1-2. Tũkwarĩrĩria maũndũ marĩkũ gĩcunjĩ-inĩ gĩkĩ?

ŨIGUAGA atĩa rĩrĩa mũndũ wetereire akũrehere kĩndũ ũrabatara mũno aga gũkinya hĩndĩ ĩrĩa ũkũmwĩrĩgĩrĩire? Hihi nĩ ũiguaga ũkuĩte ngoro? No kũhoteke ũiguaga ta ũrĩa Thimo 13:12 yugaga atĩ, “Ũndũ ũrĩa wĩrĩgĩrĩirũo ũngĩtĩrio nĩ ũtũmaga ngoro ĩrware.” Ĩ ũngĩmenya nĩ harĩ itũmi njega itũmire mũndũ ũcio age gũkinya hĩndĩ ĩrĩa ũkũmwĩrĩgĩrĩire? Hĩndĩ ta ĩyo, no ũgĩe na wetereri.

² Thĩinĩ wa gĩcunjĩ gĩkĩ, nĩ tũkwarĩrĩria motaaro maigana ũna ma Bibilia marĩa mangĩtũteithia gũkũria na gũtũũria “mwerekera wa gweterera.” (Mik. 7:7) Ningĩ nĩ tũkwarĩrĩria maũndũ merĩ, marĩa mangĩtũma tũbatare kuonania wetereri harĩ Jehova. Mũthia-inĩ, nĩ tũkuona irathimo iria ikaaheo andũ arĩa megũthiĩ na mbere gũkorũo na wetereri harĩ Jehova.

3. Ũtaaro ũrĩa ũrĩ thĩinĩ wa Thimo 13:11 ũtũrutaga atĩa?

³ Thimo 13:11 nĩ ĩkoragwo na ngerekano ĩngĩtũteithia gũkorũo na wetereri. Yugaga ũũ: “Ũtonga ũrĩa wonekaga na ihenya nĩ ũkaanyiha, no ũtonga wa mũndũ ũrĩa ũcokanagĩrĩria tũnini tũnini nĩ ũkaaingĩha.” Mũhari ũyũ ũratũruta atĩa? Mũndũ mũũgĩ ekaga maũndũ ikinya gwa ikinya arĩ na wetereri na akagĩa na maumĩrĩra mega.

4. Nĩ ũndũ ũrĩkũ tũreruta kuumana na rĩandĩko rĩa Thimo 4:18?

⁴ Thimo 4:18 yugaga ũũ: “Njĩra ya andũ arĩa athingu ĩhaana ta ũtheri wa rũcinĩ ũrĩa ũthiaga ũkĩaraga o nginya mũthenya  barigici.” Ciugo icio nĩ ironania wega njĩra ĩrĩa Jehova ahũthagĩra kũguũrĩria andũ ake muoroto wake o kahora. No ningĩ mũhari ũcio no ũhũthĩrũo kuonania ũrĩa Mũkristiano ekaga mogarũrũku ũtũũro-inĩ wake agathiĩ akuhĩrĩirie Jehova. Mũndũ ndangĩteng’erio ũhoro-inĩ wĩgiĩ gũkũra kĩĩroho. Ũndũ ũcio nĩ woyaga ihinda. Rĩrĩa tweruta na kĩyo na tũkahũthĩra maũndũ marĩa tũreruta kũgerera Kiugo kĩa Ngai na ithondeka rĩake, o kahora kahora nĩ tũkũragia ngumo ta cia Kristo. Ningĩ nĩ tũmenyaga Ngai makĩria. Rekei tuone ngerekano Jesu aahũthĩrire gũtaarĩria ũndũ ũcio.

5. Jesu aahũthĩrire ngerekano ĩrĩkũ kuonania ũrĩa mũndũ akũraga kĩĩroho o kahora?

⁵ Jesu aahũthĩrire ngerekano kuonania atĩ ũhoro wa Ũthamaki ũhaana ta kabegũ kanini karakũra o kahora ngoro-inĩ ya mũndũ wendete maũndũ mega. Aaugire ũũ: “Nacio mbeũ icio ikamera na ikaraiha—no [mũhandi] ndoĩ ũrĩa ikũraga. Tĩri guo mwene ũtũmaga igĩe na maciaro itĩna gwa itĩna, ciambaga ikaruta nguha, igacoka ikaruta igira, na marigĩrĩrio-inĩ igira icio ikagĩa na maciaro.” (Mar. 4:27, 28) Jesu eendaga kuuga atĩa? Aataragĩria atĩ o ta ũrĩa mũmera ũkũraga kahora kahora, no taguo mũndũ ũrĩa wetĩkĩra ũhoro wa Ũthamaki akũraga kĩĩroho kahora o kahora. Kwa ngerekano, o ũrĩa arutwo aitũ a Bibilia marathiĩ magĩkuhagĩrĩria Jehova, nĩ twambagĩrĩria kuona magĩka mogarũrũku maingĩ ũtũũro-inĩ wao. (Ef. 4:22-24) No nĩ twagĩrĩirũo kũririkanaga atĩ Jehova nĩwe ũkũragia kabegũ kau kanini.—1 Kor. 3:7.

6-7. Tũreruta atĩa kuumana na ũrĩa Jehova oombire thĩ?

⁶ Maũndũ-inĩ marĩa mothe Jehova ekaga, nĩ akoragwo na wetereri wa kũhũthĩra ihinda rĩrĩa rĩothe rĩrabatarania nĩgetha arĩkie wĩra mũna. Ekaga ũguo nĩguo agoocithie rĩĩtwa rĩake na andũ arĩa angĩ magunĩke. Kwa ngerekano, ta wĩcirie ũrĩa Jehova aahaarĩrĩirie thĩ ikinya gwa ikinya nĩguo ĩikaragwo nĩ andũ.

⁷ Bibilia ĩgĩtaarĩria ũrĩa Jehova oombire thĩ, yugaga atĩ nĩ aaigire “ithimi ciayo,” akĩhanda  “itugĩ ciayo,” na akĩiga “ihiga rĩayo rĩa kona.” (Ayub. 38:5, 6) O na nĩ aahũthĩrire ihinda kwĩrorera wĩra ũrĩa aarutĩte. (Kĩam. 1:10, 12) Ta geria gwĩciria ũrĩa araika maaiguaga mona Jehova akĩũmba indo njerũ kĩmwe gwa kĩmwe. Ũndũ ũcio no nginya akorũo nĩ wamacanjamũraga mũno. Nĩkĩo Bibilia yugaga atĩ maambĩrĩirie “kwanĩrĩra makenete.” (Ayub. 38:7) Tũreruta atĩa? Jehova aahũthĩrire mĩaka mĩingĩ mũno kũrĩkia kũũmba indo no rĩrĩa aarorire indo iria ciothe oombĩte, aaugire atĩ “ciarĩ njega mũno.”—Kĩam. 1:31.

8. Tũkwarĩrĩria maũndũ marĩkũ?

⁸ O ta ũrĩa tuona thĩinĩ wa ngerekano icio, kũrĩ na morutani maingĩ thĩinĩ wa Bibilia matuonagia bata wa gũkorũo na wetereri. Rĩu rekei twarĩrĩrie maũndũ merĩ mangĩbatara tuonanie wetereri witũ harĩ Jehova.

9. Nĩ ũndũ-inĩ ũrĩkũ ũmwe twagĩrĩirũo gũkorũo na wetereri harĩ Jehova?

⁹ No tũbatare gweterera nĩguo Jehova acokie mahoya maitũ. Tũngĩkorũo tũkĩhoya Jehova atũhe hinya wa gũkirĩrĩria igerio kana atũteithie gũtooria mũtugo mũna ũtarĩ mwega, no tuone ta aroya ihinda iraihu atarĩ aracokia mahoya macio maitũ. Nĩ kĩĩ gĩtũmaga Jehova age gũcokia mahoya maitũ mothe o rĩo rĩrĩa twamũhoya?

10. Nĩkĩ nĩ tũrabatara gũkorũo na wetereri ũhoro-inĩ wĩgiĩ mahoya?

¹⁰ Jehova nĩ athikagĩrĩria mahoya maitũ na kinyi. (Thab. 65:2) Onaga mahoya maitũ ma kuuma ngoro marĩ ũira wa kuonania atĩ tũrĩ na wĩtĩkio. (Ahib. 11:6) Ningĩ rĩrĩa twahoya Jehova nĩ endaga kuona kana nĩ tũrerutanĩria gwĩka kũringana na mahoya maitũ na gwĩka wendi wake. (1 Joh. 3:22) Kwoguo no tũbatare gũkorũo na wetereri na gwĩka kũringana na mahoya maitũ angĩkorũo nĩ tũrenda gũtooria mũtugo mũna mũũru tũrĩ naguo. Jesu nĩ aatũteithirie kuona atĩ mahoya maitũ mamwe no mage gũcokio o hĩndĩ ĩyo. Aaugire ũũ: “Thiĩi na mbere kũhoya, na nĩ mũkũheo; thiĩi na mbere gũcaria, na nĩ mũkuona; thiĩi na mbere kũringaringa, na nĩ mũkũhingũrĩrũo; tondũ mũndũ o wothe ũhoyaga nĩ aheagwo, na mũndũ o wothe ũcaragia nĩ onaga, na mũndũ o wothe ũrĩringaringaga, nĩ arĩhingũragĩrũo.” (Mat. 7:7, 8) Tũngĩrũmagĩrĩra ũtaaro ũcio, na ‘tũkahoya tũtegũtigithĩria,’ no tũkorũo na ma atĩ Ithe witũ wa igũrũ nĩ arĩiguaga mahoya maitũ na akamacokia.—Kol. 4:2.

11. Ahibirania 4:16 ĩngĩtũteithia atĩa rĩrĩa tũrona ta mahoya maitũ maikarire mũno magĩgacokio?

¹¹ O na gũtuĩka no tuone ta Jehova aikarire mũno agĩgacokia mahoya maitũ, atwĩrĩire atĩ arĩcokagia mahoya maitũ “ihinda rĩrĩa rĩagĩrĩire.” (Thoma Ahibirania 4:16.) Nĩkĩo tũtiagĩrĩire kũruta Jehova mahĩtia ũndũ mũna ũngĩaga gwĩkĩka na ihenya ta ũrĩa tũrerĩgagĩrĩra. Kwa ngerekano, andũ aingĩ nĩ makoretwo makĩhoya mĩaka mĩingĩ nĩguo Ũthamaki wa Ngai ũũke ũniine mũtabarĩre ũyũ mũũru. O na Jesu oonanirie atĩ nĩ twagĩrĩirũo kũhoya Ũthamaki ũcio ũũke. (Mat. 6:10) Ĩndĩ no ũkorũo ũtarĩ ũndũ wa ũũgĩ o na hanini mũndũ angĩtĩkĩria wĩtĩkio wake harĩ Ngai ũnyihe atĩ tondũ mũico nduokire hĩndĩ ĩrĩa andũ meerĩgagĩrĩra ũũke. (Hab. 2:3; Mat. 24:44) Nĩ ũndũ wa ũũgĩ gũthiĩ na mbere gweterera Jehova na kũhoya tũrĩ na wĩtĩkio. Mũico ũgooka hĩndĩ ĩrĩa yagĩrĩire tondũ Jehova nĩ atuĩte ‘mũthenya na thaa’ rĩrĩa ũgooka. Na tũrĩ na ma atĩ mũthenya ũcio ũgaakorũo ũrĩ ihinda rĩrĩa rĩagĩrĩire harĩ andũ othe.—Mat. 24:36; 2 Pet. 3:15.

12. Nĩ ũndũ-inĩ ũrĩkũ hangĩkorũo harĩ ũndũ mũritũ kuonania wetereri?

 ¹² No tũbatare gweterera rĩrĩa tũrekwo maũndũ matarĩ ma kĩhooto. Andũ thĩinĩ wa thĩ nĩ mekaga andũ arĩa angĩ maũndũ matarĩ mega nĩ ũndũ wa kũrĩa maumĩte, rangi wao, rũthiomi rũrĩa maragia, bũrũri ũrĩa maumĩte, kana atĩ tondũ mũndũ nĩ mũthuri kana mũtumia. Angĩ nao nĩ mekagwo maũndũ moru nĩ ũndũ wa gũkorũo na wathe wa mwĩrĩ kana wa meciria. Ndungata nyingĩ cia Jehova nĩ ciĩkagwo maũndũ moru nĩ ũndũ wa wĩtĩkio wa cio. Rĩrĩa twekwo maũndũ moru nĩ twagĩrĩirũo kũririkana ciugo ici cia Jesu. Aaugire: “Ũrĩa ũgaakirĩrĩria o nginya mũico nĩwe ũkaahonokio.” (Mat. 24:13) No rĩrĩ, ĩ ũngĩmenya atĩ mũndũ mũna kĩũngano-inĩ nĩ ekĩte mehia maritũ? Thutha wa athuri kũmenyithio ũhoro ũcio-rĩ, hihi no wonanie wetereri na njĩra ya kwĩhoka atĩ nĩ mekũrũmbũyania naguo makĩrũmĩrĩra ũtongoria wa Jehova? Nĩ maũndũ marĩkũ athuri mabataraga gwĩka?

13. Athuri a kĩũngano mekaga atĩa nĩguo meke maũndũ na njĩra ya Jehova?

¹³ Rĩrĩa athuri mamenya atĩ nĩ kũrĩ mũndũ thĩinĩ wa kĩũngano wĩkĩte mehia maritũ, nĩ mahoyaga “ũũgĩ ũrĩa uumaga igũrũ,” nĩguo magĩe na mawoni ta ma Jehova megiĩ ũndũ ũcio. (Jak. 3:17) Muoroto wao ũkoragwo ũrĩ gũteithia ũcio ũhĩtĩtie nĩguo acoke “kuuma mahĩtia-inĩ ma njĩra yake” kũngĩhoteka. (Jak. 5:19, 20) Ningĩ nĩ mendaga gwĩka ũrĩa wothe mangĩhota nĩguo magitĩre kĩũngano na momĩrĩrie andũ arĩa matuurithĩtio nĩ mũndũ ũcio. (2 Kor. 1:3, 4) Rĩrĩa ũndũ ta ũcio waumĩra, athuri nĩ mambaga gũtuĩria maũndũ mothe, na ũndũ ũcio no woe ihinda. Macokaga makahoya na makahe mũndũ ũcio ũhĩtĩtie motaaro kuuma Bibilia-inĩ na makamũrũnga na “gĩkĩro kĩrĩa kĩagĩrĩire.” (Jer. 30:11) O na gũtuĩka athuri nĩ marũmbũyanagia na ũndũ ta ũcio o na ihenya, matihĩkaga gũtua matua. Rĩrĩa athuri marũmĩrĩra ũtongoria wa Jehova, kĩũngano gĩothe nĩ kĩgunĩkaga. Ĩndĩ o na athuri marũmbũyanĩtie na maũndũ na njĩra ĩrĩa yagĩrĩire, mũndũ ũrĩa ũtuurithĩtio no athiĩ na mbere kũigua atuurĩtwo. Angĩkorũo ũndũ ta ũcio nĩ wĩkĩkĩte harĩ wee-rĩ, nĩ kĩĩ kĩngĩgũteithia kũnyihanyihia ruo?

14. Nĩ ngerekano ĩrĩkũ thĩinĩ wa Bibilia ĩngĩkũmĩrĩria angĩkorũo nĩ ũtuurithĩtio na njĩra nene nĩ Mũkristiano ũngĩ?

¹⁴ Hihi nĩ ũrĩ watuurithio na njĩra nene nĩ mũndũ ũngĩ, na hihi o na akorũo aarĩ Mũira  wa Jehova? Kiugo kĩa Ngai nĩ gĩkoragwo na ngerekano njega ingĩtũteithia gwetagĩrĩra Jehova arũnge maũndũ. Kwa ngerekano, rĩrĩa Jusufu eekirũo maũndũ mataarĩ ma kĩhooto nĩ ariũ a ithe, ndaarekire mehia macio mao matũme akorũo na marũrũ. Handũ ha ũguo, aaigire meciria make harĩ gũtungatĩra Jehova, na nĩ aarathimirũo na njĩra nene nĩ ũndũ wa gũkirĩrĩria arĩ na wetereri. (Kĩam. 39:21) Thutha wa ihinda, Jusufu nĩ aahotire kuohera andũ acio maamũhĩtĩirie, tondũ nĩ oonaga ũrĩa Jehova aamũrathimĩte. (Kĩam. 45:5) O ta Jusufu, tũngĩkuhĩrĩria Jehova na tũtige maũndũ mothe moko-inĩ make, nĩ tũrĩiguaga tũmĩrĩirio.—Thab. 7:17; 73:28.

15. Nĩ kĩĩ gĩateithirie mwarĩ wa Ithe witũ ũmwe kwaga gũtindanĩra na ũndũ mũũru eekĩtwo?

¹⁵ Ũrĩa kũrĩ nĩ atĩ, no twage gwĩkwo maũndũ moru ta marĩa Jusufu eekirũo, no ũndũ o wothe mũũru tũngĩkwo no ũtũtuurithie. Angĩkorũo nĩ harĩ mũndũ ũtũhĩtĩirie o na angĩkorũo mũndũ ũcio ti mũthathaiya wa Jehova, no tũgunĩke tũngĩhũthĩra motaaro ma Bibilia. (Afil. 2:3, 4) Rekei tuone ũndũ ũmwe wĩyoneirũo. Mwarĩ wa Ithe witũ ũmwe nĩ aatuurirũo mũno rĩrĩa aamenyire atĩ mũndũ maarutaga wĩra nake nĩ eeraga andũ angĩ maũndũ matarĩ mega na matarĩ ma ma mamwĩgiĩ. Handũ ha kuoya ikinya na ihenya, mwarĩ wa Ithe witũ ũcio nĩ aambire gwĩcũrania igũrũ rĩgiĩ kĩonereria kĩa Jesu. Rĩrĩa Jesu eekagwo maũndũ moru, ndeerĩhagĩria na njĩra ya gwĩka andũ arĩa angĩ maũndũ moru. (1 Pet. 2:21, 23) Gwĩciria ũhoro wĩgiĩ kĩonereria kĩu kĩa Jesu, nĩ gwatũmire age gũtindanĩra na ũndũ ũcio wekĩkĩte. Thutha-inĩ nĩ aamenyire atĩ mũndũ ũcio maarutaga wĩra nake nĩ aahiũranagia na thĩna mũnene wa mwĩrĩ na aarĩ na mĩtangĩko mĩingĩ. Kwoguo mwarĩ wa Ithe witũ ũcio agĩtua atĩ no gũkorũo nĩ mĩtangĩko ĩyo yatũmaga mũndũ ũcio arie ũguo. Mwarĩ wa Ithe witũ ũcio nĩ aakenire mũno nĩ ũndũ wa gũkorũo atĩ nĩ aakirĩrĩirie arĩ na wetereri, na nĩ aagĩire na thayũ.

16. Nĩ ũndũ ũrĩkũ ũngĩgwĩkĩra ngoro angĩkorũo nĩ wĩkĩtwo ũndũ ũtarĩ wa kĩhooto? (1 Petero 3:12)

¹⁶ Angĩkorũo nĩ ũrakirĩrĩria nĩ ũndũ wa gwĩkwo ũndũ mũna ũtarĩ wa kĩhooto, kana ũndũ ũngĩ wa gũgũtuurithia, ririkanaga atĩ Jehova akoragwo hakuhĩ na “arĩa mathuthĩkĩte ngoro.”  (Thab. 34:18) Nĩ akwendete, tondũ nĩ ũkoragwo na wetereri na nĩ ũmũikagĩria mĩrigo yaku. (Thab. 55:22) Jehova nĩwe Mũtuanĩri ciira wa thĩ yothe, na kwoguo nĩ oonaga maũndũ mothe marĩa mekĩkaga. (Thoma 1 Petero 3:12.) Angĩkorũo nĩ ũragerera moritũ makĩrĩte ũhoti waku-rĩ, hihi nĩ wĩhaarĩirie gweterera Jehova arũnge maũndũ?

17. Nĩ ũndũ ũrĩkũ Jehova atwĩrĩire thĩinĩ wa Isaia 30:18?

¹⁷ Ica ikuhĩ, Ithe witũ wa igũrũ nĩ egũtũrathima na njĩra nene kũgerera Ũthamaki wake. Isaia 30:18 yugaga ũũ: “Jehova nĩ etereire akirĩrĩirie nĩguo amuonie ũtugi, na nĩ ekwarahũka nĩguo amuonie tha. Nĩ gũkorũo Jehova nĩ Ngai wa kĩhooto. Gũkena nĩ arĩa othe maikaraga mamwetereire.” Andũ arĩa mathiaga na mbere gweterera Jehova marĩ na irathimo nyingĩ ihinda-inĩ rĩrĩ na thĩinĩ wa thĩ njerũ.

18. Nĩ irathimo irĩkũ twetereire?

¹⁸ Rĩrĩa andũ a Ngai makaaingĩra thĩinĩ wa thĩ njerũ, matigaakorũo rĩngĩ na mĩtangĩko na mathĩna marĩa makoragwo namo ũmũthĩ. Gũtigaakoragwo na maũndũ matarĩ ma kĩhooto kana ruo. (Kũg. 21:4) Tũtikaabatara rĩngĩ gweterera na kũrigwo kana kĩrĩa twetereire nĩ gĩgũka, tondũ andũ othe magaakoragwo na indo cia kũigana. (Thab. 72:16; Isa. 54:13) Na githĩ kĩu gĩtigaakorũo kĩrĩ kĩrathimo kĩnene?

19. Jehova aratũhaarĩria nĩ ũndũ wa ũndũ ũrĩkũ?

¹⁹ Jehova nĩ aratũhaarĩria gũgaatũũra thĩinĩ wa wathani wake, na njĩra ya gũtũteithia gũtooria mĩtugo mĩũru na gũkũria ngumo iria imũkenagia. Ndũkanakue ngoro kana ũtige gũtungatĩra Jehova. Nĩ twĩrĩirũo maũndũ mega mahinda marĩa maroka. O twetereire mahinda mega mbere itũ, rekei tũthiĩ na mbere gweterera Jehova arĩkie wĩra wake!