1. Jehova oombire andũ nĩkĩ?

KŨRĨ hĩndĩ Jehova aatũũraga kuo arĩ wiki. No ndaarĩ na ihooru. Jehova ndabataraga mũndũ ũngĩ nĩguo akorũo na gĩkeno. O na kũrĩ ũguo, Ngai nĩ oonire arĩ wega ombe andũ angĩ na makenere ũtũũro. Nĩ ũndũ wa wendo, Jehova akĩambĩrĩria kũũmba.—Thab. 36:9; 1 Joh. 4:19.

2. Jesu o hamwe na araika maaiguire atĩa nĩ ũndũ wa indo iria Jehova oombire?

² Mbere ndaya, Jehova oombire Jesu Mũrũ wake. Thutha ũcio, kũgerera harĩ Mũrũ ũcio wake ‘indo iria ingĩ ciothe ikĩũmbwo,’ o hamwe na ciũmbe milioni nyingĩ cia kĩĩroho. (Kol. 1:16) Jesu nĩ aakeneire mweke ũcio wa kũrutithania wĩra na Ithe. (Thim. 8:30) Na araika a Ngai o nao nĩ maakenire. Maarĩ kuo rĩrĩa Jehova na Jesu, Njorua yake ya wĩra maathondekire igũrũ na thĩ. Araika acio moonanirie atĩa gĩkeno kĩao? Rĩrĩa thĩ yombirũo, “makĩambĩrĩria kwanĩrĩra makenete” na hatarĩ nganja Jehova omba o kĩndũ nĩ maakenaga, na makĩria rĩrĩa oombire andũ marĩ a mũico harĩ ũũmbi wake. (Ayub. 38:7; Thim. 8:31, kohoro ka magũrũ-inĩ) Ũũmbi ũcio wothe nĩ woonanirie wendo na ũũgĩ wa Jehova.—Thab. 104:24; Rom. 1:20.

3. O ta ũrĩa 1 Akorintho 15:21, 22 yonanĩtie-rĩ, nĩ ũndũ ũrĩkũ ũhotekaga nĩ ũndũ wa igongona rĩa ũkũũri rĩa Jesu?

³ Muoroto wa Jehova warĩ andũ matũũre tene na tene thĩinĩ wa thĩ thaka ĩrĩa oombĩte. No rĩrĩa Adamu na Hawa maaremeire  Ithe wao ũrĩ wendo, mehia na gĩkuũ nĩ ciaingĩrire, kwoguo matingĩatũũrire tene na tene thĩinĩ wa thĩ. (Rom. 5:12) Hihi Jehova eekire atĩa? O hĩndĩ ĩyo nĩ ooigire ũrĩa angĩekire nĩguo ahonokie andũ. (Kĩam. 3:15) Jehova nĩ aabangire ũrĩa angĩarutire ũkũũri, nĩguo ciana cia Adamu na Hawa ikũũrũo kuuma harĩ mehia na gĩkuũ. Na njĩra ĩyo, akĩreka o mũndũ ethuurĩre kũmũtungatĩra nĩguo akoona muoyo wa tene na tene.—Joh. 3:16; Rom. 6:23; thoma 1 Akorintho 15:21, 22.

4. Tũkwarĩrĩria ciũria irĩkũ gĩcunjĩ-inĩ gĩkĩ?

⁴ Nĩ harĩ ciũria nyingĩ ciĩyumĩragia ciĩgiĩ kĩĩranĩro gĩa kũriũkia andũ arĩa makuĩte. Kwa ngerekano, hihi andũ makaariũkio na njĩra ĩrĩkũ? Hihi nĩ tũkahota kũmenya endwa aitũ arĩa maakuĩte rĩrĩa magaacokio muoyo? Ũriũkio ũgatũrehera gĩkeno na njĩra irĩkũ? Na gwĩcũrania ũhoro wĩgiĩ ũriũkio kũngĩtũruta atĩa ũhoro wĩgiĩ wendo, ũũgĩ, na wetereri wa Jehova? Rekei twarĩrĩrie ciũria icio.

5. Nĩkĩ no twĩrĩgĩrĩre atĩ andũ makaariũkio na mũbango kahora kahora?

⁵ Rĩrĩa Jehova kũgerera harĩ Mũrũ wake akaariũkia andũ milioni nyingĩ, no twĩrĩgĩrĩre atĩ andũ othe matikaariũkio hĩndĩ ĩmwe. Nĩkĩ hihi? Tondũ andũ acio othe mangĩriũkio ihinda-inĩ rĩmwe no kwage mũbango mwega thĩinĩ wa thĩ. Na hingo ciothe Jehova ekaga maũndũ na njĩra ya mũbango. Jehova nĩ oĩ atĩ nĩguo thayũ ũtũũre no mũhaka gũkorũo na mũbango mwega. (1 Kor. 14:33) Jehova Ngai nĩ oonanirie ũũgĩ na wetereri rĩrĩa marĩ na Jesu maathondekire thĩ ikinya gwa ikinya mbere ya kũũmba mũndũ. O ũndũ ũmwe na ũcio, Jesu nĩ akoonania ngumo o ta icio hĩndĩ ya Wathani wa Mĩaka  Ngiri, akĩrutithania wĩra na arĩa makaahonoka Hari–Magedoni makĩhaarĩria thĩ nĩguo mamũkĩre arĩa makaariũkio.

6. Kũringana na Atũmwo 24:15, andũ amwe arĩa Jehova akaariũkia nĩa?

⁶ Ũndũ ũrĩa wa bata makĩria nĩ atĩ, andũ arĩa makaahonoka Hari–Magedoni nĩ makaaruta andũ arĩa makaariũkio ũhoro wĩgiĩ Ũthamaki wa Ngai na ithimi cia Jehova. Nĩkĩ? Tondũ andũ aingĩ arĩa makaariũkio nĩ arĩa “matarĩ athingu.” (Thoma Atũmwo 24:15.) Nĩ makaabatara gwĩka mogarũrũku maingĩ nĩguo magunĩke kuumana na igongona rĩa Jesu. Ta wĩcirie ũrĩa gũgaakorũo na wĩra mũingĩ wa kũruta andũ aingĩ arĩa matoĩ Jehova ũhoro wa ma. Hihi andũ magaathomithagio marĩ mũndũ ũmwe ũmwe ta ũrĩa tũrutaga andũ Bibilia ũmũthĩ? Hihi arĩa makaamba kũrutwo nĩ makeerũo o mũndũ kĩũngano kĩrĩa agaakorũo na mamenyerio nĩguo marute arĩa makaariũkio thutha wao? Tũkũbatara gweterera nĩguo tũkoona. No ũrĩa tũĩ nĩ atĩ, mũthia-inĩ wa Mĩaka Ngiri ya Wathani wa Kristo, “hatarĩ nganja thĩ nĩ ĩkaaiyũrũo nĩ ũmenyo wĩgiĩ Jehova.” (Isa. 11:9) Hatarĩ nganja mĩaka ĩyo ngiri nĩ tũgakenera wĩra mũingĩ wa gũcanjamũra.

7. Andũ a Ngai magaakorũo na ũcayanĩri nĩkĩ makĩruta andũ arĩa makaariũkio?

⁷ Hĩndĩ ya Wathani wa Mĩaka Ngiri wa Kristo, ciana ciothe cia Jehova gũkũ thĩ nĩ ikaabatara gwĩka mogarũrũku nĩguo imũkenie. Kwoguo marĩ othe nĩ makaabatara kuonania ũcayanĩri magĩteithia arĩa makaariũkio kweheria mĩerekera ya wĩhia nĩguo matũũre kũringana na ithimi cia Jehova. (1 Pet. 3:8) Hatarĩ nganja arĩa magaacokio muoyo nĩ makaagucĩrĩrio harĩ andũ a Jehova enyihia, arĩa o nao magakorũo ‘makĩrutĩra ũhonokio wao wĩra.’—Afil. 2:12.

8. Nĩkĩ no twĩrĩgĩrĩre atĩ andũ nĩ makaamenya endwa ao arĩa makaariũkio?

⁸ Nĩ harĩ itũmi cigana ũna ingĩtũma twĩrĩgĩrĩre atĩ andũ nĩ makaamenya endwa ao arĩa makaariũkio. Kwa ngerekano, kũringana na andũ arĩa Jehova anariũkia no twĩrĩgĩrĩre akaariũkia andũ arĩa makuĩte matariĩ o ta ũrĩa maahaanaga, ũrĩa maaragia, na ũrĩa meeciragia kahinda kanini matanakua. Ririkana atĩ Jesu aaringithanirie gĩkuũ na toro na akĩringithania kũriũkio na gũkĩrio kuuma toro. (Mat. 9:18, 24; Joh. 11:11-13) Rĩrĩa andũ mokĩra kuuma toro, matikoragwo macenjetie ũrĩa marahaanaga kana mwarĩrie wao na matikoragwo mariganĩirũo nĩ maũndũ marĩa maroĩ matanathiĩ toro. Ta wĩcirie ngerekano ya Lazaro. Aakoretwo arĩ mũkuũ kwa ihinda rĩa thikũ inya, kwoguo mwĩrĩ wake nĩ waambĩrĩirie kũbutha. No rĩrĩa Jesu aamũriũkirie, aarĩ a nyina nĩ maamũmenyire, na o na Lazaro nĩ aamaririkanire.—Joh. 11:38-44; 12:1, 2.

9. Nĩkĩ andũ arĩa makaariũka matigatuĩka akinyanĩru mwĩrĩ na meciria maariũka o ũguo?

⁹ Jehova eranĩire atĩ rungu rwa wathani wa Kristo gũtirĩ mũndũ ũkoiga: “Ndĩ mũrwaru.” (Isa. 33:24; Rom. 6:7) Kwoguo andũ arĩa makaariũkio nĩ magaakorũo na ũgima mwega wa mwĩrĩ. O na kũrĩ ũguo, matigaatuĩka akinyanĩru maariũka o ũguo. Kũngĩthiĩ ũguo, andũ ao na arata no maage kũmamenya. No kũhoteke andũ othe magaatuĩka akinyanĩru kahora kahora hĩndĩ ya Mĩaka Ngiri ya Wathani wa Kristo. Mũthia-inĩ wa mĩaka ĩyo ngiri, nĩrĩo Jesu agaacokeria Ithe Ũthamaki. Hĩndĩ ĩyo Ũthamaki ũcio nĩ ũgaakorũo ũrĩkĩtie wĩra waguo biũ o hamwe na gũteithia andũ gũtuĩka akinyanĩru.—1 Kor. 15:24-28; Kũg. 20:1-3.

10. Ũriũkio ũgaatũma ũigue atĩa?

¹⁰ Ta hũũra mbica gĩkeno kĩrĩa ũgaakorũo nakĩo ũgĩcemania rĩngĩ na endwa aku arĩa makaariũkio. Hihi gĩkeno kĩu gĩgatũma wende gũtheka-ĩ, kana kũrĩra? Hihi nĩ ũgaakena nginya wambĩrĩrie kũinĩra Jehova? Ũndũ ũmwe tũrĩ na ma naguo nĩ atĩ, nĩ ũkaigua ũrĩ na wendo mũnene mũno harĩ Ithe witũ ũrĩ wendo na Mũrũ wake nĩ ũndũ wa kĩheo kĩao kĩa ũriũkio.

11. Kũringana na ciugo cia Jesu thĩinĩ wa Johana 5:28, 29, gũgaathiĩ atĩa harĩ arĩa magaatũũra kũringana na ithimi cia Ngai cia ũthingu?

¹¹ Ta hũũra mbica gĩkeno kĩrĩa arĩa makaariũkio magaakorũo nakĩo makĩĩyaũra ũmũndũ ũrĩa wa tene na matũũre kũringana na ithimi cia Ngai cia ũthingu. Andũ arĩa makeyaũra ũmũndũ ũcio wa tene, magaatũũra tene na tene thĩinĩ wa paradiso. No arĩa makaaremera Ngai na maage kũgarũrũka matigetĩkĩrio gũthũkia thayũ ũrĩa ũgaakorũo kuo paradiso.—Isa. 65:20; thoma Johana 5:28, 29.

12. Jehova akaarathima atĩa arĩa othe magaakorũo thĩinĩ wa thĩ?

¹² Rungu rwa Ũthamaki wa Ngai, andũ othe nĩ makeyonera ũũma wa ciugo iria irĩ thĩinĩ wa Thimo 10:22 iria ciugaga: “Kĩrathimo kĩa Jehova nĩkĩo gĩtongagia mũndũ, na ndarĩ ruo onganagĩrĩria nakĩo.” Nĩ ũndũ wa gũteithio nĩ roho wa Jehova, andũ a Ngai magaathiĩ makũrĩtie ngumo o ta cia Kristo na o kahora kahora matuĩke akinyanĩru. (Joh. 13:15-17; Ef. 4:23, 24) Na o mũthenya, mĩĩrĩ yao ĩgaathiĩ ĩgĩĩte hinya na matuĩke andũ ega. Na githĩ ũtũũro ndũgaakorũo ũrĩ na gĩkeno mũno hĩndĩ ĩyo. (Ayub. 33:25) No rĩrĩ, gwĩcũrania ũhoro wĩgiĩ ũriũkio kũngĩgũteithia atĩa ihinda-inĩ rĩrĩ?

13. O ta ũrĩa Thaburi 139:1-4 yonanĩtie-rĩ, ũriũkio wonanagia atĩa atĩ Jehova nĩ atũĩ wega?

¹³ O ta ũrĩa tũkuonete hau kabere, Jehova akaariũkia andũ marĩ na ũmũndũ wao na makĩririkanaga maũndũ marĩa mooĩ. Ũndũ ũcio ũronania atĩa? Ũronania atĩ Jehova nĩ akwendete mũno ũũ atĩ nĩ aririkanaga maũndũ marĩa wĩciragia, ũrĩa ũiguaga, ũrĩa waragia, na ũrĩa wĩkaga. Kwoguo no ahote kũriũkia mũndũ ahaana o ta ũrĩa aahaanaga atanakua. Mũthamaki Daudi nĩ aamenyaga atĩ Jehova nĩ oĩ o ũmwe witũ wega. (Thoma Thaburi 139:1-4.) Kũmenya atĩ Jehova nĩ atũĩ na njĩra ta ĩyo kũngĩtũhutia atĩa ihinda-inĩ rĩrĩ?

14. Gwĩcũrania ũrĩa Jehova atũĩ wega-rĩ, kwagĩrĩirũo gũtũhutia atĩa?

¹⁴ Tũngĩĩcũrania ũrĩa Jehova atũĩ wega, tũtibatiĩ gwĩtigĩra. Nĩkĩ hihi? Nĩ tũrĩririkanaga atĩ Jehova nĩ atũrũmbũyagia na gĩkĩro kĩnene. Nĩ onaga ngumo iria itũmaga o ũmwe witũ akorũo arĩ wa bata harĩ we. Nĩ oĩ maũndũ marĩa twanagerera ũtũũro-inĩ witũ magatũma tũhaane ũrĩa tũhaana. Na githĩ ũcio ti ũndũ wa gũtũũmĩrĩria? Tũtiagĩrĩirũo kũigua ta tũrĩ oiki. Na hingo ciothe Jehova akoragwo hamwe na ithuĩ akĩrora ũrĩa angĩtũteithia.—2 Maũ. 16:9.

15. Ũriũkio wonanagia atĩa ũũgĩ wa Jehova?

¹⁵ Guoya wa gwĩtigĩra gũkua no ũhũthĩrũo ũũru. Andũ arĩa makoragwo rungu rwa Shaitani no maũhũthĩre gũtũma andũ makunyanĩre arata ao, kana gũtũma meke maũndũ marĩa maramenya ti mega. No ithuĩ tũtiagĩrĩirũo gwĩtigĩra gĩkuũ na njĩra ĩyo. Nĩ tũĩ atĩ o na thũ citũ ingĩtũũraga, Jehova  nĩ agaatũriũkia. (Kũg. 2:10) Tũrĩ na ma atĩ gũtirĩ ũndũ o na ũmwe mangĩka ũngĩtũtigithũkania na Jehova. (Rom. 8:35-39) Jehova nĩ onanĩtie atĩ nĩ arĩ ũũgĩ mũingĩ mũno na njĩra ya gũtũhe kĩĩrĩgĩrĩro gĩa kũriũka. Nĩ ũndũ wa kĩĩrĩgĩrĩro kĩu, tũtiĩtigagĩra rĩrĩa arĩa marĩ rungu rwa Shaitani moiga nĩ megũtũũraga. Ningĩ nĩ gĩtũmaga tũgĩe na ũmĩrĩru mũnene wa gũthiĩ na mbere gũtungatĩra Jehova.

16. Nĩ ciũria irĩkũ wagĩrĩirũo kwĩyũria? Macokio ma ciũria icio mangĩgũteithia atĩa kũmenya kana nĩ wĩhokete Jehova?

¹⁶ Thũ cia Jehova ingiuga atĩ nĩ igũkũũraga-rĩ, hihi no ũkorũo na ma atĩ nĩ agaakũriũkia? Ũngĩmenya atĩa atĩ nĩ wĩhokete Jehova? Ũndũ ũmwe tũngĩka ũguo nĩ kwĩyũria, ‘Hihi matua marĩa ndĩratua o mũthenya nĩ monanagia atĩ nĩ ndĩhokaga Jehova?’ (Luk. 16:10) Kĩũria kĩngĩ tũngĩĩyũria nĩ, ‘Hihi mũtũũrĩre wakwa nĩ wonanagia atĩ nĩ ndĩhokete kĩĩranĩro kĩa Jehova gĩa kũrũmbũiya mabataro makwa rĩrĩa ndaiga Ũthamaki mbere?’ (Mat. 6:31-33) Angĩkorũo macokio maku nĩ ĩĩ, ũndũ ũcio ũronania nĩ wĩhokaga Jehova na nĩ wĩhaarĩirie nĩ ũndũ wa igerio o rĩothe ũngĩcemania narĩo.—Thim. 3:5, 6.

17. (a) Ũriũkio wonanagia atĩa atĩ Jehova nĩ arĩ wetereri? (b) Tũngĩonania ngatho nĩ ũndũ wa wetereri wa Jehova na njĩra ĩrĩkũ?

¹⁷ Jehova nĩ atuĩte nĩrĩ akaaniina mũtabarĩre ũyũ wa maũndũ. (Mat. 24:36) Na tondũ nĩ arĩ wetereri, ndangĩoya ikinya ihinda rĩu rĩtakinyĩte. Nĩ eriragĩria kũriũkia arĩa makuĩte, no no akoragwo na wetereri. (Ayub. 14:14, 15) Etereire ihinda rĩrĩa rĩagĩrĩire rĩkinye nĩguo amariũkie. (Joh. 5:28) Nĩ twagĩrĩirũo gũcokia ngatho nĩ ũndũ wa wetereri wa Jehova. Ta wĩcirie ũndũ ũyũ: Nĩ ũndũ wa wetereri wa Jehova, andũ aingĩ o hamwe na ithuĩ, nĩ tũgĩte na mweke wa ‘kwĩrira.’ (2 Pet. 3:9) Jehova endaga andũ aingĩ o ũrĩa kwahoteka makaagĩa na muoyo wa tene na tene. Kwoguo rekei tuonanagie ngatho nĩ ũndũ wa wetereri wake. Na njĩra ĩrĩkũ? Na njĩra ya gwĩka ũrĩa wothe tũngĩhota gũcaria arĩa marĩ na “mwerekera ũrĩa wagĩrĩire wa kũheo muoyo wa tene na tene” na kũmateithia kwenda Jehova na kũmũtungatĩra. (Atũm. 13:48) Tweka ũguo, andũ angĩ nĩ mekũgunĩka na wetereri wa Jehova o ta ũrĩa o na ithuĩ tũgunĩkĩte.

18. Twagĩrĩirũo gũkorũo na wetereri kwerekera andũ arĩa angĩ nĩkĩ?

 ¹⁸ Jehova nĩ ageterera mũthia wa mĩaka ĩrĩa ngiri ategũthethũka, rĩrĩa andũ magaatuĩka akinyanĩru. Mbere ya hĩndĩ ĩyo ĩkinye, Jehova no agaathiĩ na mbere gũtuohera mehia maitũ. Kwoguo nĩ twagĩrĩirũo kũrũmĩrĩra kĩonereria gĩake, na njĩra ya kũroraga ngumo njega cia andũ arĩa angĩ na kũmakirĩrĩria. Ta wĩcirie ũhoro wa mwarĩ wa Ithe witũ ũmwe ũrĩa mũthuri wake aambĩrĩirie kũgũmĩrũo nĩ mĩtangĩko mĩnene na agĩtiga gũthiaga mĩcemanio. Ooigire ũũ: “Ũndũ ũcio warĩ mũritũ mũno harĩ niĩ. Mũtũũrĩre witũ wagarũrũkire o rĩmwe na tũtingĩahotire gwĩka maũndũ marĩa twabangaga gwĩka.” Ĩndĩ o na akĩgeragĩra maũndũ macio maritũ, mwarĩ wa Ithe witũ ũcio arĩ na wendo nĩ aathiire na mbere gũkorũo na wetereri harĩ mũthuri wake. Eehokire Jehova na ndakuire ngoro. O ta Jehova, ndaatindanĩire na mathĩna ma mũthuri wake no aarorire ngumo ciake njega. Ooigire ũũ: “Mũthuri wakwa akoragwo na ngumo nyingĩ njega na nĩ arerutanĩria o kahora kahora kũhiũrania na mĩtangĩko yake.” Nĩ ũndũ wa bata gũkorũo na wetereri hĩndĩ ĩrĩa andũ a famĩlĩ kana andũ kĩũngano-inĩ marerutanĩria kũhiũrania na moritũ.

19. Twagĩrĩirũo gũtua itua rĩrĩkũ?

¹⁹ Jesu na araika nĩ maakenire mũno rĩrĩa thĩ yombirũo. No ta wĩcirie ũrĩa magaakorũo na gĩkeno mona thĩ ĩiyũrĩte andũ akinyanĩru, mendete Jehova na maramũtungatĩra. Ningĩ ta wĩcirie gĩkeno kĩrĩa arĩa makoima gũkũ thĩ mathiĩ igũrũ magaathane hamwe na Kristo magaakorũo nakĩo mona ũrĩa wĩra wao ũgunĩte andũ gũkũ thĩ. (Kũg. 4:4, 9-11; 5:9, 10) Ningĩ ta hũũra mbica ũgĩtũũra hĩndĩ ĩrĩa andũ makaarĩraga maithori ma gĩkeno, rĩrĩa mĩrimũ, kĩeha, na gĩkuũ itagaacoka gũkorũo kuo rĩngĩ. (Kũg. 21:4) Kamũira ihinda rĩu rĩkinye, tua itua rĩa kwĩgerekania na Ithe witũ ũrĩ wendo, ũũgĩ, na wetereri. Weka ũguo nĩ ũgũtũũria gĩkeno, o na wacemania na moritũ mahaana atĩa. (Jak. 1:2-4) Nĩ tũcokagĩria Jehova ngatho nĩ ũndũ wa kĩĩranĩro gĩake gĩa atĩ “nĩ gũkaariũkio andũ.”—Atũm. 24:15.