Nĩ ũthomete na kinyi icunjĩ cia mwaka ũyũ cia Mũrangĩri? Ta rora kana no ũhote gũcokia ciũria ici:

Jakubu 5:11 ĩtũheaga ũũma ũrĩkũ rĩrĩa ĩrauga atĩ Jehova nĩ arĩ “wendo muororo mũno” na nĩ “mũigua tha”?

Nĩ tũũĩ atĩ Jehova nĩ akoragwo ehaarĩirie gũtuohera rĩrĩa twehia tondũ nĩ mũigua tha. Ningĩ Jakubu 5:11 nĩ ĩtũheaga ũũma wa atĩ nĩ akoragwo na wendi wa gũtũteithia. Nĩ twagĩrĩirũo kwĩgerekania nake.—w21.01, kar. 21.

Jehova aaigire mũbango wa ũtongoria nĩkĩ?

Eekire ũguo tondũ nĩ endete andũ ake. Mũbango ũcio nĩ ũtũmaga andũ ake mahote kũrutithania wĩra marĩ na thayũ na mũbango mwega. Andũ a famĩlĩ arĩa marũmagĩrĩra mũbango ũcio wa ũtongoria, nĩ mamenyaga nũũ wagĩrĩirũo gũtua matua na onererie arĩa angĩ ũrĩa mangĩrũmĩrĩra matua macio.—w21.02, kar. 3.

Akristiano magĩrĩirũo kwĩmenyerera nĩkĩ makĩhũthĩra programu cia gũtũmanĩra na kwamũkĩra ndũmĩrĩri?

Mũndũ angĩthuura kũhũthĩra programu icio, nĩ agĩrĩirũo gũthuura na njĩra ya ũũgĩ andũ arĩa araranĩria nao. No ũkorũo ũrĩ ũndũ mũritũ mũno gwĩka ũguo angĩkorũo mũraranĩria mũrĩ ngurubu nene ya andũ. (1 Tim. 5:13) Ningĩ programu icio no itũme ũtheremie ndeto itarĩ njĩkĩre mũkonde kana kũhũthĩra aarĩ na ariũ a Ithe witũ nĩguo ũthondeke mbeca.—w21.03, kar. 31.

Nĩ kĩĩ gĩatũmire Ngai etĩkĩrie Jesu anyamarĩke na akue?

Wa mbere, Jesu gũcuurio mũtĩ-inĩ nĩ kũngĩahotithirie Ayahudi makũũrũo kuumana na kĩrumi kĩrĩa maarĩ nakĩo. (Gal. 3:10, 13) Wa kerĩ nĩ atĩ Jehova aamenyeragia Jesu nĩ ũndũ wa wĩra ũrĩa angĩkehokerũo arĩ Mũthĩnjĩri-Ngai Mũnene. Na wa gatatũ nĩ atĩ Jesu gũtũũria wĩhokeku nginya gĩkuũ nĩ kuoonanirie atĩ andũ no mahote gũtũũria wĩhokeku o na hĩndĩ ĩrĩa maragerera magerio maritũ. (Ayub. 1:9-11)—w21.04, kar. 16-17.

Ũngĩka atĩa angĩkorũo ti ũndũ mũhũthũ gũkora andũ mĩciĩ-inĩ yao ũkĩhunjia?

Geria gũthiĩ ihinda rĩrĩa mangĩkorũo marĩ mĩciĩ. Ningĩ no ũgerie kũhunjia kũndũ ngũrani. Na no ũgerie kũhũthĩra njĩra itiganĩte cia kũhunjia, ta kwandĩka marũa.—w21.05, kar. 15-16.

Mũtũmwo Paulo eendaga kuuga atĩa rĩrĩa ooigire: “Kũgerera watho nĩ ndakuire ũhoro-inĩ wĩgiĩ watho”? (Gal. 2:19)

Watho wa Musa nĩ woonanagia wega atĩ andũ ti akinyanĩru na nĩ watongoririe Aisiraeli harĩ Kristo. (Gal. 3:19, 24) Nĩ wateithirie Paulo gwĩtĩkĩra Kristo. Na njĩra ĩyo, Paulo ‘agĩkua ũhoro-inĩ wĩgiĩ watho,’ na njĩra ya atĩ ndaarĩ rungu rwaguo rĩngĩ.—w21.06, kar. 31.

Jehova atũigĩire kĩonereria atĩa harĩ kuonania ũkirĩrĩria?

Jehova nĩ akirĩrĩirie kuona rĩĩtwa rĩake rĩkĩhakwo gĩko, andũ aingĩ makĩregana na wathani wake, agakirĩrĩria ũremi wa ciana imwe ciake, maheeni ma Shaitani, kuona ndungata ciake endete ikĩnyamarĩka, kwamũranio na arata ake arĩa makuĩte, kuona andũ aganu makĩhinyĩrĩria andũ arĩa angĩ, na kuona ũũmbi wake ũgĩthũkangio.—w21.07, kar. 9-12.

Jusufu aaigire kĩonereria kĩrĩkũ kĩega harĩ kuonania wetereri?

Nĩ aakirĩrĩirie maũndũ mataarĩ ma kĩhooto marĩa eekirũo nĩ ariũ a ithe. Thutha ũcio nĩ aatuĩrĩirũo ũrĩa gũtarĩ na akĩohwo njera mĩaka mĩingĩ thĩinĩ wa Misiri.—w21.08, kar. 12.

Hagai 2:6-9, 20-22 yarathĩte ũhoro wa gũthingithio kũrĩkũ kwa mũhaano?

O na gũtuĩka ndũrĩrĩ itiamũkagĩra ndũmĩrĩri ya Ũthamaki, andũ aingĩ nĩ mokĩte ũhoro-inĩ wa ma. Ica ikuhĩ ndũrĩrĩ nĩ igũthingithio na njĩra ya kwanangwo.—w21.09, kar. 15-19.

Nĩkĩ tũtiagĩrĩirũo gũkua ngoro wĩra-inĩ witũ wa kũhunjia?

Jehova nĩ onaga kĩyo gitũ na agakena. Tũngĩaga gũkua ngoro kana tũnoge, nĩ tũkaaheo muoyo wa tene na tene.—w21.10, kar. 25-26.

Mũrango wa 19 wa Maũndũ ma Alawii ũngĩtũteithia atĩa gwathĩkĩra ũtaaro ũyũ: “Tuĩkai atheru inyuĩ ene mĩthiĩre-inĩ yanyu yothe”? (1 Pet. 1:15)

No kũhoteke ciugo icio irutĩtwo thĩinĩ wa Maũndũ ma Alawii 19:2. Mũrango wa 19 nĩ wonanĩtie njĩra nyingĩ iria tũngĩhũthĩra nacio ũtaaro wa 1 Petero 1:15 ũtũũro-inĩ witũ wa o mũthenya.—w21.12, kar. 3-4.