GĨCUNJĨ KĨA WĨRUTI KĨA 33
Jehova nĩ Aroraga Andũ Ake
“Riitho rĩa Jehova nĩ rĩroraga arĩa mamwĩtigĩrĩte.”—THAB. 33:18.
RWĨMBO NA. 4 “Jehova Nĩwe Mũrĩithi Wakwa”
GĨCUNJĨ-INĨ GĨKĨ a
1. Nĩ kĩĩ gĩatũmire Jesu ahoe Jehova agitĩre arũmĩrĩri ake?
ŨTUKŨ wa mũico Jesu atanakua, nĩ aahoire ihoya rĩa mwanya kũrĩ Ithe witũ wa igũrũ. Aahoire Jehova agitagĩre arũmĩrĩri ake. (Joh. 17:15, 20) Hatarĩ nganja, Jehova nĩ akoretwo akĩgitĩra na akarũmbũiya andũ ake. O na kũrĩ ũguo, Jesu nĩ aamenyaga atĩ arũmĩrĩri ake nĩ mangĩgacemania na ũkararia mũnene kuuma kũrĩ Shaitani. Jesu ningĩ nĩ aamenyaga atĩ nĩ mangĩabatarire ũteithio wa Jehova nĩguo mahote gwĩtiiria tharĩkĩro cia Mũcukani.
2. Kũringana na Thaburi 33:18-20, nĩkĩ tũtiagĩrĩirũo gwĩtigĩra rĩrĩa twatũngana na mathĩna?
2 Thĩinĩ wa thĩ ĩno ĩratongorio nĩ Shaitani, Akristiano a ma nĩ macemanagia na mathĩna maingĩ. Mathĩna macio no matũme tũkue ngoro, o na kana magerie wĩhokeku witũ harĩ Jehova. No o ta ũrĩa tũkuona thĩinĩ wa gĩcunjĩ gĩkĩ, tũtiagĩrĩire gwĩtigĩra. Jehova nĩ atũrũmbũyagia na nĩ onaga mathĩna marĩa tũragerera, na hingo ciothe nĩ akoragwo ehaarĩirie gũtũteithia kũhiũrania namo. Rekei tũrore ngerekano igĩrĩ cia andũ magwetetwo thĩinĩ wa Bibilia ironania atĩ Jehova “nĩ [aroraga] arĩa mamwĩtigĩrĩte.”—Thoma Thaburi 33:18-20.
RĨRĨA TŨRĨ NA IHOORU
3. Nĩ hĩndĩ ta ĩrĩkũ tũngĩigua tũrĩ na ihooru?
3 O na gũtuĩka tũrĩ na aarĩ na ariũ a Ithe witũ aingĩ thĩinĩ wa kĩũngano, rĩmwe no tũigue tũrĩ na ihooru. Kwa ngerekano, andũ ethĩ no maigue matiganĩirio rĩrĩa marataarĩria ũhoro wa wĩtĩkio wao marĩ cukuru, o na kana rĩrĩa mathamĩra kĩũngano-inĩ kĩngĩ. Amwe aitũ no tũigue kĩeha o na kana tũigue tũkuĩte ngoro, tweciria atĩ tũkũhiũrania na mathĩna maitũ tũrĩ oiki. No twĩtigĩre kwaria na andũ arĩa angĩ tũgĩciria matigũtaũkĩrũo. O na rĩmwe no twĩcirie gũtirĩ mũndũ ũtindanagĩra na ithuĩ. Kũigua ihooru nĩ ũndũ wa ũndũ o wothe no gũtũme rĩmwe tũigue tũtiganĩirio na twĩna mĩtangĩko. Jehova ndendaga tũigue ũguo. Tũngiuga ũguo nĩkĩ?
4. Nĩ kĩĩ gĩatũmire mũnabii Elija oige: “No niĩ tu ndigarĩte”?
4 Ta wĩcirie ũhoro wa mũnabii Elija. Jezebeli nĩ eehĩtĩte kũmũũraga, na kwoguo agĩthiĩ rũgendo rwa thikũ 40 nĩguo ahonokie muoyo wake. (1 Ath. 19:1-9) Mũthia-inĩ, arĩ wiki ngurunga-inĩ, eerire Jehova ũũ: “No niĩ tu [mũnabii] ndigarĩte.” (1 Ath. 19:10) Kwarĩ na anabii angĩ bũrũri-inĩ ũcio, tondũ Obadia nĩ aahotete kũhonokia anabii 100 matikooragwo nĩ Jezebeli. (1 Ath. 18:7, 13) Nĩ kĩĩ gĩagĩtũmaga Elija aigue ta arĩ wiki? Hihi eeciragia atĩ anabii arĩa othe maahonoketio nĩ Obadia nĩ maakuĩte? Hihi aaiguaga ihooru tondũ gũtiarĩ na mũndũ ũngĩ wathathayagia Jehova hamwe nake, o na thutha wa Jehova kuonania atĩ nĩwe Ngai ũrĩa wa ma Kĩrĩma-inĩ gĩa Karimeli? Hihi eeciragia atĩ gũtirĩ mũndũ wataũkagĩrũo aarĩ ũgwati-inĩ, kana oonaga ta gũtarĩ mũndũ wamũrũmbũyagia? Bibilia ndĩonanĩtie kĩrĩa gĩatũmire Elija aigue ũguo. No ũndũ ũrĩa tũrĩ na ma naguo nĩ atĩ Jehova nĩ aataũkĩirũo nĩ kĩrĩa gĩatũmaga Elija aigue arĩ wiki, na nĩ aamenyaga ũrĩa ekũmũteithia.
Rĩrĩa tũraigua tũrĩ na ihooru-rĩ, tũngĩĩruta atĩa kuumana na ũrĩa Jehova aateithirie Elija? (Rora kĩbungo gĩa 5-6)
5. Jehova aateithirie Elija atĩa kũmenya atĩ ndarĩ wiki?
5 Jehova nĩ aateithirie Elija na njĩra cigana ũna. Nĩ aamwĩkĩrire ngoro eyarie. Ooririe Elija ũũ maita merĩ: “Nĩ kĩĩ ũreka gũkũ?” (1 Ath. 19:9, 13) Na hĩndĩ ciothe Jehova nĩ aamũthikagĩrĩria akĩĩitũrũra. Jehova nĩ aacokeirie Elija na njĩra ya kũmuonia atĩ aarĩ kuo na atĩ aarĩ na hinya mũingĩ. Ningĩ nĩ eerire Elija atĩ kwarĩ na athathaiya angĩ thĩinĩ wa Isiraeli maamũthathayagia. (1 Ath. 19:11, 12, 18) No mũhaka akorũo Elija nĩ aaiguire ahoorera thutha wa gũitũrũra ngoro yake harĩ Jehova na kũigua Jehova akĩmũũmĩrĩria. Jehova nĩ aaheire Elija wĩra wa bata. Nĩ aamũririe aitĩrĩrie Hazaeli maguta atuĩke mũthamaki wa Siria, na aitĩrĩrie Jehu maguta atuĩke mũthamaki wa Isiraeli, na amũre Elisha atuĩke mũnabii. (1 Ath. 19:15, 16) Jehova aaheire Elija wĩra ũcio nĩguo amũteithie kũiga meciria make maũndũ-inĩ marĩa magĩrĩire. Ningĩ Ngai nĩ aamũheire Elisha marutithanie wĩra hamwe nake. Jehova angĩgũteithia atĩa rĩrĩa ũraigua ũrĩ na ihooru?
6. Nĩ maũndũ marĩkũ ũngĩhoya igũrũ rĩamo rĩrĩa ũraigua ũrĩ na ihooru? (Thaburi 62:8)
6 Jehova endaga ũmũhoe. Jehova nĩ onaga moritũ marĩa ũragerera na akwĩrĩte atĩ nĩ arĩthikagĩrĩria rĩrĩa rĩothe ũramũhoya. (1 Thes. 5:17) Nĩ akenaga gũthikĩrĩria athathaiya ake. (Thim. 15:8) Nĩ maũndũ marĩkũ ũngĩhoya igũrũ rĩamo rĩrĩa ũraigua ũrĩ na ihooru? Itũrũragĩra Jehova ngoro yaku o ta ũrĩa Elija eekire. (Thoma Thaburi 62:8.) Mwĩre maũndũ marĩa maragũtanga na ũrĩa maratũma ũigue. Mwĩre agũteithie kũmenya ũrĩa ũngĩka rĩrĩa waigua ũguo. Kwa ngerekano, angĩkorũo nĩ ũiguaga ũrĩ na guoya na ũkaigua ũtiganĩirio rĩrĩa ũrataarĩria wĩtĩkio waku ũrĩ cukuru, hoya Jehova agũteithie na ũmĩrĩru wa gwĩka ũguo. O na no ũmũhoe akũhe ũũgĩ wa gũtaarĩria wĩtĩkio waku na njĩra njega. (Luk. 21:14, 15) Angĩkorũo nĩ ũiguaga ũkuĩte ngoro, hoya Jehova agũteithie kwaranĩria na Mũkristiano mũgimaru kĩĩroho ũndũ ũcio. Hoya Jehova ateithie Mũkristiano ũcio agũthikĩrĩrie na ataũkĩrũo nĩwe. Nĩ ũrĩnyihagĩrũo nĩ ihooru waitũrũrĩra Jehova ngoro yaku, wona ũrĩa acokagia mahoya maku, na wetĩkĩra ũteithio wa arĩa angĩ.
Hihi nĩ ũcaragia njĩra cia kuongerera ũtungata waku na ũkanyitanĩra na andũ arĩa angĩ ũtungata-inĩ? (Rora kĩbungo kĩa 7)
7. Ũreruta atĩa kuumana na kĩonereria kĩa Mauricio?
7 Jehova nĩ atũheete ithuothe wĩra mwega wa kũruta. Koragwo na ma atĩ nĩ onaga maũndũ marĩa mothe ũhingagia kĩũngano-inĩ na ũtungata-inĩ na nĩ akenagio nĩmo. (Thab. 110:3) Gũkorũo na kĩyo maũndũ-inĩ macio kũngĩgũteithia atĩa rĩrĩa ũraigua ũrĩ na ihooru. Ta wĩcirie ũhoro wa ngerekano ya mũrũ wa Ithe witũ ũmwe mwĩthĩ wĩtagwo Mauricio. b Kahinda kanini thutha wa Mauricio kũbatithio, mũrata ũmwe wake wa hakuhĩ nĩ aambĩrĩirie gũthiĩ atigĩte ũhoro wa ma kahora kahora. Mauricio aaugire ũũ: “Kuona agĩtiga Jehova nĩ gwatũmire ndigwo kana o na niĩ nĩ ngũhota gũikara ndĩ mwĩhokeku. Ndarigagwo kana nĩ ingĩatũũririe mwĩhĩtwa wakwa wa gũtungatĩra Jehova, na kana nĩ ingĩaikarire famĩlĩ-inĩ ya Jehova. Nĩ ndaiguaga ndĩ na ihooru na ngeciria gũtirĩ mũndũ wataũkagĩrũo nĩ ũrĩa ndaiguaga.” Nĩ kĩĩ gĩateithirie Mauricio? Aaugire ũũ: “Nĩ ndongereire ũtungata wakwa. Gwĩka ũguo nĩ kwandeithirie gũtiga gwĩciria o ũhoro wakwa niĩ mwene na ũrĩa ndaiguaga. Nĩ ndaiguaga ngenete na itarĩ na ihooru ndĩ hamwe na andũ arĩa angĩ ũtungata-inĩ.” Kwoguo o na rĩrĩa tũtaraumagarania na Akristiano arĩa angĩ tũkĩhunjia, nĩ twĩkĩragwo hinya rĩrĩa twanyitanĩra nao maũndũ-inĩ ta kwandĩka marũa na kũhunjia na thimũ. Nĩ kĩĩ kĩngĩ gĩateithirie Mauricio? Oongereire ũũ: “Ningĩ nĩ nderutanĩirie gwĩkĩra kĩyo kĩũngano-inĩ. Ndekaga ũrĩa wothe ingĩhota kũhaarĩria tũcunjĩ twakwa twa mĩcemanio na ngatũruta wega. Tũcunjĩ tũu nĩ twandeithagia kũigua nyendetwo nĩ Jehova na andũ arĩa angĩ.”
RĨRĨA TŨRAHĨTŨKĨRA MAGERIO MARITŨ
8. Magerio maritũ mangĩtũhutia atĩa?
8 No twĩrĩgĩrĩre gũcemania na maũndũ maritũ mahinda-inĩ maya ma kũrigĩrĩria. (2 Tim. 3:1) Ĩndĩ no tũkorũo tũtekwĩrĩgĩrĩra igerio rĩa mũthemba mũna, na rĩtũkore o rĩmwe. No tũkorererũo o rĩmwe nĩ mathĩna ta ma mbeca, ma mũrimũ, kana tũkuĩrũo nĩ mũndũ twendete. Mahinda-inĩ ta macio no tũigue tũgĩtangĩka na tũritũhĩirũo, makĩria angĩkorũo tũracemania na igerio thutha wa rĩrĩa rĩngĩ o na kana magerio matiganĩte magokanĩra hamwe. No ririkanaga atĩ Jehova nĩ arona na nĩ arĩgũteithagia kũhiũrania na magerio macio ũrĩ na ũmĩrĩru.
9. Taarĩria magerio mamwe marĩa Ayubu aacemanirie namo.
9 Ta wĩcirie ũrĩa Jehova aateithirie Ayubu ndungata yake. Ayubu nĩ aacemanirie na magerio maingĩ maritũ ihinda-inĩ o rĩmwe. Mũthenya-inĩ o ũmwe, Ayubu nĩ aamenyithirio maũndũ moru meekĩkĩte magatũma orũo nĩ mahiũ make, ndungata ciake, o na gũthũkia mũno, ciana ciake. (Ayub. 1:13-19) Ihinda inini thutha ũcio o na atathirĩtwo nĩ kĩeha kĩa maũndũ macio, nĩ aagĩire na mũrimũ mũũru mũno warĩ na ruo. (Ayub. 2:7) Ihinda rĩu rĩarĩ iritũ mũno ũũ atĩ Ayubu aaugire ũũ: “Nĩ thũũrĩte muoyo wakwa; ndikwenda gũthiĩ na mbere gũtũũra.”—Ayub. 7:16.
Jehova nĩ aateithirie Ayubu gwĩtĩkia atĩ nĩ amwendete na nĩ amũrũmbũyagia na njĩra ya kũmũtaarĩria ũrĩa arũmbũyagia indo iria ombĩte (Rora kĩbungo gĩa 10)
10. Jehova aateithirie Ayubu atĩa gũkirĩrĩria magerio? (Rora mbica ngothi-inĩ.)
10 Jehova nĩ oonaga maũndũ marĩa Ayubu aageragĩra. Tondũ Jehova nĩ eendete Ayubu, nĩ aamũheire kĩrĩa aabataraga nĩguo ahote gũkirĩrĩria magerio macio, na aikare arĩ mwĩhokeku. Jehova nĩ aaririe na Ayubu, akĩmũririkania ũhoro wa ũũgĩ wake mũingĩ, na ũrĩa arũmbũyagia ũũmbi wake na wendo. Nĩ aamwĩrire ũhoro wa nyamũ nyingĩ cia magegania. (Ayub. 38:1, 2; 39:9, 13, 19, 27; 40:15; 41:1, 2) Jehova ningĩ nĩ aahũthĩrire ndungata yake ĩtagwo Elihu kũũmĩrĩria Ayubu na kũmwĩkĩra ngoro. Elihu nĩ aaririkanirie Ayubu atĩ Jehova nĩ arathimaga athathaiya ake hingo ciothe rĩrĩa makirĩrĩria. No Jehova ningĩ nĩ aahũthĩrire Elihu kũhe Ayubu ũtaaro. Elihu nĩ aateithirie Ayubu gũtiga gwĩciria mũno igũrũ rĩake mwene na njĩra ya kũmũririkania atĩ tũrĩ anini mũno tũringithanĩtio na Jehova Mũũmbi wa igũrũ na thĩ. (Ayub. 37:14) Ningĩ Jehova nĩ aaheire Ayubu wĩra wa kũhoera arata ake atatũ, nĩ ũndũ wa mehia marĩa meekĩte. (Ayub. 42:8-10) Jehova atũteithagia atĩa ũmũthĩ rĩrĩa twacemania na magerio maritũ?
11. Bibilia ĩtũũmagĩrĩria atĩa rĩrĩa tũracemania na magerio?
11 Jehova ndaragia na ithuĩ ĩmwe kwa ĩmwe ta ũrĩa eekire harĩ Ayubu, no nĩ atwaragĩria kũgerera Kiugo gĩake Bibilia. (Rom. 15:4) Nĩ atũũmagĩrĩria na njĩra ya gũtũhe kĩĩrĩgĩrĩro kĩa mahinda mokĩte. Ta wĩcirie ũhoro wa maũndũ mamwe magwetetwo thĩinĩ wa Bibilia marĩa mangĩtũũmĩrĩria hĩndĩ ya magerio. Thĩinĩ wa Maandĩko, Jehova atwĩrĩte atĩ gũtirĩ kĩndũ “kĩngĩhota gũtũtigithũkania na wendo [wake],” nginya magerio maritũ. (Rom. 8:38, 39) Ningĩ nĩ atũheete ũũma atĩ “akoragwo hakuhĩ na arĩa othe mamũkayagĩra” kũgerera mahoya. (Thab. 145:18) Jehova atwĩrĩte atĩ tũngĩmwĩhokaga nĩ tũrĩhotaga gũkirĩrĩria igerio o rĩothe, na tũgakorũo na gĩkeno o na rĩrĩa tũragerera magerio. (1 Kor. 10:13; Jak. 1:2, 12) Kiugo kĩa Ngai ningĩ nĩ gĩtũririkanagia atĩ magerio marĩa tũragerera no ma ihinda inini maringithanĩtio na irathimo cia tene na tene iria atwĩrĩire. (2 Kor. 4:16-18) Jehova nĩ atũheete kĩĩrĩgĩrĩro kĩa ma atĩ nĩ akaaniina Shaitani ũrĩa Mũcukani, ũrĩa ũtũrehagĩra mathĩna maitũ mothe, na aniine andũ arĩa aganu. (Thab. 37:10) Hihi nĩ ũigĩte meciria-inĩ maandĩko mamwe ma gũkũũmĩrĩria kuuma Bibilia-inĩ marĩa mangĩgũteithia gũkirĩrĩria magerio ihinda rĩũkĩte?
12. Jehova endaga twĩke atĩa nĩguo tũgunĩke biũ kuumana na Kiugo gĩake?
12 Jehova endaga tũcaragie mahinda ma kwĩruta Bibilia o mũthenya, na tũgecũranagia na njĩra ndikĩru maũndũ marĩa tũrathoma. Rĩrĩa twahũthĩra maũndũ marĩa tũreruta, wĩtĩkio witũ nĩ ũgĩaga na hinya makĩria na tũgakuhĩrĩria Ithe witũ wa igũrũ makĩria. Na njĩra ĩyo, tũkagĩa na hinya wa gũkirĩrĩria magerio. Jehova ningĩ nĩ aheaga arĩa mehokaga Kiugo gĩake roho wake mũtheru. Na roho ũcio no ũtũhe “hinya ũrĩa ũkĩrĩte wa ndũire” nĩguo tũhote gũkirĩrĩria igerio o rĩothe.—2 Kor. 4:7-10.
13. Irio cia kĩĩroho iria tũheagwo nĩ “ngombo ĩrĩa njĩhokeku na njũgĩ” itũteithagia atĩa gũkirĩrĩria magerio?
13 Kũgerera ũteithio wa Jehova, “ngombo ĩrĩa njĩhokeku na njũgĩ” nĩ ĩtũheaga mabuku, video, na nyĩmbo iria itũteithagia gũkorũo na wĩtĩkio mũrũmu na gũikara twarahũkĩte kĩĩroho. (Mat. 24:45) Nĩ twagĩrĩirũo kũhũthĩra indo icio Jehova atũheete wega. Mwarĩ wa Ithe witũ ũmwe kuuma Amerika (US), nĩ erĩgĩte kuuga ũrĩa acokagia ngatho nĩ ũndũ wa irio icio ciothe cia kĩĩroho. Aaugire ũũ: “Ihinda-inĩ rĩa mĩaka 40 ĩrĩa ngoretwo ngĩtungatĩra Jehova, wĩhokeku wakwa nĩ ũgeretio maita maingĩ.” Nĩ aacemanirie na magerio maritũ. Gukawe nĩ aaringirũo na ngaari na agĩkua nĩ ndereba warĩ mũrĩĩu, nao aciari ake magĩkua nĩ ũndũ wa kũrũara, na nĩ aarũire na mũrimũ wa kansa maita merĩ. Nĩ kĩĩ kĩmũteithĩtie gũkirĩrĩria? Aaugire ũũ: “Jehova nĩ akoretwo akĩnũmbũiya. Irio cia kĩĩroho iria atũheaga kũgerera ngombo ĩrĩa njĩhokeku na njũgĩ nĩ indeithĩtie gũkirĩrĩria. Nĩ ũndũ wa irio icio, no njuge ũũ o ta Ayubu: ‘O nginya rĩrĩa ngaakua, gũtirĩ hĩndĩ ngaatiganĩria wĩkindĩru wakwa!’”—Ayub. 27:5.
Tũngĩteithĩrĩria arĩa angĩ atĩa thĩinĩ wa kĩũngano? (Rora kĩbungo gĩa 14)
14. Jehova ahũthagĩra atĩa aarĩ na ariũ a Ithe witũ gũtũteithia rĩrĩa tũrĩ na mathĩna? (1 Athesalonike 4:9)
14 Jehova nĩ arutĩte andũ ake ũrĩa mangĩonania wendo na momanĩrĩrie hĩndĩ ya moritũ. (2 Kor. 1:3, 4; thoma 1 Athesalonike 4:9.) Makĩĩgerekania na Elihu, aarĩ na ariũ a Ithe witũ nĩ makoragwo mehaarĩirie gũtũteithia gũikara tũrĩ ehokeku rĩrĩa twacemania na moritũ. (Atũm. 14:22) Kwa ngerekano, ta wĩcirie ũrĩa kĩũngano kĩa mwarĩ wa Ithe witũ Diane kĩamwĩkĩrire ngoro na gĩkĩmũteithia gũikara arĩ mwĩhokeku thutha wa mũthuri wake kũrũara mũrimũ mũnene. Diane aaugire ũũ: “Hatiarĩ hahũthũ. No mĩeri-inĩ ĩyo mĩritũ, nĩ twaiguaga Jehova atũnyitĩrĩire biũ na moko make marĩ hinya. Kĩũngano gitũ nĩ gĩatũteithirie na njĩra nene. Gũceererũo, kũhũũrĩrũo thimũ, na kũhĩmbĩrio nĩ aarĩ na ariũ a Ithe witũ nĩ gwatũteithirie gũkirĩrĩria. Tondũ ndingĩhota gũtwarithia ngaari, aarĩ na ariũ a Ithe witũ nĩ maatigagĩrĩra atĩ nĩ ndakinya mĩcemanio-inĩ na ndathiĩ ũtungata-inĩ rĩrĩa rĩothe ndahota.” Na githĩ tũtikenaga mũno nĩ gũkorũo na aarĩ na ariũ a Ithe witũ mendanĩte ũguo kĩũngano-inĩ!
KORAGWO NA NGATHO NĨ ŨNDŨ WA WENDO ŨRĨA JEHOVA ATUONAGIA
15. Nĩ kĩĩ kĩratũma tũkorũo na ma atĩ no tũhote gũkirĩrĩria magerio?
15 Ithuothe nĩ tũrĩcemanagia na magerio matiganĩte. No o ta ũrĩa tweruta, tũtirĩhiũranagia namo tũrĩ oiki. O ta mũciari ũrĩ wendo, Jehova atũroraga hingo ciothe. Akoragwo hakuhĩ na ithuĩ, ehaarĩirie gũthikĩrĩria tũkĩmũhoya, na ehaarĩirie gũtũteithia. (Isa. 43:2) Tũrĩ na ma atĩ no tũhote kũhiũrania na magerio tondũ nĩ atũheaga kĩrĩa gĩothe tũrabatara nĩguo tũhote gũkirĩrĩria. Nĩ atũheete kĩheo kĩa mahoya, Bibilia, irio nyingĩ cia kĩĩroho, na aarĩ na ariũ a Ithe witũ, nĩguo atũteithie rĩrĩa tũrĩ na mathĩna.
16. Tũngĩka atĩa nĩguo tũthiĩ na mbere kũrũmbũiyo nĩ Jehova?
16 Nĩ tũcokagia ngatho mũno nĩ ũndũ wa gũkorũo na Ithe witũ wa igũrũ ũrĩa ũtũroraga. “Ngoro citũ nĩ ikenaga nĩ ũndũ wake.” (Thab. 33:21) No tuonie Jehova atĩ nĩ tũcokagia ngatho nĩ ũndũ wa wendo ũrĩa atuonagia, na njĩra ya kũhũthĩra wega ũteithio wothe ũrĩa atũheaga. Ningĩ nĩ tũrabatara kũhingia itemi ritũ nĩguo Jehova athiĩ na mbere gũtũrũmbũiya. Na njĩra ĩngĩ, twathiĩ na mbere kwĩrutanĩria gwathĩkĩra Jehova na gwĩka maũndũ marĩa magĩrĩire maitho-inĩ make, egũtũũra atũroraga tene na tene!—1 Pet. 3:12.
RWĨMBO NA. 30 Ngai Wakwa, Mũrata Wakwa, na Baba