ maambĩrĩirie gũtũmwo mabũrũri-inĩ maingĩ, na ũndũ ũcio nĩ watũmire Aira a Jehova mongerereke mũno. Thutha ũcio, mwaka-inĩ wa 1968, nĩ kwaambĩrĩirio mũbango wa kũruta andũ Bibilia gũkĩhũthĩrũo ibuku rĩetagwo Kweli Iongozayo Kwenye Uzima wa Milele. Rĩataaragĩria ũhoro wa ma wa Bibilia na njĩra hũthũ, na ũndũ ũcio nĩ wagucĩrĩirie andũ aingĩ mũno kũrĩ Jehova. Ihinda-inĩ rĩa mĩaka ĩna, andũ makĩria ma ngiri magana matano nĩ maabatithirio. Ningĩ andũ milioni nyingĩ nĩ maabatithirio kũndũ gũtiganĩte o ũrĩa kanitha wa Gatoreki wathiaga ũkĩagaga hinya gĩcigo-inĩ kĩa Latin Amerika na mabũrũri-inĩ mangĩ, na mĩkaana ĩrĩa andũ a Jehova meekĩrĩirũo ĩkĩeherio gĩcigo-inĩ kĩa Rũraya ya Irathĩro na icigo imwe cia Afrika. (Isa. 60:22) Mĩaka-inĩ ya ica ikuhĩ, ithondeka rĩa Jehova nĩ rĩrutĩte indo ingĩ nyingĩ njega cia gũteithia andũ kwĩruta ũhoro wa ma. Rĩu nĩ tũreyonera wega atĩ kĩrĩndĩ kĩnene nĩ gĩcokanĩrĩirio gĩgakinya makĩria ma andũ milioni inyanya.

16. Kĩrĩndĩ kĩnene kĩa andũ kiumĩte kũ?

¹⁶ Thĩinĩ wa kĩoneki, Johana oonire atĩ kĩrĩndĩ kĩnene kĩngĩkoima “ndũrĩrĩ-inĩ ciothe, na mĩhĩrĩga, na ikundi cia andũ, na thiomi.” Mbere ĩyo, mũnabii Zekaria nĩ aarathĩte ũndũ ta ũcio. Aandĩkire ũũ: “Matukũ-inĩ macio, andũ ikũmi kuuma harĩ thiomi ciothe cia ndũrĩrĩ nĩ makaanyita, ti itherũ, nĩ makaanyita marũmĩtie  kanjũ ya Mũyahudi moige atĩrĩ: ‘Tũrenda gũthiĩ hamwe na inyuĩ, tondũ nĩ tũiguĩte atĩ Ngai arĩ hamwe na inyuĩ.’”—Zek. 8:23.

17. Nĩ ũndũ ũrĩkũ ũrekwo ũgateithia andũ kuuma ndũrĩrĩ-inĩ ciothe na thiomi ciothe?

¹⁷ Aira a Jehova nĩ moĩ atĩ nĩguo andũ a thiomi ciothe macokanĩrĩrio, ũhoro ũrĩa mwega no mũhaka ũhunjio na thiomi nyingĩ. Tũkoretwo tũgĩtaũra mabuku marĩ na ũhoro wa Bibilia makĩria ma mĩaka 130, no mahinda-inĩ maya tũraruta wĩra wa ũtaũri na thiomi magana maingĩ na njĩra nene ĩtarĩ yoneka. Hatarĩ nganja, Jehova nĩ ta kĩama araringa matukũ-inĩ maya agacokanĩrĩria kĩrĩndĩ kĩnene kuuma ndũrĩrĩ-inĩ ciothe. Kĩrĩndĩ kĩu kĩnene kuuma kũndũ gũtiganĩte gĩthathayagia na ũrũmwe, tondũ irio cia kĩĩroho nĩ cionekaga na thiomi nyingĩ. Ningĩ Aira a Jehova nĩ moĩkaine wega nĩ ũndũ wa wendo ũrĩa makoragwo naguo na kĩyo kĩao gĩa kũhunjia. Na githĩ ũcio ti ũndũ wa gwĩkĩra wĩtĩkio hinya mũno!—Mat. 24:14; Joh. 13:35.

18. (a) O ta ũrĩa Isaia 46:10, 11 yonanĩtie-rĩ, nĩkĩ ti ũndũ wa kũgegania kuona atĩ Jehova nĩ ahingĩtie ũrathi wĩgiĩ kĩrĩndĩ kĩnene? (b) Nĩ kĩĩ gĩtũmaga arĩa marĩ na kĩĩrĩgĩrĩro gĩa gũgaatũũra thĩinĩ wa thĩ matikaigue ta kũrĩ kĩndũ maraga?

¹⁸ Nĩ tũkenaga mũno nĩ ũndũ wa ũrathi ũcio wĩgiĩ kĩrĩndĩ kĩnene. Ti ũndũ wa kũgegania kuona atĩ Jehova nĩ ahingĩtie ũrathi ũcio na njĩra nene. (Thoma Isaia 46:10, 11.) Andũ a kĩrĩndĩ kĩnene nĩ makenaga nĩ ũndũ wa kĩĩrĩgĩrĩro kĩrĩa Jehova amaheete. Matiiguaga ta kũrĩ kĩndũ maraga nĩ ũndũ wa gũkorũo mataitĩrĩirio maguta nĩ roho wa Ngai magatungate na Jesu kũrĩa igũrũ. Thĩinĩ wa Maandĩko, nĩ tũthomaga ũhoro wĩgiĩ athuri na atumia aingĩ maarĩ na wĩtĩkio arĩa maatongoragio na njĩra nene nĩ roho mũtheru, no ti gĩcunjĩ kĩa arĩa 144,000. Mũndũ ũmwe harĩ acio nĩ Johana Mũbatithania. (Mat. 11:11) Mũndũ ũngĩ nĩ Daudi. (Atũm. 2:34) Acio erĩ o hamwe na angĩ aingĩ nĩ makaariũkio matũũre thĩinĩ wa paradiso gũkũ thĩ. Marĩ othe hamwe na kĩrĩndĩ kĩnene nĩ magaakorũo na mweke wa kuonania wĩhokeku wao harĩ Jehova na harĩ ũnene wake.

19. Gũtaũkĩrũo nĩ kĩoneki kĩa Johana kĩgiĩ kĩrĩndĩ kĩnene kũbatiĩ gũtũma twĩke atĩa?

¹⁹ Ngai ndarĩ acokanĩrĩria andũ milioni nyingĩ kuuma ndũrĩrĩ-inĩ ciothe ta arĩa acokanĩrĩirie matukũ-inĩ maya. Gũtekũmakania kana kĩĩrĩgĩrĩro gitũ nĩ gĩa gũthiĩ igũrũ kana nĩ gĩa gũgaatũũra gũkũ thĩ, nĩ tũrabatara gũteithia andũ aingĩ o ũrĩa kũngĩhoteka matuĩke gĩcunjĩ gĩa kĩrĩndĩ kĩnene kĩa “ng’ondu ingĩ.” (Joh. 10:16) Ica ikuhĩ, Jehova nĩ ekũrehe thĩna mũnene ũrĩa warathĩtwo ũrĩa ũkaaniina thirikari na ndini iria ikoretwo igĩtũma andũ manyamarĩke mũno. Na githĩ andũ a kĩrĩndĩ kĩnene matirĩ na mweke wa mwanya wa gũgaatungatĩra Jehova thĩinĩ wa thĩ tene na tene!—Kũg. 7:14.