GĨCUNJĨ KĨA WĨRUTI KĨA 34
Ũrĩ na Itemi rĩa Bata Kĩũngano-inĩ kĩa Jehova!
“O ta ũrĩa mwĩrĩ ũrĩ ũmwe no nĩ ũrĩ ciĩga nyingĩ, na ciĩga ciothe cia mwĩrĩ ũcio o na irĩ nyingĩ nĩ mwĩrĩ ũmwe-rĩ, ũguo noguo Kristo o nake atariĩ.”—1 KOR. 12:12.
RWĨMBO NA. 101 Kũrutithania Wĩra twĩ na Ũrũmwe
GĨCUNJĨ-INĨ GĨKĨ *
1. Nĩ gĩtĩo kĩrĩkũ kĩnene tũkoragwo nakĩo?
NĨ GĨTĨO kĩnene gũkorũo tũrĩ thĩinĩ wa kĩũngano kĩa Jehova. Tũkoragwo thĩinĩ wa paradiso ya kĩĩroho ĩkoragwo na andũ marĩ na gĩkeno na mendete thayũ. Itemi rĩaku thĩinĩ wa kĩũngano nĩ rĩrĩkũ?
2. Nĩ ngerekano ĩrĩkũ mũtũmwo Paulo aahũthĩrire marũa-inĩ make?
2 No twĩrute maũndũ maingĩ megiĩ itemi rĩrĩa tũrĩ narĩo kuumana na ngerekano mũtũmwo Paulo aahũthĩrire maita maigana ũna marũa-inĩ make. Marũa-inĩ macio, Paulo aaringithanirie kĩũngano na mwĩrĩ wa mũndũ. Ningĩ nĩ aaringithanirie mũndũ ũmwe ũmwe thĩinĩ wa kĩũngano na ciĩga itiganĩte cia mwĩrĩ.—Rom. 12:4-8; 1 Kor. 12:12-27; Ef. 4:16.
3. Nĩ maũndũ marĩkũ matatũ tũkwarĩrĩria gĩcunjĩ-inĩ gĩkĩ?
3 Thĩinĩ wa gĩcunjĩ gĩkĩ, tũkwarĩrĩria maũndũ matatũ ma bata tũngĩĩruta kuumana na ngerekano ĩyo ya Paulo. Wa mbere, nĩ tũkuona atĩ o ũmwe witũ arĩ na itemi * rĩa bata kĩũngano-inĩ kĩa Jehova. Wa kerĩ, nĩ tũkwarĩrĩria ũrĩa tũngĩka angĩkorũo nĩ tuonaga arĩ ũndũ mũritũ gwĩtĩkia atĩ tũrĩ na itemi rĩa bata thĩinĩ wa kĩũngano. Na wa gatatũ, nĩ tũkwarĩrĩria nĩkĩ nĩ twagĩrĩirũo gũthiĩ na mbere kũhingia itemi ritũ thĩinĩ wa kĩũngano.
O ŨMWE WITŨ ARĨ NA ITEMI RĨA BATA KĨŨNGANO-INĨ KĨA JEHOVA
4. Tũreruta atĩa kuumana na Aroma 12:4, 5?
4 Ũndũ wa mbere tũngĩĩruta kuumana na ngerekano ya Paulo nĩ atĩ o ũmwe witũ arĩ na itemi rĩa bata kĩũngano-inĩ. Paulo aambĩrĩirie ngerekano ĩyo ũũ: “O ta ũrĩa mwĩrĩ ũmwe ũkoragwo na ciĩga nyingĩ, no ciĩga icio ciothe itirutaga wĩra ũhaanaine-rĩ, no taguo harĩ ithuĩ, o na gũtuĩka tũrĩ aingĩ, tũrĩ mwĩrĩ ũmwe thĩinĩ wa Kristo, no tũrĩ mũndũ ũmwe ũmwe-rĩ, tũrĩ kĩĩga kĩa mũndũ na ũrĩa ũngĩ.” (Rom. 12:4, 5) Paulo eendaga kũrutana atĩa? O ũmwe witũ arĩ na itemi ngũrani na rĩa ũrĩa ũngĩ thĩinĩ wa kĩũngano, no ithuothe tũrĩ a bata.
O mũndũ akoragwo na itemi ngũrani thĩinĩ wa kĩũngano, no ithuothe tũrĩ a bata (Rora kĩbungo gĩa 5-12) *
5. Nĩ “iheo” irĩkũ Jehova aheanĩte thĩinĩ wa kĩũngano?
5 Rĩrĩa weciria nĩa makoragwo na itemi rĩa bata thĩinĩ wa kĩũngano no kũhoteke andũ arĩa mokaga meciria-inĩ nĩ arĩa matongoragia maũndũ thĩinĩ wa kĩũngano. (1 Thes. 5:12; Ahib. 13:17) Ma nĩ atĩ, Jehova kũgerera harĩ Kristo nĩ aheanĩte “arũme marĩ ta iheo” thĩinĩ wa kĩũngano. (Ef. 4:8) Arũme acio nĩ arĩa matungataga thĩinĩ wa Kĩama Kĩrĩa Gĩtongoragia, ateithia a Kĩama Kĩrĩa Gĩtongoragia, arĩa matungataga thĩinĩ wa Kamĩtĩ ya Wabici ya Rũhonge, arori a mũthiũrũrũko, arĩa marutanaga cukuru-inĩ cia gĩtheokrasi, athuri a kĩũngano, na ndungata cia kĩũngano. Ariũ a Ithe witũ acio othe mamũragwo kũgerera roho mũtheru nĩguo marũmbũiye ng’ondu cia Jehova na matungatĩre kĩũngano.—1 Pet. 5:2, 3.
6. Kũringana na 1 Athesalonike 2:6-8, ariũ a Ithe witũ arĩa mamũrĩtwo kũgerera roho mũtheru merutanagĩria gwĩka atĩa?
6 Ariũ a Ithe witũ mamũragwo kũgerera roho mũtheru nĩguo mahingie maũndũ matiganĩte. O ta ũrĩa ciĩga itiganĩte cia mwĩrĩ ta moko na magũrũ irutaga wĩra nĩguo mwĩrĩ wothe ũgunĩke, ariũ a Ithe witũ arĩa mamũragwo kũgerera roho mũtheru nĩ merutanagĩria nĩguo kĩũngano gĩothe kĩgunĩke. Matiĩcaragĩria igweta. Handũ ha ũguo, merutanagĩria gwaka na gwĩkĩra hinya aarĩ na ariũ a Ithe witũ. (Thoma 1 Athesalonike 2:6-8.) Nĩ tũcokagĩria Jehova ngatho nĩ ũndũ wa arũme acio a kĩĩroho na matarĩ mwĩyendo!
7. Arĩa makoragwo ũtungata-inĩ wa mahinda mothe makenagĩra irathimo irĩkũ?
7 Andũ amwe thĩinĩ wa kĩũngano no makorũo mamũrĩtwo gũtungata marĩ amishonarĩ, mapainia a mwanya, kana a hĩndĩ ciothe. Aarĩ na ariũ a Ithe witũ amwe thĩinĩ wa thĩ yothe, nĩ matuĩte itua rĩa kũhunjagia na gũtua andũ arutwo mahinda mothe. Na njĩra ĩyo nĩ mahotete gũteithia andũ aingĩ gũtuĩka arutwo a Kristo Jesu. O na gũtuĩka ndungata icio cia mahinda mothe itikoragwo na indo nyingĩ cia kĩĩmwĩrĩ, Jehova nĩ acirathimaga na njĩra nyingĩ. (Mar. 10:29, 30) Nĩ twendete aarĩ na ariũ a Ithe witũ acio, na nĩ tũkenaga nĩ ũndũ wao gũkorũo thĩinĩ wa kĩũngano!
8. Nĩkĩ mũhunjia o wothe wa ũhoro ũrĩa mwega nĩ wa bata harĩ Jehova?
8 Hihi ariũ a Ithe witũ arĩa mamũrĩtwo na arĩa marĩ ũtungata-inĩ wa mahinda mothe no o tu makoragwo na itemi rĩa bata kĩũngano-inĩ? Aca! Mũhunjia o wothe wa ũhoro ũrĩa mwega nĩ wa bata harĩ Jehova na thĩinĩ wa kĩũngano. (Rom. 10:15; 1 Kor. 3:6-9) Gĩtũmi nĩ tondũ ũndũ ũrĩa wa bata mũno kĩũngano kĩhingagia nĩ gũtua andũ arutwo a Mwathani witũ Jesu Kristo. (Mat. 28:19, 20; 1 Tim. 2:4) Arĩa othe manyitanagĩra na kĩũngano, makorũo marĩ abatithie kana matarĩ abatithie, nĩ merutanagĩria kũiga mbere wĩra ũcio ũtũũro-inĩ wao.—Mat. 24:14.
9. Nĩ kĩĩ gĩtũmaga tũcokie ngatho nĩ ũndũ wa aarĩ a Ithe witũ arĩa tũkoragwo nao kĩũngano-inĩ?
9 Jehova nĩ aheete aarĩ a Ithe witũ itemi rĩa bata mũno kĩũngano-inĩ. Nĩ akenagio nĩ aarĩ a Ithe witũ arĩa marĩ kĩhiko-inĩ, arĩa marĩ na ciana, a ndigwa, na arĩa matarĩ kĩhiko-inĩ arĩa mamũtungatagĩra marĩ na wĩhokeku. Bibilia nĩ ĩgwetete atumia aingĩ maarĩ kĩonereria kĩega arĩa maakenagia Ngai. Magathĩrĩirio marĩ cionereria njega ũhoro-inĩ wĩgiĩ ũũgĩ, wĩtĩkio, kĩyo, ũmĩrĩru, ũtaana, na ciĩko njega. (Luk. 8:2, 3; Atũm. 16:14, 15; Rom. 16:3, 6; Afil. 4:3; Ahib. 11:11, 31, 35) Nĩ tũcokagĩria Jehova ngatho mũno nĩ ũndũ wa aarĩ a Ithe witũ arĩa makoragwo na ngumo ta icio njega thĩinĩ wa ciũngano citũ.
10. Nĩ kĩĩ gĩtũmaga tũcokie ngatho nĩ ũndũ wa andũ akũrũ kĩũngano-inĩ?
10 Ningĩ nĩ tũkenaga mũno gũkorũo na andũ aingĩ akũrũ thĩinĩ wa ciũngano citũ. Thĩinĩ wa ciũngano imwe, kũrĩ na aarĩ na ariũ a Ithe witũ akũrũ matungatĩire Jehova ũtũũro-inĩ wao wothe marĩ ehokeku. Nao angĩ no kũhoteke merutĩte ũhoro wa ma marĩ o akũrũ. Andũ amwe akũrũ no makorũo makĩhiũrania na mathĩna ma mwĩrĩ marĩa moimanaga na ũkũrũ. Mathĩna macio no matũme maremwo kũhingia maũndũ maingĩ thĩinĩ wa kĩũngano na wĩra-inĩ wa kũhunjia. Ĩndĩ nĩ merutanagĩria ũrĩa wothe mahota ũtungata-inĩ na makahũthĩra hinya ũrĩa wothe marĩ naguo gwĩkĩra andũ arĩa angĩ ngoro na kũmamenyeria. Ningĩ nĩ twĩrutaga maũndũ maingĩ kuumana na ũmenyeru wao. Nĩ a bata mũno harĩ Jehova na harĩ ithuĩ.—Thim. 16:31.
11-12. Andũ ethĩ thĩinĩ wa kĩũngano kĩanyu magwĩkĩraga ngoro na njĩra ĩrĩkũ?
11 Ningĩ ta wĩcirie ũhoro wĩgiĩ andũ ethĩ. Nĩ macemanagia na moritũ maingĩ magĩkũrĩra thĩinĩ wa thĩ ĩno ĩtongoragio nĩ Shaitani ũrĩa Mũcukani na mwĩcirĩrie wake mũũru. (1 Joh. 5:19) Ĩndĩ nĩ twĩkĩragwo ngoro mũno rĩrĩa tuona makĩruta macokio mĩcemanio-inĩ, makĩhunjia, na magĩtetera wĩtĩkio wao marĩ na ũmĩrĩru. Hatarĩ nganja, inyuĩ andũ ethĩ mũrĩ na itemi rĩa bata thĩinĩ wa kĩũngano kĩa Jehova!—Thab. 8:2.
12 O na kũrĩ ũguo, aarĩ na ariũ a Ithe witũ amwe nĩ monaga arĩ ũndũ mũritũ gwĩtĩkia atĩ nĩ mahingagia itemi rĩa bata thĩinĩ wa kĩũngano. Nĩ kĩĩ kĩngĩtũteithia kuona atĩ o ũmwe witũ arĩ na itemi rĩa bata thĩinĩ wa kĩũngano? Rekei tuone.
ONAGA ITEMI RĨAKU THĨINĨ WA KĨŨNGANO
13-14. Nĩ kĩĩ kĩngĩtũma andũ amwe mone ta matarĩ a bata thĩinĩ wa kĩũngano?
13 Rekei tuone ũndũ wa kerĩ tũngĩĩruta kuumana na ngerekano ya Paulo. Paulo agwetete thĩna ũkoragwo na andũ aingĩ ũmũthĩ wa kwaga gwĩtĩkia atĩ nĩ makoragwo na itemi rĩa bata thĩinĩ wa kĩũngano. Aandĩkire ũũ: “Kũgũrũ kũngiuga, ‘Tondũ ti niĩ guoko, niĩ ndirĩ kĩĩga kĩa mwĩrĩ,’ ũndũ ũcio ndũngĩtũma gũtige gũtuĩka kĩĩga kĩa mwĩrĩ. Na gũtũ kũngiuga, ‘Tondũ ti niĩ riitho, niĩ ndirĩ kĩĩga kĩa mwĩrĩ,’ ũndũ ũcio ndũngĩtũma gũtige gũtuĩka kĩĩga kĩa mwĩrĩ.” (1 Kor. 12:15, 16) Paulo eendaga kũrutana ũndũ ũrĩkũ?
14 Ũngĩĩringithania na andũ arĩa angĩ thĩinĩ wa kĩũngano no wone ta ũtarĩ wa bata. Andũ amwe thĩinĩ wa kĩũngano no makorũo marĩ arutani ega, moĩ kũbanga maũndũ wega, kana marĩ na ũhoti wa gwĩkĩra andũ arĩa angĩ ngoro. No gũkorũo werora wonaga ndũrĩ na ũhoti ta wao. Ũndũ ũcio ũronania atĩ ũrĩ mwĩnyihia. (Afil. 2:3) Ĩndĩ no hakorũo na ũgwati. Angĩkorũo kaingĩ nĩ wĩringithanagia na andũ arĩa marĩ na ũhoti mũnene nĩ ũrĩkuaga ngoro. O ta ũrĩa Paulo aagwetire, o na no wambĩrĩrie gwĩciria atĩ ndũkoragwo ũrĩ wa bata thĩinĩ wa kĩũngano. Nĩ kĩĩ kĩngĩgũteithia kũhũũrana na mwĩcirĩrie ũcio?
15. Kũringana na 1 Akorintho 12:4-11, nĩ ũndũ ũrĩkũ twagĩrĩirũo gũkorũo na ma naguo wĩgiĩ iheo iria tũngĩkorũo nacio?
15 Hĩndĩ ya karine ya mbere, Jehova nĩ aaheire Akristiano amwe iheo cia roho mũtheru na njĩra ya kĩama, no othe matiaheirũo iheo ihaanaine. (Thoma 1 Akorintho 12:4-11.) Jehova aamaheire iheo na ũhoti ngũrani, ĩndĩ o ũmwe wao aarĩ wa bata. Ũmũthĩ tũtiheagwo iheo cia roho mũtheru na njĩra ya kĩama, no ũrĩa kũrĩ nĩ atĩ no kũhoteke tũtirĩ na ũhoti ũhaanaine ĩndĩ ithuothe tũrĩ a bata harĩ Jehova.
16. Nĩ ũtaaro ũrĩkũ wa mũtũmwo Paulo twagĩrĩirũo kũhũthĩra?
16 Handũ ha kwĩringithania na Akristiano arĩa angĩ, twagĩrĩirũo kũhũthĩra ũtaaro ũyũ mũtũmwo Paulo aandĩkire atongoretio nĩ roho: “O mũndũ nĩ athuthurie ciĩko ciake mwene, na hĩndĩ ĩyo nĩ ekũgĩa na gĩtũmi gĩa gũkena nĩ ũndũ wake mwene, no ti kwĩringithania na mũndũ ũrĩa ũngĩ.”—Gal. 6:4.
17. Tũrĩgunĩkaga atĩa twarũmĩrĩra ũtaaro wa Paulo?
17 Tũngĩrũmĩrĩra ũtaaro ũcio ũtongoretio nĩ roho wa mũtũmwo Paulo, na tũthuthurie ciĩko citũ ene no twambĩrĩrie kuona atĩ tũrĩ na iheo na ũhoti wa mwanya. Kwa ngerekano, mũthuri wa kĩũngano no akorũo ndarĩ na ũhoti mũnene wa kũrutana kĩũngano-inĩ, ĩndĩ akorũo na moimĩrĩro mega mũno wĩra-inĩ wa gũtua andũ arutwo. Kana hihi no akorũo ndarĩ na ũhoti mũnene wa kũbanga maũndũ wega ta athuri angĩ kĩũngano-inĩ, ĩndĩ nĩ akoragwo arĩ mũtugi mũno na nĩ arĩ wendo, na aarĩ na ariũ a Ithe witũ nĩ maiguaga mategwĩtigĩra gũthiĩ kũmũhoya ũtaaro wa Maandĩko. Ningĩ no akorũo arĩ kĩonereria kĩega gĩa kũnyita andũ ũgeni. (Ahib. 13:2, 16) Rĩrĩa tuona ũhoti na iheo iria tũrĩ nacio, nĩ tũrĩkenaga nĩ ũndũ wa maũndũ marĩa tũrahingia kĩũngano-inĩ. Ningĩ tũtirĩiguagĩra ũiru ariũ a Ithe witũ arĩa marĩ na iheo ngũrani na citũ.
18. Tũngĩagagĩria ũhoti witũ atĩa?
18 Gũtekũmakania itemi rĩrĩa tũrĩ narĩo thĩinĩ wa kĩũngano, ithuothe nĩ twagĩrĩirũo kwĩrutanĩria kwagagĩria ũtungata na ũhoti witũ. Jehova nĩ atũteithagia kwagagĩria maũndũ macio kũgerera gĩthomo kĩa bata kĩrĩa tũrutagwo nĩ ithondeka rĩake. Kwa ngerekano, kũgerera mũcemanio wa gatagatĩ-inĩ ga kiumia, nĩ tũheagwo motaaro mangĩtũteithia gũkorũo na moimĩrĩro mega makĩria ũtungata-inĩ. Hihi nĩ wĩrutanagĩria kũhũthĩra maũndũ marĩa tũrutagwo mũcemanio-inĩ ũcio?
19. Ũngĩka atĩa nĩguo ũkinyĩre muoroto wa gũthiĩ Cukuru ya Ahunjia a Ũthamaki?
19 Gĩthomo kĩngĩ kĩa bata twamũkagĩra nĩ kĩrĩa kĩrutanagwo thĩinĩ wa Cukuru ya Ahunjia a Ũthamaki. Aarĩ na ariũ a Ithe witũ arĩa marĩ ũtungata-inĩ wa mahinda mothe arĩa marĩ na mĩaka 23 nginya 65, no mathiĩ cukuru ĩyo. No gũkorũo nĩ wonaga ta ũtangĩhota gũthiĩ cukuru ĩyo. No handũ ha gwĩkĩrĩra maũndũ marĩa mangĩtũma wone ta ũtangĩhota gũthiĩ, wĩcirie maũndũ marĩa mangĩtũma wende gũthiĩ. Ningĩ ũcoke ũrore nĩ maũndũ marĩkũ ũngĩka nĩguo wagĩrĩre gũthiĩ cukuru ĩyo. Ũgĩteithio nĩ Jehova na ũcoke ũkorũo na kĩyo, no ũhote gwĩka ũndũ ũrĩa weciragia ndũngĩhoteka.
HŨTHAGĨRA ŨHOTI WAKU GWĨKĨRA KĨŨNGANO HINYA
20. Tũreruta atĩa kuumana na Aroma 12:6-8?
20 Ũndũ wa gatatũ ũrĩa tũngĩĩruta kuumana na ngerekano ya Paulo ũrĩ thĩinĩ wa Aroma 12:6-8. (Thoma.) Thĩinĩ wa mĩhari ĩyo, Paulo onanĩtie o rĩngĩ atĩ andũ thĩinĩ wa kĩũngano makoragwo na iheo itiganĩte. No haha aratĩtĩrithia atĩ, twagĩrĩirũo kũhũthĩra kĩheo o gĩothe tũrĩ nakĩo gwaka na gwĩkĩra kĩũngano hinya.
21-22. Nĩ maũndũ marĩkũ tũngĩĩruta kuuma harĩ Robert na Felice?
21 Ta wĩcirie ngerekano ya mũrũ wa Ithe witũ tũgwĩta Robert. Thutha wa gũtungata bũrũri-inĩ ũngĩ, nĩ aatũmirũo gũtungata Betheli ya bũrũri ũrĩa ooimĩte. O na gũtuĩka nĩ eerirũo ndaacenjeirio mweke wa ũtungata nĩ ũndũ wa gwĩka ũndũ o wothe mũũru, ooigire ũũ: “Kwa ihinda rĩa mĩeri mĩingĩ, ndaikaraga itarĩ na gĩkeno, nĩ ũndũ wa kuona ta ndaremetwo kũhingia wĩra ũrĩa ndaheetwo. Harĩ mahinda ndaiguaga ta ingĩtiga ũtungata wakwa wa Betheli.” Eekire atĩa nĩguo acokie gĩkeno gĩake? Mũthuri ũmwe wa kĩũngano nĩ aamũririkanirie atĩ Jehova nĩ atũmenyeragia kũgerera mweke o wothe anatũhe nĩguo tũhote kũhingia wega wĩra ũrĩa tũrĩ naguo ihinda-inĩ rĩrĩ. Robert nĩ aamenyire atĩ nĩ arabatara gũtiga gwĩciria ũhoro wa ihinda ihĩtũku, na ambĩrĩrie gwĩciria ũrĩa angĩka ihinda-inĩ rĩrĩ.
22 Mũrũ wa Ithe witũ Felice Episcopo nĩ aacemanirie na ũndũ ta ũcio. Marĩ na mũtumia wake maarĩkirie cukuru ya Gileadi mwaka-inĩ wa 1956, na magĩtungata wĩra-inĩ wa gũceerera ciũngano bũrũri-inĩ wa Bolivia. Mwaka-inĩ wa 1964, makĩgĩa kaana. Felice ooigire ũũ: “Ndwarĩ ũndũ mũhũthũ harĩ ithuĩ gũtiga mweke wa ũtungata ũrĩa twarĩ naguo. No nyende kuuga atĩ kwa ihinda ta rĩa mwaka ũmwe ndaiguaga nguĩte ngoro. No nĩ ũndũ wa ũteithio wa Jehova, nĩ ndaacenjirie mwerekera ũcio ndarĩ naguo, na ngĩiga meciria harĩ wĩra wakwa mwerũ wa gũtuĩka mũciari.” Hihi wanaigua ta ũrĩa Robert na Felice maaiguaga? Hihi nĩ ũiguaga ũkuĩte ngoro tondũ ihinda-inĩ rĩrĩ ndũrĩ na mĩeke ya ũtungata ĩrĩa warĩ nayo ihinda ihĩtũku? Angĩkorũo nĩ ũiguaga ũguo, no ũkorũo na gĩkeno makĩria ũngĩcenjia mwerekera waku, na wĩkĩrĩre maũndũ marĩa ũngĩhota kũhingia ihinda-inĩ rĩrĩ ũgĩtungatĩra Jehova na aarĩ na ariũ a Ithe witũ. Koragwo na maũndũ maingĩ ma gwĩka, na ũhũthagĩre iheo na ũhoti waku gũteithia andũ arĩa angĩ, na nĩ ũrĩgĩaga na gĩkeno ũgĩkĩra hinya kĩũngano.
23. Twagĩrĩirũo kũhũthagĩra mahinda gwĩka atĩa? Nĩ maũndũ marĩkũ tũkaarĩrĩria gĩcunjĩ-inĩ kĩrĩa kĩrũmĩrĩire?
23 Ithuothe tũrĩ a bata harĩ Jehova. Endaga tũkorũo tũrĩ famĩlĩ-inĩ yake. Tũngĩhũthagĩra mahinda gwĩcũrania maũndũ marĩa tũngĩhota gwĩka nĩguo twĩkĩre hinya aarĩ na ariũ a Ithe witũ, na tũcoke twĩrutanĩrie kũhingia itemi rĩu nĩ ũrĩkoragwo ũrĩ ũndũ mũhũthũ harĩ ithuĩ kũigua atĩ tũrĩ a bata kĩũngano-inĩ. No rĩrĩ, tũkoragwo na mawoni marĩkũ kwerekera andũ arĩa angĩ kĩũngano-inĩ? Tũngĩonania atĩa atĩ nĩ tũmonaga marĩ a bata? Gĩcunjĩ-inĩ kĩrĩa kĩrũmĩrĩire nĩ tũkaarĩrĩria maũndũ macio ma bata.
RWĨMBO NA. 24 Ũka Kĩrĩma-inĩ kĩa Jehova
^ kĩb. 5 Ithuothe nĩ twendete kũigua atĩ tũrĩ a bata harĩ Jehova. No rĩmwe no gũkorũo nĩ twĩyũragia kana Jehova nĩ atuonaga tũrĩ a bata. Gĩcunjĩ gĩkĩ nĩ gĩgũteithia o ũmwe witũ kuona atĩ nĩ wa bata thĩinĩ wa kĩũngano.
^ kĩb. 3 GŨTAARĨRIA KIUGO: Gũkorũo na itemi thĩinĩ wa kĩũngano kĩa Jehova kũhutĩtie maũndũ marĩa mũndũ angĩhota gwĩka nĩguo ake na ekĩre hinya kĩũngano. Itemi ritũ thĩinĩ wa kĩũngano rĩtiĩhocetie harĩ rũrĩrĩ rwitũ, ũhoti witũ wa kĩĩmbeca, mũikarĩre, ũndũire, kana gĩthomo gitũ.
^ kĩb. 62 GŨTAARĨRIA MBICA: Mbica ithatũ ironania ũrĩa kũrathiĩ na mbere, mbere ya mũcemanio, hĩndĩ ya mũcemanio, na thutha wa mũcemanio. Mbica ya 1: Mũthuri wa kĩũngano ũranyita mũndũ ũgeni, mũrũ wa Ithe witũ mwĩthĩ ũrahaarĩria indo cia mũgambo, na mwarĩ wa Ithe witũ ũraranĩria na mwarĩ wa Ithe witũ ũngĩ mũkũrũ. Mbica ya 2: Andũ ethĩ na akũrũ makĩruta macokio hĩndĩ ya Wĩruti wa Mũrangĩri. Mbica ya 3: Mũrũ wa Ithe witũ na mũtumia wake magĩteithĩrĩria harĩ gũtheria Nyũmba ya Ũthamaki. Mwarĩ wa Ithe witũ agĩteithĩrĩria kairĩtu gake gũikia mũhothi ithandũkũ-inĩ rĩa mũhothi. Mũrũ wa Ithe witũ mwĩthĩ agĩteithĩrĩria metha-inĩ ya mabuku, na mũrũ wa Ithe witũ ũngĩ akĩũmĩrĩria mwarĩ wa Ithe witũ mũkũrũ.
