Jesu nĩ eerutire ngumo njega iria ciamũteithirie kũrutithania wĩra hamwe na andũ na njĩra njega rĩrĩa aarĩ gũkũ thĩ na gũkorũo arĩ kĩonereria kĩega. Tũngĩgunĩka atĩa na kĩonereria kĩa Jesu? Tũngĩthuthuria kĩonereria gĩake na kinyi, no twĩrute maũndũ matatũ mangĩtũteithia kũrutithanagia wĩra wega na andũ arĩa angĩ. Maũndũ macio nĩ marĩtũteithagia gũkorũo na ũrũmwe na kũnyitanagĩra na aarĩ na ariũ a Ithe witũ.

Mũndũ ũrutithanagia wĩra wega na andũ arĩa angĩ nĩ enyihagia na akona arĩa mararutithania wĩra nao marĩ a bata, na ndageragia kwĩyonania. Jesu nĩ eerutire gũkorũo na mwerekera ta ũcio wa wĩnyihia kuuma kũrĩ Ithe. O na gũtuĩka Jehova nowe tu ũngĩtwo Mũũmbi, nĩ oonire arĩ wega andũ arĩa angĩ mamenye wĩra wa bata ũrĩa Mũrũwe aarutire harĩ kũũmba. Ũndũ ũcio nĩ wonekaga wega kũgerera ciugo ici Ngai aaugire: “Nĩ tũũmbe mũndũ na mũhianĩre witũ.” (Kĩam. 1:26) Rĩrĩa Jehova aaugire ciugo icio, no mũhaka Jesu akorũo nĩ aakenirio mũno nĩ wĩnyihia wake.—Thab. 18:35.

Rĩrĩa Jesu aarĩ gũkũ thĩ, o nake nĩ oonanirie wĩnyihia. Angĩagathĩrĩirio nĩ ũndũ wa maũndũ marĩa aahingĩtie, eerekagĩria rũgooco harĩ Ngai. (Mar. 10:17, 18; Joh. 7:15, 16) Jesu nĩ aatũũririe thayũ gatagatĩ gake na arutwo ake, na aamonaga marĩ arata no ti ngombo. (Joh. 15:15) O na nĩ aamathambirie magũrũ, nĩguo amarute bata wa gũkorũo marĩ enyihia. (Joh. 13:5, 12-14)  O na ithuĩ nĩ twagĩrĩirũo kuona arĩa tũrutithanagia wĩra nao marĩ a bata, handũ ha kũiga maũndũ maitũ mbere ya mao. Rĩrĩa ‘twaheana gĩtĩo mũndũ na ũrĩa ũngĩ’ tũtekwenda kwamũkĩra rũgooco, nĩ tũhotaga kũhingia maũndũ maingĩ.—Rom. 12:10.

Mũndũ mwĩnyihia ningĩ nĩ amenyaga atĩ “ataarani aingĩ nĩ matũmaga maũndũ magaacĩre.” (Thim. 15:22) O na tũngĩkorũo na ũmenyeru kana ũhoti ũigana atĩa, nĩ twagĩrĩirũo kũririkanaga atĩ gũtirĩ mũndũ ũĩ maũndũ mothe. O na Jesu nĩ eetĩkagĩra atĩ kũrĩ maũndũ o nake atoĩ. (Mat. 24:36) Ningĩ nĩ aakenaga kũmenya maũndũ marĩa arutwo ake matarĩ akinyanĩru mooĩ kana marĩa meeciragia. (Mat. 16:13-16) Nĩkĩo arĩa maarutithanagia wĩra nĩ maakenagĩra gũkorũo hamwe nake. Rĩrĩa twakorũo tũrĩ enyihia, twaririkana atĩ tũtiũĩ maũndũ mothe, na twathikĩrĩria mawoni ma andũ arĩa angĩ, nĩ tũgĩaga na thayũ hamwe na andũ arĩa angĩ, na rĩrĩa twakorũo na ũrũmwe ‘maũndũ nĩ magaacagĩra.’

Nĩ ũndũ wa bata makĩria harĩ athuri a kĩũngano kwĩgerekania na Jesu ũndũ-inĩ ũcio rĩrĩa mararutithania wĩra hamwe. Nĩ mabatiĩ kũririkana atĩ roho mũtheru no ũteithie mũthuri o wothe kũruta mawoni mangĩteithia kĩama gĩa athuri gũtua itua rĩega. Rĩrĩa marĩ mũcemanio-inĩ, athuri a kĩũngano nĩ matigagĩrĩra atĩ mũndũ o wothe arĩ na wĩyathi wa kũruta mawoni, na marĩ hamwe magatua matua ma kũguna kĩũngano gĩothe.

Mũndũ ũrutithanagia wĩra wega na andũ arĩa angĩ nĩ akoragwo na ũigananĩru. Nĩ athikagĩrĩria na ndanyitagĩrĩra mawoni make. Jesu hatarĩ nganja aarĩ na mĩeke mĩega ya kwĩrorera ũigananĩru wa Ithe. Kwa ngerekano, o na gũtuĩka andũ nĩ maatuĩrĩirũo gĩkuũ, Jehova nĩ aamũtũmire oke amahonokie.—Joh. 3:16.

Jesu ndaanyitagĩrĩra mawoni make rĩrĩa ona kwagĩrĩire. Ririkana ũrĩa aateithirie mũtumia Mũfoenicia, o na gũtuĩka aatũmĩtwo kũrĩ nyũmba ya Isiraeli. (Mat. 15:22-28) Ningĩ nĩ aakoragwo na ũigananĩru harĩ maũndũ marĩa eerĩgagĩrĩra kuuma harĩ arutwo ake. Rĩrĩa Petero mũrata wake wa hakuhĩ aamũkaanire mbere ya andũ, Jesu nĩ eehaarĩirie kũmuohera. Thutha-inĩ, nĩ eehokeire Petero mawĩra mangĩ ma bata. (Luk. 22:32; Joh. 21:17; Atũm. 2:14; 8:14-17; 10:44, 45) Kĩonereria kĩa Jesu gĩtuonagia atĩ nĩ twagĩrĩirũo ‘kũrekaga ũigananĩru witũ ũmenyekage nĩ andũ othe’ na njĩra ya kwaga kũnyitĩrĩra mawoni maitũ.—Afil. 4:5.

 Gũkorũo na ũigananĩru ningĩ no gũtũtindĩke kũrutithania wĩra na andũ a mĩthemba yothe tũrĩ na thayũ. Jesu eekagĩra andũ othe maũndũ na njĩra njega nginya thũ ciake iria ciamũiguagĩra ũiru ikiuga atĩ nĩ “mũrata wa etia mbeca cia igooti na ehia” arĩa maathikagĩrĩria ndũmĩrĩri yake. (Mat. 11:19) O ta Jesu-rĩ, hihi ithuĩ nĩ tũhotaga kũrutithania wĩra na andũ a mĩthemba yothe? Mũrũ wa Ithe witũ wĩtagwo Louis ũrĩa kwa ihinda inene arutithanĩtie wĩra na andũ a mĩthemba mĩingĩ wĩra-inĩ wa mũthiũrũrũko o hamwe na Betheli aaugire ũũ: “Ngeragia kũringithania andũ arĩa ndĩrarutithania wĩra nao na rũthingo rwakĩtwo na mahiga ma ũraihu ũtiganĩte. Ũngĩmenya o ihiga rĩa mũthemba mũna harĩa rĩagĩrĩire kũigwo, no ũhote gwaka rũthingo rũrũngarũ. O na niĩ nĩ ngeragia gwĩka mogarũrũku nĩguo hote kũrutithania wĩra wega na andũ arĩa angĩ tondũ ithuothe tũtirĩ akinyanĩru.” Mwerekera ũcio wa mũrũ wa Ithe witũ nĩ mwega mũno.

Nĩ tarĩ tũngĩonania atĩ tũrĩ na roho wa kũnyitanĩra ciũngano-inĩ citũ? Nĩ tũkoragwo na mweke wa gwĩka ũguo rĩrĩa tũranyitanĩra na gĩkundi gitũ gĩa kũhunjia. No tũrutithanie wĩra na ahunjia mehokeirũo maũndũ thĩinĩ wa famĩlĩ, ngũrani na maitũ, kana a ũkũrũ ũtiganĩte. Hihi no tũgerie gwĩka mogarũrũku tũhunjie kũringana na ũhoti wao kana tũnyitanĩre nao mahunjio-inĩ marĩa mendete?

Mũndũ ũrutithanagia wĩra wega na andũ arĩa angĩ nĩ akoragwo ‘ehaarĩirie kũmagaĩra indo ciake.’ (1 Tim. 6:18) Rĩrĩa Jesu aarutithanagia wĩra na Ithe no mũhaka akorũo nĩ oonire atĩ Jehova ndaahithanagia maũndũ. Rĩrĩa Jehova “aahaarĩirie igũrũ,” Jesu ‘aarĩ kuo’ na nĩ eerutaga maũndũ kuuma kũrĩ Jehova. (Thim. 8:27) Thutha ũcio, Jesu we mwene nĩ aakeneire kũgaĩra arutwo ake ‘maũndũ marĩa aaiguĩte’ kuuma kũrĩ Ithe. (Joh. 15:15) No twĩgerekanie na kĩonereria kĩa Jehova na njĩra ya kwĩraga aarĩ na ariũ a Ithe witũ maũndũ marĩa tũreruta. Mũndũ ũrutithanagia wĩra wega na andũ arĩa angĩ, ndagaga kũmeera maũndũ ma bata marĩa marabatara kũmenya atĩ nĩguo akorũo nowe tu ũratongoria maũndũ. Nĩ akenaga rĩrĩa arera andũ arĩa angĩ maũndũ mega marĩa erutĩte.

Ningĩ no twĩrage andũ arĩa tũrutithanagia nao wĩra maũndũ ma kũmekĩra ngoro. Rĩrĩa mũndũ ona kĩyo gitũ na atũgaathĩrĩria-rĩ, na githĩ tũtiguaga twĩkĩrĩtwo ngoro mũno? Jesu nĩ ooyaga mahinda kwĩra andũ arĩa aarutithanagia wĩra nao maũndũ mega marĩa oonaga harĩ o. (Ringithania Mathayo 25:19-23; Luka 10:17-20.) O na aameerire atĩ nĩ mangĩgeeka “maũndũ manene gũkĩra” make. (Joh. 14:12) Ũtukũ wa mũico atanakua, nĩ aagaathĩrĩirie atũmwo ake ehokeku akĩmeera: “Inyuĩ nĩ inyuĩ mũkoretwo hamwe na niĩ magerio-inĩ makwa.” (Luk. 22:28) No mũhaka ciugo ciake nĩ ciahutirie atũmwo ake ngoro mũno na ikĩmateithia kũhingia ũtungata wao. Tũngĩhũthagĩra mahinda kũgaathĩrĩria arĩa tũrutithanagia wĩra nao, nĩ marĩkoragwo na gĩkeno makĩria na mongerere kĩyo kĩao.

Mũrũ wa Ithe witũ ũmwe wĩtagwo Kayode aaugire ũũ: “Mũndũ ũrutithanagia wĩra wega na andũ arĩa angĩ ndabataraga gũkorũo arĩ mũkinyanĩru, no nĩ atũmaga andũ arĩa angĩ makorũo na gĩkeno na agatũma wĩra ũhũthe.” Hihi wee ũrĩ mũndũ wa mũthemba ũcio? Na githĩ to ũrie na njĩra ya ũũgĩ aarĩ na ariũ a Ithe witũ amwe mũrutithanagia wĩra makwĩre wee ũkoragwo wĩ mũruti wĩra wa mũthemba ũrĩkũ? Angĩkorũo nĩ makenagĩra kũrutithania wĩra nawe o ta ũrĩa arutwo a Jesu maakenagĩra kũrutithania wĩra nake, no ũhote kuuga ciugo o ta ici cia mũtũmwo Paulo: “Tũrĩ arutithania wĩra hamwe na inyuĩ nĩgetha mũgĩe na gĩkeno.”—2 Kor. 1:24.