1. Nĩ maũndũ marĩkũ mega andũ aingĩ ethĩ mahotete kũhingia?

 O MWAKA, Akristiano ethĩ ngiri nyingĩ nĩ mabatithagio. Hihi wee nĩ ũbatithĩtio? Angĩkorũo nĩ ũbatithĩtio, aarĩ na ariũ a Ithe witũ nĩ makenagio nĩwe, na o na Jehova nĩ akenagio nĩwe! (Thim. 27:11) Ta wĩcirie maũndũ mega marĩa ũhotete kũhingia gũkinyĩria ihinda rĩrĩ. Nĩ wĩrutĩte Bibilia na kĩyo, hihi kwa ihinda rĩa mĩaka ĩigana ũna. Kwĩruta Bibilia nĩ gũgũteithĩtie gũkorũo na ma atĩ Bibilia nĩ Kiugo kĩa Ngai. Makĩria ma ũguo, gwĩka ũguo nĩ gũgũteithĩtie kũmenya Mũtungi wa ibuku rĩu itheru, na kũmwenda. Wendo waku harĩ Jehova ũgĩkũra, nginya ũgĩtua itua rĩa kũmwĩyamũrĩra na kũbatithio. Rĩu nĩ itua rĩega mũno ũtuĩte!

2. Tũkwarĩrĩria ũndũ ũrĩkũ gĩcunjĩ-inĩ gĩkĩ?

 ² Hatarĩ nganja, no kũhoteke wĩtĩkio waku nĩ wageririo na njĩra itiganĩte ũtanabatithio. No o ũrĩa mĩaka ĩrathiĩ, nĩ ũrĩcemanagia na magerio mangĩ. Shaitani nĩ arĩgeragia gũtũma ũtige kwenda Jehova na kũmũtungatĩra. (Ef. 4:14) Ndũkamwĩtĩkĩrie eke ũguo. Nĩ kĩĩ kĩngĩgũteithia gũtũũria wĩhokeku harĩ Jehova, na kũhingia mwĩhĩtwa waku wa kũmwĩyamũrĩra? No mũhaka ũthiĩ na mbere ‘kwĩrutanĩria’ biũ nĩguo ũtuĩke Mũkristiano mũgimaru kĩĩroho. (Ahib. 6:1) No ũngĩka ũguo atĩa? Ũndũ ũcio nĩguo tũkwarĩrĩria thĩinĩ wa gĩcunjĩ gĩkĩ.

3. Akristiano othe magĩrĩirũo gũthiĩ na mbere gwĩka atĩa thutha wa kũbatithio?

³ Thutha wa kũbatithio, ithuothe nĩ tũrabatara kũrũmagĩrĩra ũtaaro ũrĩa mũtũmwo Paulo aaheire Akristiano a Efeso. Aamekĩrire ngoro matuĩke Akristiano ‘agima biũ.’ (Ef. 4:13) Nĩ ta aameraga: ‘Thiĩi na mbere gũkũra kĩĩroho.’ No tũtaũkĩrũo nĩ ũrĩa mũtũmwo Paulo eendaga kuuga, tũngĩringithania ũrĩa mũndũ akũraga kĩĩroho, na ũrĩa mwana akũraga. Rĩrĩa aciari magĩa kaana nĩ makenagio mũno nĩko na magakenda. No gatitũũraga karĩ kaana. Thutha wa ihinda, nĩ kabataraga gũtigana na “maũndũ ma wana.” (1 Kor. 13:11) No taguo gũthiaga harĩ Mũkristiano. Thutha wa kũbatithio, nĩ twagĩrĩirũo gũthiĩ na mbere gũkũra kĩĩroho. Rekei twarĩrĩrie maũndũ mamwe mangĩtũteithia gwĩka ũguo.

4. Nĩ kĩĩ kĩngĩgũteithia gũkũra kĩĩroho? Taarĩria. (Afilipi 1:9)

⁴ Enda Jehova makĩria. Gũkinyĩria rĩu nĩ wendete Jehova mũno. Ĩndĩ wendo waku harĩ we no wongerereke. Na njĩra ĩrĩkũ? Mũtũmwo Paulo nĩ aagwetire ũndũ ũmwe tũngĩka thĩinĩ wa Afilipi 1:9. (Thoma.) Paulo aahoire atĩ wendo wa Afilipi “ũingĩhe mũno makĩria.” Kwoguo no tũhote kwenda Jehova makĩria. Tũngĩka ũguo na njĩra ya kũgĩa na “ũmenyo ũrĩa wa ma na ũtaũku wothe.” O ũrĩa tũgũthiĩ na mbere kũmenya Jehova, noguo tũgũthiĩ na mbere kũmwenda makĩria, na gũkenera ngumo ciake hamwe na njĩra ciake cia gwĩka maũndũ. Nĩ tũrĩkoragwo na wendi mũnene wa kũmũkenia, na tũgethema gwĩka ũndũ o wothe ũngĩmũrakaria. Nĩ twĩrutanagĩria mũno kũmenya wendi wake na ũrĩa tũngĩũhingia.

5-6. Taarĩria ũrĩa tũngĩka nĩguo twende Jehova makĩria.

⁵ No tũhote kwenda Jehova makĩria tũngĩmenya Mũrũ wake wega, tondũ eegerekanagia na Ithe na njĩra nginyanĩru. (Ahib. 1:3) Njĩra ĩrĩa njega biũ ya kũmenya Jesu nĩ kwĩruta mabuku marĩa mana ma Injiri. Angĩkorũo ndũkoretwo ũgĩthoma Bibilia o mũthenya-rĩ, githĩ to wambĩrĩrie na mabuku macio? Ũgĩthoma mabuku macio megiĩ Jesu, wĩrutanĩrie biũ kũmenya ngumo ciake. Nĩ aakinyĩrĩkaga na ihenya, na nĩ aanyitaga twana tũnini moko-inĩ make arĩ na wendo. (Mar. 10:13-16) Arutwo ake nĩ maaiguaga marĩ na wĩyathi wa kwĩitũrũra kuuma ngoro, rĩrĩa maakoragwo hamwe nake. (Mat. 16:22) Jesu eegerekanagia na Ithe witũ wa igũrũ ũndũ-inĩ ũcio. O na Jehova nĩ akinyĩrĩkaga na ihenya. No twarie nake na njĩra ya mahoya. Rĩrĩa tũrahoya, no tũmũitũrũrĩre kĩrĩa kĩrĩ ngoro-inĩ citũ. Na twĩ na ũũma atĩ ndangĩtũtuĩra ũrĩa gũtarĩ. Nĩ atwendete mũno, na nĩ atũrũmbũyagia.—1 Pet. 5:7.

⁶ Jesu nĩ aaiguagĩra andũ tha. Mũtũmwo Mathayo aandĩkire ũũ: “Rĩrĩa oonire kĩrĩndĩ, agĩkĩiguĩra tha tondũ kĩarĩ kĩnyamarie na gĩkahurunjwo ta ngʼondu itarĩ na mũrĩithi.” (Mat. 9:36) Ĩ nake Jehova aiguaga atĩa? Jesu ooigire ũũ: “Awa ũrĩa ũrĩ igũrũ [ndangĩenda] o na ũmwe wa aya matariĩ ta twana ore.” (Mat. 18:14) Na githĩ ciugo icio ti cia gũtũũmĩrĩria mũno! O ũrĩa tũgũthiĩ na mbere kũmenya Jesu wega, noguo tũkwenda Jehova makĩria.

7. Ũngĩgunĩka atĩa ũngĩhũthagĩra mahinda hamwe na Akristiano agimaru kĩĩroho?

⁷ Ũndũ ũngĩ ũngĩgũteithia kwenda Jehova makĩria na gũtuĩka Mũkristiano mũgimaru kĩĩroho, nĩ kũhũthagĩra mahinda hamwe na aarĩ na ariũ a Ithe witũ arĩa agimaru kĩĩroho kĩũngano-inĩ nĩgetha ũmamenye wega.  Nĩ ũkuona atĩ nĩ makoragwo na gĩkeno, na matiĩriraga nĩ ũndũ wa itua rĩao rĩa gũtungatĩra Jehova. Meere magũtaarĩrie maũndũ mamwe mega marĩa meyoneire ũtungata-inĩ wa Jehova. Mahoe ũtaaro ũngĩkorũo na itua rĩa bata ũrenda gũtua. Ririkana atĩ, “ataarani aingĩ nĩ matũmaga kũgĩe na ũgaacĩru.”—Thim. 11:14.

8. Ũngĩka atĩa angĩkorũo nĩ ũkoragwo na nganja igũrũ rĩgiĩ maũndũ marĩa Bibilia yugaga?

⁸ Niina nganja iria ũngĩkorũo nacio. O ta ũrĩa  kĩbungo gĩa 2 gĩtaarĩirie, Shaitani nĩ arĩgeragia gũtũma ndũgathiĩ na mbere gũkũra kĩĩroho. Ũndũ ũmwe angĩhũthĩra gwĩka ũguo, nĩ gũtũma ũgĩe nganja meciria-inĩ maku igũrũ rĩgiĩ morutani mamwe ma Bibilia. Kwa ngerekano, andũ amwe no magerie gũkũiguithia atĩ indo nĩ kwĩyumĩria cieyumĩririe no ti kũũmbwo ciombirũo. No gũkorũo ndwaiguĩte ũhoro wĩgiĩ ũrutani ũcio, no rĩu nĩ ũrarutwo ũrĩ cukuru. Maũndũ marĩa arimũ maugaga ma kũnyita mbaru ũrutani wa indo kwĩyumĩria no moneke ta marĩ ma ma. Ĩndĩ no kũhoteke matirĩ mageria gwĩciria na kinyi ũira wĩgiĩ atĩ nĩ kũrĩ Mũũmbi. Ririkanaga ũndũ ũyũ ũgwetetwo thĩinĩ wa Thimo 18:17: “Mũndũ wa mbere kũrehe ciira wake onekaga ta araria ma, o nginya rĩrĩa ũcio ũngĩ arĩũka amũthuthurie.” Handũ ha gwĩtĩkia maũndũ mothe marĩa ũrarutwo cukuru, wĩrutage na kinyi ũrĩa Kiugo kĩa Ngai kiugaga. Ĩkaga ũthuthuria mabuku-inĩ maitũ. Aria na aarĩ na ariũ a Ithe witũ arĩa mbere ĩyo meetĩkĩtie ũrutani wa indo kwĩyumĩria. Morie nĩ kĩĩ gĩatũmire metĩkie atĩ nĩ kũrĩ Mũũmbi ũtwendete. Ndeereti ta ĩyo no ĩgũteithie gũkorũo na ũũma atĩ nĩ kũrĩ Mũũmbi.

9. Ũreruta atĩa kuumana na ũhoro wa Melissa?

⁹ Mwarĩ wa Ithe witũ ũmwe wĩtagwo Melissa, nĩ aagunĩkire mũno kuumana na ũthuthuria ũrĩa eekire wĩgiĩ ũũmbi. b Aaugire ũũ: “Thĩinĩ wa cukuru, arimũ marutanaga ũrutani wa atĩ indo nĩ kwĩyumĩria cieyumĩririe na njĩra ĩroneka ta ĩrĩ ya ma. Kĩambĩrĩria-inĩ, nĩ ndetigagĩra gwĩka ũthuthuria. Ndonaga ta ndeka ũthuthuria ngũkinyĩrĩra kuona atĩ ũrutani wa indo kwĩyumĩria nĩ wa ma. No ndecũrania, ngĩona atĩ Jehova endaga tũmũtungatĩre twĩ na itũmi njega. Kwoguo ngĩambĩrĩria gwĩka ũthuthuria. Nĩ ndathomire  ibuku rĩa Je, Kuna Muumba Anayekujali? na broshua ya Uhai—Ulitokana na Muumba? na ya Maswali Matano Muhimu Kuhusu Chanzo cha Uhai. Ũndũ ũcio nĩguo ndabataraga. Ndĩriraga kaba ingĩekĩte ũguo mbere.”

10-11. Nĩ kĩĩ kĩngĩgũteithia gũtooria meciria matarĩ mega? (1 Athesalonike 4:3, 4)

¹⁰ Wĩtheme mĩthiĩre ĩtarĩ mĩega. Mĩaka-inĩ ya ũtinĩnja, merirĩria ma ngomanio makoragwo me na hinya mũno, na no ũhatĩkwo kwĩingĩria ngomanio-inĩ itagĩrĩire. Shaitani angĩenda ũhingie merirĩria macio. Nĩ kĩĩ kĩngĩgũteithia gũtooria igerio rĩu? (Thoma 1 Athesalonike 4:3, 4.) Rĩrĩa ũrahoya, itũrũrĩra Jehova ngoro yaku. Mwĩre ũrĩa ũraigua, na ũmũrie akũhe hinya. (Mat. 6:13) Ririkanaga atĩ Jehova endaga gũgũteithia no ti gũgũtuĩra. (Thab. 103:13, 14) Ningĩ no wone ũteithio Bibilia-inĩ. Melissa ũrĩa ũkũgwetetwo na hau kabere, nĩ aahiũranagia na meciria matarĩ mega. Aaugire ũũ: “Gũthoma Bibilia o mũthenya nĩ kwandeithirie gũthiĩ na mbere kũrũa na meciria macio matarĩ mega. Nĩ kwandirikanirie atĩ ndĩ wa Jehova, na atĩ nĩ ndĩrenda kũmũtungatĩra.”—Thab. 119:9.

¹¹ Ndũkageragie kũhiũrania na mathĩna maku ũrĩ wiki. Aragia na aciari aku igũrũ rĩgiĩ maũndũ marĩa maratũma ũtangĩke. Ti ũndũ mũhũthũ kwaria igũrũ rĩgiĩ maũndũ ta macio, no nĩ ũndũ wa bata gwĩka ũguo. Melissa aaugire ũũ: “Ndahoire Jehova ahe ũmĩrĩru, ngĩcoka ngĩaria na baba igũrũ rĩgiĩ thĩna wakwa. Thutha ũcio nĩ ndaiguire ndahoorera. Nĩ ndamenyire atĩ Jehova nĩ aakenirio nĩ niĩ.”

12. Nĩ kĩĩ kĩngĩgũteithia gũtuaga matua mega?

¹² Tongoragio nĩ motaaro ma Bibilia. O ũrĩa ũrathiĩ ũgĩkũraga, noguo ũrĩgĩaga na wĩyathi makĩria wa gwĩtuĩra matua. No nĩ harĩ maũndũ maingĩ mũno ũtoĩ megiĩ ũtũũro. Ũngĩka atĩa wĩtheme gwĩka mahĩtia mangĩthũkia ũrata waku hamwe na Jehova? (Thim. 22:3) Mwarĩ wa Ithe witũ ũmwe wĩtagwo Kari nĩ ataarĩirie kĩrĩa kĩamũteithirie gũtua matua mega. Nĩ aamenyire atĩ Akristiano agimaru kĩĩroho matibataraga mawatho ma kũmatongoria maũndũ-inĩ mothe ma ũtũũro. Aaugire ũũ: “Nĩ ndabataraga gũtaũkĩrũo nĩ motaaro ma Bibilia, handũ ha o kũrũmagĩrĩra mawatho.” Ũgĩthoma Bibilia, wĩyũrie ũũ: ‘Ũndũ ũyũ ũranduta atĩa igũrũ rĩgiĩ mawoni ma Jehova? Hihi harĩ na motaaro mangĩndeithia gwĩka ũrĩa kwagĩrĩire? Angĩkorũo nĩ harĩ-rĩ, ingĩgunĩka atĩa nĩ ũndũ wa kũmahũthĩra?’ (Thab. 19:7; Isa. 48:17, 18) Ũngĩthomaga Bibilia na ũgecũrania motaaro mayo, nĩ ũrĩkoragwo ũrĩ ũndũ mũhũthũ harĩ we gũtua matua marakenia Jehova. Wathiĩ na mbere gũkũra kĩĩroho, nĩ ũkuona atĩ ndũrabatara mawatho megiĩ kaũndũ o gothe, tondũ nĩ ũtaũkĩirũo nĩ ũrĩa Jehova onaga maũndũ.

13. Arata ega mangĩgũteithia atĩa? (Thimo 13:20)

¹³ Thuura arata arĩa mendete Jehova. O ta ũrĩa hekũgwetetwo, arata arĩa ũthuuraga no mahutie mũno ũrĩa ũrakũra kĩĩroho. (Thoma Thimo 13:20.) Mwarĩ wa Ithe witũ ũmwe wĩtagwo Sara nĩ ooragwo nĩ gĩkeno gĩake. No nĩ harĩ ũndũ wekĩkire ũkĩmũteithia gũcokererũo nĩ gĩkeno gĩake. Sara ooigire ũũ: “Nĩ ndonire arata ega o ihinda-inĩ rĩrĩa rĩagĩrĩire. Nĩ ndambĩrĩirie gũcemanagia na mwarĩ wa Ithe witũ ũmwe mwĩthĩ o kiumia tũkeruta ngathĩti ya Mũrangĩri. Mũrata ũngĩ wakwa nake akĩndeithia kwambĩrĩria kũrutaga macokio mĩcemanio-inĩ. Nĩ ũndũ wa gũteithio nĩ arata akwa, nĩ ndambĩrĩirie kuoya wĩruti wa Bibilia na mahoya na ũritũ. Nĩ ndambĩrĩirie gũkorũo  na ũrata mũrũmu hamwe na Jehova, na ngĩambĩrĩria gũcokererũo nĩ gĩkeno gĩakwa.”

14. Julien eekire atĩa nĩguo agĩe na arata ega?

¹⁴ Ũngĩka atĩa nĩguo ũkorũo na arata ega mangĩgũteithia gũkũra kĩĩroho? Julien, ũrĩa ũtungataga arĩ mũthuri wa kĩũngano aaugire ũũ: “Ndĩ mwĩthĩ, nĩ ndagĩire na arata ega arĩa twanyitanagĩra nao ũtungata-inĩ. Arata acio nĩ maakoragwo na kĩyo, na nĩ maandeithirie kuona ũrĩa ingĩkenera ũtungata. Nĩ ndeigĩire muoroto wa kũingĩra ũtungata-inĩ wa mahinda mothe. Kĩrĩa gĩatũmaga njage gũkorũo na arata ega hau kabere, nĩ tondũ ndacaragia o arata arĩa maarĩ a rika rĩakwa. Thutha ũcio, nĩ ndagĩire na arata ega Betheli. Kĩonereria kĩao nĩ kĩandeithirie gũthuura maũndũ ma gwĩkenia na njĩra njega, na ũndũ ũcio ũkĩndeithia gũkuhĩrĩria Jehova makĩria.”

15. Paulo aaheire Timotheo mũkaana ũrĩkũ wĩgiĩ arata? (2 Timotheo 2:20-22)

¹⁵ Wagĩrĩirũo gwĩka atĩa ũngĩmenya atĩ gũkorũo na ũrata na mũndũ mũna ũrĩ kĩũngano-inĩ no gũthũkie ũrata waku na Jehova? Paulo nĩ aamenyaga atĩ andũ amwe thĩinĩ wa kĩũngano gĩa Gĩkristiano gĩa karine ya mbere matiarĩ na muonere mwega wa maũndũ ma kĩĩroho, na kwoguo akĩra Timotheo etheme andũ ta acio. (Thoma 2 Timotheo 2:20-22.) Ũrata witũ hamwe na Jehova nĩ kĩndũ kĩa goro. Na tondũ nĩ twĩrutanĩirie mũno gũkorũo na ũrata wa hakuhĩ hamwe na Jehova, tũtiagĩrĩirũo kũreka mũndũ o na ũrĩkũ aũthũkie.—Thab. 26:4.

16. Nĩ mĩoroto ya mũthemba ũrĩkũ wagĩrĩirũo kwĩigĩra?

¹⁶ Wĩigĩre mĩoroto ĩrĩ na ũguni. Thuura mĩoroto ĩngĩgũteithia gwĩkĩra wĩtĩkio waku hinya, na gũthiĩ na mbere gũkũra kĩĩroho. (Ef. 3:16) Kwa ngerekano, no ũtue itua rĩa gũthomaga na kwĩruta Bibilia o mũthenya. (Thab. 1:2, 3) Ningĩ no ũgerie kũhoyaga maita maingĩ makĩria, na kũhoyaga kuuma ngoro. No gũkorũo nĩ ũrabatara kwĩgirĩrĩria makĩria, harĩ maũndũ marĩa ũthuuraga ma gwĩkenia na ũrĩa ũhũthagĩra mahinda maku. (Ef. 5:15, 16) Jehova nĩ arĩkenaga rĩrĩa ona ũkĩĩrutanĩria gũkũra kĩĩroho.

17. Ũngĩgunĩka atĩa nĩ ũndũ wa gũteithia andũ arĩa angĩ?

¹⁷ Gũteithia andũ arĩa angĩ no gũgũteithie gũthiĩ na mbere gũkũra kĩĩroho. Jesu aaugire  ũũ: “Kũheana nĩ kũrĩ gĩkeno kĩnene gũkĩra kwamũkĩra.” (Atũm. 20:35) No ũgunĩke mũno ũngĩhũthĩra hinya waku wa wĩthĩ na mahinda maku gũteithia andũ arĩa angĩ. Kwa ngerekano, no wĩigĩre muoroto wa gũteithagia andũ arĩa akũrũ kĩũngano-inĩ, na arĩa marĩ na mathĩna ma mwĩrĩ. No wĩrutĩre kũmateithia rĩrĩa marabatara mũndũ wa gũtũma kũmagũrĩra indo, kana kũmateithia kũhũthĩra indo ta thimũ. Angĩkorũo ũrĩ mũrũ wa Ithe witũ, wĩigĩre muoroto wa gũtuĩka ndungata ya kĩũngano, ũrĩ na muoroto wa gũteithia aarĩ na ariũ a Ithe witũ. (Afil. 2:4) Ningĩ no wonie arĩa marĩ nja ya kĩũngano atĩ nĩ ũmendete, na njĩra ya kũmahunjĩria ũhoro ũrĩa mwega wa Ũthamaki. (Mat. 9:36, 37) Na kũngĩhoteka, wĩigĩre muoroto wa gũtungatĩra Jehova ũtungata-inĩ wa mahinda mothe.

18. Ũtungata wa mahinda mothe ũngĩgũteithia atĩa gũkũra kĩĩroho?

¹⁸ Ũtungata wa mahinda mothe no ũkũhe mĩeke mĩingĩ ya gũthiĩ na mbere gũkũra kĩĩroho. Ũtungata wa ũpainia no ũkũhingũrĩre mũrango wa gũthiĩ Cukuru ya Ahunjia a Ũthamaki. O na no ũhote gũtungata Betheli, kana mĩako-inĩ ya gĩtheokrasi. Mwarĩ wa Ithe witũ ũmwe mwĩthĩ wĩtagwo Kaitlyn aaugire ũũ: “Kũhunjia hamwe na aarĩ na ariũ a Ithe witũ marĩ na ũmenyeru, nĩ kwandeithirie gũthiĩ na mbere gũkũra kĩĩroho thutha wa kũbatithio. Kĩonereria kĩao nĩ kĩandeithirie kwĩruta Bibilia na kinyi, na kwagagĩria ũhoti wakwa wa kũrutana.”

19. Nĩ irathimo irĩkũ ũkũgĩa nacio wathiĩ na mbere gũkũra kĩĩroho?

¹⁹ Ũngĩthiĩ na mbere gũkũra kĩĩroho, nĩ ũrĩkenagĩra irathimo nyingĩ. Nĩ ũgwĩthema kwananga wĩthĩ waku ũgĩthingata maũndũ matarĩ na ũguni. (1 Joh. 2:17) Nĩ ũgwĩthema ruo rũrĩa ruumanaga na gũtua matua matarĩ mega. Handũ ha ũguo, nĩ ũkũgĩa na gĩkeno kĩa ma na ũgaacĩre. (Thim. 16:3) Kĩonereria gĩaku kĩega nĩ kĩrĩkagĩra ngoro aarĩ na ariũ a Ithe witũ othe. (1 Tim. 4:12) Na ũndũ wa bata o na makĩria, nĩ ũrĩkenagĩra thayũ na kũiganĩra nĩ ũndũ wa gũkenia Jehova na gũkorũo na ũrata wa hakuhĩ hamwe nake.—Thim. 23:15, 16.