Jehova eerire Aisiraeli atĩ maagĩrĩirũo gũkorũo marĩ andũ atheru. Nĩguo mahote gũkorũo marĩ atheru, aameerire ũũ: “Ndũkanathiĩ ũgĩtheremagia njambanio kũrĩ andũ anyu. Ndũkanaingĩrie muoyo wa mũndũ ũrĩa ũngĩ ũgwati-inĩ. Niĩ nĩ niĩ Jehova.”—Alaw. 19:2, 16.

Hihi kiugo gĩa Kĩhibirania kĩrĩa gĩtaũrĩtwo “ndũkanaingĩrie” rĩandĩko-inĩ rĩrĩ kiugĩte atĩa? Ibuku rĩmwe rĩa Kĩyahudi rĩtaaragĩria Maũndũ ma Alawii riugĩte ũũ: “Gacunjĩ kau ka mũhari ũcio . . . nĩ karitũ gũtaũra tondũ ciugo cia Kĩhibirania iria ihũthĩrĩtwo ho ingĩtaũrũo ĩmwe kwa ĩmwe ciugĩte ‘ndũkarũgame mbere kana hakuhĩ’ na tũtiũĩ ciaragia ũhoro wa kĩĩ.”

Athomi amwe maugaga atĩ kiugo kĩu nĩ gĩkuruhaine na ciugo iria irĩ thĩinĩ wa mũhari wa 15, iria ciugĩte: “No mũhaka mũtuage ciira wanyu na kĩhooto. Ndũkanathutũkanie mũndũ ũrĩa mũthĩni kana ũkorũo na kĩmenyano harĩ mũndũ ũrĩa mũtongu. Wagĩrĩirũo gũtuĩra mũndũ ũrĩa ũngĩ na kĩhooto.” (Alaw. 19:15) Kwoguo, watho ũrĩa ũrĩ mũhari-inĩ wa 16 wa “ndũkanaingĩrie” muoyo wa mũndũ ũrĩa ũngĩ ũgwati-inĩ ũngĩonanirie atĩ andũ a Ngai matiabatiĩ gwĩka ũndũ ũtarĩ wa kĩhooto rĩrĩa marĩ igooti-inĩ, biacara-inĩ, kana famĩlĩ-inĩ, na matiagĩrĩirũo gwĩka maũndũ matarĩ ma kĩhooto nĩguo megune o ene. Ũrĩa kũrĩ nĩ atĩ, tũtiagĩrĩirũo gwĩka maũndũ ta macio, no nĩ kũrĩ ũndũ ũngĩ tũngĩĩruta kuumana na mũhari ũcio wa 16.

Ta wĩcirie ciugo cia kwambĩrĩria cia mũhari ũcio. Ngai eerĩte andũ ake matigathiĩ magĩtheremagia njambanio. Nĩ wega kũririkana atĩ njambanio nĩ njũru gũkĩra mũcene, o na gũtuĩka mũcene o naguo no ũrehe mathĩna. (Thim. 10:19; Koh. 10:12-14; 1 Tim. 5:11-15; Jak. 3:6) Mũndũ ũracambania kaingĩ ahũthagĩra ciugo cia maheeni akĩendaga nĩguo athũkĩrie mũndũ ũngĩ rĩĩtwa. No arute ũira wa maheeni kwerekera mũndũ ũngĩ, o na angĩkorũo ũndũ ũcio no ũingĩrie muoyo wa mũndũ ũrĩa aracambia ũgwati-inĩ. Ũguo nĩguo gwathiire harĩ Nabothu. Kũrĩ arũme maarutire ũira wa maheeni ũmwĩgiĩ, na ũndũ ũcio ũgĩtũma oragwo hatarĩ kĩhooto. (1 Ath. 21:8-13) O ta ũrĩa hagwetetwo thĩinĩ wa gĩcunjĩ gĩa kerĩ kĩa Maũndũ ma Alawii 19:16, mũndũ ũracambania no aingĩrie muoyo wa mũndũ ũrĩa ũngĩ ũgwati-inĩ na njĩra ya gũtũma akue.

Ningĩ mũndũ no acambie mũndũ ũrĩa ũngĩ nĩ gũkorũo nĩ amũthũire. 1 Johana 3:15 yugaga ũũ: “Mũndũ o wothe ũthũire mũrũ wa Ithe nĩ mũũragani, na nĩ mũĩ atĩ gũtirĩ mũũragani ũrĩ na muoyo wa tene na tene thĩinĩ wake.” Makĩria ma ũguo, thutha wa Ngai kuuga ndũkanaingĩrie muoyo wa mũndũ ũrĩa ũngĩ ũgwati-inĩ, oongereire ũũ: “Ndũkanamene mũrũ wa thoguo ngoro-inĩ yaku.”—Alaw. 19:17.

Nĩ ũndũ ũcio, Akristiano no merute ũndũ wa bata kuumana na watho ũrĩa ũrĩ thĩinĩ wa Maũndũ ma Alawii 19:16. Nĩ twagĩrĩirũo kũregana na meciria moru na gũcambia andũ arĩa angĩ. Angĩkorũo no ‘tũingĩrie’ muoyo wa mũndũ ũrĩa ũngĩ ũgwati-inĩ na njĩra ya kũmũcambia nĩ ũndũ wa ũiru kana kwaga kũmwenda, ũndũ ũcio no wonanie atĩ tũrĩ na rũmena kũmwerekera. Akristiano nĩ magĩrĩirũo gwĩthema ũndũ ũcio biũ.—Mat. 12:36, 37.